Comelec, naputakti ng batikos sa pag-absuwelto kay Sen. Chiz

ni Pablo Hernandez @Prangkahan | November 29, 2025

BATIKOS ANG GINAWANG RESBAK NG MGA PINOY SA COMELEC SA PAG-ABSUWELTO KAY SEN. ESCUDERO -- Mali ang akala ng Comelec na ‘bobo’ ang lahat ng mga Pilipino, na mapapaniwala nila ang mga mamamayan na kaya nila inabsuwelto si Sen. Chiz Escudero sa kasong paglabag sa Omnibus Election Code sa pagtanggap nito ng P30 million campaign fund sa kontraktor na si Lawrence Lubiano, may-ari ng Centerways Construction and Development Inc. ay dahil hindi naman daw ang kumpanya (Centerways Construction and Development Inc.) ang nakalagay sa Statement of Contributions and Expenditures (SOCE) ng senador na nagbigay sa kanya ng donasyon, kundi mismo si Mr. Lubiano.

Dahil nga hindi naman ‘bobo’ ang lahat ng mamamayan, kaya ang mga Pinoy nakakaintindi na may ginagawang paglabag sa batas si Escudero sa pagtanggap ng campaign fund sa kontraktor ay rumesbak, pinuputakti nila ngayon ng batikos ang Comelec, period!

XXX

ASAHAN NANG IAABSUWELTO NA RIN NG SENATE ETHICS COMMITTEE SI SEN. ESCUDERO -- May nakabinbin na ethics complaint si Atty. Marvin Aceron sa Senado laban kay Sen. Chiz Escudero kaugnay sa pagtanggap nito ng P30M campaign fund sa kontraktor na si Lawrence Lubiano, pero ang reklamong ito ay hindi inaaksyunan ni Sen. JV Ejercito, chairman ng Senate Ethics Committee.

At dahil inabsuwelto na ng Comelec si Escudero ay tiyak aaksyunan na ni Sen. JV ang ethics complaint, at asahan nang iaabsuwelto rin ito ng Senado, at siyempre ang gagawing batayan ay ang pag-absuwelto sa kanya (Escudero) ng komisyon, boom!

XXX

KUWENTONG KUTSERO O WEAK LEADER TALAGA SI PBBM SA SINABI NIYANG MAY ABOGADO SI ZALDY CO NA NAMBA-BLACKMAIL SA KANILA? -- Kuwentong kutsero o weak leader lang talaga si Pres. Bongbong Marcos (PBBM) sa sinabi niya na may abogado raw si former Cong. Zaldy Co na hindi niya pinatulan ang pamba-blackmail na kesyo ititigil lang daw ng dating kongresista ang mga atake sa pamilya Marcos kung hindi na itutuloy ng Marcos admin ang pagkansela sa pasaporte ng former congressman?

Kaya natin nasabing kuwentong kutsero ay dahil matapos itanggi ni Atty. Ruy Rondain, abogado ni Zaldy Co ang alegasyon ni PBBM, hanggang ngayon ay hindi pa pinapangalanan ni PBBM kung sino ang sinasabi niyang abogado na namba-blackmail sa kanila, at kung sakaling totoo ang sinabi ng Pangulo, eh lalabas na "weak leader" siya kasi mantakin n'yo,presidente siya ng bansa tapos hindi niya ipinahuli ang lawyer na namba-blackmail sa kanila, tsk!

XXX

SA KASAYSAYAN NG ‘PINAS, SI VP SARA LANG ANG LUMALABAS NA ATAT NA ATAT MAGING PRESIDENTE, ISINAPUBLIKO PA NIYA NA SIYA ANG PAPALIT NA MAGIGING PRESIDENTE KAPAG NAWALA SA PODER SI PBBM -- Kung sinuman ang adviser ni Vice Pres. Sara Duterte-Carpio ay sablay ang ipinayo nito sa kanya na sabihin sa publiko na dahil siya ang bise presidente, ay awtomatik daw na siya ang magiging presidente na papalit kay PBBM sakaling mawala ito sa posisyon.

Sa totoo lang, alam naman talaga ng mamamayan na si VP Sara ang magiging presidente kapag nawala sa posisyon si PBBM, pero sa kasaysayan ng ‘Pinas na sa mga nakaraang naging bise presidente ay wala kahit isa sa kanila ang nagsabi sa publiko na siya (bise presidente) ang magiging pangulo kapag natanggal sa puwesto ang presidente.

Kaya natin nasabing sablay ang ganyang uri ng statement ni VP Sara ay dahil pinuputakti na rin siya ng pamba-bash sa social media, dahil masyado raw siyang atat na atat na maging presidente ng ‘Pinas, boom!

Sen. Chiz, inabsuwelto ng Comelec, tiyak na dadami ang pulitikong tatanggap ng donasyon sa kontraktor

ni Pablo Hernandez @Prangkahan | November 28, 2025

DAPAT IAPRUB NI SPEAKER DY ANG HIRIT NA IMBESTIGASYON NG MAKABAYAN BLOC PARA HINDI ISIPIN NG TAUMBAYAN NA PINUPROTEKTAHAN NG KAMARA SINA PBBM, ROMUALDEZ AT SANDRO -- Naghain ng resolusyon ang Makabayan bloc congressmen sa pangunguna ni ACT Teacher partylist Rep. Antonio Tinio na imbestigahan sina Pres. Bongbong Marcos (PBBM), Leyte Rep. Martin Romualdez at presidential son, Ilocos Norte Rep. Sandro Marcos kaugnay sa sunud-sunod na video ng pasabog ni former Ako Bicol Partylist Rep. Zaldy Co na sangkot umano ang mga ito (PBBM, Romualdez at Sandro) sa Bicam insertions at kickback sa Dept. of Public Works and Highways (DPWH)-flood control projects.

Dapat aprubahan ni Speaker Bojie Dy ang hirit ng mga Makabayan bloc congressmen na imbestigahan ang tungkol sa isyung ito para hindi isipin ng taumbayan na binibigyan ng proteksyon ng Kamara sina PBBM, Romualdez at Sandro na idinadawit ni Zaldy Co sa flood control scandal, period!

XXX

DAPAT GUMAWA NG BATAS NA ANG MGA KONTRAKTOR BAWAL PUMASOK SA PULITIKA AT ‘DI RIN DAPAT MAGKAROON NG POSISYON SA PAMAHALAAN -- Ayon kay Independent Commission for Infrastructure (ICI) Chairman Andres Reyes ay inirekomenda na raw nila sa Ombudsman na sampahan ng kasong plunder, bribery at administratibo ang walong ‘congtractor’ (mga kongresistang kontraktor) na sangkot sa flood control scandal na kinabibilangan nina former Cong. Zaldy Co, CWS Partylist Rep. Edwin Gardiola, Uswag Ilonggo Partylist Rep. James Ang, Pusong Pinoy Partylist Rep. Jernie Nisay, Bulacan 2nd Dist. Rep. Agustina Pancho, Cagayan 3rd Dist. Rep. Joseph Lara, Surigao Del Norte 1st Dist. Rep. Francisco Matugas at Tarlac 3rd Dist. Rep. Noel Rivera.

Mantakin n’yo, nagsipagkandidato ang mga ito para maging mga kongresista na ang hangad lang pala mang-scam sa kaban ng bayan at hindi para maglingkod sa mamamayan at bayan.

Panahon na talaga na gumawa ng batas ang Senado at Kamara na nagbabawal sa mga kontraktor na pumasok sa pulitika at pagbawalan din silang magkaroon ng anumang posisyon sa pamahalaan, boom!

XXX

SA PAG-ABSUWELTO NG COMELEC KAY SEN. CHIZ, ASAHAN NANG MARAMING PULITIKO ANG TATANGGAP NG CAMPAIGN FUNDS SA MGA KONTRAKTOR -- Inabsuwelto ng Comelec si Sen. Chiz Escudero sa kasong may kinalaman sa paglabag sa Omnibus Election Code kaugnay sa pagtanggap niya ng P30 million campaign fund sa kontraktor na si Lawrence Lubiano.

Malinaw naman sa nakasaad sa batas na ang kandidato ay bawal tumanggap ng campaign fund sa kontraktor, at gayundin sa kontraktor na pinagbabawalan na magbigay ng donasyon sa mga kandidato, pero dahil inabsuwelto ng Comelec si Sen. Escudero, asahan nang sa mga susunod na halalan ay maraming pulitiko ang tatanggap na ng campaign funds sa mga kontraktor, buset!

XXX

PNP-REGION 1 DIRECTOR GEN. DINDO REYES MAY ‘WAR ON ILLEGAL GAMBLING,’ PERO SA MGA BAYAN NG BACNOTAN AT BANGAR SA LA UNION, MAY RAKET NA DROP BALLS AT COLOR GAMES -- Sa kabila ng pagdedeklara ni PNP-Region 1 Director, Brig. Gen. Dindo Reyes ng "war on illegal gambling," ay hindi pa rin itinitigil nina alyas "Bong" at "Mylene" ang raket nilang drop balls at color games sa mga munisipalidad ng Bacnotan at Bangar sa La Union.

Dapat ipa-raid nina P/Maj. Ariel Saltin ng Bacnotan Police Station at P/Maj. Ronald Lupisan ng Bangar Police Station ang mga raket nina "Bong" at "Mylene" sa kanilang jurisdiction, kasi kapag nalaman ni Gen. Reyes na wala silang aksyon dito, malamang sibak sa puwesto ang abutin nila, boom!

ICI, naglaban-bawi kay Rep. Romualdez

ni Pablo Hernandez @Prangkahan | November 27, 2025

NAGLABAN-BAWI ANG ICI KAY REP. ROMUALDEZ -- Noong Nov. 21, 2025 ay palaban na nagsumite ng mga dokumento ang Independent Commission for Infrastructure (ICI) sa Office of the Ombudsman na nagrerekomenda na isama na sa sasampahan ng kasong plunder at bribery ang pinsan ni President Bongbong Marcos (PBBM) na si Leyte Rep. Martin Romualdez, pero kamakalawa, Nov. 25, 2025 ay inanunsyo ni Atty. Ade Fajardo, abogado ng dating speaker, na nang makakuha sila ng kopya ng ICI documents at tingnan nila ang nilalaman nito ay wala naman daw nakasaad dito o wala rin umanong nakalakip dito na idinidiin ng ICI si Romualdez sa flood control projects scam.

Iyan ang ICI na itinatag ni PBBM, laban-bawi kay Romualdez, palaban sa statement pero sa dokumento mistulang binawi ang alegasyon sa pinsan ng Presidente, pwe!

XXX

HARRY ROQUE WALA NANG KAWALA, ANUMANG ORAS MADI-DEPORT O HUHULIHIN NA NG INTERPOL DAHIL KANSELADO NA ANG PASAPORTE NIYA -- Hindi naman pala (hindi pa) inaresto si former presidential spokesman Harry Roque kundi pinigilan lang siya ng mga Dutch authorities na makaalis ng bansang The Netherlands patungong Vienna, Austria, na ang palusot dito ni Roque ay may sakit daw kasi siya kaya hindi pinayagang makasakay ng eroplano, pero may mga balita na kaya hindi siya pinayagang makaalis sa The Hague (The Netherlands) ay dahil kanselado na ang kanyang pasaporte.

Kung totoo na kaya hindi pinayagan si Roque na makalabas ng The Netherlands ay dahil kanselado na ang kanyang pasaporte, ibig sabihin niyan ay wala na siyang kawala

sa batas, na anumang araw ay made-deport o huhulihin na siya ng Interpol para ibalik siya sa Pilipinas at makulong sa city jail sa kinasasangkutan niyang kasong no bail na qualified trafficking in person sa Pilipinas kaugnay sa pagkakasangkot umano niya sa ilegal na operasyon ng Philippine Offshore Gaming Operators (POGO) sa Porac, Pampanga, period!

XXX

KUWESTIYONABLE ANG PAGIGING ANTI-CORRUPT NI CONG. KIKO BARZAGA, HINDI NIYA BINABATIKOS ANG MGA KAALYADO NIYANG SINA SEN. ESCUDERO, SEN. ESTRADA AT SEN. VILLANUEVA NA NASASANGKOT SA FLOOD CONTROL SCAM -- Ang mga atake ni Cavite 4th District Rep. Kiko Barzaga patungkol sa mga anomalyang kinasasangkutan ng Marcos administration ay hindi puwedeng sabihing isa siyang lawmaker na anti-corrupt.

Simula kasi ng pumutok ang isyung flood control scam at unang lumabas ang mga pangalan nina Sen. Chiz Escudero, Sen. Jinggoy Estrada at Sen. Joel Villanueva na sangkot sa anomalyang ito ay porke kaalyado niya ang mga ito, ni-minsan ay hindi niya nagawang batikusin ang tatlong senador na ito, boom!

XXX

‘SAVE THE PHILIPPINES COALITION’ VS. MARCOS WALANG PATOL KASI MGA PASIMUNO NITO MGA TALUNANG KANDIDATO -- May itinatag na "Save the Philippines Coalition", ang ilang personalidad na ang layunin ay pabagsakin ang Marcos administration, pero nang magsipagsalita na ang mga convenor ng grupong ito, wala silang arrived sa publiko.

Ang nais nating ipunto rito, walang patol sa publiko, na never makakuha ng suporta sa taumbayan ang grupong ito kasi ang karamihan sa mga pasimuno nitong "Save the Philippines Coalition" ay mga talunang kandidato sa nakalipas na eleksyon, period!