Anumang lumabas sa ICI investigation, ‘di paniniwalaan ng taumbayan, sila-sila lang sa ICI nakaaalam ng pinaggagawa nila

ni Pablo Hernandez @Prangkahan | October 20, 2025

WALANG ‘K’ ANG MAG-ASAWANG DISCAYA MAGTAMPO SA ICI DAHIL SA LAKI NG NA-SCAM SA KABAN NG BAYAN WORTH P207B, MOST GUILTY TALAGA SILA SA FLOOD CONTROL PROJECTS SCAM -- Kung pakasusuriin ang sinabi ni Atty. Cornelio Samaniego, abogado ng mag-asawang Discaya ay lumalabas na "nagtampo" ang kanyang mga kliyente sa statement ni ICI Commissioner Rogelio Singson na hindi sila (Curlee at Sarah Discaya) least guilty, kaya nagpasya ang mga Discaya na huwag nang makipagtulungan sa imbestigasyon ng ICI sa mga sangkot sa flood control projects scam.

Kapal din talaga ng mukha ng mga Discaya, kasi sa totoo lang ay walang “K” o karapatan na magtampo ang mga Discaya sa statement ni ICI Comm. Singson dahil hindi naman talaga sila least guilty, sa laki ng pera ng bayan worth P207 billion na kanilang na-scam ay sila talaga ang most guilty sa flood control projects scam, period!

XXX

KUNG ANUMAN ANG KALABASAN NG ICI INVESTIGATION, HINDI ITO PANINIWALAAN NG TAUMBAYAN DAHIL SILA-SILA LANG ANG NAKAKAALAM KUNG ANO’NG MGA PINAGGAGAWA NILA -- Kung anuman ang kalabasan ng imbestigasyon ng ICI, lalo’t kung wala rin lang silang kakasuhan na high ranking gov’t. officials o high ranking politicians ay hindi ito paniniwalaan ng taumbayan.

Ang dahilan, ayaw nilang isapubliko ang ICI hearings sa mga sangkot sa flood control projects scam, sila-silang mga nasa ICI lang kasi ang nakakaalam sa kanilang mga pinaggagawa sa loob ng tanggapan nila, mga buset!

XXX

KAPAG PATULOY NA DEDEDMAHIN NI PBBM ANG PANAWAGANG ISAPUBLIKO ANG ICI INVESTIGATION, IBIG SABIHIN GUSTONG ILUSOT NG GOBYERNO ANG MASTERMIND SA FLOOD CONTROL PROJECTS SCAM -- Si Pres. Bongbong Marcos (PBBM) ang nagtatag ng ICI kaya’t may "K" siyang sabihan ang mga ICI members na isapubliko ang ICI investigation sa flood control projects scam para ‘ika nga maalis sa isipan ng mamamayan na may nais pagtakpan o may nais ilusot ang gobyerno sa mga sangkot sa flood control projects scam.

Pero kung patuloy na dededmahin ni PBBM ang panawagan ng iba’t ibang sektor na isapubliko ang ICI investigation, ibig sabihin niyan ay kung sinuman talaga ang mastermind sa flood control projects scam, iyan ang gusto ng gobyerno na ilusot sa kaso, boom!

XXX

TILA GUSTO NI GORDON MAGKAPUWESTO SA MARCOS ADMIN KAYA TODO-SIPSIP SIYA NANG SABIHING ‘GOOD LEADER’ DAW SI PBBM -- Nang magkita sina PBBM at former Sen. Richard Gordon, chairman ng Philippine Red Cross (PRC) sa Cebu matapos ang lindol, ay sinabi ng dating senador na "good leader" daw ang kasalukuyang presidente.

Tila gusto ni Gordon na mabigyan siya ng posisyon sa Marcos administration kaya todo-sipsip siya kay PBBM, he-he-he!

Dapat mag-rally din sa tapat ng ICI, baka sakaling isapubliko ang imbestigasyon sa flood control scam

ni Pablo Hernandez @Prangkahan | October 19, 2025

KAPAG TINOTOO NG LIDERATO NG AFP NA TANGGALAN NG PENSYON ANG MGA RETIRED MILITARY OFFICIALS, LALONG TITINDI ANG GALIT NILA KAY PBBM -- Pinag-aaralan daw ngayon ng liderato ng Armed Forces of the Philippines (AFP) na i-revoke o kanselahin ang pension ng mga retired military officials na nangungimbinse sa mga active junior and senior military officials na mag-aklas o mag-withdraw ng support kay Pres. Bongbong Marcos (PBBM).

Naku, eh kapag tinotoo na tanggalan sila ng pension ay asahan nang lalong titindi ang galit ng mga retired military kay PBBM, boom!

XXX

LALONG MAGAGALIT SA MARCOS ADMN ANG TAUMBAYAN KAPAG GINAWANG STATE WITNESS SI ROMUALDEZ -- Itinanggi ng Dept. of Justice (DOJ) na kinokonsidera nilang state witness si Leyte Rep. Martin Romualdez sa flood control projects scam dahil hindi naman daw nag-a-apply ang dating House speaker na magpasailalim sa Witness Protection Program (WPP).

Kahit pa mag-apply sa WPP ay hindi dapat gawing state witness si Romualdez dahil kapag ginawa nila iyan, tiyak mas lalong magagalit sa Marcos administration ang taumbayan, period!

XXX

PARA MATIGIL NA ANG ANTI-CORRUPTION RALLY, DAPAT BILISAN NG ICI ANG IMBESTIGASYON UPANG MAPANAGOT NA ANG MGA SANGKOT SA FLOOD CONTROL PROJECTS SCAM -- Matapos maglunsad ng anti-corruption protest ang mga Duterte Diehard Supporters (DDS) noong October 12, 2025, ay sinundan ito kamakalawa (October 17) ng anti-corruption rally ng mga kabataang estudyante, at sa statement naman ng mga civil society groups at iba pang cause-oriented groups ay linggo-linggo na raw silang magsasagawa ng anti-corruption rally hangga’t hindi napapanagot ang mga sangkot sa flood control projects scam.

Aba’y dapat nang atasan ni PBBM ang Independent Commission for Infrastructure (ICI) na bilis-bilisan ang pag-iimbestiga upang mapanagot na ang lahat ng mga dawit sa anomalya para matigil na ang anti-corruption rally, kasi kung babagal-bagal at laging may magaganap na protesta laban sa katiwalian ay may malaking epekto iyan sa ekonomiya ng bansa dahil iisipin ng international community na sobrang lala na ang corruption sa ‘Pinas kasi weekly ay may nagsasagawa ng rally laban sa mga ‘buwaya’ sa pamahalaan, boom!

XXX

DAPAT MAY MAG-RALLY DIN SA TAPAT NG TANGGAPAN NG ICI AT BAKA SAKALI MAOBLIGANG ISAPUBLIKO ANG IMBESTIGASYON NILA SA MGA SANGKOT SA FLOOD CONTROL PROJECTS SCAM --Dapat sa susunod na may gagawing anti-corruption rally ang iba’t ibang sektor ng lipunan ay sa harap ng tanggapan ng ICI sila magsagawa ng protesta.

Kapag d’yan (ICI) nila ginawa ang anti-corruption rally ay baka maobliga na ang ICI na isapubliko ang ginagawa nilang hearing sa flood control projects scam, period!

‘Pag mastermind sa flood control scam ‘di nakasuhan, malamang ‘Pinas mag-no. 1 na sa pinaka-corrupt sa Southeast Asia

ni Pablo Hernandez @Prangkahan | October 18, 2025

BAGSAK ANG RATING NINA PBBM AT VP SARA DAHIL PAREHO SILANG NASASANGKOT SA CORRUPTION -- Matapos ang anti-corruption rally noong Sept. 21, 2025 ay nagsagawa ng survey ang Social Weather Stations (SWS) na ikinomisyon ng Stratbase Group, at ang kinalabasan ng survey ay parehong lumagapak ang ratings nina Pres. Bongbong Marcos (PBBM) at Vice Pres. Sara Duterte-Carpio, na ang dating performance rating ng pangulo na 48% ay bumagsak sa 43% at ang dating rating ng bise presidente na 53% performance rating ay bumagsak sa 45%.

Hindi naman talaga kataka-takang lumagapak ang kanilang ratings dahil pareho silang nasasangkot sa corruption, si PBBM ay nasisisi kung bakit pinirmahan ang 2025 national budget na may sangkatutak na insertions sa flood control project, at si VP Sara naman nasasangkot sa corruption sa kanyang confidential funds, boom!

XXX

GUSTO NG MAG-ASAWANG DISCAYA NA PALABASIN NA LEAST GUILTY SILA KAHIT NA P207B NA-SCAM SA KABAN NG BAYAN -- Ayon kay Atty. Cornelio Samaniego, abogado ng mag-asawang Discaya na kaya raw nagpasyang huwag nang makipagtulungan sa Independent Commission for Infrastructure (ICI) ang kanyang mga kliyente ay dahil sa sinabi raw ni ICI Commissioner Rogelio Singson na hindi umano puwedeng maging state witness ang mga Discaya dahil hindi raw least guilty ang mga ito sa naganap na flood control projects scam.

Aba, ang gusto palang palabasin ng mag-asawang Discaya na kahit pa ayon kay Sen. Ping Lacson ay higit P207 billion halaga ang kanilang na-scam sa pera ng bayan, ay nais nila na least guilty sila sa pang-i-scam sa kaban ng bayan, mga pwe!

XXX

TILA ISASAMA NI OMBUDSMAN REMULLA SI FPRRD SA KASONG MAY KAUGNAYAN SA PHARMALLY SCAM -- Binawi ni Ombudsman Boying Remulla sa Sandiganbayan ang kasong isinampa sa mga sangkot sa Pharmally scam, na ayon sa Ombudsman ay ire-refile din naman nila, bubusisiin daw nila ito, kaso mayroon daw na dapat isama sa case ang hindi naisama noon.

Malamang, ang isasama sa kaso ay si former Pres. Rodrigo Roa Duterte (FPRRD) dahil sabi ni former Sen. Richard Gordon, na ang dating presidente raw ang pasimuno sa P12 billion Pharmally scam noong pandemya, period!

XXX

KAPAG MASTERMIND SA FLOOD CONTROL PROJECTS SCAM HINDI NASAMA SA KAKASUHAN, MALAMANG ‘PINAS MAG-NUMBER 1 SA PINAKA-CORRUPT NA BANSA SA SOUTHEAST ASIA -- Sa corruption index ng Transparency International last year (2024) ay rank 4 sa pinaka-corrupt na bansa ang Pilipinas sa Southeast Asia, at ngayong year 2025 matapos na mabulgar ang sangkatutak na flood control projects scam ay pumalo na sa rank 3 ang ‘Pinas sa pinaka-corrupt na bansa sa Southeast Asia pa rin.

Kaya kapag hindi nasama sa mga kakasuhan ang pinaka-mastermind sa flood control projects scam, malamang next year o pagsapit ng year 2026 ay baka ‘Pinas na ang maitalang pinaka-corrupt na bansa sa Southeast Asia, boom!