Pondo para sa sektor ng edukasyon, dapat maramdaman ng mga guro at estudyante

ni Leonida Sison @Boses | September 26, 2025

Kung tutuusin, ang dagdag na pondo para sa edukasyon ay hindi lang tinitingnan bilang biyaya mula sa gobyerno kundi isang obligasyon na matagal nang dapat naibigay. 

Taun-taon, paulit-ulit na ipinapako ang mga guro, magulang, at mag-aaral sa pangakong uunahin ang edukasyon. 

Kaya’t ang pag-apruba ng Kamara sa dagdag na bilyong piso para sa 2026 budget ng Department of Education (DepEd) ay karapat-dapat lamang, para sa matagal nang utang ng estado sa mga paaralan. 

Sa deliberasyon nitong linggo, tumaas sa P1.224 trilyon ang pondo ng sektor — ang pinakamalaking alokasyon sa kasaysayan at unang beses na naabot ng Pilipinas ang 4% benchmark ng United Nations Educational, Scientific and Cultural Organization (UNESCO).

Ang DepEd, na unang nagpanukala ng P928.52 bilyon, ay labis ang pasasalamat sa Kongreso, ngunit ang paalala ni DepEd Secretary Sonny Angara na ang halaga ng dagdag na pondo ay nakasalalay sa maayos at mabilis na implementasyon. 

Pinakamalaking bahagi ng dagdag-pondo ang P22.5 bilyon para sa Basic Education Facilities Fund na nakalaan sa pagpapatayo, pagkukumpuni, at pagpapabilis na magawa ng mga pasilidad gaya ng mga silid-aralan at upuan. Pinalakas din ang plano ng kagawaran na makipagtulungan sa mga local government unit (LGU) at pribadong sektor upang maiwasan ang pagkaantala sa mga proyektong pang-imprastraktura. 

Sa usapin ng mga mag-aaral na nasa laylayan, binigyan din ng dagdag na badyet ang mga espesyal na programa — P306 milyon para sa Alternative Learning System, P193 milyon para sa Special Needs Education, P79.6 milyon para sa Indigenous Peoples Education, at P26.25 milyon para sa Madrasah Education. 

At upang harapin ang epekto ng pandemya sa pagkatuto, makakatanggap ang ARAL Program ng P579.5 milyon para sa overload pay ng mga guro at P984 milyon para sa mga non-DepEd tutors. Hindi rin nakalimutan ang nutrisyon ng mga bata, ang School-

Based Feeding Program ay nadagdagan ng P1.88 bilyon bukod pa sa naunang P11.8 bilyon, upang matiyak na patuloy na may pagkain sa hapag ng milyun-milyong mag-aaral. 

Ang lahat ng ito ay naging posible matapos ire-align ng Pangulo ang P255 bilyon mula sa flood control projects ng DPWH. 

Maganda ang dagdag na pondo, pero ang tunay na sukatan ay hindi sa rami ng budget kundi sa bilis at bisa ng implementasyon. 

Sa bansang matagal nang problema ang kakulangan ng silid-aralan, upuan, pasilidad, oportunidad, at iba pa, ang bawat araw ng pagkaantala ng edukasyon ay nangangahulugan lamang ng pagnanakaw sa kinabukasan ng kabataan. 

Kaya naman ang dagdag-pondo ay totoong magpapabuti sa sektor na ito, subalit kailangang agad magkaroon ng resulta. 

Sa kinauukulan, hindi dapat puro pangako lamang para sa ating edukasyon, dapat maramdaman ito ng mga guro at mag-aaral.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

PBBM, dapat magpakita ng “kamay na bakal” hangga’t ‘di pa huli ang lahat

ni Ka Ambo @Bistado | September 25, 2025

Pinaiikot lang ang ordinaryong Pinoy ng mga kongresista at senador na nag-iimbestiga.

Alam naman nila ang sagot sa kanilang mga tanong.

----$$$--

Kumbaga sa titser, tanong nang tanong sa estudyanteng si Juan, pero sa aktuwal — alam naman niya ang sagot.

Halimbawa, sino ang pambansang bayani?Alam ng titser na si Dr. Jose Rizal ang sagot, pero bakit nagtatanong pa?

----$$$--

WALANG “insertion” at “unprogrammed” funds na magagalaw o magagamit nang “hindi alam” ng Speaker ng Kamara, Senate President, DBM chief at mismong mga department head.

Tanong mismo ni Senate President Tito Sotto sa engineer, hindi ba alam ng boss mo ang mga ginagawa mo?

Gusto ni Tito Sen — na ang sagot dapat ng engineer sa kanyang tinanong ay “oo” or “yes”.

----$$$--

ERE ang tanong: Hindi ba alam ng Senate President ang paggamit ng “insertion” at “unprogrammed funds” — ng anim na senador?

Sino ba ang pordarekord na “pinakamaraming beses na termino” sa Senado?

----$$$--

INIYAYABANG ni Sotto na hawak niya ang ‘record’ na may pinakamaraming beses na na-reelect sa Senate.

Pero, bakit siya ‘nagtatanong’ sa mga engineer tungkol sa “insertion” at “unprogrammed” funds na ginamit sa flood control projects scam?

Mas masasagot ‘yan mismo ni Sotto kaysa ng mga engineer.

----$$$--

MAHIHIRAPAN ang sinuman na sagutin ang tanong sa paggamit ng “pondo” sa GAA, NEP, “insertion” o “unprogrammed fund”, maliban sa mga senador.

Ang mga iyan ay lihim na proseso — at imposible na hindi alam ng Speaker ng Kamara at mismo ng Senate President.

Pinakahuli, imposible na walang basbas ng DBM na kumakatawan sa Malacañang.

-----$$$--

KAPAG walang alam o nagtatanga-tangahan ang Malacañang, DBM, Kamara, Senado at gabinete — sa alingasngas sa paglustay ng pondo — dapat ay pumasok dito ang COA, Ombudsman at Civil Service Commission.

Ang mga constitutional bodies na ito ay siyang dapat nagbabantay sa tatlong sangay ng gobyerno — ehekutibo, lehislatura at maging ang hudikatura.

----$$$--

MALINAW ang sitwasyon, palyado at dispalinghado ang ehekutibo, lehislatura at hudikatura, pero bakit inutil din ang constitutional body?

Sa ganyang sitwasyon at senaryo — mapanganib ‘yan dahil maaaring ilarawan ito bilang “failure” ng buong sistema ng gobyerno.

----$$$--

KAPAG nagkutsabahan ang tatlong sangay ng gobyerno dili kaya’y paralisado ang “balance of power” — at inutil ang constitutional bodies na dapat ay kumakastigo sa mga ito — saan patungo ang Republika ng Pilipinas?

Obligasyon at isang malaking hamon kay Pangulong Ferdinand Marcos, Jr. — na huwag kunsintehin ang kutsabahan, bagkus ay ipakita sa madla — na gumagana nang malusog ang probisyon ng Konstitusyon.

----$$$--

Dapat ay magpakita ng “kamay na bakal” si PBBM hangga’t hindi pa huli ang lahat.

Kapag tameme si junior — siya rin ang magdurusa -- at tatanggap ng parusa ng taumbayan.

----$$$--

ANG pagkakasangkot ng komisyoner ng Commission on Audit — ay hindi biro.

Ito ay konkretong ebidensya ng kabiguan ng demokratikong proseso na ipatupad ang esensiya ng Konstitusyon at demokrasya.

Kung dispalinghado ang proseso, saan tayo pupunta?

Sumagot kayo? Bakit kayo namumutla?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Cong. Zaldy Co, dapat i-persona non grata sa buong Bicol Region

ni Pablo Hernandez @Prangkahan | September 25, 2025

HATE NI SEN. BONG GO ANG MGA KURAKOT, KAYA KAYSA MANAKAW NA NAMAN ANG P255B FLOOD CONTROL PROJECT SA 2026 NATIONAL BUDGET, DAPAT ANG PONDO ILIPAT SA DOH-MAIFIP PARA MAITULONG SA MGA PASYENTENG NAKA-CONFINE SA OSPITAL -- Suportado ni Sen. Bong Go ang panukala ng Kongreso na ang P255 billion na para sa flood control projects ng Dept. of Public Works and Highways (DPWH) sa 2026 national budget ay i-realign sa Medical Assistance to Indigent and Financially Incapacitated Program (MAIFIP) ng Dept. of Health (DOH).

Ayon kasi kay Sen. Bong Go, kaysa manakaw at ginagawang gatasan ng ilan ang flood control projects, ay mas mainam na ilaan ito (P255B) sa MAIFIP na pantulong sa mga kababayang pasyente sa mga DOH hospital at specialty centers hospital at private hospitals.

Patunay ang statement na iyan ni Sen. Bong Go na hate niya ang mga kurakot at may malasakit sa mamamayan, period!

XXX

DAPAT I-PERSONA NON GRATA SI CONG. ZALDY CO SA BUONG BICOL REGION -- Sa mga isinangkot ni Bulacan DPWH 1-former District Engineer Henry Alcantara sa mga senador, dating senador, kongresista at dating kongresista, ay si Ako Bicol Partylist Rep. Zaldy Co, former chairman ng House Committee on Appropriations sa flood control projects scam, lumalabas na ang partylist congressman na ito ang may pinakamalaking natanggap na kickback, at nakumpirma ito nang sabihin naman ni Bulacan DPWH-1 former Asst. District Engineer Brice Hernandez na may pagkakataon pa raw na nag-deliver sila ng P1 billion kickback kay Cong. Zaldy Co.

Mantakin n’yo, ginamit ni Zaldy Co ang pangalang Bicol sa itinatag niyang Ako Bicol Partylist para iluklok siya ng mga kapwa niya Bikolano sa Kamara, tapos ang gagawin pala ay ‘mangurakot’ sa kaban ng bayan.

Dapat iparamdam ng mga miyembro ng local gov’t. units (LGUs) sa Albay, Camarines Sur, Camarines Norte, Catanduanes at Masbate ang kanilang galit, magkaisa silang magpasa ng resolusyon na idinedeklara nilang persona non grata sa buong Bicol region si Zaldy Co, period!

XXX

PUMAPANGIT ANG IMAHE NI SEN. MARCOLETA SA PAGPUPUMILIT NA GAWING STATE WITNESS ANG MAG-ASAWANG DISCAYA -- Dapat nang tantanan ni Sen. Rodante Marcoleta ang pagpupumilit niyang maging state witness ang mag-asawang Curlee at Sarah Discaya nang walang kapalit, na ibig niyang sabihin ay hindi babawiin ng gobyerno ang higit P207 billion ‘in-scam’ ng mag-asawang Discaya sa kaban ng bayan.

Sa totoo lang, pumapangit ang kanyang imahe sa publiko, naba-bash siya nang todo sa social media sa pagtatanggol at pagpupumilit na gawing state witness ang mag-asawang scammer na ito, boom!

XXX

KAPAG NAGLABAS NG WARRANT OF ARREST ANG ICC LABAN KAY SEN. BATO, BAKA MATULAD KAY FPRRD NA PUWERSAHANG DINALA SA THE HAGUE AT IKINULONG SA ICC JAIL -- Matapos basahan ng mga kasong murder si former Pres. Rodrigo Roa Duterte sa International Criminal Court (ICC) ay nasama ang mga apelyidong "Dela Rosa" at "Aguirre" sa public redacted version na ipinost sa ICC website.

Wala mang mga first name, pero ito ay tumutukoy kina former Philippine National Police (PNP) chief, at ngayo’y Sen. Ronald Dela Rosa at former Justice Sec. Vitaliano Aguirre.

Noong si Sen. Chiz Escudero pa ang Senate President ay nagpalabas ito ng statement na hindi niya papayagang arestuhin si Sen. Dela Rosa sa loob ng Senado sakaling maglabas ng warrant of arrest laban sa kanya (Dela Rosa) ang ICC.

Ang problema ngayon ni Sen. Dela Rosa ay hindi niya kaalyado ang Senate President na si SP Tito Sotto, kaya kung sakaling maglabas ng warrant of arrest sa kanya ang ICC ay malaki ang posibilidad na matulad siya kay FPRRD na puwersahang dinala ng arresting law enforcers sa The Hague (The Netherlands) at ikinulong sa ICC jail, period!