Sa mga kurakot sa gobyerno, si Cong. Zaldy Co ang ‘pinakatulisan’ sa lahat

ni Pablo Hernandez @Prangkahan | September 24, 2025

MAS MALAKI PA ANG KICKBACK NG PARTYLIST REP. KAYSA 3 SENADOR KAYA LUMALABAS NA SA MGA KURAKOT SA GOBYERNO, SI CONG. ZALDY CO ANG ‘PINAKATULISAN’ SA LAHAT -- Isinangkot na ni Dept. of Public Works and Highways (DPWH) Bulacan 1, former District Engr. Henry Alcantara sa flood control project scam sina Senators Joel Villanueva, Jinggoy Estrada, ex-Sen. Bong Revilla, former DPWH Usec. Roberto Bernardo, dating Usec. at ex-Caloocan City Rep. Mitch Cajayon at Ako Bicol Partylist Rep. Zaldy Co, former chairperson ng House Committee on Appropriations.

Sa mga pinangalanang ito ni ex-DE Alcantara, lumabas na si Cong. Zaldy Co ang may natanggap na pinakamalaking kickback na umabot sa bilyun-bilyong piso.

Mantakin n’yo, mas malaki pa ang kickback ni Co kaysa sa tatlong senador na itinuga ni Alcantara, at dahil d’yan lumalabas ngayon na sa mga kurakot sa gobyerno, ang partylist representative na ito (Zaldy Co) ang ‘pinakatulisan’ sa lahat, period!

XXX

FPRRD, BINASAHAN NA NG MGA KASONG MURDER KAYA ‘SUNTOK SA BUWAN’ NA MAKALAYA PA SIYA SA ICC JAIL -- Matapos ianunsyo ni Vice Pres. Sara Duterte-Carpio na may bansa na raw na tatanggap sa kanyang amang si former Pres. Rodrigo Roa Duterte (FPRRD) sakaling pagbigyan ng International Criminal Court (ICC) ang hiling nilang interim release sa dating pangulo, ay isinapubliko ng ICC na binasahan na nila ng mga kasong murder si ex-PDuterte.

Ang ginawang iyan ng ICC na basahan ng mga murder case si FPRRD habang may nakabinbing interim release sa kanya, ay maituturing na “suntok sa buwan” na makalaya pa ang ex-president sa ICC jail sa The Netherlands, tsk!

XXX

P46B PANG-FLOOD CONTROL PROJECTS DAPAT LANG I-REALIGN SA PANG-AYUDA SA MAHIHIRAP KAYSA MAPUNTA SA ‘BUWAYANG’ POLITICIANS, DPWH OFFICIALS AT MGA KONTRAKTOR -- Nais ni Minority Leader, 4Ps Partylist Rep. Marcelino Libanan na ang P46 billion flood control projects ng Dept. of Public Works and Highways (DPWH) na nakapaloob sa 2026 national budget, ay i-realign at ilipat sa mga tanggapan nina Sec. Rex Gatchalian ng Dept. of Social Welfare and Development (DSWD) para sa ayuda program na Assistance to Individuals in Crisis Situation (AICS) at Sec. Bienvenido Laguesma ng Dept. of Labor and Employment (DOLE) para sa ayuda program naman ng

Tulong Panghanapbuhay sa ating Disadvantage/Displaced Workers (TUPAD).

Sa panahon na wala pang nakakasuhan at naipapakulong, dapat lang na ang mga mahihirap na kababayan ang makinabang sa P46B na ‘yan kaysa mga ‘buwayang’ politician, DPWH officials at mga kontraktor, period!

XXX

DAPAT KASUHAN NG OBSTRUCTION OF JUSTICE ANG MGA MAKABAYAN BLOC REPRESENTATIVES DAHIL SA PAGTATANGGOL NILA SA MGA KABATAANG NANGGULO SA MANILA -- Kahit kailan talaga ay anti-pulis itong mga partylist na miyembro ng Makabayan bloc dahil mga parak pa ang sinisisi nila sa nangyaring gulo sa Maynila, na kesyo hindi raw nagpatupad ng maximum tolerance ang mga pulis at basta na lang daw pinaghuhuli at nagsagawa ng police brutality sa mga kabataan.

Kita naman sa mga kumalat na video na nagpairal ng maximum tolerance ang mga pulis at kita rin sa mga video na mga kabataan ang unang gumawa ng gulo, pinagbabato ang mga parak kaya marami sa kanila ang nasugatan, tapos nanunog pa ng isang trak, isang motorsiklo, sinira ang mga kagamitan ng Manila LGU at pribadong establisimyento, ninakaw pa ang vault ng isang motel sa Maynila, kaya natural lang na aaksyon na ang mga otoridad para dakpin ang mga nanggugulo.

Dapat sa mga Makabayan bloc partylist representatives na ito ay sampahan ng pulisya ng kasong obstruction of justice para maturuan ng leksyon dahil hindi nila dapat kinakampihan ang mga gumawa ng mali, naging marahas, nanggulo sa rally sa Maynila, boom!

Dignidad at propesyon, ‘di dapat ibenta dahil lamang sa pera

ni Leonida Sison @Boses | September 24, 2025

Masakit isipin na kapag ang mismong inaasahan nating magtuturo ng integridad sa atin ay siya ring unang lumalapastangan dito.

Sa halagang P10,000, isang guro ang nahuli habang kinukunan ng litrato ang test questionnaire ng Licensure Examination for Teachers (LET) noong Setyembre 21, 2025. 

Ito ay isang pagtataksil sa propesyon at sa tiwalang ibinigay sa kanya. Ang suspek ay isang senior high school teacher at watcher ng nasabing exam.

Ayon sa Professional Regulation Commission-Davao (PRC-11), lumabas sa imbestigasyon na itinago niya ang test paper, at pumasok sa banyo, at doon kinunan ng larawan gamit ang cellphone. Nang walang umamin kung kanino ang cellphone, idinaan ito sa biometric match at tumugma ito sa guro.

Lalong nakadidismaya nang aminin umano nito na ibinenta ang larawan sa isang review center kapalit ng P10,000. Mas masaklap isipin nang inamin niyang nagawa na rin niya ito noong Marso, pero hindi nahuli at nakalusot. 

Sinabi ng National Bureau of Investigation (NBI) at PRC, malinaw ang paglabag sa Republic Act of 8981 o PRC Modernization Act, na nagtatakda ng mabigat na parusa sa exam leakage — pagkakakulong, disqualification mula sa pagkuha o supervising examinations, hanggang sa pagpapawalang-bisa o revocation ng kanilang PRC license.

Posible ring maharap sa kasong fraud at falsification sa ilalim ng Revised Penal Code. 

Hindi ito basta simpleng pagkakamali. Ito’y pagyurak sa integridad ng pagsusulit na susi sa hinaharap ng mga gurong nangangarap magturo nang marangal. 

Ang LET ay hindi lamang papel na sasagutan o exam, ito ang salaan kung sino ang karapat-dapat humubog sa mga susunod na henerasyon ng mga mag-aaral. Kapag ito’y dinungisan, ang buong edukasyon ang naapektuhan. Maging halimbawa sana ang kasong ito, at hindi puwedeng palagpasin lang ng simpleng patawad o paghingi ng sorry ang ganitong kasalanan. 

Ang mga guro ay inaasahang magiging ilaw ng lipunan at gabay ng mga mag-aaral at hindi ng katiwalian, kaya nararapat lang na ang PRC, NBI, at iba pang ahensyang kaugnay nito ay hindi lang parusahan ang nasabing indibidwal, kundi busisiin din ang mga review center na nakikipagsabwatan para kumita sa pandaraya.

Kung tutuusin ang edukasyon ay dapat pundasyon ng bansa, kailangang bantayan ito laban sa lahat ng uri ng katiwalian. Hindi maaaring ituring na guro kung nagagawa naman nito ang pandaraya. Isa siyang paalala kung paano tuluyang bumabagsak ang sistema kapag ang dignidad ay naibebenta. 

Sa sinumpaang propesyon, kailangan ng katapatan at kabutihan, dahil ang pagiging guro o mentor ay hindi lamang isang trabaho, kayo ang humuhubog ng mga kabataang nangangarap ng magandang kinabukasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga raliyista, kitang may kani-kaniyang agenda

ni Ka Ambo @Bistado | September 23, 2025

May mga nagtatanong: Mairaos kaya ni PBBM ang 6-year term?

Sa ipinakitang bugso ng mga nagprotesta noong Linggo, mahirap sagutin ang tanong.

----$$$--

Magkakaiba kasi ang agenda ng mga raliyista.

Sa totoo lang, isang grupo riyan ay maka-Marcos.

Obvious na ang ilang pangkat ay maka-Duterte.

----$$$--

MALINAW din ang kulay ng mga maka-CPP-NPA-NDF na kasama sa nagprotesta.

Mayroon din nagpapahiwatig ng “maka-kanan” o linyang military.

----$$$--

MAY mga nagprotesta, para lamang makaganti sa pagsasarado ng kanilang establisimyento partikular ang media network.

Mayroon ding lehitimong grupo ng mga kabataan at estudyante.

----$$$--

SA isang video clip, mayroon ding vendor tulad ng nag-aalok ng fishball at kikiam.

Nariyan din ang ilang pulitiko at malalaking lider ng negosyante na ikinatawan ni Gov. Chavit.

-----$$$--

DATI-RATI, ang pinakaaktibo, pinakamaingay at pinakamagulo — ay ang hanay ng mga manggagawa, pero tila nasasapawan sila ng ilang pangkat.

Magkakaiba ang kulay ng mga pumagitna sa kalye at ginamit lamang ang isyu ng “flood control project modus” upang sukatin ang damdamin ng mga tao.

----$$$--

MARAMING nagprotesta, pero malinaw na watak-watak.

Aktuwal pang nakipag-away ang maka-Duterte sa ilang grupo — na nagpapatunay na hindi “solido” ang grupo na nagpapantasyang maibagsak ang administrasyon ni Marcos Jr.

-----$$$--

MAS okey sana ay magkanya-kanya ng araw ng protesta ang magkakahiwalay na pangkat na may kani-kanya ring agenda.

Halimbawa, mauna na ang grupo ng mga maka-Marcos.

----$$$--

HUMUGOT din ng espesyal na araw ang mga maka-Duterte.

Sundan ito ng mga makaka-kaliwa o nagsisimpatiya sa CPP-NPA-NDF. 

----$$$--

DAPAT din humugot ng araw ang grupo ng mga relihiyon.

Magkani-kanya ng petsa ang Iglesia ni Cristo, Simbahang Katoliko at El Shaddai, at siyempre, puwede ring maprotesta ang mga maka-Jesus Is Lord upang maidepensa ang reputasyon ng kanilang founder na nadumihan ng putik ng isyu ng korupsiyon.

----$$$--

PINAKAMAHALAGA, magtakda ng espesyal na petsa ang lehitimo at walang batik pulitika na hanay ng mga kabataan — young professionals, estudyante at out-of-school youth tulad ng nagtitinda ng fishball at kikiam.

Kung nais ng mga negosyante na magprotesta ay puwede rin.

---$$$--

ANG street protest bilang instrumento sa pagpapalit ng liderato ng bansa — ay sinasang-ayunan ng Konstitusyon.

Isinalegal ito nang katigan ng Korte Suprema ang pag-upo ni Tita Cory na natalo sa official canvassing ng Comelec pero naging president.

----$$$--

KINATIGAN din ng Korte Suprema ang pag-upo sa Malacañang ng noon ay bise presidente na si Gloria Macapagal-Arroyo nang “magtraydor” sa noo’y commanding-in-chief na si Erap si dating AFP chief Angelo Reyes.

Nang lumaon, nag-suicide si Reyes nang ma-bully sa Senate hearing.

-----$$$--

ANG kasaysayan ay paulit-ulit lang na nagaganap — nagbabago ng aktuwal na “bida at kontrabida”.

Mahirap matiyak na mananatili sa Malacanang si PBBM hanggang 2028.

----$$$--

LINGID sa kaalaman ng marami, ang pinakamaselang “component” ng pagpapalit ng liderato — batay sa kasaysayan ay hindi “domestic issue”, bagkus ay ang panghihimasok ng mga dayuhan.

Maging mapagmatyag, lalo na’t nagbago na nang tuluyan ang modernong henerasyon.

----$$$--

ALALAHANIN natin, bumubuwelo ang buong mundo sa isang hindi maiiwasang Ikatlong Digmaang Pandaigdig kung saan, hindi makakaiwas ang Pilipinas.

Kailangan ang isang “super strong leader” ngayon -- at sa 2028!

Kailangan ay maipadama ni PBBM sa mga Pinoy at mismo sa mga dayuhan -- na siya ay isang brusko at super strong upang matapos niya ang kanyang termino — sibakin ang dapat sibakin sa burukrasya!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.