2 armadong tulak, huli sa drug-bust

News @Balitang Probinsiya | April 17, 2024

Negros Occidental — Dalawang armadong drug pusher ang dinakip ng mga otoridad sa  drug-bust operation ng mga operatiba kamakalawa sa Brgy. Gahit, EB Magalona sa lalawigang ito.

Pansamantalang hindi pinangalanan ang mga suspek habang iniimbestigahan pa sila ng mga otoridad. 

Ayon sa ulat, may tinanggap na impormasyon ang pulisya na nagbebenta ng umano’y shabu ang mga suspek kaya nagsagawa ng drug-bust operation ang mga operatiba na naging dahilan upang madakip ang dalawang armadong drug pusher.

Nabatid na nakakumpiska ang mga otoridad ng 90 gramo ng hinihinalang shabu at dalawang baril na may lamang bala sa pag-iingat ng mga suspek.

Nakapiit na ang mga suspek na kapwa nahaharap sa kasong paglabag sa Comprehensive Dangerous Drugs Act of 2002 at illegal possession of firearms and ammunitions.

2 bagets, patay sa aksidente

News @Balitang Probinsiya | April 17, 2024

Iloilo — Dalawang binatilyo ang namatay nang bumangga ang kinalululanan nilang motorsiklo sa concrete railings sa national highway ng bayan ng Calinog sa lalawigang ito.

Hindi na muna pinangalanan ang dalawang biktima habang hindi pa naipapabatid sa kanilang pamilya ang sinapit ng dalawang binatilyo na kapwa 17-anyos. 

Ayon sa ulat, nawalan umano ng kontrol ang rider na binatilyo sa pagmamaneho ng motorsiklo na kinalululanan din ng isa pang biktima kaya bumangga sila sa concrete railings.

Nabatid na sa lakas ng impact ay nagtamo ng malaking pinsala sa ulo at katawan ang mga biktima.

Dinala ng mga saksi ang mga biktima sa ospital, pero kapwa sila idineklarang dead-on-arrival.

Mga bilangguan, ‘di itatayo sa Masungi Georeserve — BuCor

ni Eli San Miguel - Trainee @News | April 16, 2024

Tiniyak ni Bureau of Corrections (BuCor) Director General Gregorio Catapang Jr. nitong Martes na walang bilangguan ang itatayo sa loob ng Masungi Georeserve sa Baras, Rizal.

“The bureau with proper coordination with the Department of Environment and Natural Resources will also conduct (a) delineation survey sometime next month but do not misconstrue this to anything because we only want to determine the metes and bounds of BuCor property that we need to secure,” pahayag ni Catapang.

Noong simula ng 2023, nagkaroon ng alitan ang BuCor at ang Masungi Georeserve Foundation hinggil sa protektadong lugar matapos sabihin ng BuCor na nais nitong itayo ang bagong headquarters sa lugar.

Sinabi ng BuCor na iginawad sa kanilang ahensiya ang 270-ektaryang ari-arian sa Masungi sa ilalim ng Proclamation No. 1158, na nilagdaan ni dating Pangulong Gloria Macapagal-Arroyo.

Samantala, sinabi ni Catapang na nananatiling nakabinbin ang ideya na magtayo ng bagong headquarters habang isinasagawa pa ang karagdagang pag-aaral.