Mga dapat gawin para ‘di malasin sa buhay

ni Maestro Honorio Ong @Kapalaran Ayon Sa Numero | August 28, 2024

Dear Maestro,

Ano ba ang aking masuwerteng araw, petsa, at kulay, para suwertehin naman ako sa buhay? Pansin ko kasing lagi na lang akong minamalas sa lahat ng bagay. 

Sana maturuan n’yo ako, para umunlad at suwertehin naman ako sa aking buhay.  Ang birthday ko ay April 9, 1988.

Umaasa,

Mikaela ng San Juan, Cainta, Rizal

---

Dear Mikaela,

Ayon sa zodiac sign mong Aries at birth date mong 9, ikaw ay mapalad sa lahat ng numerong may sumatotal na 3-6-9, tulad ng 12, 21, 30, 15, 24, 33, 18, 27, 36, 45 at iba pang kauri nito. Sapagkat ikaw ay nasa ilalim ng planetang Mars. Ang nasabing mga numero ang siya ring mapalad mong petsa kung saan sa mga petsang nabanggit mo rin dapat isagawa ang mga bagay na iyong binabalak upang tiyak na magtagumpay.

Dagdag pa rito, bukod sa nasabing mga numero, mapalad ka rin sa pula, habang ang asul at violet ang magiging secondary color mo. Suwerte naman sa iyo ang araw ng Martes, Huwebes at Biyernes.

Kusa namang iigting ang mabuti mong kapalaran sa tuwing sasapit ang ika-21 ng Oktubre hanggang ika-27 ng Disyembre, mula sa ika-21 ng Marso hanggang ika-27 ng Abril at mula sa ika-21 ng Hulyo hanggang ika-27 ng Agosto. 

Samantala, ka-compatible mo naman ang mga isinilang sa zodiac sign na Leo, Sagittarius, Libra at kapwa mo Aries, higit lalo silang may mga birth date na 3, 12, 21, 30, 9, 18, 27, 6, 15, 24, 4, 13, 22, 31, 1, 10, 19 at 28.

Significant at favorable years mo naman ang mga taong 2025, 2026, at 2027. Sa nasabing panahon, maraming mga suwerte at magagandang kapalaran ang tuluy-tuloy at kusang darating sa iyong buhay. Magsisimulang gumanda ang iyong buhay sa edad mong 37 pataas.

Guro na 40-anyos at ‘di kagandahan, makakapag-asawa sa taong 2024

ni Maestro Honorio Ong @Kapalaran ayon sa Numero | June 15, 2023

Dear Maestro,

Naisipan kong sumangguni sa inyo dahil 40-years-old na ako, at gusto ko sanang malaman kung may pag-asa pa kaya akong makapag-asawa. Hindi ako kagandahan, pero may stable work naman ako bilang isang teacher. July 17, 1982 ang birthday ko.

Umaasa,

Camille ng Orani, Bataan

Dear Camille,

Ayon sa birth date mong 17 o 8 (dahil ang 17 ay kinukumpyut ng ganito, 1+7=8), sa destiny number na nagkataong 8 din (7+17+1982=2006/ 20+06=26/ 2+6=8) at zodiac sign na Cancer, makapag-aasawa ka pa rin kahit na hindi ka kagandahang babae, dahil wala namang kaugnayan ang itsura pagdating sa pag-ibig.

Ang kinaganda nito ay nagkataon pang 8 ang birth date at destiny number mo na ang nasabing mga numero ay kapwa itinuturing na strong number, ibig sabihin, kapag ginusto mo talaga at pinairal mo ang iyong pagiging “taong otso” at ginusto mong mag-asawa na, wala magagawa ang tadhana o ang kapalaran kundi ang pag-asawahin ka.

Kaya kahit 40 na ang edad mo, hindi ka dapat kabahan, dahil kung ‘yung mga bakla at tomboy, ay nakapag-aasawa at iyong iba pa nga ay kinakasal, ikaw pa kayang nagka-edad lang at medyo nahuli lang ng bahagya sa huling biyahe ay sigurado namang makakapag-aasawa ka pa.

Ayon sa iyong Love Calendar ang pag-aasawang nabanggit basta’t ginusto mo lang talaga ay tinatayang magaganap sa susunod na taong 2024, sa edad mong 41 pataas, hatid ng isang lalaking may kayumangging kulay ng balat, may katamtamang laki ng pangangatawan at isinilang sa zodiac sign na Scorpio, kung saan, sa isang sitwasyong hindi mo inaasahan pero totoong mangyayari, may biglaan at hindi gaanong pinaghandaang pag-aasawa na magaganap.

Ang ikinaganda pa nito, kahit na biglaan, ang pag-aasawang nakatakda, ito ay mamumunga pa rin ng isang maunlad at maligayang panghabambuhay na pagpapamilya.

Tamang araw at petsa ng paggamit ng lucky color para magka-dyowa

ni Maestro Honorio Ong - @Kapalaran ayon sa Numero| October 20, 2022

Dear Maestro,

Sa aming magbabarkada, ako na lang ang hindi pa nagkaka-boyfriend sa edad kong 23. Nais kong malaman kung may tsansa pa ba akong magka-boyfriend kahit wala naman akong seryosong manliligaw ngayon? Gayunman, may ilang nagpaparamdam, pero hindi naman nila itinutuloy ang kanilang panliligaw.

Maestro, sana ay mabasa n’yo sa birthday ko na kung magkaka-boyfriend ako, kailan ito mangyayari at magiging masaya ba ang bubuuin naming relasyon?

December 7, 1998 ang birthday ko.

Umaasa,

Ynna ng Muzon, SJDM, Bulacan

Dear Ynna,

Ang birthday mong December 7, 1998 ay nagsasabing ikaw ay nagtataglay ng birth date na 7, sa destiny number na 1 (12+7+1998=2017/ 20+17=37/ 3+7=10/ 1+0=1) at zodiac sign na Sagittarius.

Masasabing kaya hindi ka pa nagkaka-boyfriend ngayon ay dahil ang umiiral sa iyong kapalaran ay ang weak number mong 7, sa halip na ang iyong strong destiny number na 1 at ang strong ding zodiac sign na Sagittarius.

Upang magka-boyfriend ka, dapat panaigin mo ang iyong strong destiny number 1, gayundin ang strong zodiac sign mong Sagittarius, imbes na ang weak number 7.

Madali lang ‘yan, simula sa araw na ito, palagi kang magsuot ng suwerteng kulay para sa mga Taong Uno (1) o may destiny number na 1 tulad mo, at ito ay ang kulay na dilaw o yellow. Habang isuot mo rin ang kulay na laan para sa mga may zodiac sign na Sagittarius, ito naman ang red o pula.

Ganito ang tamang paggamit, tuwing sasapit ang mga petsang 1, 10, 19, 28, 4, 13, 22, 31, 7, 16, 25, 2, 11, 20, 29, 8, 17, at 26, isuot mo ang kulay na dilaw, higit lalo kung ang nasabing mga petsa ay natapat sa mga araw ng Linggo, Lunes at Sabado.

Habang tuwing sasapit naman ang mga petsang 3, 12, 21, 30, 6, 15, 24, 9, 18 at 27, isuot mo ang kulay na pula, higit lalo kung ang nasabing mga petsa ay natapat sa mga araw ng Martes, Huwebes at Biyernes. Kapag ang petsa naman ay 5, 14 at 23, ito ang petsa na malaya kang gumamit ng kulay na magugustuhan mong gamitin.

Kapag nasunod mo ang simpleng rekomendasyon sa itaas, tiyak ang magaganap sa susunod na taong 2023 at sa edad mong 24 bago sumapit ang edad mong 25 dahil magkaka-boyfriend ka na, hatid ng lalaking isinilang sa buwan ng Mayo.