Pasahero, may dalang $580,000 at P1.2M cash, naharang sa NAIA

ni Gina Pleñago @News | June 27, 2025

Photo File: Bureau of Customs

Naharang ng mga tauhan ng Airport Police ang isang lalaking pasahero na papaalis patungong Hong Kong na may dalang malaking halaga na pera sa Ninoy Aquino International Airport (NAIA) Terminal 3.

Sa final security checkpoint, nakita sa luggage ng pasahero ang cash kaya't isinagawa ang manual inspection kung saan tumambad ang perang aabot sa P1.2 million at 580,000 US dollars.

Ang pasahero at nakumpiskang pera ay nasa kustodiya na ng Bureau of Customs para sa karagdagang imbestigasyon.

Kable ng mga CCTV camera sa EDSA, tinangay

ni Gina Pleñago @News | June 27, 2025

Photo File: Metro Base / NCAP - MMDA

Ninakaw ang kable ng mga naka-install na CCTV camera sa EDSA-Guadalupe.

Ayon sa Metropolitan Manila Development Authority (MMDA), ninakaw ang kable ng walong camera.

Nitong Hunyo 20 nang ikabit umano ang mga camera para sa  No Contact Apprehension Policy (NCAP) at Hunyo 24 nang matuklasan ang nangyaring pagnanakaw.

"Newly installed po 'yung mga camera na nanakaw 'yung mga cable. During testing last week, may na-detect po na humming sound so they were disconnected for troubleshooting.

Kaya nu'ng 24 lang po talaga nalaman na nanakaw na ang mga cable," ayon sa MMDA.

May hawak nang CCTV footages ang mga otoridad upang matunton ang mga nagnakaw ng kable.

P219M smuggled fuel buking, 21 huli

ni BRT @News | June 23, 2025

File Photo: Bureau of Customs PH

Tinatayang P219.5 milyong halaga ng smuggled fuel ang nasabat ng Bureau of Customs (BOC) sa isang operasyon sa La Union Port.

Huli sa akto nitong Huwebes ng gabi ang motor tanker na MT Bernadette habang naglilipat ng diesel patungo sa isang lorry truck.

Ayon sa BOC, nadiskubre rin na may dalawa pang lorry truck na may lamang diesel fuel na nagmula sa naturang tanker.

Sa imbentaryo nitong Biyernes, tinatayang nasa 200,000 litro ng diesel ang nasa tanker, habang may 19,000 litro at 40,000 litro naman sa dalawang trak.

Nasa 259,000 litro ang kabuuan ng umano'y ipinuslit na fuel.

Kaugnay nito, hindi umano nakapagpakita ng anumang dokumento ang 10 tripulante ng MT Bernadette upang patunayan ang legalidad ng kanilang aktibidad.

Inaresto ang drayber, porter, lookout, at iba pang sinasabing kasabwat sa operasyon kaya umabot sa 21 ang kabuuang bilang ng mga naaresto.

Ang mga may-ari, kapitan ng barko, crew, at iba pang mga sangkot ay nahaharap sa mga kasong kriminal at administratibo alinsunod sa Customs Modernization and Tariff Act (CMTA) at TRAIN Law.