Yayaman sa pagpasok sa pulitika at ‘di dahil sa mga nunal sa mukha

ni Maestro Honorio Ong - @Kapalaran ayon sa Numero| August 12, 2021

Dear Maestro,

Matagal na akong sumusubaybay sa inyong mga kolum at nanonood sa inyong mga show sa BULGAR Online at BULGAR TV. May tanong ako tungkol sa nunal. Mayroon akong nunal sa kanang bahagi ng mukha, sa may pisngi at gawing itaas, at sabi ninyo ay susuwertehin ang mga taong may ganitong nunal, pero bakit hanggang ngayon ay tila kakambal ko pa rin ang kahirapan at kamalasan sa buhay? Kailan ba ako susuwertehin, kapag ba pantay na ang aking mga paa o hindi na ako makagulapay dahil sa sobrang katandaan?

Simple lang naman ang pangarap ko at ‘yun ay ang mapagtapos ng pag-aaral ang anim kong anak at magkaroon kami ng sariling bahay at lupa. Matutupad ba ito at paano ako susuwertehin? April 18, 1968 ang birthday ko.

Umaasa,

Majorie ng Bagong Barrio, Pandi, Bulacan

Dear Majorie,

Alam ko kung bakit kahit may nunal ka sa kanang bahagi ng pisngi ay hindi ka pa rin sinusuwerte, gayung ayon sa Molesophy (sining at siyensiya na nag-aaral at nag-i-interpret ng iba’t ibang nunal at mga pekas sa balat ng tao upang alamin ang kanilang natatagong ugali at sadlakang kapalaran), suwerte ang anumang nunal na matatagpuan sa kanang bahagi ng mukha.

Tulad ng nasabi na, sigurado akong bukod sa nunal sa kanang bahagi ng pisngi, marami ka pang ibang nunal sa mukha at malamang na may iba’t ibang nunal ka rin sa kaliwang bahagi ng iyong mukha o pisngi.

Ito ang dahilan kaya ang nunal sa kanang bahagi ng iyong mukha ay tila nababalewala ang kapangyarihan. Ito ay dahil hindi ‘yan “independent mole” o sa mas klarong paliwanag, kinokontra ng iba pang mga nunal sa kaliwang bahagi ng mukha ang suwerte sanang nunal sa kanang bahagi ng mukha.

Kaya ang ibang tao na napakaraming nunal sa mukha, bihira at mahihirapan talaga silang suwertehin dahil “scattered” o nagkalat ang “lucky at unlucky charm” na nirerepresinta ng mga nunal sa iba’t ibang bahagi ng mukha.

Ngayon, kung tama ang ating sapantaha na may nunal ka nga sa kanang pisngi na simbolo ng suwerte, pero hindi naman makalutang ang magandang kapalaran dahil marami ka ring nunal sa kaliwang pisngi, mas mabuting pagtuunan ng pag-aanalisa ang birth date mong April 18, 1968 upang matuklasan natin sa pamamagitan ng Astro-Numerology ang iba pang paraan o teknik upang ikaw ay suwertehin at kung paano matutupad ang mga pangarap mo sa buhay.

Samakatuwid, ikaw ay under sa zodiac sign na Aries sa birth date na 9 (ang 18 ay 1+8=9) at sa destiny number na 1. Naging 1 ang destiny number mo dahil ang April 18, 1968 ay may ganitong kompyutasyon 4+18+1968=1990/ 19+90=109/ 10+9=19/1+9=10/ 1+0=1.

At alam mo ba kung saan ka susuwertehin? Sa pamumulitika at paglilingkod sa bayan. Kaya ngayon pa lang, maghanap ka na ng mga gawain na maaaring makatulong ka sa inyong barangay o makilahok ka sa mga gawaing may kaugnayan sa public service, habang puwede ring maging daan mo ay sa relihiyon patungo sa politics.

Basta ang mahalaga, makahanap ka ng daan upang makapaglingkod nang libre, bukal sa loob at walang bayad sa iyong mga kababayan. Sa ganyang paraan, kapag nasa poder ka na o nagkaroon ng posisyon sa inyong barangay o bayan, doon ka na magsisimulang suwertehin. Gayundin, unti-unti at isa-isa nang matutupad ang mga pangarap mo sa buhay, sa tulong din ng mga tao na magiging koneksiyon mo sa pamahalaan at ibang pang pribado at mayayamang indibidwal.

Kaya dahil ikaw ay isang Aries, may double strong na number na 9 at 1, at sabi nga natin ay marami kang nunal sa mukha, ngayon pa lang ay maglalabas ka na ng bahay dahil kailangan mong gamitin ang nasabing mga datos upang maipakita sa iyong kababayan ang kahalagahan ng iyong talento at nalalaman. Kapag nakilala ka nila bilang mahusay na public servant, tulad ng inaasahan, doon magsisimula ang iyong malaking suwerte hanggang sa tuloy-tuloy ka nang lumigaya at umunlad, matupad ang iyong mga pangarap na mapagtapos ang iyong mga anak sa pag-aaral at sa bandang huli, dahil na rin sa paglilingkod sa bayan, kusa ka na ring magkakaroon ng bahay at lupa.

Ang pangyayaring tinuran, na susuwertehin ka sa paglilingkod sa iyong mga kababayan ay inaasahang magsisimulang maganap sa taong kasalukuyan hanggang sa mga susunod pang taong 2025, sa edad mong 57 pataas.

Umaasang makakabalikan ang ex-BF na naging dyowa ng BFF

ni Maestro Honorio Ong - @Kapalaran ayon sa Numero| August 10, 2021

Dear Maestro,

May boyfriend ako noon, pero naghiwalay kami at naging sila ng bestfriend ko. Kahit pa sila na, nararamdaman kong mahal niya pa rin ako at kaya niya ginagawa ‘yun ay dahil nais niya lang akong pagselosin.

Maestro, muli ba kaming magkakabalikan ng ex-boyfriend ko at tama ba ang hinala ko na mahal pa rin niya ako o mas mahal na niya ang bestfriend ko? November 19, 1998 ang birthday ko, habang February 12, 1997 naman ang ex ko at October 8, 1999 ang bestfriend ko.

Umaasa,

Ms. Scorpio ng San Roque, Cardona, Rizal

Dear Ms. Scorpio,

Huwag mo nang asahang bumalik ang iyong ex-boyfriend na isinilang noong February 12, 1997 na napunta na sa bestfriend mo na may birthday namang Octoebr 8, 1999. Dahil ang zodiac sign mong Scorpio at Aquarius ang ex-boyfriend mo ay nagsasabing hindi naman kayo compatible sa isa’t isa. Sa halip, ang tunay na ka-compatible ng ex-boyfriend mo — ‘wag ka namang malulungkot— ay ang bestfriend mo na may zodiac sign na Libra. Ibig sabihin, anuman ang mangyari, mahal man ng ex-boyfriend mo o hindi ang kasalukuyan niyang girlfriend, tiyak ang magaganap, sa bandang huli ay posibleng sila na ang magkatuluyan.

Kaya tulad ng nasabi na, pabayaan mo nang lumigaya sa ibang babae ang ex mo habang hayaan mo namang lumigaya ang bestfriend mo sa ex-boyfriend mo. Kapag maluwag sa loob mong tinanggap ang mga pangyayari, kapag sila na ang nagkatuluyan, hindi ka naman lalabas na kaawa-awa at luhaan dahil binalewala mo nang lahat ang nagdaang relasyon ninyo ng ex-boyfriend mo. Sa isang dahilan lang, hindi naman kayo talaga compatible at kahit makasama mo pa siya habambuhay ay hindi naman kayo tiyak at lubusang magiging maligaya.

Samantala, sa susunod na pakikipagrelasyon, upang hindi ka na muling iwanan at mabigo, humanap ka ng isang lalaking katugma at ka-compatible mo talaga.

Sila ang mga lalaking isinilang sa zodiac sign na Cancer, Pisces, Taurus at kapwa mo Scorpio, higit lalo silang mga isinilang sa petsang 4, 13, 22, 31, 2, 11, 20, 29, 7, 16 at 25. Sa piling ng ganyang klaseng lalaki, tiyak ang magaganap – magkakaroon ka na ng panatag at panghabambuhay na relasyon.

Samantala, ang nasabing pangyayari kung saan magkakaroon ka na ng panatag at panghabambuhay na relasyon, sa isang lalaking ka-compatible mo talaga, kaya hindi ka na niya iiwan ay natakdang maganap sa taong 2023 hanggang 2024 sa edad mong 25 pataas.

Binatang feeling malas, yayaman sa abroad ‘pag may dollar sign ang pirma

ni Maestro Honorio Ong - @Kapalaran ayon sa Numero| August 09, 2021

Dear Maestro,

Nakapagtrabaho na ako ng isa’t kalahating taon, pero ngayon, tumutulong na lang ako sa negosyo namin. Dahil mahina at palaging kulang ang benta, lalo na ngayong panahon ng pandemic kaya naman sumusubok akong maghanap ng trabaho, pero palagi akong bigo. Mahiyain kasi ako, pero pinipilit ko pa ring lumakas ang loob ko.

Parang walang nangyayari sa buhay ko dahil wala akong trabaho. Maestro, makapagtatrabaho ba ako rito sa atin o sa ibang bansa kahit wala akong pang-placement fee at pang-ayos ng mga papeles?

Sa totoo lang, nawawalan na ako ng pag-asa dahil limang taon na akong nababakante. May pag-asa pa bang muling gumanda at maging maayos, lumigaya at umunlad ang buhay ko? Paki-analisa na rin ang aking lagda kung okey na o may dapat pang baguhin para gumanda ang buhay ko. September 22, 1988 ang birthday ko.

Umaasa,

Ms. Virgo ng Wawa, Siniloan, Laguna

Dear Ms. Virgo,

Sadyang magiging magulo ang isip, karanasan at kapalaran mo, sapagkat ang birth date mong September 22, 1988 ay nasa pagitan ng dalawang zodiac sign na Virgo at Libra. Ito ang dahilan kaya magulo ang isip mo at on and off ang kapalaran mo sa aspetong career o propesyon.

Dapat mamili ka ng zodiac sign na ipo-portray kung Virgo o Libra. Madali ka namang makakapamili kung susubukan mong silipin ang lalagyan ng iyong mga damit. Kung mas marami ang kulay na pula, piliin mo ang zodiac sign na Libra, pero kung mas marami ang kulay puting damit, Virgo ang gamitin mo.

Ianalisa at suriin mo rin kung sino ang iyong mga kaibigan at bestfriend, gayundin ang malalapit mong kasama na madalas tumulong sa iyo, kung sila ay isinilang sa zodiac sign na Taurus, Capricorn, Gemini at Pisces at Virgo, Virgo ang piliin mong zodiac sign. Samantala, kung ang iyong mga kaibigan, mga taong malalapit na tumutulong sa iyo ay Aquarius, Libra at Aries, Libra ang piliin mo.

Sa pagpili ng zodiac sign na paiiralin sa iyong buhay, gamitin mo ang mapalad na kulay. Kung Virgo, tulad ng nasabi na, puti, asul at alahas na silver, kung Libra naman, kulay na pula, pink, violet at iba pang kulay na hinango sa pula.

Hinggil naman sa iyong pirma, maganda na ang iyong lagda. Ang kailangan na lang, imbes na “A”, palitan mo ng “S” ang nasabing letra. Pagkatapos, okey na ang bilog na buntot ng letrang “g”, ang gawin mo na lang ay ibaba nang todo ang bilog na buntot upang mapunta sa ilalim ng guhit ng papel. Sa ganyang paraan, magiging “korteng dollar sign” ang unahang bahagi ng iyong lagda at medyo bababa na ang bilog na buntot ng letrang “g”. Kapag nag-apply ka sa abroad, mabilis kang matatanggap hanggang sa tuluy-tuloy na kumita ng dollar at umasenso.

Kapag nakapili ka na ng zodiac sign na paiiralin sa iyong buhay at sinunod mo ang mga rekomendasyon sa itaas, tiyak ang magaganap sa taong 2022 sa edad mong 34 pataas— susuwertehin at aasenso ka na, magkakaroon ng regular na trabaho, magkaka-nobya, makapag-aasawa hanggang magkaroon ng masaya at panghabambuhay na pamilya.