Marcos admin, imbes unahin ang OFWs na naiipit sa Israel-Iran war, ni-rescue muna ang 21 gov’t officials

ni Pablo Hernandez @Prangkahan | June 20, 2025

DAPAT MAS INUNANG ILIGTAS ANG OFWs SA ISRAEL NA GUSTO NANG UMUWI NG ‘PINAS KAYSA SA GOV’T. OFFICIALS -- Ligtas na mula sa sigalot ng Israel at Iran ang 21 opisyal ng Philippine gov’t. na kinabibilangan ng mga pulitiko at Dept. of Agriculture (DA) officials matapos na i-rescue sila ng Dept. of Foreign Affairs (DFA) sa Israel at dalhin sa Jordan.

Ibang klase rin itong Marcos administration dahil mas inuna pang iligtas ang mga opisyal ng gobyerno kaysa mga overseas Filipino workers (OFWs) sa Israel na matagal nang nagmamakaawa na iligtas sila sa digmaang Israel vs. Iran, tsk!

XXX

SABLAY ANG MGA PULITIKONG ABOGADONG SENATE PRESIDENT AT SENADOR -- Lahat ng mga retired chief justice, mga retired associate justice, mga constitutionalists, law experts, law professors ay iisa ang sinasabi, walang remand o return sa bahagi ng impeachment na nakalagay sa Konstitusyon.

So malinaw, sablay ang pag-apruba ng pulitikong abogadong si Senate President Chiz Escudero sa isinulong ng kapwa niya pulitikong abogado na si Sen. Alan Cayetano na pag-remand o pag-return sa Kamara ng articles of impeachment laban kay Vice Pres. Sara Duterte-Carpio, boom!

XXX

NOON SABI NI PCO USEC. CASTRO HINDI RAW MAKIKIALAM ANG MALACAÑANG SA IMPEACHMENT KAY VP SARA, PERO NGAYON NAKIKIALAM NA -- Sinabi ni Presidential Communication Officer (PCO) Usec. Claire Castro na dapat pakinggan ng Senado ang panawagan ng business community na umpisahan na at bilisan ang impeachment trial kay VP Sara.

Aba, teka! Ang linaw naman ng sinabi noon ni Usec. Castro na hindi makikialam ang Malacañang sa isyung impeachment kay VP Sara, pero ngayon nakikialam na, pinabibilisan ang impeachment trial sa bise presidente, period!

XXX

BUKOD SA PAGKANSELA SA REGISTRATION NG DUTERTE YOUTH PARTYLIST, DAPAT KASUHAN DIN ANG MAGHIPAG NA RONALD CARDEMA AT DRIXIE MAE SUAREZ -- Kinansela na ng Comelec ang registration ng Duterte Youth Partylist na ibig sabihin out na ito sa pagiging partylist, na ‘ika nga, tuluyan nang walang ipoproklama na representante ng partylist na ito sa Kamara.

Ayos ‘yan, at sana hindi lang sa pagbasura sa registration ng Duterte Youth Partylist ang maging aksyon ng Comelec, na ang nais nating ipunto rito ay dapat sampahan din ng criminal case na perjury at falsification of public documents ang maghipag na Ronald Cardema, chairperson ng Duterte Youth at 1st nominee Drixie Mae Suarez dahil sa pinirmahan ni Ronald sa Certification of Nomination and Acceptance (CONA) ni Drixie Mae na "Cardema" ang apelyido nito gayong Suarez pala ang tunay na apelyido, boom!

Ordinansa kontra street gangs, dapat gawing nationwide

ni Pablo Hernandez @Prangkahan | June 19, 2025

‘MAPANIIL NA KAPANGYARIHAN’ ANG IPINAKIKITA NI SP ESCUDERO SA PUBLIKO -- Dahil sa patuloy na pambabatikos ng publiko kay Senate President Chiz Escudero dahil sa delaying tactics sa impeachment proceedings kay VP Sara at pag-remand o pagbalik sa Kamara ng articles of impeachments na wala naman daw nakasaad sa Konstitusyon na “remand” ay sinabi ng Senate President na “no limits” daw ang kapangyarihan ng impeachment court, na kung anuman daw ang gustong gawin nito ay walang sinuman umano na puwedeng pumigil at bumatikos dito.

Dahil sa statement na iyan ni Escudero ay sinopla siya ni former Chief Justice Reynato Puno, na ayon sa dating punong mahistrado ay walang puwang sa demokrasyang bansa ang “arbitrary power” o ‘mapaniil na kapangyarihan’ ang ipinakikita niya (Escudero) sa publiko, boom!

XXX

KAYA NAIS NI HARRY ROQUE NA PALITAN NA NI VP SARA SI PBBM NA LIDER NG BANSA PARA MAKAUWI NA, MAWALA ANG MGA KASO AT MAGKAROON ULI NG POWER SA GOBYERNO -- Muling nanawagan si former presidential spokesman Harry Roque kay Pres. Bongbong Marcos (PBBM) na magpa-rehab na raw ito at isalin na kay Vice Pres. Sara Duterte-Carpio ang pamamahala sa bansa dahil palala na raw ang giyera sa Middle East sa pagitan ng Israel at Iran.

Sa totoo lang, kaya lang naman madalas ang panawagan ni Roque na bumaba na sa puwesto si PBBM ay dahil kapag si VP Sara na ang lider ng ‘Pinas ay makakauwi na siya sa bansa, mababasura na ang mga kaso sa kanya at magkakaroon uli siya ng power sa pamahalaan, period!

XXX

FAKE NEWS PALA NA HINDI HAPPY SI PBBM SA PERFORMANCE NI PCO SEC. JAY RUIZ -- Matapos i-bypass ng Commission on Appointments (CA) ang pagtalaga sa kanya ni PBBM bilang kalihim ng Presidential Communication Office (PCO), ay muling itinalaga ng Presidente si Sec. Jay Ruiz bilang head ng PCO.

Kung ganu’n, fake news pala ang kumalat na isyu sa social media na hindi happy si PBBM sa pagiging head ng PCO dahil kung totoong hindi nasisiyahan ang Pangulo sa serbisyo ni Ruiz ay hindi na niya sana ito iri-reappoint sa PCO, period!

XXX

ORDINANSA NG VALENZUELA VS STREET GANGS DAPAT GAWING NATIONWIDE NG SENADO AT KAMARA -- Pasado na ang ordinansang pag-ban sa paglikha at pag-operate ng street gang sa Valenzuela City, na nagdedeklara ng “persona non grata” o bawal na ang pamamayagpag ng 13 street gangs sa lungsod, kung saan ang mga niri-recruit para sumapi sa mga grupong ito ay mga menor-de-edad.

Nakasaad sa ordinansa na kakasuhan ang mga nagri-recruit pati ang kanilang mga parents ay sasampahan din ng mga kaukulang kaso.

Puwede naman pala ang ganyang ordinansa, pero sana ay may senador o kongresista na sundan ang ginawang ito ng Valenzuela City LGU (local government unit) para maging nationwide na ang pagbabawal sa mga street gangs lalo’t may mga madalas mag-viral sa social media na mga menor-de-edad na kasapi ng mga gangs ang nagrarambulan at nagpapatayan sa kalsada, tsk!

Mga hepe ng pulisya, kung ayaw matulad sa 8 sinibak, seryosohin ang 5-minute response sa krimen

ni Pablo Hernandez @Prangkahan | June 18, 2025

PBBM ‘INUNGGOY’ NG MGA TAONG BINIGYAN NIYA NG PUWESTO SA PAMAHALAAN -- Inamin ni Pres. Bongbong Marcos (PBBM) na may mga tinanggap siyang false accomplishment reports ng mga government project mula sa iba’t ibang sangay ng pamahalaan.

Kumbaga, parang inamin na rin ni PBBM na ‘inunggoy’ lang siya ng mga miyembro ng kanyang gabinete na kanyang ini-appoint sa iba’t ibang departamento ng pamahalaan, tsk!

XXX

SINO SA MGA KAIBIGAN NI PBBM ANG SISIBAKIN NIYA SA KANYANG GABINETE? -- Tiniyak ni PBBM na sisibakin niya sa puwesto ang mga kaibigan niyang binigyan niya ng posisyon sa gobyerno pero hindi nagawa ang trabaho sa kanilang departamento.

Aba’y dapat lang. Kaya ang tanong: Sino kaya sa mga kaibigan ni PBBM na miyembro ng kanyang gabinete ang sisibakin niya sa puwesto? Abangan!

XXX

DAPAT PAKINGGAN NI PBBM ANG PAYO SA KANYA NI ATTY. MACALINTAL NA I-VETO ANG POSTPONEMENT NG BSKE 2025 -- Nanawagan si Atty. Romy Macalintal kay PBBM na i-veto nito ang ipinasang panukalang batas ng Senado at Kamara na nagpu-postpone sa nakatakdang halalan sa Dec. 1, 2025 at pagpapalawig sa termino ng mga kasalukuyang nakaupong mga barangay official sa buong bansa.

Dapat pakinggan ni PBBM ang panawagang ito sa kanya ni Atty. Macalintal para hindi siya mapahiya uli kasi sa tema ng pananalita ng abogado ay kukuwestiyunin niya uli ito sa Supreme Court (SC).

Kung babalikan ang postponement ng Barangay and Sangguniang Kabataan Elections (BSKE) noong Dec. 5, 2022 na inaprub noon ni PBBM ay napahiya rito ang

Presidente dahil nang kuwestiyunin ito ni Macalintal sa SC, ang abogado ang kinatigan ng Korte Suprema at sa inilabas na desisyon ng 15 mahistrado, sablay daw o labag sa Konstitusyon ang nilagdaan ng Pangulo na nagpapaliban sa halalan, at bagama’t na-delay, natuloy ang BSKE noong unang Lunes ng October 2023, period!

XXX

SERYOSO SI GEN. TORRE SA 5 MINUTES RESPONSE KAYA ANG MGA HINDI AGAD NAKAPAGRESPONDE PINAGSISIBAK SA PUWESTO -- Walong hepe ng pulisya sa Metro Manila ang sinibak ni PNP Chief Gen. Nicolas Torre III dahil sa pagkabigong makapagresponde ang kanilang mga tauhan sa itinakda niyang 5 minutes response sa mga krimen sa kanilang mga nasasakupan sa Caloocan City, Navotas City, Paranaque City, Makati City, Valenzuela City, Marikina City, Mandaluyong City at San Juan City.

Ang sibakang ito sa mga hepe ang patunay na seryoso si Gen. Torre na ipatupad ang 5 minutes response ng kapulisan sa mga krimeng nagaganap sa kanilang mga nasasakupan, period!