Pag-endorso ni VP Sara sa mga senador, pinalagan

ni Mylene Alfonso @News | May 2, 2025

File Photo: VP Sara Duterte - PDP Laban FB

Naniniwala ang isang human rights lawyer na ang pag-endorso ni Vice President Sara Duterte sa mga senatorial candidate ay naglalayong iligtas ang kanyang sarili na mahatulan na guilty sa impeachment trial. 

Sa isang panayam sa radyo, sinabi ni Atty. Antonio 'Audie' Bucoy, miyembro ng Free Legal Assistance Group (FLAG) at ng Movement of Attorneys for Brotherhood, Integrity and Nationalism (MABINI), na ang biglaang pagsuporta ni Duterte sa mga tumatakbong senador ay nagpapakita ng kanyang pangamba na ma-convict ng Senate impeachment court. 

Ang pag-endorso ni Duterte kina Sen. Imee Marcos at Las Piñas City Rep. Camille Villar ay tinawag ni Bucoy na malinaw na tangkang impluwensyahan ang magiging desisyon ng Senado. 

Idinagdag pa niyang ang reklamong impeachment na inihain ng Kamara ay hindi isang political stunt kundi isang seryosong kaso na may kalakip na mga dokumento. 

Ipinunto niyang ang pitong Articles of Impeachment na inihain ng Kamara ay maaaring ibuod sa tatlong pangunahing kategorya: destabilization at pagbabanta sa buhay nina Pangulong Marcos, First Lady Liza Araneta-Marcos at House Speaker Ferdinand Martin G. Romualdez; pagtataksil sa tiwala ng publiko; at malawakang korupsiyon.

Dagdag-sahod sa M. Mla., aprub — DOLE

ni Madel Moratillo @News | Apr. 29, 2025

Photo File: Labor Secretary Bienvenido Laguesma - salary BSP

Asahan umano ang dagdag-sahod sa mga minimum wage earner sa Metro Manila sa lalong madaling panahon.

Ayon kay Labor Secretary Bienvenido Laguesma, nakatakda nang masimulan ang wage review sa rehiyon.

Tinatayang nasa apat na milyong minimum wage earners at iba pang walong milyong manggagawa ang maaaring makinabang sa wage adjustments.

Ayon sa Kalihim, nasa 17 regional wage board na ang nakasunod sa direktiba ni Pangulong Ferdinand Marcos, Jr. para sa deliberasyon ng 60 araw bago ang anibersaryo ng huling wage order.

Hinikayat naman ng DOLE ang mga naghahanap ng trabaho na samantalahin ang ilulunsad nilang 70 job fair sites sa May 1.

Nasa 170 libong local at overseas jobs ang iaalok dito.

Phreatic eruption, naitala sa Bulkang Bulusan

ni V. Reyes | Apr. 29, 2025

Photo: Bulusan Volcano - Sorsogon PIO/Juban MDRRMO

Apektado ng ashfall ang ilang bayan sa Sorsogon kasunod ng phreatic eruption sa Bulkang Bulusan sa Sorsogon, Lunes ng umaga.

Ayon sa Sorsogon Provincial Information Office, partikular na apektado ng ashfall ang mga bayan ng Juban at Irosin.

Nabatid din mula kay Philippine National Police Region 5 Director Andre Dizon, na mahigit sa 100 indibidwal o 33 pamilya sa mga apektadong barangay ang inilikas na.

Sinasabing makapal na abo ang bumalot sa mga Barangay Puting Sapa at Buraburan sa bayan ng Juban habang katamtaman sa Brgy. Guruyan at iba pang barangay.

Inabisuhan na rin ang mga motorista na magdahan-dahan sa pagbiyahe sa mga kalsadang apektado ng ashfall.

Alas-4:36 ng madaling-araw nang maganap ang phreatic eruption sa Bulkang Bulusan na tumagal hanggang alas-5 ng madaling-araw.

Ang phreatic eruption ay ang pagbuga ng usok o steam bunga ng pag-init ng tubig sa ilalim ng lupa na nadikit o maaaring lumapit sa magma.

Sa impormasyon mula sa Philippine Institute of Volcanology and Seismology (PHIVOLCS), inabot ng hanggang 4.5 kilometro ang pagbunga mula sa bunganga ng bulkan.

Nakataas na ngayon ang Alert Level 1 (Low-level unrest) sa Bulkang Bulusan kasunod ng pagsabog.

Inabisuhan na rin ang mga lokal na pamahalaan at ang publiko na sundin ang pinaiiral na 4-kilometer radius permanent danger zone.

"Vigilance in the 2-kilometer Extended Danger Zone (EDZ) on the southeast sector must be exercised due to the possible impacts of volcanic hazards such as PDCs, ballistic projectiles, rockfall, avalanches and ashfall on these danger areas," dagdag pa ng PHIVOLCS.