Nahuhubaran na ng maskara ang mga nagpapanggap na lingkod-bayan, mga kurakot pala!

ni Pablo Hernandez @Prangkahan | September 10, 2025

WALANG ‘K’ MAGING STATE WITNESS ANG MAG-ASAWANG DISCAYA DAHIL SILA ANG MOST GUILTY SA FLOOD CONTROL SCAM -- Walang “K” o karapatan ang mag-asawang Curlee at Sarah Discaya na maging state witness ng pamahalaan laban sa mga sinasabi nilang mga kongresista at Dept. of Public Works and Highways (DPWH) officials na tumatanggap umano sa kanila ng kickback mula sa mga flood control project na ipinagkakaloob sa kanila ng DPWH.s

Sa ipinakita nilang yaman, karangyaan sa buhay, sangkatutak na luxury cars, mala-palasyong tahanan at mga mamahaling kagamitan ay hindi least guilty ang mag-asawang Discaya, kundi sila ang most guilty sa ‘pang-i-scam’ sa kaban ng bayan, boom!

XXX

ANG SINUNGALING NA KAPATID NG MAGNANAKAW, HINDI DAPAT GAWING STATE WITNESS -- Ang mag-asawang Discaya ay nuknukan ng sinungaling kasi ang sinabi nila na kesyo dahil daw sa laki ng porsyentong kickback na hinihingi sa kanila ng mga kongresista at DPWH officials ay halos 2% hanggang 3% na lang daw ang kinikita nila sa kanilang mga proyekto, at kung minsan daw ay nalulugi pa sila, na ang paawa effect nilang ito sa Senate Blue Ribbon Committee ay taliwas sa lifestyle at karangyaan sa pamumuhay na ipinakita ng pamilya Discaya sa publiko.

Sabi nga nina Sen. Kiko Pangilinan, ang sinungaling ay kapatid ng magnanakaw at si Pasig City Mayor Vico Sotto naman ay ang sinungaling asawa ng magnanakaw, at dahil liar ang mag-asawang Discaya at sangkot pa sila sa pang-i-scam sa kaban ng bayan, hindi talaga sila puwedeng maging state witness, period! 

XXX

NAHUHUBARAN NA NG MASKARA ANG MGA NAGPAPANGGAP NA MGA LINGKOD-BAYAN DAHIL MGA KURAKOT PALA SILA -- Matapos isangkot ng mag-asawang Discaya sa Senate Blue Ribbon Committee sa kickback sa mga proyekto ang ilang kongresista, ay isinangkot naman ni DPWH-Bulacan Asst. District 1 Engr. Brice Hernandez sa House Infra Committee sa DPWH projects scam sina Sen. Jinggoy Estrada at Sen. Joel Villanueva.

Mainam din ang ginawang pagbubulgar ni Pres. Bongbong Marcos (PBBM) sa flood control projects scam, dahil diyan ay nahuhubaran ng maskara ang mga nagpapanggap na mga lingkod-bayan, iyon pala mga kurakot, tsk!

XXX

INAKALA NG MGA DDS SI SPEAKER ROMUALDEZ ANG MAPAPATALSIK, ANG MASAKLAP ANG NAPATALSIK SA PAGKA-SENATE PRESIDENTE KAPWA NILA DDS NA SI SEN. ESCUDERO -- Nang isangkot ng mag-asawang Discaya sina Speaker Martin Romualdez at former House Appropriations Committee Chairman, Ako Bikol Partylist Rep. Elizaldy Co ay nagbunyi ang mga Duterte Diehard Supporters (DDS), nagsipag-post sila sa social media na patalsikin na si Speaker Romualdez.

Ang masaklap, hindi nangyari ang gusto ng mga DDS na mapatalsik sa puwesto si Speaker Romualdez, at sa halip ang kapwa nila DDS na si Sen. Chiz Escudero ang napatalsik bilang Senate president, pinalitan siya ni SP Tito Sotto, boom!

Marcos admin, babagal-bagal sa pagsasampa ng kasong plunder sa mag-asawang Discaya

ni Pablo Hernandez @Prangkahan | September 9, 2025

ASAHAN NA NG MAG-ASAWANG DISCAYA NA SANGKATUTAK NA PLUNDER CASE ANG KAKAHARAPIN DAHIL SANDAMAKMAK NA PERA NG BAYAN ANG ‘IN-SCAM’ NILA -- Noong August 31, 2025 ay sinabi ng kontraktor na si Curlee Discaya na hindi raw sila tatakas palabas ng Pilipinas dahil wala raw silang ghost projects, at sa pagharap naman ng kanyang misis na kontratista rin sa imbestigasyon ng Senate Blue Ribbon Committee, ang mga construction firms daw nila ay hindi sangkot sa mga ghost project.

Pero nabuking na nagsisinungaling sila dahil may mga nag-post sa social media na nakarating na rin sa Facebook page ni Pres. Bongbong Marcos (PBBM) na ang mga construction firm ng mag-asawang Discaya na Amethyst Horizon Builders at Alpha and Omega General Contractor and Development Corporation ay may ghost projects na flood control na mag-uugnay sa mga Brgy. Batang at Brgy. Garawon, parehong nasa bayan ng Hernani sa Eastern Samar, at ang pag-aari rin ng mga Discaya na YPR General Contractor and Construction Supply Inc. ay may ghost project na flood control sa Brgy. Soong, Llorente sa nabanggit din na lalawigan. 

Dahil sa nabulgar na iyan ay posibleng marami pang ghost projects ang mag-asawang Discaya, at dahil sangkatutak na pera ng bayan ang kanilang ‘in-scam’, asahan na nilang

sandamakdak na mga kasong plunder din ang kanilang kakaharapin, boom!

XXX

DAPAT IMBESTIGAHAN NI MAYOR VICO SOTTO ANG MGA KONTRATA NG MAG-ASAWANG DISCAYA SA CITY HALL MULA YEAR 2012, AT KAPAG ‘IN-SCAM’ ANG KABAN NG PASIG CITY, UNAHAN NIYA ANG BABAGAL-BAGAL NA MARCOS ADMIN SA PAGSASAMPA NG KASONG PLUNDER SA MGA ITO -- Sa interview nina Korina Sanchez at Julius Babao noon sa mag-asawang Discaya ay sinabi ni Sarah na noong year 2012 kumuha sila ng kontrata sa city hall, at sa Senate Blue Ribbon Committee ay inamin ni Sarah Discaya na year 2016 onwards daw nakakuha ng mga flood control project sa Dept. of Public Works and Highways (DPWH).

Balikan natin ang year 2012, hindi pa alkalde sa panahong ito si Mayor Vico Sotto, kaya’t panawagan natin sa kanya (Mayor Vico) na tingnan ang mga kontratang pinasok ng mag-asawang Discaya sa city hall, at kapag napatunayang may ginawa rin silang ‘kawalanghiyaan’ sa kaban ng Pasig City, sampahan na agad niya ng kasong plunder, unahan na niya ang Marcos administration na babagal-bagal sa pagsasampa ng kaso sa mga Discaya, period!

XXX

KUNG SI SARAH DISCAYA ANG ‘FLOOD CONTROL SCAM QUEEN’, SI DPWH USEC. MARIA CABRAL NAMAN ANG ‘INSERT QUEEN’ -- Ang ibinulgar ni Sen. Ping Lacson na tinawagan ni DPWH Usec. Maria Cabral ang staff ni Sen. Tito Sotto noong May 2025 na mag-insert o magsingit ng mga flood control project para sa 2026 national budget, ay kinumpirma rin ni Tito Sen.

Malamang ang pangungumbinse ni Usec. Cabral sa staff ni Tito Sen ay ginawa rin nito sa mga staff ng ibang senador at kongresista, at maaaring may mga pumatol.

kung ang bansag ngayon kay Sara Discaya ay “flood control scam queen”, ang puwede namang ibansag kay Usec. Cabral ay “insert queen” ng DPWH, boom!

XXX

NASA ‘PINAS NA SI ROYIMA GARMA KAYA ASAHAN NA MABUBULOK SIYA SA KULUNGAN KAPAG NAPATUNAYANG GUILTY SA KASONG MURDER -- Nasa bansa na si former Philippine Charity Sweepstakes Office (PCSO) General Manager Royima Garma matapos siyang i-deport ng Amerika pabalik ng ‘Pinas.

Kabilang si Garma sa sinampahan ng kasong murder ng National Bureau of Investigation (NBI) at Philippine National Police (PNP) kaugnay sa pagpatay kay former PCSO Board Member Wesley Barayuga noong July 2020, at kapag napatunayang guilty siya sa kaso, dahil no bail ang murder case ay tiyak mabubulok na siya sa kulungan, abangan!

Sen. at cong., kung sinuportahan lang ang Death Penalty Bill sa plunderer noon wala sanang flood control projects scam

ni Pablo Hernandez @Prangkahan | September 8, 2025

KUNG SINUPORTAHAN LANG NOON NG MGA SENADOR AT KONGRESISTA ANG PANUKALANG DEATH PENALTY NI SEN. BONG GO SA MGA PLUNDERER, WALA SANANG NAGANAP NA FLOOD CONTROL PROJECTS SCAM -- Bago pa isinulong ng noo’y Zamboanga City Rep. Khymer Olaso last January 2025 at ni Sen. Ronald Dela Rosa ngayong September 2025 ang parusang kamatayan sa mga plunderer, may ganyan na ring panukalang batas si Sen. Bong Go noong July 2019 na ang kasong plunder, dapat patawan ng death penalty.

Kung ang bill na iyan ni Sen. Bong Go ay noon pa sinuportahan ng mga senador at kongresista, wala sanang isyung flood control projects scam, wala sanang mga nagsabwatan sa pang-i-scam sa bilyun-bilyong pisong kaban ng bayan, period!

XXX

NAKABUTI RIN ANG INSPIRATION INTERVIEW NINA KORINA AT JULIUS DAHIL KUNG HINDI NAKITA NG PUBLIKO ANG MAGARBONG PAMUMUHAY NG PAMILYA DISCAYA, BAKA ANG SINABI NI SARAH DISCAYA SA SENADO SIMPLE LANG ANG KANILANG PAMUMUHAY -- Nakabuti rin pala ang ‘bayad’ (tig-P10M daw, ayon sa post ni Pasig City Mayor Vico Sotto) na inspiration interview nina broadcaster-vloggers Korina Sanchez at Julius Babao sa mag-asawang Curlee at Sarah Discaya, na pinalabas nila sa kanilang mga programa na kesyo dapat daw maging inspirasyon ang pagyaman ng mag-asawang Discaya.

Kung hindi kasi ininterbyu nina Korina at Julius ang mag-asawang Curlee at Sarah, at hindi nila ipinakita sa publiko ang magarbong pamumuhay ng pamilya Discaya, na mayroon silang sangkatutak na luxury cars, mala-palasyong tahanan, mga mamahaling kagamitan, ay malamang ang sabihin ni Sarah Discaya sa imbestigasyon ng Senate Blue Ribbon Committee patungkol sa flood control projects scam na siya, kanyang mister na si Curlee at kanilang mga anak ay simple lang ang kanilang pamumuhay, boom!

XXX

LAHAT NG KONTRAKTOR NA MAY KONTRATA SA GOBYERNO, DAPAT ISAILALIM DIN

SA LIFESTYLE CHECK, BAKA TULAD NG PAMILYA DISCAYA GUMARBO RIN ANG PAMUMUHAY SA ‘PANG-I-SCAM’ SA KABAN NG BAYAN -- Hindi lang dapat mga politician at gov’t. officials ang dapat isailalim sa lifestyle check.

Dapat isailalim din sa lifestyle check ang mga kontraktor na may kontrata sa gobyerno, baka kasi hindi lang lantad, na tulad sila ng pamilya Discaya na may sangkatutak na luxury cars, mala-palasyong tahanan at may mga mamahaling kagamitan, na mga naging bilyonaryo rin sa ‘pang-i-scam’ sa pera ng bayan, period!

XXX

MAGULONG GOBYERNO ANG MARCOS ADMIN, PRESIDENTE VS. VICE PRESIDENT, SENADO VS. KAMARA AT MALACANANG VS. KONGRESO -- Sa mga naging administrasyon, pinakamagulo ay ang Marcos administration.

Magkaaway ang presidente at bise presidente, magkaaway ang Senado at Kamara, at magkaaway ang Malacanang at Kongreso.

Imbes magkaisa para mapanagot sa batas ang mga nang-i-scam sa kaban ng bayan, sila-sila ang mga nagbabangayan, palibhasa kasi karamihan sa kanila ay sangkot din sa mga katiwalian, mga pwe!