Depositors ng bangko, sa buwisit sa 20% tax sa tubo ng savings, baka i-withdraw ang pera at ialkansya na lang

ni Pablo Hernandez @Prangkahan | July 19, 2025

DAPAT IHANDA NA NI SEN. DELA ROSA ANG SARILI, BAKA NGA MAGLABAS NA NG WARRANT OF ARREST SA KANYA ANG ICC – “Go ahead!”, iyan ang tugon ni Sen. Ronald Dela Rosa bilang reaksyon sa sinabi ni Executive Sec. Lucas Bersamin na kapag may warrant of arrest na kaugnay sa kasong crimes against humanity ay agad daw ipapahuli ng Marcos administration ang senador at itu-turnover ito sa Interpol para ikulong sa International Criminal Court (ICC) jail sa The Netherlands.

Dapat na talagang ihanda ni Sen. Dela Rosa ang kanyang sarili sa mga susunod na araw dahil hindi naman magpapalabas ng statement si ES Bersamin tungkol sa pagpapaaresto sa senador kung walang natanggap na impormasyon ang Malacanang na malapit nang maglabas ng warrant of arrest laban sa kanya (Dela Rosa) ang ICC boom!

XXX

TAKLESA AT LAGING NAKIKIPAGBARDAGULAN SI CLAIRE CASTRO SA MGA KRITIKO NI PBBM KAYA MALAMANG HINDI SIYA MASIBAK SA PCO -- Normal lang ang ginawa ni newly appointed Presidential Communications Office (PCO) Sec. Dave Gomez na pinagku-courtesy resignation ang mga dinatnan niyang mga opisyal sa PCO na in-appoint ni former PCO Sec. Jay Ruiz dahil may bitbit siyang (Gomez) mga sarili niyang tao.

At bagama’t kabilang si PCO Usec. Claire Castro sa nagsumite ng courtesy resignation, maaring hindi siya makabilang sa sisibakin ni Sec. Gomez, na ‘ika nga mananatili siyang (Castro) spokesperson ng Malacanang.

Sa totoo lang kasi, kailangan ng Palasyo ang tulad ni Castro na taklesa at laging nakikipagbardagulan sa mga kritiko ni Pres. Bongbong Marcos (PBBM), period!

XXX

MALAMANG MAUSO ULI ANG ALKANSYA DAHIL NABUWISIT ANG MGA DEPOSITOR SA POLISIYA NG MARCOS ADMIN NA PATAWAN NG 20% TAX ANG MGA TUBO O INTERES SA SAVINGS SA BANGKO -- Baka mauso na naman ang alkansya.

Nasabi natin ito kasi mantakin n’yo, ang interest sa savings sa bangko ng mamamayan ay pinakakaltasan o pinapapatawan ni Finance Sec. Ralph Recto ng 20% tax.

Bagama’t hindi naman mismo ang savings ang papatawan ng 20% tax kundi ang interest o tubo lang, sa social media ay mababasa ang comments ng netizens na umuusok sa galit sa polisiyang ito ng Marcos admin.

Ang nais nating ipunto rito ay baka sa buwisit, i-withdraw ng mga mamamayan ang mga savings nila sa bangko at ilagay na lang ito sa alkansya, boom!

XXX

MAGAGALIT TALAGA ANG DEPOSITORS NG BANGKO, KAYA SILA NAG-IMPOK PARA SAVINGS NILA KUMITA O TUMUBO TAPOS ANG INTEREST, PINAG-IINTERESAN NG MARCOS ADMIN – Bagama’t nilinaw ni Sec. Recto na tanging interest lang sa savings ng mga Pinoy depositor ang papatawan ng 20% tax at hindi mismo ang savings ang kakaltasan, ay galit pa rin siyempre ang mamamayang may savings sa mga bangko.

Kasi naman, kaya nga sila (depositors) nag-impok sa bangko para tumubo o magka-interest ang kanilang mga savings, tapos ang ginawa ng Marcos admin, pinag-interesan ang tubo, pinatawan ng 20% tax, mga buset!

Isko, panay pabida sa mga sagabal sa bangketa, sa ‘paggiba’ ng sindikato ng lotteng, kailan kaya?

ni Pablo Hernandez @Prangkahan | July 18, 2025

MAGKASALUNGAT NA SURVEY, SA SWS, MAJORITY PINOY GUSTO NG IMPEACHMENT, SA PULSE ASIA, MAJORITY PINOY AYAW SA IMPEACHMENT -- Sa latest survey ng Social Weather Station (SWS) ay 66% daw ng mga Pinoy ay nais na ituloy ang impeachment trial kay Vice Pres. Sara Duterte-Carpio, pero sa survey naman ng Pulse Asia noong May 27, 2025 ay 50% daw ng mga Pinoy ang ayaw ma-impeach ang bise presidente.

Ganyan naman lagi ang mga survey sa ‘Pinas, laging magkasalungat, at dahil magkaiba ang resulta ng kanilang survey, isa lang ang iisipin ng publiko na itong SWS ay pro-Marcos at itong Pulse Asia ay pro-Duterte, boom!

XXX

SANIB-PUWERSA NA ANG MGA AKTIBISTA AT MGA LOYALISTA LABAN SA PAMILYA DUTERTE AT MGA KAALYADO NI FPRRD -- Matapos sabihin ni activist lawyer Kristina Conti na posibleng ipaaresto na rin ng International Criminal Court (ICC) si Sen. Ronald Dela Rosa  para makasama na ito ni former Pres. Rodrigo Roa Duterte (FPRRD) sa ICC jail sa The Netherlands, ay inanunsyo kamakalawa ni Executive Sec. Lucas Bersamin na handa raw ang Marcos administration na dakpin ang senador kapag naglabas na ng warrant of arrest laban dito ang ICC.

Patunay iyan na sanib-puwersa na ang mga aktibista at loyalista laban sa pamilya Duterte at sa mga kaalyado ni FPRRD, period!

XXX

MALAMANG 'NGARAG' NA SA TAKOT ANG POLITICIANS NA SANGKOT SA MISSING SABUNGEROS  DAHIL ‘NO BAIL’ NA KIDNAPPING AT MULTIPLE MURDER ANG IKAKASO  SA KANILA -- Sinabi ni Dept. of the Interior and Local Gov’t. (DILG) Sec. Jonvic Remulla na wala raw silang sasantuhin sa kaso ng missing sabungeros, na aniya kahit daw governor, mayor o senador, kapag napatunayan nilang sangkot sa karumal-dumal na krimeng ito ay kanilang isasama sa kaso.

Sigurado, “ngarag” na sa takot ang mga politician na dawit sa pagpapapatay sa missing sabungeros dahil kapag napatunayang sangkot sila sa krimen, mabubulok na sila sa selda dahil ang kasong isasampa sa kanila na kidnapping at multiple murder ay “no bail,” boom!

XXX

PANAY PABIDA NI YORME ISKO SA PAGGIBA SA MGA SAGABAL SA BANGKETA, KAILAN NAMAN KAYA MAGPAPABIDA SA ‘PAGGIBA’ SA SINDIKATO NG LOTTENG SA MAYNILA? -- Panay ang pabida ni Manila Mayor Isko Moreno sa pagpapaalis at pagpapagiba sa mga sagabal sa mga bangketa sa lungsod, at pati nga barangay hall na nasa bangketa ay kanyang pinatanggal para madaanan ito (bangketa) ng mamamayan.

Eh ang tanong: Kailan naman kaya “gigibain” ni Yorme Isko ang untouchable na sindikato ng lotteng sa Maynila nina "Boy Abang," "Lorna," "Paknoy," "Dani Bukol," "Anna," "Prades," "Tonton," "Lando," "Tata Ber" at "Simbulan," abangan!

Mga ‘buwaya’, happy sa nakakalulang P6.793T budget sa 2026

ni Pablo Hernandez @Prangkahan | July 17, 2025

WALA NG OPOSISYON SA KAMARA DAHIL ANG MINORITY LEADER, ‘TUTA’ NG SPEAKER -- Dati, ang kalakaran sa Kamara ay iyong kongresistang kumandidato sa speakership na natalo ang siyang awtomatik na magiging minority leader, at ang minority leader na ito ang siyang mamumuno sa pagkontra at pambabatikos sa mga maling polisiya ng speaker ng mababang kapulungan ng Kongreso.

Bigyang halimbawa natin noong 10th Congress, naglaban sa speakership ang noo’y Pangasinan Rep. Jose De Venecia at dating San Juan Rep. Ronaldo Zamora, nagwagi si De Venecia kaya siya ang naging speaker, at ang natalo na si Zamora ay awtomatik na minority leader, at umiral ang ganyang sistema hanggang 15th Congress, nagwagi bilang speaker ang noo’y Quezon City Rep. Sonny Belmonte at ang tinalo niya, na noo’y Albay Rep. Edcel Lagman, ang siyang naging minority leader.

Nabago ang sistema pagpasok ng 16th Congress hanggang 19th Congress, na kahit hindi kumandidato sa pagka-speaker, nagiging minority leader, kaya ang resulta wala nang tumatayong oposisyon sa Kamara, dahil ang speaker na ang nagdidikta kung sino dapat umaktong minority leader.

Onli in da ‘Pinas lang iyan, na ang minority leader ng House of Representatives, “tuta” ng speaker, boom!

XXX

P6.793T PROPOSED BUDGET SA 2026 APRUB KAY PBBM, KAYA ANG MGA ‘BUWAYA’ HAPPY NA NAMAN! -- Inaprub ni Pres. Bongbong Marcos (PBBM) ang P6.793 trillion proposed national budget para sa year 2026.

Sa laki ng national budget na iyan, happy na naman ang mga “buwaya” sa pamahalaan, buset!

XXX

MALAMANG PUTAKTIHIN NG MGA KASO SA OMBUDSMAN ANG MGA SENADOR NA PABOR SA DISMISSAL WITHOUT TRIAL SA MGA KASO NI VP SARA -- Sinabi ni Fr. Ranhilio Aquino, dean ng Graduate School of Law ng San Beda na puwede raw kasuhan ng dereliction of duty o neglect of duty at anti-graft ang mga majority senator-judges na boboto para i-dismiss ang mga kasong impeachment kay Vice Pres. Sara Duterte-Carpio nang walang nagaganap na impeachment trial.

Naku kapag nagkataon, malamang putaktihin ng kaso sa Ombudsman ang mga senador na pabor sa ‘dismissal without trial,’ abangan!

XXX

WALA PANG NAIPAPAHULING MGA SMUGGLER SI CUSTOMS COMM. NEPOMUCENO KAYA MALAMANG WALANG MAIBIBIDA SI PBBM SA KANYANG SONA SA PAGLABAN NG ADMINISTRASYON SA SMUGGLING -- Tila walang maibibida si PBBM sa kanyang nalalapit na State of the Nation Address (SONA) patungkol sa paglaban ng kanyang administrasyon sa mga smuggler.

Hanggang ngayon kasi ay wala pang naibibida si Customs Comm. Ariel Nepomuceno na may nahuli na silang mga smuggler sa Adwana, boom!