Cong. Leviste, naturingang mambabatas pero ‘di alam na walang papel si VP Sara sa budget insertion

ni Pablo Hernandez @Prangkahan | December 2, 2025

SANA ALL NG PARTYLIST TULAD NG SSS-GSIS PARTYLIST NAGTATRABAHO SA KAPAKANAN NG MAMAMAYAN, IBA KASING PARTYLIST TINATRABAHO MANG-SCAM SA KABAN NG BAYAN -- Kung may mga partylist tulad ng “Ako Bicol”, "CSW,"  "Uswag Ilonggo" at "Pusong Pinoy" na ang tinatrabaho paano makapang-i-scam sa kaban ng bayan, ay may partylist naman na ang tinatrabaho ay paano makakatulong sa kapakanan ng mamamayan, at ito ay ang “SSS-GSIS Pensiyonado (SGP) Partylist.”

May panukalang batas kasi si SGP Partylist Rep. Rolando Macasaet na ang 15-year service requirement sa mga kawani ng pamahalaan para maging pensyonado ng Gov’t. Service Insurance System (GSIS), ay ibaba ito at gawin na lang itong 10-year service requirement, tulad ng 10-year service requirement sa Social Security System (SSS) sa private sectors.

Sana all ng partylist congressmen ay tulad ni SGP Cong. Macasaet na ang iniisip paano makatulong sa kapakanan ng mamamayan, hindi tulad nina former Cong. Zaldy Co ng Ako Bicol, CSW Rep. Edwin Gardiola, Uswag Ilonggo Rep. James Ang at Pusong Pinoy Rep. Jernie Nisay na pang-i-scam sa kaban ng bayan ang inatupag kung kaya't inirekomenda ng Independent Commission for Infrastructure (ICI) na sila ay sampahan ng kasong plunder at graft, period!

XXX

NOV. 30 ANTI-CORRUPTION RALLY KAUNTI LANG LUMAHOK, KUMBAGA SA PELIKULA SEMPLANG SA TAKILYA -- Kumbaga sa pelikula, semplang sa takilya ang anti-corruption rally ng "Trillion Peso March Movement" na idinaos kamakalawa (Nov. 30, 2025) dahil kakaunti lang ang mga dumalo sa kilos-protesta na magkasabay na idinaos sa EDSA Shrine sa Quezon City at Quirino Grandstand sa Manila.

Bago sumapit ang Nov. 30 anti-corruption rally na ito ay talaga namang nabahala ang Marcos administration dahil inakala nila na dadagsa ang mga tao sa kilos-protesta lalo’t sunud-sunod ang presscon ng mga organizers ng "Trillion Peso March Movement" na kesyo mala-People Power daw ang kanilang isasagawang rally sa EDSA Shrine at Quirino Grandstand, ‘yun pala kakaunti lang ang lumahok, at dahil diyan, binash ng netizens sa social media ang mga pasimuno ng mga protestang ito, boom!

XXX

KAYA KAUNTI LANG ANG LUMAHOK SA ANTI-CORRUPTION RALLY DAHIL SA KAKA-CLOSED DOOR HEARING NG ICI, TAPOS NA-STOP PA ANG IMBESTIGASYON NG SENATE BLUE RIBBON COMMITTEE AT HOUSE INFRA COMMITTEE -- Nang unang ilunsad ng "Trillion Peso March Movement" ang anti-corruption rally noong Sept. 21, 2025 ay marami-rami ang lumahok, sa tantiya rito ay nasa 50K tao ang lumahok sa protesta sa Quirino Grandstand, at nasa 70K tao naman ang lumahok sa EDSA Shrine, pero kamakalawa (Nov.30) sa pinagsamang bilang ng mga lumahok sa protestang ito sa Quirino Grandstand at EDSA Shrine, pati sa ilang lalawigan na may idinaos din na rally ay nasa 9,000 lang ang lumahok.

Ang maaaring dahilan kung kaya nawawalan na ng ganang lumahok ang mamamayan sa mga anti-corruption rally ay dahil wala nang gaanong nababalitaan ang publiko sa mga sangkot sa flood control scandal dahil nga bukod sa closed door ang hearing ng Independent Commission for Infrastructure (ICI), ay itinigil na rin ng Senate Blue Ribbon Committee at House Infra Committee ang imbestigasyon sa mga politician, gov’t. officials at kontraktor na nagsabwatan sa pang-i-scam sa kaban ng bayan, period!

XXX

NATURINGANG MAMBABATAS SI CONG. LEVISTE HINDI PALA NIYA ALAM NA WALA TALAGANG PAPEL AT HINDI MAKAPAG-I-INSERT SA NATIONAL BUDGET ANG VICE PRESIDENT -- Bukod sa pinagtawanan, ay na-bash pa si Batangas 1st Dist. Rep. Leandro Leviste sa statement niya na sa mga politician at gov’t. officials ng ‘Pinas ay tanging si Vice Pres. Sara Duterte-Carpio lang daw ang walang insertions sa national budget.

Sa totoo lang, pagtatawanan at maba-bash talaga si Cong. Leviste dahil naturingan siyang mambabatas, pero hindi pala niya alam na hindi talaga magagawa ni VP Sara na mag-insert sa national budget dahil mga senador at kongresista lang na nagbabalangkas ng taunang badyet, silang mga mambabatas lang ang may kakayanang dumiskarte ng pagsingit sa budget at walang papel dito ang bise presidente, boom!

Imbestigasyon kay Rep. Sandro Marcos, dapat i-live ng ICI

ni Pablo Hernandez @Prangkahan | December 1, 2025

HIRIT NA TRAVEL CLEARANCE NI SEN. ESTRADA SA SANDIGANBAYAN, HINARANG NG DOJ NA IBIG SABIHIN, DESIDIDONG IKULONG ULI ANG SENADOR -- Kinontra ng panel of prosecutors ng Dept. of Justice (DOJ) ang hinihinging travel clearance ni Sen. Jinggoy Estrada sa Sandiganbayan para makapunta sa Japan mula Dec. 26, hanggang Dec. 31, 2025 at magtungo rin sa Norway, Iceland at Austria mula Jan. 5 hanggang 15, 2026, dahil ayon sa Justice department, bukod sa may kinakaharap pang mga kasong graft ang senador kaugnay sa pagkakasangkot nito sa pork barrel scam, ay inirekomenda na rin ng Independent Commission for Infrastructure (ICI) sa Ombudsman na isama ito (Estrada) sa kasong plunder, malversation of public funds through falsification of public documents at bribery patungkol naman sa pagkakasangkot nito sa flood control projects scam.

Ang pagharang na iyan ng DOJ sa hirit ni Sen. Estrada na travel clearance para makapag-abroad ay indikasyong desidido ang DOJ na ikulong uli ang nabanggit a senador, boom!

XXX

DAPAT I-LIVE NG ICI ANG IMBESTIGASYON KAY REP. SANDRO MARCOS PARA MAKITA NG PUBLIKO KUNG TOTOO O KASINUNGALINGAN ANG ATAKE NI ZALDY CO SA PRESIDENTIAL SON -- Matapos isangkot ni former Ako Bicol Partylist Rep. Zaldy Co si Ilocos Norte Rep. Sandro Marcos sa Bicam insertions at flood control projects scam ay agad itong itinanggi ng kongresistang presidential son at kasunod nito ay nagpalabas siya (Sandro Marcos) ng statement na handa siyang humarap sa isasagawang imbestigasyon ng ICI.

Sana, kapag inimbestigahan na si Cong. Sandro ay i-live streaming ito ng ICI para makita ng publiko kung sino kina Sandro Marcos at Zaldy Co ang sinungaling at nagsasabi ng totoo, period!

XXX

DAPAT NAG-RESIGN MUNA SA COMELEC SI CHAIRMAN GARCIA, BAGO INABSUWELTO SI SEN. ESCUDERO -- Matapos iabsuwelto ng Comelec si Sen. Chiz Escudero sa kasong paglabag sa Omnibus Election Code nang tumanggap ito ng P30 million campaign fund sa kontraktor na si Lawrence Lubiano, may-ari ng Centerways Construction and Development Inc., ay may mga lumabas na isyu na naging abogado pala ng senador si Comelec Chairman George Garcia noong hindi pa ito nanunungkulang head ng komisyon.

Dapat pala ang ginawa ni Chairman Garcia, for delicadeza, ay nag-resign siya sa Comelec bago inilabas ang desisyong pumabor kay Sen. Escudero, at dahil hindi siya nagbitiw sa puwesto, natanim ngayon sa isipan ng publiko na ginamit niya ang kanyang power para iabsuwelto sa kaso ang senador, boom!

XXX

DAPAT ISAULI NG MGA CELEBRITY SA KABAN NG BAYAN ANG PERANG IBINAYAD SA KANILA NG MGA ‘SCAMMER’ NA PARTYLISTS -- Malaki ang naitulong ng ilang celebrity sa pag-endorso kaya laging nananalo sa mga nakaraang halalan ang mga partylist na "Ako Bicol," "CSW," "Uswag Ilonggo" at "Pusong Pinoy."

Nang pumutok ang flood control scandal, nabulgar na ang mga partylist representatives na sina former Cong. Zaldy Co ng Ako Bicol, CSW Rep. Edwin Gardiola, Uswag Ilonggo Rep. James Ang at Pusong Pinoy Rep. Jernie Nisay ay mga kontraktor pala na sangkot sa pang-i-scam sa kaban ng bayan kung kaya't kabilang sila sa inirekomenda ng ICI sa Ombudsman na sampahan ng mga kasong plunder, graft at bribery.

Kaya kung may konsensya ang mga celebrity na nagpanalo sa mga scammer na partylist na ito ay dapat isauli nila sa kaban ng bayan ang ibinayad na talent fee sa kanila, dahil pera ng bayan ang ibinayad sa kanila, at hindi pera ng mga ‘buwayang’ partylist representatives na mga ito, period!

DDS, ‘di lahat nakikisimpatya, meron ding gustong makulong si Roque

ni Pablo Hernandez @Prangkahan | November 30, 2025

HINDI LAHAT NG DDS NAKIKISIMPATYA KAY HARRY ROQUE, MAY DDS DIN TULAD NI PANELO NA MATUTUWA KAPAG NAHULI SIYA NG INTERPOL -- Ikinatuwa ni former presidential legal counsel/spokesman Salvador Panelo ang pagkakalagay ni former spokesman Harry Roque sa Red Notice ng Interpol, na ayon sa kanya ay dapat lang talaga itong (Roque) mahuli at makulong sa kasong qualified trafficking in person kaugnay sa pagkakasangkot nito sa operasyon ng Philippine Offshore Gaming Operator (POGO) sa Porac, Pampanga.

Si Panelo ay hindi lang basta isang Duterte Diehard Supporter (DDS) kundi matalik pa siyang kaibigan si former Pres. Rodrigo Roa Duterte (FPRRD), at sa litanya niyang ito ay indikasyon na may galit siya kay Roque, at kung anuman ang kanyang galit ay siya lang ang nakakaalam.

Ang nais nating ipunto sa sinabing ito ni Panelo ay hindi lahat ng mga DDS, nakikisimpatiya kay Roque, na ‘ika nga, may mga DDS din na gusto siyang mahuli at makulong, period!

XXX

DAHIL PINAL NA ANG DESISYON NG ICC NA PAG-REJECT SA INTERIM RELEASE NI FPRRD, ASAHAN NA NI PBBM NA ARAW-ARAW BABATIKUSIN NG MGA DDS SA SOCIAL MEDIA -- Matapos i-reject ng International Criminal Court (ICC) ang mosyon ng kampo ni FPRRD na interim release for humanitarian reason sa 80-anyos na ex-president na kasalukuyang nakakulong sa ICC jail sa kasong crimes against humanity ay lalong tumindi ang galit ng mga DDS kay Pres. Bongbong Marcos (PBBM).

Dahil nga pinal na ang desisyong ito ng ICC, asahan nang araw-araw makakatikim ng pambabatikos si PBBM mula sa mga DDS sa social media, boom!

XXX

NAWALA NA ANG KABA NG MGA PULITIKONG TUMANGGAP NG CAMPAIGN FUNDS SA MGA KONTRAKTOR DAHIL BASEHAN NILA ANG PAG-ABSUWELTO NG COMELEC KAY ESCUDERO -- Noong Nov. 26, 2025 ay kinabahan ang 85 pulitiko nang ibulgar ni Comelec Chairman George Garcia na hindi lang daw si Sen. Chiz Escudero ang tumanggap ng campaign funds sa mga kontraktor dahil ayon sa kanya ay natuklasan ng komisyon na mayroon pang 54 na kandidato noong 2022 election, at 31 kandidato nitong nakalipas na May 2025 election ang tumanggap ng campaign funds sa mga kontraktor na may kontrata sa gobyerno.

Noon, talagang kinabahan ang 85 pulitikong ito, pero nawala ang kaba nila dahil Nov. 27, 2025 nang iabsuwelto ng Comelec si Escudero sa kasong paglabag sa Omnibus Election Code kasi nga raw ay hindi naman pala Centerways Construction and Development Inc. ang nakalagay sa Statement of Contributions and Expenditures (SOCE) na nagbigay ng P30 million campaign funds sa senador kundi pangalang Lawrence Lubiano (may-ari ng nabanggit na construction firm) ang nakalagay sa SOCE, period!

XXX

VP SARA, HINDI SAFE SA PANAWAGANG ‘RESIGN’ -- Sa anti-corruption rally na isasagawa ng iba’t ibang sektor ng lipunan sa Quirino Grandstand ngayong araw na ito, Bonifacio Day (Nov. 30), ay hindi lang si PBBM ang ipapanawagan ng mga raliyista na mag-resign, kundi pati si Vice Pres. Sara Duterte-Carpio dahil ayon sa mga magra-rally ay pareho raw sangkot sa corruption ang presidente at bise presidente ng bansa.

Kung ganu’n, sa anti-corruption rally sa Quirino Grandstand, hindi rin pala safe si VP Sara sa panawagang mag-resign sa puwesto, boom!