Mala-palasyo, mala-mall na bahay ng pamilya Discaya, dapat kumpiskahin din at isubasta

ni Pablo Hernandez @Prangkahan | November 2, 2025

PARA MAGTIWALA ANG MAMAMAYAN SA ICI, ISAPUBLIKO LAHAT NG MGA SEN. AT CONG. NA MAY INSERTIONS SA BICAM -- Nawala ang tiwala ng publiko sa itinatag ni Pres. Bongbong Marcos (PBBM) na Independent Commission for Infrastructure (ICI) dahil nagsagawa ito ng closed-door investigation sa mga sangkot sa flood control projects scam, na ‘ika nga kahit inanunsyo na ng ICI na isasapubliko na nila ang kanilang mga next hearing ay matabang pa rin ang pagtanggap dito ng mamamayan.

Kung nais ng ICI na makabawi sila ng pagtitiwala ng publiko, simple lang ang dapat nilang gawin at ito ay gumawa sila ng sarili nilang website at ilagay dito ang lahat ng mga senador at kongresista na nag-insert sa bicameral budget hearing ng mga flood control project, period!

XXX

POLITICAL FAMILY NG ESPINA SA BILIRAN, KINASUHAN NG PLUNDER, DAPAT GANYAN ANG GAWIN SA IBANG MAY POLITICAL DYNASTY NA NASASANGKOT SA KATIWALIAN, BUONG ANGKAN KASUHAN -- Isang nagngangalang Lord Allan Garcia ang nagsampa ng kasong plunder sa Ombudsman laban sa magkakapatid na sina Biliran Gov. Roger Espina, Vice Gov. Roselyn Espina-Paras, Rep. Gerryboy Espina at sa anak ni Gov. Roger na si Naval, Biliran Mayor Gretchen Espina, na ayon sa nagrereklamo ay sangkot ang pamilya Espina sa mga substandard at mga depektibong infrastructure project sa lalawigan.

Kung totoo ang alegasyon at sa huli mapatunayang guilty ang political family na ito sa Biliran ay maaari pala silang magsama-sama sa kulungan.

Aba’y iyan pala ang magandang gawin ng mamamayan sa mga political dynasty, kung may ginawang katiwalian, ang buong angkan nila, sampahan ng kasong plunder, boom!

XXX

MALA-PALASYO, MALA-MALL NA BAHAY NG PAMILYA DISCAYA KUMPISKAHIN DIN AT ISUBASTA -- Sa Nobyembre 15, 2025 ay uumpisahan na ng Bureau of Customs (BOC) ang pagbebenta sa mga smuggled na luxury cars ng pamilya Discaya.

Sana kapag ang lahat ng luxury cars ng mag-asawang Curlee at Sarah Discaya ay naisubasta na, ang next na kumpiskahin ng gobyerno at isubasta ay ang mala-palasyo at mala-mall na tirahan ng pamilya Discaya, kasi hindi naman nila pera ang ginasta sa pagpapagawa ng napakarangya nilang mga bahay kundi mula ‘yan sa pera ng bayan na in-scam nila, period!

XXX

PARAMI NANG PARAMI ANG MGA KURAKOT KAYA PARAMI RIN NANG PARAMI ANG MGA NAGHIHIRAP SA ‘PINAS -- Sa latest survey ng Social Weather Stations (SWS) ay 50% o kalahati ng populasyon ng pamilyang Pilipino ang nagsabi na nananatili silang mahirap sa panahon ng Marcos administration.

Dahil parami nang parami ang mga kurakot sa bansa, hindi naman talaga kataka-taka na parami rin nang paraming pamilyang Pinoy ang patuloy na nakakaranas ng hirap sa ‘Pinas, tsk!

Solar-powered ferry, bibiyahe na

ni Leonida Sison @Boses | November 2, 2025

Magandang balita para sa mga komyuter na sawa at pagod na sa pagbiyahe, sabayan pa ng mabigat na trapik. Ang pagdating ng solar-powered ferry sa Pasig River Ferry Service ay isang malaking hakbang tungo sa mas malinis at sustainable na transportasyon sa ating bansa. 

Ang inobasyong ito ay bunga ng talino at malasakit sa kalikasan ng mga Pinoy, na pinondohan ng Department of Science and Technology (DOST) sa ilalim ng e-mobility program. Ang M/B Dalaray ay isang locally developed electric passenger ferry (e-ferry) na kayang magsakay ng hanggang 40 pasahero. Ito ay all-electric battery-powered ferry na mas tahimik kumpara sa tradisyonal o conventional ferry, at kinabitan ng mga solar panels sa bubong na siyang nag-o-operate ng mga accessories at fixtures. Mas matipid din ito dahil P45 lamang ang gastos kada kilometro kumpara sa P135 ng karaniwang ferry, kung saan bibiyahe na ngayong November. 

Ang proyektong ito ay hindi lang tungkol sa teknolohiya, kundi pati na rin sa pagbabago ng mindset tungo sa climate-conscious innovation. Sa isang bansa na nakakaranas ng climate change o global warming, panahon na upang itulak ang ganitong mga green transport systems. Ang naturang e-ferry ay simbolo ng pag-asa para sa isang malinis at mas sustainable na transportasyon, at ito ay environment friendly pa. Kung magpapatuloy ang inisyatiba na ito, hindi malayong maging normal na sa atin ang mga e-ferries, e-jeeps, at e-buses. 

Ang pagbabago ay nagsisimula sa maliliit at ngayon, sa bawat paglayag ng e-ferry, umaagos ang pag-asa para sa isang mas maginhawang pagbiyahe.

Gayundin, ang M/B Dalaray ay isang patunay na kayang makipagsabayan ng mga Pinoy sa makabagong teknolohiya, basta’t may suporta. Ang proyektong ito ay bunga ng pagtutulungan ng mga institusyon tulad ng University of the Philippines Diliman Electrical and Electronics Engineering Institute at ng DOST. 

Sa pagdating ng solar-powered ferry, hindi lang ang Pasig River ang muling mabubuhay, pati ang pag-asa nating maging isang green nation. Hindi lamang iyon, isang malaking hakbang tungo sa mas malinis na hangin, mas tahimik na na pagbiyahe, at mas sustainable na transportasyon. 

Ang pagkakaroon ng e-ferry ay isang halimbawa ng kung paano natin maaaring gamitin ang mga renewable energy sources gaya ng solar power upang mabawasan ang ating carbon footprint. 

Isang malaking tagumpay din ito para sa mga Pinoy na naniniwala sa kapangyarihan ng teknolohiya at inobasyon, at paalala na kayang-kaya nating lumikha at bumuo ng mga bagay basta may determinasyon, pagtutulungan at malasakit, na makabubuti rin sa ating kalikasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Life expectancy ng tao, aabot ng 200 taon

ni Ka Ambo @Bistado | November 1, 2025

Araw ng mga Kaluluwa, patay at santo ngayon.

Sumalangit nawa ang mga yumao.

----$$$--

SA Pilipinas, emosyonal ang paggunita sa araw ng ito.

Nagbabalik kasi ang alaala ng yumao sa mga araw na ito at tumitingkad kung paano nila ipinadama ang pagmamahal habang sila ay nasa lupa.

----$$$--

GUSTONG ibalik ng mga naulila ang naramdamang pagmamahal na ibinahagi ng mga yumao nang sila ay nabubuhay pa — pero wala na ang pisikal nilang katawan.

Dahil dito, naniniwala sila sa kaluluwa na kakambal ng pisikal na katawan — at ang naturang pisikal na katawan ay kakambal ng kaluluwa.

-----$$$--

SA pinakahuling ulat ng siyensiya, ang DNA ng pisikal na katawan ng tao — ay natuklasang nagmula pa sa kalawakan — at sa aktuwal — interstellar o sa kabila pa ng solar system.

Sa pagdalaw ng 3I/ATLAS comet na may dala-dalang yelo, water vapor, carbon dioxide at tubig — nagpapatunay dito na ang “kasaysayan ng pisikal” na tao ay nag-ugat sa kabila pa ng solar system.

-----$$$--

ANG DNA ay hindi nakikita ng mata — mas magaan ito sa pinakamaliit pang pisikal na bagay — at palutang-lutang sa kalawakan — gaya ng pamamasyal ng 3I/ATLAS comet.

Ibig sabihin, sakto ang description at paggamit ng terminong “langit” — dahil ang pisikal at maging ang kaluluwa — ay babalik sa kalawakan.

Kumbaga, tumpak ang usal na: “Suma-Langit-Nawa!”

-----$$$--

ANG problema — ang tinutukoy natin dito ay ang naturelasa ng tao — sa punto de bista ng siyensiya.

Walang pinag-uusapan dito kung masama o mabuti ang tao — lahat ay sasanib sa kalawakan.

-----$$$--

SAMANTALA, dahil sa artificial intelligence, synthetic intelligence, automation at quantum physics -- at batay sa ipinakikita ng 3I/ATLAS comet — may ibang “physics” na hindi pa natutuklasan ng mga siyentista (scientist).

Sa malaon at madali, dahil sa quantum physics at synthetic intelligence — masusukat na sa loob ng laboratory ang naturalesa ng “kaluluwa”.

----$$$--

SAKALING masakop ng physics ang kaluluwa, malinaw na may lihim na karunungan ang napapaloob sa mga sitas ng Bibliya at doktrina ng mga relihiyon sa balat ng lupa.

Ibig sabihin, ang relihiyon, sekta at mistisismong ipinamana ng mga ninuno — ay higit na may “advance learning” sa ating existence.

----$$$--

Sa loob ng isang dekada mula ngayon — ang life expectancy ng tao ay lalawig at maaaring madoble — puwedeng maging 200 taon imbes na 100 taon lamang.

Nangangahulugan ding totoo at hindi lang literal na nabuhay si Matusalem ng halos isang libong taon sa lupa.

-----$$$--

TALIWAS kay Matusalem na inilalarawan na ugod-ugod at kulubot ang balat — ang mga tao sa ating henerasyon ay mananatiling makisig at makinis ang kutis — kahit higit nang 100 taong singkad.

-----$$$--

ANG paggunita ng All Saints Day at All Souls Day ay hindi lamang pag-alaala sa mga patay, bagkus ay paggunita rin sa hinaharap ng mga tao.

Iba na ang naturalesa ng tao sa nagdaang 100 taon. At maiiba rin ang naturalesa nito sa susunod pang isang siglo.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.