Ombudsman Remulla, muling kinumpirmang may ICC warrant of arrest si Sen. Bato, malamang lalo itong ‘dinaga’

ni Pablo Hernandez @Prangkahan | December 8, 2025

MAKALUSOT MAN SI SEN. MARCOLETA SA PAGLABAG SA OMNIBUS ELECTION CODE, PERO SA KASONG PERJURY SA OMBUDSMAN, BAKA ‘DI SIYA MAKALUSOT -- Matapos padalhan ng show cause order ng Comelec si Sen. Rodante Marcoleta kaugnay sa misdeclaration niya sa kanyang Statement of Contributions and Expenditures (SOCE) ay sinampahan din siya ng kasong perjury sa Ombudsman nina Atty. Dino De Leon, Atty. Alex Lacson at Kontra Daya convenor Danilo Arao.

Sakaling makalusot man si Sen. Marcoleta sa Comelec kaugnay sa kasong paglabag sa Omnibus Election Code, baka sa kaso niyang perjury ay hindi siya makalusot dahil kilala si Ombudsman Boying Remulla na walang sinasanto sa mga gumagawa ng paglabag sa batas ng ‘Pinas, period!

XXX

TIYAK LALONG TUMINDI ANG GALIT NI SEN. MARCOLETA SA MARCOS ADMIN, GUSTO NIYANG MAGING STATE WITNESS ANG MAG-ASAWANG DISCAYA, PERO ANG GINAWA NG OMBUDSMAN KINASUHAN NA SI SARAH DISCAYA PARA MAKULONG SA CITY JAIL -- Sinampahan na ng Ombudsman ng kasong no bail na graft and malversation of public funds ang mga kontraktor na sina Sarah Discaya, Roma Angeline Rimando at pitong Dept. of Public Works and Highways (DPWH) officials dahil sa pagsasabwatan sa P96.5 million "ghost" flood control projects sa Davao Occidental, at kaya asahan nang kasunod niyan ang pag-aresto at pagkulong sa kanila sa city jail.

Dahil diyan ay tiyak lalong tumindi ang galit ni Sen. Marcoleta sa Marcos admin dahil nga gustung-gusto niya na gawing state witness sina Sarah Discaya at ang mister nito na si Curlee Discaya para makalusot sa kaso at hindi makulong ang mga ito. Pero ang naisin ng senador ay "tinabla" dahil nakasuhan na, ang kasunod niyan ay pag-aresto at pagpapakulong sa mag-asawang Discaya at sa iba pang sangkot sa flood control scandal sa city jail, abangan!

XXX

SA MULING PAGKUMPIRMA NI OMBUDSMAN REMULLA NA MAY ICC WARRANT OF ARREST NA SI SEN. DELA ROSA, MALAMANG LALONG ‘DINAGA’ ANG DIBDIB NG SENADOR -- Sa media interview kay Ombudsman Remulla ay muli niyang kinumpirma na may warrant of arrest na mula sa International Criminal Court (ICC) si Sen. Ronald Dela Rosa kaugnay sa kinakaharap nitong kasong crimes against humanity.

Sa sinabing iyan ni Ombudsman Remulla, hindi man aminin ni Sen. Dela Rosa ay siguradong "dinaga" na naman ang dibdib niya, boom!

XXX

DAPAT MAG-RESIGN NA SI SEN. DELA ROSA, KUNG WALA NA TALAGA SIYANG PLANONG PUMASOK SA SENADO -- Mag-iisang buwan na sa December 11, 2025 na hindi pumapasok sa Senado si Sen. Bato dela Rosa, pero tuloy ang suweldo niya.

Sa totoo lang, talo ang taumbayan kay Sen. Bato, kasi sinusuwelduhan siya ng taumbayan kahit absent o hindi siya pumapasok sa Senado.

Kung wala na talagang plano si Sen. Dela Rosa na pumasok sa Senado dahil sa takot na maaresto siya at makulong sa ICC jail sa The Hague, dapat mag-resign na lang siya sa pagka-senador kasi sa totoo lang, hindi katanggap-tanggap sa publiko na absent siya pero tuloy suweldo niya, period!

Parang hinimas-himas muna ni ICI Comm. Singson ang batok ni PBBM, saka binatukan

ni Pablo Hernandez @Prangkahan | December 7, 2025

SA PAG-RESIGN NI ICI COMM. SINGSON, PARANG HINIMAS-HIMAS MUNA NIYA ANG BATOK NI PBBM, AT SAKA BINATUKAN -- Matapos mag-resign, sinabi ni outgoing Independent Commission for Infrastructure (ICI) Comm. Rogelio Singson na naniniwala raw siyang hindi sangkot sa flood control scandal si Pres. Bongbong Marcos (PBBM) dahil ang Presidente raw ang nagbulgar ng anomalya at ito rin ang nagtatag ng komisyon para imbestigahan ang mga sangkot sa flood control projects scam. Ang problema lang daw kaya siya nag-resign ay dahil bukod sa wala agad ibinabang pondo, wala pang "pangil" ang ICI.

Kumbaga parang hinihimas-himas (pinuri) muna ni Comm. Singson ang batok ni PBBM, at saka binatukan (hindi raw kasi pinondohan agad ni PBBM ang ICI, at kulang pa power ng komisyon), boom!

xxx

ANO NAMAN KAYA ANG GAGAWING ‘PALUSOT’ NG COMELEC PARA IABSUWELTO SI SEN. MARCOLETA SA KINASANGKUTAN NITONG SOCE MISDECLARATION? -- Nagpadala na rin ang Comelec ng show cause order kay Sen. Rodante Marcoleta kaugnay sa misdeclaration nito sa kanyang Statement of Contributions and Expenditures (SOCE) patungkol sa sinabi niya na may mga donors siya noong nakaraang 2025 election, pero hindi niya itinala ang mga pangalan sa kanyang SOCE.

Bago si Sen. Marcoleta ay mas naunang pinadalhan ng show cause order si Sen. Chiz Escudero dahil naman sa pagtanggap nito ng campaign fund sa kontraktor na si Lawrence Lubiano dahil ipinagbabawal sa Omnibus Election Code ang pagtanggap ng kandidato ng donasyon sa mga kontratista, pero matapos ang imbestigasyon ay inabsuwelto ng Comelec si Sen. Escudero dahil si Mr. Lubiano naman daw ang nakatalag sa SOCE na nagbigay ng perang pangkampanya sa senador, at hindi naman daw ang pag-aari nitong construction firm.

Kaya’t ang tanong: Ano naman kaya ang "palusot" ng Comelec sa publiko sa gagawin nilang pag-absuwelto kay Sen. Marcoleta? Abangan!

XXX

ASTIG NA MANONG CHAVIT NATIYOPE? HIRIT NIYA REPORMA LANG DAW SA GOV'T. ANG NAIS NIYA AT HINDI RAW SIYA PARTE NG DESTABILIZERS NI PBBM -- Isa si former Ilocos Sur Gov. Chavit Singson sa lantarang nananawagan kay Pres. Bongbong Marcos (PBBM) na mag-resign na sa puwesto, at may panawagan din umano siya sa militar na alisin na ang suporta sa Presidente, at dahil diyan ay isa si Manong Chavit sa binabatikos ng mga Marcos loyalists vloggers na kabilang daw ito sa grupong nasa likod ng destabilization plot para patalsikin ang Pangulo sa puwesto.

Ito na ang siste, nang may magsampa sa Ombudsman ng mga kasong graft laban kay Manong Chavit ay waring ang astig na dating gobernador ay natiyope, iba na ang kanyang tono, reporma lang daw sa gobyerno ang panawagan niya, at hindi raw siya destabilizers, boom!

XXX

FAKE NEWS PALA ANG IPINAKALAT SA SOCIAL MEDIA NG MGA DDS VLOGGER NA INALISAN NI PBBM NG MGA SECURITY SI VP SARA, LUMITAW SA COA AUDIT REPORT NA SANGKATUTAK PA RIN ANG BODYGUARDS NG BISE PRESIDENTE -- Lumabas sa 2024 audit report ng Commission on Audit (COA) na 335 security personnels ni Vice Pres. Sara Duterte-Carpio ang patuloy na tumatanggap ng suweldo mula sa Armed Forces of the Philippines (AFP).

Kung ganu’n, fake news pala ang ipinakalat sa social media ng mga Duterte Diehard Supporters (DDS) vloggers na pinatanggalan ni PBBM ng mga security personnel si VP Sara, dahil lumitaw sa audit report ng COA na sangkatutak pa rin ang mga bodyguards ng bise presidente, period!

Ex-PACC Sec. Belgica, walang “K” mambatikos sa isyu ng korupsiyon

ni Pablo Hernandez @Prangkahan | December 6, 2025

AKALA NG PUBLIKO PALABAN SI CONG. SANDRO NA IPA-LIVE STREAMING ANG IMBESTIGASYON SA KANYA NG ICI PERO ATRAS DIN PALA, GUSTONG CLOSED-DOOR HEARING -- Matapos isabit ni former Ako Bicol Partylist Rep. Zaldy Co si Ilocos Norte 1st District Rep. Sandro Marcos sa Bicam insertions at flood control scandal ay palaban na inanunsyo ng presidential son na boluntaryo raw siyang haharap sa imbestigasyon ng Independent Commission for Infrastructure (ICI) kapag pinatawag siya ng komisyon.

Dahil sa tinuran ni Cong. Sandro ay inakala ng publiko na idedepensa niya ang kanyang sarili sa mga alegasyon sa kanya ni Zaldy Co sa pamamagitan ng live streaming sa social media, pero nang humarap na siya sa komisyon, eh ang inihirit ng presidential son ay executive session, na ibig sabihin closed-door hearing na sila-sila (Cong. Sandro, lawyers at ICI members) lang ang nakakaalam ng pinag-uusapan nila sa loob ng komisyon, pwe!

XXX

DAPAT IREKOMENDA NG ICI SA OMBUDSMAN NA KASUHAN NG PLUNDER SI CONG. PULONG -- Hindi sinipot ni Davao City 1st District Rep. Paolo Duterte ang imbitasyon sa kanya ng ICI kaugnay sa mga kuwestiyonableng flood control projects sa kanyang distrito na natuklasan nina ICI Special Adviser and Investigator, ret. Gen. Rodolfo Azurin at DPWH Usec. ret. Gen. Arthur Bisnar, at sa mga dokumentong isinumite ni ACT Teacher Partylist Rep. Antonio Tinio sa ICI na nagsasangkot sa Davao City congressman sa anomalya, at ang idinahilan ni Cong. Pulong ay isa raw siyang congressman at wala raw "K" ang ICI na itinatag ni PBBM na siya ay imbestigahan dahil magkahiwalay daw ang power ng legislative at executive.

Aba’y hindi pupuwede iyan na isnab-isnabin lang ni Cong. Pulong ang ICI dahil pera ng bayan ang sangkot dito, kaya’t dapat magpakita ng tapang ang komisyon, irekomenda na agad nila sa Ombudsman na sampahan ito ng kasong no bail na plunder dahil kung hindi nila ito kakasuhan ay malamang dedmahin na rin ng iba pang congressman na sangkot sa flood control scandal ang subpoena sa kanila ng ICI, period!

XXX

WALANG NAIPAKULONG NA CORRUPT SI FORMER PRESIDENTIAL ANTI-CORRUPTION COMMISSION SEC. BELGICA KAYA WALA SIYANG 'K' MAMBATIKOS SA ISYU NG CORRUPTION -- Isa si Duterte Diehard Supporter (DDS), former Presidential Anti-Corruption Commission (PACC) Sec. Greco Belgica sa batikos nang batikos sa talamak umanong corruption sa panahon ng Marcos administration.

Sa totoo lang tayo, na itong si Belgica ay walang "K" mambatikos sa isyu ng corruption dahil noong panahon ng Duterte admin, eh ang linaw naman ng nakasaad sa posisyon niya at ito ay "anti-corruption," pero nang matapos ang termino ni former Pres. Rodrigo Roa Duterte (FPRRD), at tanggal na siya (Belgica) sa puwesto, ay wala naman siyang naipakulong kahit isang corrupt, boom!

XXX

KUNG TALAGANG ANTI-POLITICAL DYNASTY NA SI SPEAKER BOJIE DY DAPAT LAHAT NG KAPAMILYA NIYANG POLITICIANS PAGBITIWIN NIYA SA PUWESTO -- Maituturing na "pa-pogi points" lang sa publiko ang statement noon ni Speaker Bojie Dy na suportado niya ang Anti-Political Dynasty Bill dahil nga base sa naisapublikong Statement of Assets, Liabilities and Net Worth (SALN) ng House speaker ay lumabas na sangkatutak ang mga kapamilya niyang pulitiko, tulad niya (Speaker Bojie) politicians din ang dalawa niyang anak, tatlong kapatid, isang manugang na babae at anim na pamangkin.

Kung nais ni Speaker Bojie na maniwala sa kanya ang publiko, isa lang ang dapat niyang gawin at ito ay pagbitiwin niya sa mga kasalukuyang posisyon ang mga kapamilya niyang politicians, at kapag nagawa niya 'yan, diyan pa lang maniniwala sa kanya ang taumbayan na anti-political dynasty na nga siya, period!