Romualdez, imbes na ginigisa parang ‘binebeybi’ pa ng ICI at Ombudsman

ni Pablo Hernandez @Prangkahan | November 5, 2025

DAPAT ISAMA SA KASUHAN AT IKULONG SA CITY JAIL SINA BONOAN AT CABRAL -- Hiniling ni Independent Commission for Infrastructure (ICI) Chairman Andres Reyes, Jr. kay Ombudsman Boying Remulla na imbestigahan sina former Dept. of Public Works and Highways (DPWH) Sec. Manuel Bonoan, ex-DPWH Usec. Catalina Cabral at former DPWH Usec. Roberto Bernardo sa posibleng paglabag ng mga ito sa Code of Conduct and Ethical Standard.

Ayos iyan, dahil sa tatlong nabanggit na former DPWH officials ay tanging si Bernardo pa lang ang nadidiin nang husto, kasi sa totoo lang, bilang naging DPWH secretary si Bonoan at naging DPWH usec. for planning and for public-private partnership (PPP) si Cabral ay imposibleng wala silang alam sa naganap na malawakang flood control projects scam sa buong bansa, kaya't dapat talaga kabilang sila sa mga makasuhan at makulong sa Quezon City jail, period!

XXX

DPWH SEC. DIZON TAKOT BANG MAG-IMBESTIGA SA FLOOD CONTROL PROJECTS NI CONG. PULONG SA DAVAO CITY? -- Si former DPWH Usec. Cabral ang nagkumpirma sa imbestigasyon ng House Infra Committee na sa distrito ni Davao City Rep. Paolo Duterte ay may higit P51 billion ibinabang pondo ang DPWH.

Ang tanong: Sa dami na ng lugar sa bansa kung saan ay nagsagawa na rito si DPWH Sec. Vince Dizon ng pag-inspection sa mga flood control project ay bakit hindi pa siya nagagawi sa Davao City para tingnan kung maayos o may alingasngas sa mga proyektong pangontra sa baha sa distrito ni Cong. Pulong?

Lumalabas ngayon na ang hindi pagpunta ni Dizon sa Davao City para inspeksyunin ang mga flood control projects sa distrito ni Cong. Pulong ay indikasyon na "may kaba siya sa dibdib" na pasukin ang balwarte ng pamilya Duterte, boom!

XXX

DAPAT SI REP. MARTIN ROMUALDEZ ‘GINIGISA’ HINDI PARANG ‘BINEBEYBI’ -- Dapat gisahin nang todo ng Marcos administration si Leyte Rep. Martin Romualdez kung bakit matapos mabulgar ang flood control projects scam, ay agad-agad binigyan niya ng travel clearance si former Rep. Zaldy Co, pero imbes gisahin ay tila binebeybi pa ito (Romualdez) ng ICI, Ombudsman at Civil Aviation Authority of the Philippines (CAAP).

Panawagan ng taumbayan sa ICI ay isapubliko ang kanilang hearing, tumanggi ang ICI, at after ng closed-door hearing kay Romualdez at saka inanunsyo ni ICI Chairman Reyes na next hearing nila ay live telecast na. Sa parte ni Ombudsman Boying Remulla ay hindi raw masasama ang dating speaker sa mga kakasuhan ng plunder at gross negligence lang daw ang puwedeng ikaso sa kanya (Romualdez) dahil hindi nabantayan ang mga pinaggagawang pang-i-scam ni Zaldy Co, at ayon naman kay CAAP Director General Raul Del Rosario ay wala raw pag-aaring mga private plane at helicopters o iba pang air assets ang ex-speaker, tsk!

XXX

PAG-REJECT NG SC AT SAN JUAN RTC SA MGA HIRIT NI SEN. JINGGOY INDIKASYONG MAGBABALIK KULUNGAN NA SIYA -- Matapos i-reject ng Supreme Court (SC) ang hirit ni Sen. Jinggoy Estrada na iabsuwelto siya sa mga kaso niyang graft and corruption patungkol sa pork barrel scam, ay ni-reject din ng San Juan City Regional Trial Court (RTC) ang hirit ng senador na pagbawalan si DPWH-Bulacan 1 former Asst. Dist. Engr. Brice Hernandez sa pagkaladkad sa kanyang pangalan sa flood control projects scam.

Dahil tinabla ng dalawang korte ang hirit ni Sen. Estrada ay nakikita na ng publiko na hindi siya safe sa pork barrel scam at flood control projects scam, kaya’t dapat na niyang paghandaan ang pagbabalik niya sa kulungan, abangan!

Speaker Dy, matapos mabulgar na sangkatutak ang kamag-anak sa gobyerno, kung may delicadeza, mag-resign na

ni Pablo Hernandez @Prangkahan | November 4, 2025

PARA MAKASUHAN AT MAKULONG AGAD ANG LAHAT NG SANGKOT SA FLOOD CONTROL SCAM, DAPAT MAGKAROON NG REGIONAL ICI -- Halos lahat ng probinsya ay may mga ghost, substandard at unfinished flood control projects at sa halos tatlong buwang imbestigasyon ng Independent Commission for Infrastructure (ICI) ay anim pa lang ang inirekomenda nilang kasuhan ng plunder at graft, at sila ay Sen. Jinggoy Estrada, Sen. Joel Villanueva, former Ako Bicol Partylist Rep. Zaldy Co, dating DPWH Usec. Roberto Bernardo, Commission on Audit (COA) Commissioner Mario Lipana at ex-Caloocan City Rep. Mitch Cajayon na mga sangkot sa flood control scam sa Bulacan.

Sa Bulacan pa lang iyan, eh iyong sa mga probinsya na mayroon ding flood control projects scam, kailan pa matatapos ang imbestigasyon dito, kailan pa may makakasuhan?

Kung desidido si Pres. Bongbong Marcos (PBBM) na mapanagot ang lahat ng sangkot sa katiwalian, dapat ay palawakin niya ang ICI, maglagay ng regional ICI office na iimbestigahan ang lahat ng sangkot sa flood control scam sa mga nasasakupang probinsya ng bawat rehiyon, at kapag meron na iyan, sigurado agad-agad ay makakasuhan at maipapakulong na ang lahat ng mga nagsabwatang DPWH official, kontraktor at politicians sa pang-i-scam sa kaban ng bayan, period!

XXX

HINDI MAGANDANG TINGNAN NA ANG SPEAKER, SANGKATUTAK ANG KAMAG-ANAK NA MAY PUWESTO SA GOBYERNO, KAYA KUNG MAY DELICADEZA SI SPEAKER BOJIE DY, DAPAT MAG-RESIGN NA SIYA -- Nang isapubliko ni House Speaker, Isabela Rep. Bojie Dy ang kanyang Statement of Assets, Liabilities and Net Worth (SALN) ay dito nalaman ng publiko na mayroon pala siyang 16 na kamag-anak na may iba’t ibang posisyon sa pamahalaan.

Sa totoo lang, hindi magandang halimbawa sa mata ng publiko na ang lider ng Kamara, bukod sa may political dynasty na, may nepotismo pa.

Kaya kung may delicadeza sa kanyang sarili si Speaker Dy, dapat mag-resign na agad siya bilang Speaker of the House, boom!

XXX

AKALA NG PUBLIKONG PALABAN SI COMELEC CHAIRMAN SA MGA KANDIDATONG TUMANGGAP NG PONDO SA MGA KONTRAKTOR, PERO NANG HINGAN NG KOPYA NG MEDIA, ATRAS -- Matapos ibida ni Comelec Chairman George Garcia na maraming pulitiko ang tumanggap ng campaign funds sa mga kontraktor ay tumanggi naman siya na isapubliko ang pangalan ng mga ito.

Noong una, hinangaan ng publiko si Garcia sa pag-aakalang palaban ito pero nang humingi na ng kopya ang mga mamamahayag para isapubliko ang pangalan ng mga kandidatong tumanggap ng campaign funds sa mga kontraktor, atras siya, ayaw

magbigay ng kopya, buset!

XXX

MAY PA-GOOD-GOOD GOVERNANCE PA SINA OLONGAPO CITY MAYOR PAULINO, MUNTINLUPA CITY MAYOR BIAZON AT BAGUIO CITY MAYOR MAGALONG, PERO WALA NAMAN SILANG AKSYON SA MGA ILEGALISTANG NANGRARAKET SA MGA NASASAKUPAN -- Si Olongapo City Mayor Rolen Paulino ay miyembro rin ng Mayors for Good Governance, pero sa nasasakupan niyang lungsod tuloy pa rin ang raket na STL Small-Town Lottery (STL)-con jueteng ng isang alyas “Aging,” sa Muntinlupa City, ang alkalde rito ay si Mayor Ruffy Biazon na kasapi rin ng Mayors for Good Governance pero sa lugar niya namamayagpag din ang raket na STL-con jueteng at lotteng nina alyas "Touche" at "Jojo," gayundin ang mga saklaan ni "Walter" ay sa jurisdiction ni Mayor Benjamin Magalong, lantaran ang mga raket na mini-casino ni alyas "Patrick"  sa Legarda Bokawlan Streets at drop balls, color games ni "Nestor" sa Kayang, Baguio City.

Hanep ah, may pa-good-good governance pa sila pero wala naman silang aksyon sa mga ilegalistang nangraraket sa kanilang mga kababayan, boom!

Sangkaterbang pera baka wala na sa mansyon ni Zaldy Co, lulan ng private plane at 2 helicopters na nakapuslit sa ‘Pinas

ni Pablo Hernandez @Prangkahan | November 3, 2025

WALANG PATOL SA MAMAMAYAN ANG MGA ATAKE AT PANINIRA NI TRILLANES KAY SEN. BONG GO DAHIL ‘ROCKSTAR’ PA RIN ANG ARRIVED NITO SA TAUMBAYAN -- Sa survey ng Pulse Asia noong Oct. 18, 2025 ay si Sen. Bong Go ang top performer sa mga senador, binigyan siya ng highest 76% approval ratings ng publiko, at makalipas lang ang tatlong araw, noong Oct. 21, 2025 inatake at siniraan na ni former Sen. Antonio Trillanes ang senador, isinasangkot sa katiwalian at sinampahan pa ng kasong plunder. 

At kung titingnan ang mga social media accounts ni Sen. Bong Go, sa kanyang daily activities ay sa kabila ng mga atake at paninira sa kanya ni Trillanes ay rockstar pa rin ang arrived ng senador, na talaga namang pinagkakaguluhan siya, ipinakikita ng taumbayan ang pagmamahal sa kanya.

Ang nais nating ipunto rito, walang patol sa mamamayan ang mga atake at paninira ni Trillanes kay Sen. Bong Go, period!

XXX

SANGKATERBANG PERA MULA SA KICKBACK BAKA WALA NA SA MANSYON NI ZALDY CO, NAIPUSLIT NA PALABAS NG BANSA LULAN NG ISANG PRIVATE PLANE AT 2 HELICOPTERS -- Sa testimonya nina former Dept. of Public Works and Highways (DPWH)-Bulacan 1st District officials, Engrs. Henry Alcantara at Brice Hernandez ay napag-alaman ng Independent Commission for Infrastructure (ICI) na ang mansyon ni former Ako Bicol Partylist Rep. Zaldy Co sa Villa Verde sa Pasig City ay ginagawa lang imbakan ng sangkaterbang male-maletang pera mula sa kickback nito sa flood control projects.

Naku, sa sobrang tuso ni Zaldy Co, malamang ang sangkaterbang pera na nasa kanyang mansyon ay wala na, baka nga ang laman ng kanyang private plane at dalawang helicopters na nakapuslit palabas ng bansa ay iyong male-maletang naglalaman ng mga kuwarta mula sa na-kickback niya sa mga flood control projects, tsk!

XXX

PABIDA LANG BA NI SEC. DIZON NA NAKA-FREEZE NA ANG AIR ASSETS NI ZALDY CO

O ‘NGANGA’ LANG TALAGA ANG MGA TAGA-CAAP KAYA NAKAPUSLIT PALABAS NG ‘PINAS ANG PAG-AARI NITONG ISANG PRIVATE PLANE AT 2 HELICOPTERS -- Noong Sept. 24, 2025 ay ibinida ni DPWH Sec. Vince Dizon na isinailalim na raw sa freeze order ng mga awtoridad ang walong air assets (mga pribadong eroplano at helicopter) na pag-aari ni Zaldy Co, at nitong nakalipas na Oct. 30, 2025 ay kinumpirma naman ni Civil Aviation Authority of the Philippines (CAAP) Director General Raul Del Rosario na ang isang private plane at dalawang helicopters ng dating kongresista ay nakapuslit palabas ng ‘Pinas.

Kaya ang tanong: Pabida lang ba ni Sec. Dizon na naka-freeze na ang air assets ni Zaldy Co o "nganga" lang sa kanyang puwesto sa CAAP si DG Del Rosario kaya naipuslit palabas ng ‘Pinas ang isang private plane at dalawang helicopters ng ‘tulisang’ dating kongresista na ito? Boom!

XXX

SC MAGTATALAGA NG MGA SPECIAL COURT NA LILITIS SA MGA SANGKOT SA FLOOD CONTROL PROJECTS KAYA UNANG BATCH NA KINASUHAN NG ICI SA OMBUDSMAN KABADO NA, MAPAPADALI NA ANG PAGKULONG SA KANILA SA CITY JAIL -- Inanunsyo ng Supreme Court (SC) na magtatalaga sila ng mga special courts na maglilitis sa mga sangkot sa flood control projects scam.

Hindi man aminin ay tiyak kakaba-kaba na ang mga unang batch na kinasuhan ng ICI sa Ombudsman sina Sen. Jinggoy Estrada, Sen. Joel Villanueva, former DPWH Usec. Roberto Bernardo, Zaldy Co, Commission on Audit (COA) Comm. Mario Lipana at former Caloocan City Rep. Mitch Cajayon, kasi ang aksyon na iyan ng SC ay indikasyon na mas mapapadali ang pagpapakulong sa kanila sa Quezon City Jail, abangan!