Whistleblower, sinungaling, papatayin ako — Atong

ni Mylene Alfonso @News | July 4, 2025

File Photo: Atong Ang - Senate PH

Sinampahan na ng reklamo ng negosyanteng si Charlie 'Atong' Ang ang dati niyang tauhan na si Julie 'Dondon' Patidongan, alyas Totoy, nang tinangka umano siyang kikilan ng P300 milyon kapalit ng pananahimik sa kaso ng nawawalang mga sabungero.

Sinamahan si Ang ng kanyang abogado na si Atty. Lorna Patajo-Kapunan, sa paghahain ng reklamo sa Mandaluyong City Prosecutor’s Office, laban kay Patidongan, na isa sa mga akusado sa kaso ng nawawalang mga sabungero na nais nang maging testigo.

Kasabay nito, nagbigay din ng mensahe si Atong para kay Patidongan. “Ang masasabi ko lang, mag-isip ka Don. Kung anuman ang mga... huwag ka nang magsinungaling nang magsinungaling. Itinuring kitang parang anak ko, e. Kung alam ko lang na ganyan ka kasama… pati ako papatayin mo pa, kikidnapin mo pa ako.”

Una rito, ibinunyag ni Patidongan na nagtago noon sa alyas Totoy, na si Ang at

dalawang iba pa ang utak umano sa pagpatay sa nasa 100 nawawalang mga sabungero

mula pa noong 2021.

Idinawit din niya sa alegasyon ang aktres na si Gretchen Barretto, na may nalalaman din umano sa krimen.

Inireklamo ni Ang si Patidongan ng conspiracy to commit attempted robbery with violence against or intimidation of persons, grave threats, grave coercion, slander, at incriminating against innocent persons.

Bukod kay Patidongan, kasama rin sa reklamo ang isang alyas Brown, na dati rin umanong empleyado ni Ang.

Muli namang itinanggi ni Kapunan ang mga alegasyon laban sa kliyente niyang si Ang.

“The reason na nandito kami and the reason why we filed the case is because, number one, for the truth to come out. Number two, to affirm that Atong Ang and the members of the… group are willing to cooperate with the government,” sabi ni Kapunan sa press briefing.

“That includes the President, that includes the Supreme Court, and that includes the Secretary of Justice and all the personnel,” wika niya.

Sinabi pa ni Kapunan na nasa panig sila ng hustisya at ng mga pamilya ng nawawalang mga sabungero.

WHO hinikayat na bumalik sa pangunahing misyon sa gitna ng mga paratang ng katiwalian

ni Chit Luna @News | July 2, 2025

File Photo: World Health Organization (WHO)

Nanawagan ang isang regional harm reduction group sa World Health Organization (WHO) na ituon muli ang pansin sa pangunahing mandato nito sa gitna ng mga alegasyon ng katiwalian at labis na impluwensiya, na pinalala pa ng pag-atras ng suporta ng Estados Unidos.

"It's time to hold the WHO to its mandate and core mission of protecting global health based on science, not ideology; that is inclusive of all stakeholders, without judgment or prejudice," ayon kay Nancy Loucas, executive coordinator ng Coalition of Asia Pacific Tobacco Harm Reduction Advocates (CAPHRA).

Binanggit ni Loucas ang mga nakababahalang kaganapan kamakailan na kinasasangkutan ng WHO, kabilang ang mga alegasyon ng katiwalian at mismanagement sa Asia-Pacific, at mga ulat na may labis na impluwensiya ang isang charity na pinondohan ng U.S. billionaire na si Michael Bloomberg.

Tinukoy ng CAPHRA ang mga ulat na ang Bloomberg Philanthropies, sa tulong ng WHO, ay "improperly influenced domestic policymaking" sa mga bansang tulad ng Pilipinas, India, Pakistan, Bangladesh, Indonesia, at Vietnam.

Sa Pilipinas, ayon sa CAPHRA, isang pagdinig ng Kongreso noong 2021 ang nagbunyag na tumanggap ang local Food and Drug Administration ng mga grant mula sa mga dayuhang pribadong organisasyon na pinondohan ng Bloomberg Philanthropies upang bumuo ng regulasyon para sa mga alternatibo sa sigarilyo.

Sa Bangladesh, binatikos ang eleksyon noong Nobyembre 2023 kay Saima Wazed bilang WHO regional director para sa South East Asia. Si Wazed, anak ng dating Prime Minister Sheikh Hasina, ay naharap sa alegasyon ng improper influence mula sa kanyang ina. Isang pahayagan sa Bangladesh ang nag-ulat na sinabi ng director ng Anti-Corruption Commission na may suspecha ng korupsyon sa pag-appoint kay Wazed.

Sa Pakistan, sinuspinde ng gobyerno ang mga aktibidad ng Tobacco-Free Kids at Vital Strategies, dalawang NGO na pinondohan ng Bloomberg Philanthropies, dahil sa umano'y paglabag. Hiniling din ng Interior Ministry sa State Bank of Pakistan na i-freeze ang kanilang mga bank account.

Sa Indonesia, iniulat ng CAPHRA na ang Ministry of Health ay inakusahan ng pagsasama ng agenda ng Framework Convention on Tobacco Control (FCTC) sa draft regulation ukol sa plain packaging ng sigarilyo, na nagbunsod ng mga pag-aalala ukol sa dayuhang impluwensya sa tobacco policy.

Ayon kay Hikmahanto Juwana, isang propesor ng international law sa University of Indonesia, "Indonesia should protect its national sovereignty from foreign intervention and ensure government policies reflect domestic conditions."

Sa India, ayon sa ulat ng Reuters, pinatigil ng New Delhi ang mga gawain ng isang maliit na non-profit na pinopondohan ng Bloomberg Philanthropies matapos mabigong ideklara ang pinagmumulan ng pondo. Isang opisyal ang nagsabing ang iba pang foreign-funded organizations ay mangangailangan ng paunang pahintulot bago makapagsagawa ng anti-tobacco activities sa kabisera.

Sa Vietnam, sinabi ng Consumer Choice Center na ang "harmful interference" ng Bloomberg ay nagbabanta sa paglaganap ng harm reduction. Isang Facebook post ang nagpakita na ang mga opisyal ng WHO sa Vietnam ay nagpapasalamat sa mga organisasyong pinopondohan ng Bloomberg para sa tulong sa pagbibigay ng technical assistance ukol sa smoking at nicotine products.

"The push from Bloomberg Philanthropies and the WHO represents a form of regulatory colonialism, where foreign entities dictate policies without considering the unique challenges of individual countries," ayon sa Consumer Choice Center.

Nagpahayag ng pagkabahala ang CAPHRA sa mga alegasyon, lalo na’t malapit na ang 11th Conference of the Parties to the FCTC na gaganapin sa Geneva mula Nobyembre 17 hanggang 22, 2025.

Ang pag-atras ng U.S. mula sa WHO, bunsod ng mga isyung may kinalaman sa pagtugon nito sa pandemya ng COVID-19 at political influence, ay nagtulak sa ilang bansa—kabilang ang Argentina, Hungary, Italy, at posibleng Russia at United Kingdom—na muling suriin ang kanilang pakikipag-ugnayan sa WHO.

Hinikayat ng CAPHRA ang mga bansa sa Asia-Pacific, kabilang ang Pilipinas, na igiit ang kanilang sariling polisiya at tanggihan ang dayuhang impluwensiya.

"At this year’s COP, it is crucial that the Philippines assert its sovereignty against Bloomberg’s influence over the FCTC and advocate for its own policies. This ensures that smokers who do not quit will have access to less harmful alternatives," saad ng CAPHRA.

Ipinaglalaban ng CAPHRA ang tobacco harm reduction (THR), at nagsusulong ng paggamit ng mas ligtas na alternatibo sa sigarilyo gaya ng vape, heated tobacco at nicotine pouches, batay sa mga siyentipikong pag-aaral na nagpapakitang mas konti ang panganib nito kumpara sa sigarilyo.

Simula Hulyo 18... P50 dagdag-sahod

ni Mai Ancheta @News | July 1, 2025

Photo File: BSP

Madadagdagan ng P50 ang take home pay ng mga arawang manggagawa sa National Capital Region (NCR) matapos aprubahan ng NCR Regional Tripartite Wages and Productivity  Board (RTWPB) ang umento sa minimum wage.

Ang dagdag-sahod ay inanunsyo ng Department of Labor and Employment (DOLE) batay sa Wage Order 26.

Dahil dito, magiging P695 na ang minimum wage mula sa dating P645 para sa non-agriculture sector, at P658 mula sa P608 para sa agriculture sector, service at retail establishments na mayroong 15 pababa na mga manggagawa, pati na sa mga manufacturing na mayroong 10 pababa na mga trabahador.

Ang dagdag umento sa sahod ay magiging epektibo sa July 18, 2025.

Ayon sa DOLE, ito ang pinakamataas na wage hike na ibinigay ng wage board at pakikinabangan ng tinatayang 1.2 million na manggagawang tumatanggap ng minimum na sahod.

Sinabi naman ng mga grupo ng negosyante na kakayanin nila ang P50 dagdag na sahod para sa kanilang mga arawang manggagawa.