Marami nang naging BF pero walang nakatuluyan, takot tumandang dalaga

ni Maestro Honorio Ong - @Kapalaran ayon sa Numero| June 14, 2021

Dear Maestro,

Isinilang ako noong November 23, 1993 at maraming beses na akong nagkaroon ng karelasyon, pero ang mga relasyong ito ay hindi nagtatagal. Bakit kaya? Imagine, umabot ako ng edad 27 pero wala pa ring stable relationship na nararanasan. May stable job naman ako ngayon, ang talagang pinoproblema ko lang ay natatakot akong tumandang dalaga.

Nasa numero ba ng aking birth date na ako ay tatandang dalaga, kung hindi, kailan ako makapag-aasawa?

Umaasa,

Jane ng San Diego, Gumaca, Quezon

Dear Jane,

Hindi mangyayari ang kinatatakutan mo dahil bihira sa mga taong may birth date na 23 at nagkataong Scorpio o nasa pagitan ng Scorpio at Sagittarius ang tumatandang dalaga. Sa halip, dahil ikaw ay nasasakupan ng planeteng Mars at Jupiter dahil sa zodiac sign mong nasa pagitan ng Scorpio at Sagittarius; at Mercury dahil sa birth date mong 23 o 5 (ang 23 ay 2+3=5), mabibilis na kaganapan sa iyong buhay pag-ibig at pakikipagrelasyon ang hindi mo halos magagawa o makakayang tanggihan.

Sa matuling salita, kapag namayani sa iyo ang ruling planet na Mercury na bitbit ng birth date mong 23 at ang ruling planet na Jupiter at Mars na bitbit naman ng zodiac sign mong nasa pagitan ng Sagittarius at Scorpio, magugulat ka sa pangyayari sa iyong buhay dahil sa isang iglap, bigla kang makapag-aasawa.

Ang pag-aanalisang nabanggit ay mas tiyak na magaganap kung ikaw ay mahilig sa mga kulay na pula at alahas na silver kung saan ang pula ay tugma sa kapalaran ng zodiac sign na Scorpio at Sagittarius, habang sa alahas na silver ay tugma sa kapalaran ng numerong 23.

Ang tanong na lang sa kasalukuyan, bakit marami ka nang nakarelasyon pero sa kabiguan at pagkausyami pa rin nauuwi ang lahat? Madali lang ang sagot, at ito ay nababoy o pumangit kasi ang iyong lagda. Nakikita mo ba ang malaking bilog sa unahang bahagi ng iyong pirma na nalikha ng letrang “J”? ‘Yan ay paglalarawan ng unconscious mong isipan na hanggang ngayon ay sariwa pa rin sa iyong alaala at pagkatao ang mga nakaraang kabiguan sa buhay, kaya hindi ka maka-move on ngayon.

Subalit isang tulak na lang ng pagpapasya at lakas ng loob, sa pamamagitan ng pag-aayos ng iyong pirma, na sa halip na bilog-bilugin at guluhin ang unahang letrang “J” ay gagawin mong simpleng J at isipin mong ikaw ay bagong buhay at bagong nilalang, isa ring bago at mas maligayang pag-ibig na hahantong sa panghabambuhay na relasyon ang darating sa iyo.

Nakatakdang dumating at mangyari, ayon sa iyong Love Calendar sa taong 2022, sa edad mong 28 pataas, partikular sa buwan ng Marso hanggang Abril ang lalaking isinilang sa buwan ng Mayo. Siya na ang magiging last boyfriend mo at seryosohan na ang nasabing relasyon, na nakatakda na ring humantong sa isang masaya at panghabambuhay na pag-iibigan.

Problemado sa mama's boy na BF, makakatuluyan pa rin

ni Maestro Honorio Ong - @Kapalaran ayon sa Numero| June 11, 2021

Dear Maestro,

May boyfriend ako at siya ang first boyfriend ko. Wala pa kaming one year, pero marami na akong problema at sakripisyo sa kanya dahil mama’s boy siya, pero mabait naman. Halos lahat ng sinasabi ng mama niya ay sinusunod niya kahit apektado na ang aming relasyon. Pinagbabawalan kasi siyang mag-girlfriend hangga’t hindi siya nagkakaroon ng trabaho kaya lihim ang relasyon namin. Madalas ding ako ang nag-a-adjust sa mga personal na problema namin dahil sa family niya. Kaya ngayon, iniisip ko rin kung magtatagal ba ang ganito naming relasyon na magulo at kumplikado talaga.

Sana ay mapayuhan n’yo ako dahil mahal na mahal ko siya at ayaw kong mawala siya sa akin, pero nahihirapan na talaga ako sa sitwasyon namin.

May pag-asa bang kami ang magkatuluyan at kapag nagkatuluyan kami, hindi ba magulo rin tulad ng family nila ang magiging pamilya namin? March 17, 1994 ang birthday at July 16, 1993 naman ang boyfriend ko. Compatible ba kami at kami na ang magkakatuluyan?

Umaasa,

Jho Anne ng Pulong Buhangin, Santa Maria, Bulacan

Dear Jho Anne,

Ganyan talaga ang buhay, kapag nagmamahal, kailangang mag-sacrifice alang-alang sa iyong minamahal. Ang totoo kasi nito, walang kuwenta ang pag-ibig kung walang sakripisyo na ginagawa ang bawat isa dahil ang mga pagtiiis at sakrisyong ito ang tunay na nagpapalalim sa inyong ugnayan at pag-iibigan.

‘Ika nga ni Mother Teresa, “I have found the paradox that if I love until it hurts, then there is no hurt, but only more love,” ibig sabihin, ang tunay na esensya ng pag-ibig ay ang masaktan at sa sandaling puro sakit na lang, lulutang ang tunay na diwa ng pagmamahal.

Ang problema lang sa sitwasyon mo ay ang pangyayaring tila ikaw ang palaging nagtitiis at nagbibigay sa boyfriend mo, pero alam mo okey lang ‘yun dahil sabi mo nga, mahal na mahal mo naman siya.

At hangga’t kaya mong magtiis at mag-sacrifice dahil sa pag-ibig na inuukol mo sa kanya, sumige ka lang nang sumige dahil sa bandang huli, kapag nag-mature na ang boyfriend mo, sa panahon namang ‘yun ay kusa nang magiging maligaya ang inyong relasyon.

Hindi ka rin naman dapat na mag-alala dahil magiging maligaya ang inyong relasyon ‘pag tumagal dahil ang zodiac sign mong Pisces na may elementong water o tubig ay tulad ng zodiac sign na Cancer ng boyfriend mo, na nagtataglay din ng elementong tubig o water. Ibig sabihin, ayon sa Western Astrology, sadyang tugma at compatible talaga kayong dalawa.

Habang sa Numerology ay ganundin, ang strong number mong 17 o 8 (ang 17 ay 1+7-8) ay tugma sa weak number na 16 o 7, (ang 16 ay 1+6=7) ng boyfriend mo. Ito ay dahil ang pagsasama ng weak at strong number o weak at strong personality ay sadyang balanse. Dahil dito, darating ang panahong may pangako ng isang wagas, masagana at maligyang relasyon habambuhay. Sa madaling salita, kaunting tiis pa dahil umiibig ka.

Hanggang sa bandang huli, mararating din ng inyong relasyon ang highest point ng isang tunay at wagas na pagmamahalan. Kasabay nito, malalasahan din ng boyfriend mo ang mga sacrifices na ginagawa mo para sa kanya, upang pagdating ng panahong ‘yun ay lalo ka niyang iibigin at mamahalin, hanggang sa kayo na ang magkatuluyan at makakabuo ng maligaya at panghabambuhay na pamilya, na ayon sa iyong Love Calendar ay nakatakdang mangyari sa taong 2022 sa edad mong 28 pataas at 29 naman ang boyfriend mo.

Ex-OFW, makapag-a-abroad ulit kahit masyonda na

ni Maestro Honorio Ong - @Kapalaran ayon sa Numero| June 07, 2021

Dear Maestro,

Ako ay dating OFW at umuwi ako rito noong 2019 sa pag-aakalang malaki-laki na ang naipon kong pera na ipinadadala ko sa aking nanay. Puwede na sanang ipampagawa ng bahay at ipagpatayo ng maliit na grocery, pero hindi nangyari ang pangarap ko at huli na nang malaman kong in-invest pala ng mga magulang ko sa pyramiding ang pera na pinaghirapan ko ng halos pitong taon sa abroad. Pilit naming hinahabol ang mga taong nanloko sa amin, pero nagtatago na sila.

Sa ngayon, nag-a-apply na naman ako at hindi ko alam kung makakaalis pa ako dahil medyo may edad na ako at may pandemya pa. Sa palagay mo, malulusutan ba namin ang problemang ito? Ngayong may aplikasyon ulit ako sa dati kong agency, makakaalis pa ba ako ngayong taon at kapag nakapag-abroad ako, magiging maganda ba ulit ang kapalaran ko sa ibang bansa? June 8, 1984 ang birthday ko.

Umaasa,

Gemini ng San Carlos, Mexico, Pampanga

Dear Gemini,

Huwag ka nang malungkot dahil isang batas ng kalikasan na hindi mapapasubalian, na kapag may nawala, may darating at kapag may binawi, may muling matatanggap at kapag tinalbusan ang kamoteng baging, lalo itong lumalago at dumarami ang mga dahon at sanga.

Sa isang pamilya, mapapansin na kapag mahina na sina lolo at lola, may mga apo namang naglalakihan upang pumalit o dumagdag sa inyong angkan.

Walang iniwan sa isang nabulok na bunga ng bayabas na napigtas sa sanga at nahulog sa lupa. Bukas makalawa, sumusupling ang panibagong maliliit na binhi mula sa nabulok na bunga ng bayabas at paglipas ng ilang mga taon, ang dating maliit na supling ng bayabas ang siya namang mahihitik ng panibagong mga bunga sa tag-araw.

Ganyan talaga ang natural na batas ng kalikasan na inorasyon ni Lord at idinesenyo ng kalikasan sa bawat may buhay ang orasyong, “to multiply” o magpakarami at kalatan ang buong daigdig.

Ang problema, ang batas-kalikasang ito ay hindi kadalasang nangyayari sa isang tao. Sapagkat ang tao, hindi tulad ng halaman at hayop, masyado siyang madaling sumuko. Ang tao kasi ay likas na mainipin at kaunting pagsubok lang, nalulungkot at pinanghihinaan agad ng loob. Dahil dito, imbes na muling umusbong at madagdagan ang dahon, agad nang namamatay ang sigasig dahil nawawalan na kasi agad ng pag-asa.

Ang kaibahan ng tao sa hayop at halaman ay ang damdamin. Ang iba pa nga r’yan, sobra kung magdamdam o napaka-emosyunal, at ito ang nagiging hadlang upang hindi niya matamasa ang biyaya ng panibagong pamumulaklak at pagpapala mula sa langit.

Kaya kapag nawawalan ka ng anumang bagay, hindi ka dapat malungkot at magmukmok hanggang sa ma-depress at sa bandang huli ay magkasakit at ito pa ang ikamatay kapag minamalas-malas ka.

Kaya tama ang ginagawa mo ngayon, Gemini, lumaban ka at muling magsikap. Kahit medyo may edad ka na, muli kang mag-apply sa abroad. Bumuo kang muli ng bagong pangarap, sapagkat ayon sa iyong Travel Calendar, tiyak ang magaganap ngayong 2021, sa edad mong 37 pataas. Ito ay nagsasabing muli kang makapag-a-abroad at sa ibayong-dagat, muli kang makakaipon ng sapat na salapi na magagamit sa pagpapagawa ng inyong bahay at may kaunti pang sosobra sa naipon mo upang tuluyan mo na ring masimulan ang binabalak n’yong negosyong grocery hanggang sa tuloy-tuloy na muling umunlad, lumago ang kabuhayan at tuluyan na uling lumigaya ang inyong pamilya.