Mga mayor ng Cebu na nag-travel abroad kahit may paparating na bagyo, dapat suspendihin para ‘di pamarisan

ni Pablo Hernandez @Prangkahan | November 12, 2025

PARA HINDI PAMARISAN NG IBANG ALKALDE, DAPAT SUSPENDIHIN NI DILG SEC. JONVIC REMULLA ANG MGA MAYOR NG CEBU NA NAGSIPAG-EUROPE PA KAHIT MAY PAPARATING NA BAGYONG TINO -- Hinihingi ni Sec. Jonvic Remulla ng Dept. of the Interior and Local Gov’t. (DILG) sa Cebu government ang listahan o pangalan ng mga alkalde sa lalawigan na nagawa pang mag-travel sa Europe sa kabila na may babala na ang PAGASA na may paparating na malakas na bagyo na ang pinakatumbok ay ang probinsyang ito.

Tama iyang ginawa ni Sec. Jonvic at kapag napatunayan sa imbestigasyon na hindi naman importante at pagliliwaliw lang sa Europe ang pakay ng mga alkaldeng ito, dapat suspendihin agad sila para hindi pamarisan ng ibang mayor dahil hindi talaga katanggap-tanggap na alam naman nilang sasalantain ng Bagyong Tino ang mga nasasakupan nilang cities at municipalities sa Cebu, eh mga nagsipaglayas, mga nagsipag-Europe pa, mga pwe!

XXX

DAPAT MAGKAISA ANG MAMAMAYAN NA TULIGSAIN ANG MGA MINING, QUARRYING AT LOGGING COMPANIES NA SUMISIRA SA SIERRA MADRE – Bagama’t napakalakas ng Bagyong Uwan, pero ito ay hindi nakapaminsala nang husto matapos na malusaw nang bumangga sa mga kabundukan ng Sierra Madre sa Luzon.

Hindi lang ang Super Typhoon Uwan ang pinahihina ng Sierra Madre, kundi marami pang ibang bagyo na kapag dumaan sa kabundukang ito ay talaga namang nalulusaw kaya’t hindi gaanong nakakapaminsala sa mga lugar at taumbayan.

Ang Sierra Madre ay biyaya ng Panginoon na dapat ingatan at pahalagahan dahil pinuprotektahan nito ang mamamayan laban sa mga mapaminsalang mga bagyo, kaya’t dapat magkaisa ang mga Pinoy na tuligsain ang mga mining, quarrying at logging companies na sumisira sa kabundukang ito, period!

XXX

BUTI PA SI BULACAN GOV. DANIEL FERNANDO NILABANAN ANG MGA MINING, QUARRYING AT LOGGING COMPANIES NA SUMISIRA SA SIERRA MADRE, ANG IBANG GOV. SA LUZON WA’ PAKI -- Sa ngayon ay isa pa lang sa mga gobernador sa Luzon ang nagpakita ng malasakit sa Sierra Madre, at ito ay si Bulacan Gov. Daniel Fernando na noong August 2022 ay nagpalabas ng executive order na nagbabawal sa mga mining, quarrying at logging companies na wasakin ang parte ng kabundukang ito (Sierra Madre) sa nasasakupan ng Bulacan.

Kung may malasakit ang ibang gobernador sa kanilang mga kababayan at sa kalikasan, tularan nila si Gov. Fernando, pagbawalan din nila ang mga mining, quarrying at logging companies sa ginagawa ng mga ito na pagwasak sa nasasakupan nilang kabundukan ng Sierra Madre, plis lang!

XXX

HINDI PALA SAFE SI SEN. DELA ROSA SA BAGONG SC EXTRADITION RULES --Sinabi ni Atty. Michael Tiu, legal analyst ng University of the Philippines (UP)-College of Law na kung sakaling may warrant of arrest na ang International Criminal Court (ICC) laban kay Sen. Ronald Dela Rosa sa posibleng ikaso sa kanya na crimes against humanity ay hindi raw maaaring i-apply dito ang bagong inilabas na extradition rules ng Supreme Court (SC), dahil hindi umano ito kaso na may usapin tungkol sa extradition, at sa halip ang kailangan daw gawin ng pamahalaan ay dalhin at isuko ito sa pamamagitan ng transfer of custody sa ICC sa The Hague, The Netherlands.

Dahil sa sinabing iyan ng UP-legal analyst, hindi pala safe si Sen. Dela Rosa sa bagong extradition rules ng SC, na kapag may warrant of arrest na siya, kapag lumabas siya ng Senado, sakote ang aabutin niya sa Interpol, boom!

Quarrying, pagmimina at pagtotroso, ipagbawal na

ni Leonida Sison @Boses | November 12, 2025

Dapat na hindi lang sa tuwing may bagyo naaalala ang mga bundok na tagapagsanggalang natin, dahil habang tayo’y natutulog sa ingay ng ulan, sila ang tahimik na humaharang sa hagupit ng kalikasan. 

Kaya marahil, muling umusbong ang panawagan ng mga mamamayan na protektahan ang mga kabundukan tulad ng Sierra Madre, Cordillera Range, at Caraballo Mountains, mga tinaguriang “bantay ng Luzon” laban sa mga super typhoon gaya ni “Uwan”. 

Habang nananalasa ang unos, sila ang unang sumasangga sa lupit ng malalakas na hangin at ulan, at dahilan kung bakit maraming bayan ang ligtas hanggang ngayon. 

Ang Sierra Madre, ang tinaguriang “backbone of Luzon,” na umaabot ng mahigit 540 kilometro mula Cagayan hanggang Quezon, isang likas na pader laban sa bagyo, baha, at pagguho ng lupa. Mismong Climate Change Commission ang kumilala rito bilang “first line of defense” ng bansa laban sa mga kalamidad. 

Ayon sa isang storm chaser, hindi tuwirang napipigilan ng Sierra Madre ang bagyo bago ito tumama sa lupa, subalit malaki ang ambag nito sa pagpapahina ng unos pagkapasok sa kapatagan. Sa madaling sabi, ito ang unang panangga at humaharang sa mga hampas ng bagyo para hindi tuluyang magwakas ang mga lungsod sa dala nitong delubyo. 

Maging si Pangulong Ferdinand Marcos, Jr. ay kumilala sa mahalagang papel ng Sierra Madre sa pagprotekta sa Luzon. Paliwanag ng Malacañang, nakita mismo ng Pangulo kung gaano kalaki ang naitulong ng Sierra Madre sa pagbawas ng pinsalang dulot ni “Uwan”. 

Gayunman, sa likod ng kagandahan nito ay ang tumitinding banta ng illegal logging, mining, at quarrying na dahan-dahang kumikitil sa kagubatan. 

At habang patuloy ang papuri, tahimik namang umiiyak ang kalikasan. Ang mga punong dating payapa ay unti-unting napuputol, at ang mga bundok ay nagiging hubad sa harap ng sakim na pagmimina at walang habas na pagtotroso. 

Kahit may mga programa tulad ng Sierra Madre Natural Park at National Greening Program, kulang pa rin ang tunay na pangangalaga rito. 

Ang mga bundok ay hindi lang tanawin, ito ang ating tahanan at kalasag. Kung hindi natin ito poprotektahan, darating ang panahong wala nang haharang sa unos, at tayo mismo ang mananagot dito. 

Ang panawagan ay simple lamang, itigil ang pagsira, simulan ang pag-alaga at pagprotekta sa ating kabundukan. Dahil kung may tunay na bayani sa bawat hagupit ng bagyo, ito ay ang mga bundok na tahimik na nagsasakripisyo para sa ating kaligtasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Politicians na sanhi sa flood control scam, sure win pa rin sa eleksyon dahil mga botante madaling makalimot, buwisit!

ni Pablo Hernandez @Prangkahan | November 11, 2025

MANANALO PA RIN SA HALALAN SA 2028 ANG MGA POLITICIAN NA SANGKOT SA FLOOD CONTROL SCAM DAHIL ANG MGA BOTANTE MADALING MAKALIMOT KAPALIT NG BOTO NILA -- Nang mabulgar ang flood control projects scam ay nagpakita ng matinding galit ang taumbayan sa mga politician na sangkot sa katiwaliang ito, at nadagdagan pa ang galit ng mamamayan nang magkaroon ng mga lampas-tao, lampas-bahay na baha na kumitil sa maraming buhay at sumira sa maraming ari-arian.

Kaya kung sa panahong ito magkakaroon ng halalan, siguradong talo na ang lahat ng politicians na sangkot sa flood control projects, kaya lang ang next election ay sa 2028 pa, at ang panahon ng halalan ay nagaganap mula Pebrero hanggang Mayo, panahon ito ng summer o hindi tag-ulan.

Ang nais nating ipunto rito ay dahil walang ulan, walang baha sa panahon ng halalan,

limot na ng mga botante na sila ay binaha dahil sa kagagawan ng mga pulitikong sangkot sa flood control projects scam, tapos idagdag pa ang datung na pang-vote buying ng mga kurakot, sure win pa rin sa eleksyon ang mga ‘buwayang’ politician na

garapalang nang-i-scam sa kaban ng bayan.

Iyan ang malungkot na nangyayari sa ‘Pinas, ang majority ng mga mamamayan ay madaling makalimot sa ginawang pangungurakot ng mga politician, na ibinoboto at ipinapanalo pa rin nila sa halalan ang mga ‘buwayang’ pulitiko kapalit ng ipinambabayad sa kanilang mga boto, tsk!

XXX

PAALALA SA MGA KURAKOT NI ICI CHAIRMAN ANDRES REYES, WALANG TALAB SA MGA ‘BUWAYA’ SA PAMAHALAAN AT SA MGA SCAMMER NA KONTRAKTOR -- Naputakti nang batikos si Independent Commission for Infrastructure (ICI) Chairman Andres Reyes na habang sila ay nagpapa-presscon patungkol sa resulta ng kanilang imbestigasyon sa flood control projects ay naglabas siya ng kartolina na may nakasaad na "what the world needs now is love, not greed, not selfishness" o sa wikang Pnoy ay "ang kailangan ng mundo ngayon ay pag-ibig, hindi kasakiman at hindi makasarili" na ‘ika nga, bilang pagpapaalala niya ito sa mga nasasangkot sa flood control scam.

Mababatikos talaga siya kasi bilang chairman ng ICI ay dapat magpakita siya ng tapang laban sa mga kurakot at hindi magpakita ng ganyang "recollection" dahil sa totoo lang, ang ganyang uri ng paalala ay walang talab sa mga ‘buwaya’ sa pamahalaan at sa mga scammer na kontraktor, period!

XXX

HANGGANG NGAYON 'NGANGA' LANG SI SEN. JV SA ETHICS COMPLAINT NI ATTY. ACERON LABAN KAY SEN. ESCUDERO – “Does the Senate Ethics Committee function?” Ito ang tanong at open letter kay Sen. JV Ejercito, chairperson ng Senate Committee on Ethics, ni Atty. Marvin Aceron dahil ang isinampa niyang ethics complaint laban kay Sen. Chiz Escudero kaugnay sa pagtanggap nito ng P30 million campaign funds sa kontraktor na si Lawrence Lubiano ay hanggang ngayon ay hindi pa inaaksyunan ng Senado, hindi pa rin inaaksyunan ni Sen. JV.

Sa totoo lang, may punto naman talaga si Atty. Aceron na mainip at manguwestiyon kasi nga naman ay noon pang October 2, 2025 niya isinampa ang ethics complaint laban kay Sen. Escudero, pero higit isang buwan na, “Nganga” lang si Sen. JV, wala siyang aksyon sa reklamong ito laban sa kapwa niya senador, boom!

XXX

KUNG MAY IPINAIRAL NA DUE PROCESS SINA FPRRD AT SEN. DELA ROSA SA KAMPANYA KONTRA DROGA NOON, WALA SANA SILANG KASO SA ICC AT HINDI SANA HUMIHINGI NGAYON NG DUE PROCESS -- Matapos kumalat ang balitang may inilabas umano na warrant of arrest laban sa kanya ang International Criminal Court (ICC) kaugnay sa kasong crimes against humanity, ay nanawagan ang kampo ni Senator, former Philippine National Police (PNP) chief Ronald Dela Rosa ng due process, at ganyan din ang hiling ng kampo ni dating Pangulong Rodrigo Roa Duterte (FPRRD) na pagkalooban ng due process ang ex-president na kasalukuyang nakapiit sa ICC jail.

Kung sana noong panahon ng Duterte administration ay nagpairal ang ex-Pres. Duterte at ex-PNP Chief Gen. Dela Rosa ng due process sa kampanya laban sa droga, hindi nangyari ang bloody drug war, hindi sana nakasuhan sa ICC, at hindi sila ngayon humihingi ng due process, sa kinakaharap na kaso ng dating pangulo na crime against humanity, period!