Sen. Imee, desididong kasuhan ang mga bata ni PBBM

ni Pablo Hernandez @Prangkahan | May 4, 2025

TALAGANG DESIDIDO SI SEN. IMEE NA MAKASUHAN ANG MGA TAUHAN NI PBBM -- Isinumite na ni Sen. Imee Marcos sa Office of the Ombudsman ang mga ebidensyang nilalaman ng Senate Committee Report kaugnay sa kasong isasampa laban kina Justice Sec. Boying Remulla, Dept. of the Interior and Local Gov’t. (DILG) Sec. Jonvic Remulla, Special Envoy on Transnational Ambassador Markus Lacanilao, Philippine National Police (PNP) Chief Gen. Rommel Marbil at PNP-Criminal Investigation and Detection Group (PNP-CIDG) Director, Maj. Gen. Nicolas Torre tungkol sa pag-aresto at pagpapakulong kay ex-P-Duterte sa International Criminal Court (ICC) jail sa The Netherlands.

Talagang desidido si Sen. Imee na makasuhan ang mga tauhan ng kanyang kapatid na si Pres. Bongbong Marcos (PBBM), boom!

XXX

HINDI RAMDAM NG MGA MANGGAGAWA ANG MAUNLAD NA EKONOMIYA DAW NG ‘PINAS -- Dahil madalas ibida ng Marcos administration na maunlad na ang ekonomiya ng bansa, sinabi ni Sen. Loren Legarda na dapat iparamdam ng gobyerno sa mga manggagawa ang sinasabing economic growth ng Pilipinas.

Kumbaga parang sinabi na rin ni Sen. Loren na ang ibinibida ng Malacanang na maunlad na ekonomiya ng ‘Pinas ay hindi ramdam ng mga manggagawa, period!

XXX

SHOW-CAUSE ORDER NG COMELEC SA MGA LUMALABAG SA ELECTION CODE, ‘NINGAS-KUGON’ LANG? -- Sandamakmak na kandidato na ang pinadalhan ng Comelec ng show cause order kaugnay sa iba’t ibang uri ng mga paglabag sa halalan, pero halos walong araw na lang eleksyon na ay wala pa ring napapadiskuwalipika ang komisyon.

Kapag walang napadiskuwalipika ang Comelec, ibig sabihin niyan, “ningas-kugon” lang ang show cause order ng komisyon sa mga kandidatong lumabag sa election code, boom!

XXX

GOV. GWEN GARCIA, MALAPIT NANG BITBITIN PALABAS NG KAPITOLYO -- Sabi ni Presidential Communication Office (PCO) Usec. Claire Castro ay hindi raw makikialam si Pres. Bongbong Marcos (PBBM) sa ipinataw na 6 months preventive suspension ng Ombudsman kay Cebu Gov. Gwen Garcia.

Dahil sa sinabing iyan ng Malacanang, puwede na palang utusan ng Ombudsman ang Dept. of the Interior and Local Gov’t.  para bitbitin palabas ng kapitolyo ang gobernadora, abangan!

Gov. Garcia, ‘nakasandal sa pader’ kaya utos ng Ombudsman hindi susundin

ni Pablo Hernandez @Prangkahan | May 3, 2025

KAYA MARAMING NAGKATRABAHO DAHIL PANAHON NG ELEKSYON, AT HINDI DAHIL MAHUSAY NA LIDER SI PBBM -- Nitong nakalipas  na Labor Day ay ibinida ni Pres. Bongbong Marcos (PBBM) na maraming Pinoy ang nagkatrabaho mula last quarter ng year 2024 hanggang sa kasalukuyan.

Sa totoo lang, hindi dapat ibinibida iyan ni PBBM kasi sa totoo lang, kaya lang naman maraming Pinoy ang nagkaroon ng hanapbuhay ay dahil sa panahon ng eleksyon, ang lahat ng kumakandidato ay kumukuha ng kanilang political coordinator leaders sa bawat barangay, sa bawat sitio, may mga “angels” na taga-bigay ng kanilang mga flyers, workers hanggang watchers.

Iyang panahon ng halalan ang totoong dahilan kaya maraming Pinoy ang nagkaroon ng trabaho, at hindi ang husay sa pamamahala ni PBBM, period!

XXX

QUADCOMM MEMBERS NA MGA REELEKSYUNISTA BAKA MATALO, NANGANGAMPANYA SI VP SARA NA HUWAG SILANG IBOTO -- Nag-iikot si Vice Pres. Sara Duterte-Carpio sa mga campaign sortie ng kanyang mga kaalyado na kumakandidato sa local positions at nananawagan na huwag iboto ang mga reeleksyunistang kongresista na miyembro ng Quad Committee ng Kamara.

Dahil sa ginagawang iyan ni VP Sara at sa rami ng kanyang supporters ay mas malamang na talo sa halalan ang abutin ng mga QuadComm member, boom!

XXX

UTOS NA SUSPENSYON SA KANYA ‘DI SUSUNDIN NI CEBU GOV. GWEN GARCIA, DAHIL ‘NAKASANDAL SA PADER’ -- Kahit sinuspinde na ng Ombudsman ng anim na buwan si Cebu Gov. Gwen Garcia kaugnay sa pagbibigay ng special permit sa isang construction company nang walang kaukulang dokumento, ay sinabi ng gobernadora na hindi raw niya susundin ang utos nito (Ombudsman), never daw siyang bababa sa puwesto.

Sa totoo lang, kaya malakas ang loob ni Gov. Gwen na magsabing hindi siya bababa sa puwesto ay dahil “nakasandal siya sa pader,” kaalyado niya kasi si PBBM, period!

XXX

KATITING NA NAMAN ANG OIL PRICE ROLLBACK -- Inanunsyo ng Dept. of Energy (DOE) na next week daw ay may oil price rollback, ang ibabawas daw sa presyo ng kada litro ng gasolina ay P0.25; sa diesel ay P0.30 at sa kerosene ay P0.50.

Hay naku, dalawang sunod na nagkaroon ng bigtime oil price hike, tapos pagdating sa oil price rollback, katiting lang ang ibinabawas, buset!

Gobyerno, kinapos sa budget, wala namang pinagagawang proyekto, grabe!

ni Pablo Hernandez @Prangkahan | May 2, 2025

MASASABING KALOKOHAN ANG MATAAS NA RATING NI PBBM DAHIL ANG DAMI PA RING NAGHIHIRAP SA KANYANG ADMINISTRASYON -- Sa latest survey na inilabas ng OCTA Research firm ay nakakuha raw si Pres. Bongbong Marcos (PBBM) ng 60% majority trust at 59% approval ratings.

Sa totoo lang, parang hindi kapani-paniwala ang survey na ito kasi sa rami ng naghihirap at taas ng presyo ng mga bilihin at bayarin ay imposibleng makakuha ng ganyang kalaking grado o rating ang Presidente, period!

XXX

GOV. GWEN GARCIA, DAMING KABALBALANG GINAGAWA KAYA NASUSUSPINDE PERO KAPAG KUMANDIDATO IBINOBOTO PA RIN NG MGA TAGA-CEBU -- Pinatawan ng Ombudsman si Cebu Gov. Gwen Garcia ng anim na buwang suspensyon kaugnay sa pagbibigay ng special permit sa isang construction company ng walang kaukulang dokumento.

Itong si Gov. Garcia ay madalas masuspinde sa ginagawang mga kabalbalan sa panunungkulan, at nakakasuhan din ng graft, pero ang nakakalungkot, lagi siyang iniluluklok sa puwesto ng mga taga-Cebu kapag kumakandidato siya sa halalan, tsk!

XXX

BUDGET NG GOBYERNO KINAPOS NA KAHIT WALA NAMANG PINAGAGAWANG PROYEKTO -- Kinapos ng higit P479 billion ang budget ng pamahalaan sa unang quarter ng taon.

Grabe naman iyan, wala namang nakikita ang mamamayan na mga proyektong ipinagagawa ng Marcos administration, pero sa unang quarter pa lang ng year 2025 kinapos na budget ng gobyerno, buset!

XXX

KAPAG NAGLABAS NG WARRANT OF ARREST, TIYAK MAHUHULI NA SI ROQUE SA IBANG BANSA -- Isinampa na ng Dept. of Justice (DOJ) ang kasong no bail na human trafficking laban kay former presidential spokesman Harry Roque.

Sa oras na maglabas ng warrant of arrest, tapos na ang happy days ni Roque sa pagtatago sa ibang bansa, tiyak na sa pamamagitan ng Interpol mahuhuli na siya, abangan!