Babala ng Pagasa… Abril mas magiging mainit

ni Jasmin Joy Evangelista | March 31, 2022

Nagbabala ang state weather bureau na mas magiging mainit ang panahon sa darating na Abril matapos nitong makapagtala ng highest heat index ngayong taon sa Dagupan City, Pangasinan noong nakaraang Linggo.

Ayon sa Philippine Atmospheric, Geophysical and Astronomical Services Administration (Pagasa), umabot ang heat index sa Dagupan City’s sa 53 degrees Celsius noong March 17. Paliwanag ni Pagasa weather specialist Obet Badrina, ang temperatura na mas mataas sa 52 degrees Celsius ay pinangangambahang may dulot na “extreme danger”.

Sinabi rin ng Pagasa na ang heat index sa Dagupan City ay nasa 50 degrees Celsius bandang 2:00 p.m. noong March 30.

“Panahon po ito ngayon ng tag-init kaya atin pong binabalaan na mag-ingat lamang po, sapagkat magiging mainit ang panahon at inaasahan natin ngayong Abril lalo pang tataas ang ating temperatura,” ani Badrina.

“Kaya po uminom ng tubig at iwasang lumabas bandang tanghali hanggang hapon. Magsuot din ng komportableng damit,” dagdag niya.

LPA magdudulot ng pag-ulan sa Kalayaan Islands

ni Jasmin Joy Evangelista | March 30, 2022

Inaasahang magdudulot ng pag-ulan sa Kalayaan Islands ngayong Miyerkules ang low-pressure area o LPA sa kanluran-hilagang kanluran ng Puerto Princesa City ayon sa latest forecast ng Philippine Atmospheric, Geophysical and Astronomical Services Administration (Pagasa).

Gayunman, patuloy namang makararanas ng mainit na panahon ang mga natitirang bahagi ng bansa.

“Sa Kalayaan Islands, asahan pa rin ang mga kalat-kalat na pag-ulan dulot ng LPA,” ani Pagasa weather specialist Samuel Duran.

Ayon pa sa state weather service, namataan ang LPA 235 kilometro kanluran-hilagang kanluran ng Puerto Princesa o 295 kilometro silangan ng Pagasa Island.

Inaasahang lalabas ang LPA sa Philippine Area of Responsibility sa susunod na 24 oras.

“Samantalang ang nalalabing bahagi ng Luzon ay makakaranas pa rin ng maalinsangang panahon na may mga tiyansa ng thunderstorms pagdating ng hapon at gabi,” ani Duran.

Ang mga parte naman ng Visayas at Mindanao ay makararanas ng mainit na panahon, ayon sa Pagasa, bagama’t posible ring makaranas ng panaka-nakang pag-ulan sa tanghali o gabi, dala ng epekto ng easterlies.

Naglabas din ang Pagasa ng temperature sa mga sumusunod na lugar:

• Metro Manila: 25 to 34 degrees Celsius

• Baguio City: 17 to 25 degrees Celsius

• Laoag City: 25 to 33 degrees Celsius

• Tuguegarao: 23 to 34 degrees Celsius

• Legazpi City: 25 to 32 degrees Celsius

• Puerto Princesa City: 25 to 31 degrees Celsius

• Tagaytay: 23 to 30 degrees Celsius

• Kalayaan Islands: 25 to 30 degrees Celsius

• Iloilo City: 26 to 32 degrees Celsius

• Cebu: 24 to 32 degrees Celsius

• Tacloban City: 26 to 32 degrees Celsius

• Cagayan De Oro City: 24 to 30 degrees Celsius

• Zamboanga City: 25 to 33 degrees Celsius

• Davao City: 25 to 34 degrees Celsius

Wala namang itinaas na gale warning sa lahat ng seaboards sa bansa, ayon sa bulletin ng Pagasa as of 4 p.m. nitong Martes.

LPA, namataan sa Davao City — PAGASA

ni Lolet Abania | March 27, 2022

Isang low pressure area (LPA) ang namumuo kasabay ng Intertropical Convergence Zone (ITCZ), kung saan magdudulot ng maulap na papawirin na may kalat-kalat na pagbuhos ng ulan at thunderstorms sa buong Palawan, Eastern at Central Visayas, at Mindanao, batay sa ulat ng PAGASA ngayong Linggo.

Sa kanilang 4PM weather bulletin, ayon sa PAGASA ang LPA ay namataan sa layong 60 km east-northeast ng Davao City.

Gayunman, sinabi ng PAGASA, ang tsansa ng LPA na maging isang tropical depression ay napakababa. Makararanas naman ng bahagyang maulap hanggang sa maulap na papawirin na may isolated rain showers at thunderstorms sa buong Metro Manila at sa natitirang bahagi ng bansa.

Batay din sa weather bureau, posibleng magkaroon ng mga flash floods o landslides sa severe thunderstorms. Mahina hanggang sa katamtamang bugso ng hangin mula timog-silangan patungong hilagang-silangan ang mararanasan sa buong northern Luzon, na magdudulot ng bahagya hanggang sa moderate coastal waters.

Ang natitirang bahagi ng bansa ay makararanas ng mahina hanggang sa katamtamang east-to-northeast wind flow, na magdudulot ng mahina hanggang sa moderate coastal waters. Ayon pa sa PAGASA, ang maximum temperature ay nasa 33.4 °C nitong alas-3:00 ng hapon at ang minimum temperature ay nasa 25.2 °C ng alas-5:15 ng hapon.