Akala may droga.. Laruang dala ng OFW winasak, Customs na-wow mali

ni Madel Moratillo | April 5, 2023

Matapos mapaghinalaang may lamang ilegal na droga, sinira ng mga tauhan ng Bureau of Customs sa Ninoy Aquino International Airport ang isang laruang eroplano.

Sa isang post sa social media, ikinuwento ito ng OFW na si Rachell Anne Ramos, galing sa Hong Kong, at may connecting flight pauwi sa Laoag, Ilocos Norte.

Habang naghihintay umano siya ng biyahe, may lumapit sa kanyang empleyado dahil may nakita umano sa kanyang bagahe.

Dalawang beses umanong dumaan sa x-ray machine ang kanyang bagahe at ipinaamoy din sa K-9 dog.

Kaya para matapos na umano ang hinala sa laruan ay ipinasira na niya ito para magkaalaman.

Pero matapos ito, wala namang nakita na kontrabando sa loob.

Humingi naman ng paumanhin ang BOC sa nasabing OFW dahil sa pangyayari.

Kasabay nito, iginiit naman ni BOC spokesperson at Assistant Commissioner Vincent Maronilla na bago lang ang kanilang scanning machine.

Pinag-aaralan na rin aniya nila kung posibleng mabigyan ng kompensasyon si Ramos para sa nasirang laruan.

Saudia airplane, sumadsad ang gulong sa madamong bahagi ng NAIA runway

ni Lolet Abania | June 20, 2022

Isang eroplano ng Saudia Airlines mula sa Riyadh, Saudi Arabia, ang sumadsad ang mga gulong sa madamong bahagi ng runway ng Ninoy Aquino International Airport (NAIA) ngayong Lunes ng hapon.

Batay sa ulat, ang Boeing 777-368 aircraft na may flight number SV862 ay lumapag sa Manila bandang alas-1:47 ng hapon habang en route ito sa NAIA Terminal 1 nang maganap ang insidente.

Ayon sa report, ang mga gulong ng eroplano ay napapihit na lagpas sa sementadong bahagi ng taxiway, habang sumadsad ito sa maputik na bahagi ng landing field.

Ligtas at walang pasahero na nasaktan sa insidente, subalit agad silang pinababa mula sa eroplano at in-evacuate sa taxiway.

Wala namang naantalang mga flights sa airport. Agad ding nagtungo ang mga airport officials sa site upang inspeksiyunin ang eroplano habang isinayos naman ito ng airport maintenance.

Free rides mula NAIA T2, T3, saanman sa Metro Mla. simula Hunyo 15-30 — DOTr

ni Lolet Abania | June 4, 2022

May libreng airport shuttle rides para sa mga pasahero ang Grab Philippines na magsisimula sa Hunyo 15 hanggang 30, ito ay bilang suporta ng kumpanya sa free ridership program ng pamahalaan.

Sa isang statement, masayang tinanggap ng Department of Transportation (DOTr) ang inisyatibong ito ng Grab na nag-aalok ng free airport shuttle rides para sa mga pasahero mula Ninoy Aquino International Airport (NAIA) Terminals 2 at 3 hanggang sa saanmang lugar sa National Capital Region (NCR).

Ang free airport shuttle ay sisimulan sa Hunyo 15 hanggang 30, 2022, mula alas-8:00 ng gabi hanggang alas-11 ng gabi. Ayon sa DOTr, magde-deploy ang Grab ng 100 units para sa naturang free airport shuttle program.

Para ma-avail ang libreng shuttle service, kailangan ang mga pasahero na mag-book sa Grab booths na matatagpuan sa arrival areas ng NAIA Terminals 2 at 3. Pinasalamatan naman ni DOTr Secretary Art Tugade ang Grab para sa naturang free shuttle services dahil napadagdag ito sa kasalukuyang Libreng Sakay Program ng DOTr at ng Land Transportation Franchising and Regulatory Board (LTFRB).

Gayundin, pinasalamatan ng Grab Philippines sina Pangulong Rodrigo Duterte at Tugade sa paglulunsad nito ng Libreng Sakay Program.

“We thank President Rodrigo Roa Duterte and the DOTr under the leadership of Secretary Art Tugade for launching the Libreng Sakay program, as well as other valuable projects that continue to benefit the Filipino commuters,” pahayag ng Grab.