Influenza-like cases sa Negros Occidental, tumaas ng 258%

ni Eli San Miguel - Trainee @News | December 11, 2023

Ipinakiusap ng mga health officials sa publiko na mag-ingat sa panahon ng mga pista at okasyon dahil tumaas ng 258.93 porsyento ang mga kaso ng sakit na katulad ng influenza sa Negros Occidental ngayong taon.

Ayon kay Dr. Ma. Girlie Pinongan, provincial health officer, mayroong 2,211 kaso ng influenza-like illness na iniulat mula Enero 1 hanggang Disyembre 2 ngayong taon sa 31 bayan at lungsod ng Negros Occidental kumpara sa 616 na kaso noong 2022.

Naitala ang pinakamaraming kaso sa bayan ng Isabela na may 1,680, sinusundan ng San Carlos City na may 129; Murcia, 80; Bago City, 57; Talisay City, 50; Hinigaran, 20; Cadiz City, 19; at Don Salvador Benedicto, Silay City, at Victorias City na may 16 bawat isa.

Sinabi ni Pinongan na hindi gaanong malubha ang mga kaso at karaniwang bunga ng pagbabago sa kundisyon ng panahon.

Gayunpaman, aniya, dapat iwasan ng publiko ang malapitang pakikipag-ugnayan sa mga taong may sintomas ng sakit na katulad ng influenza.

Kinikilala ang nasabing sakit sa pamamagitan ng fever, fatigue, cough, sore throat, at body aches.

Naiwan sa sinapupunan ng ina.. Beybi, isinilang na putol ang ulo

ni Lolet Abania | June 13, 2022

Kahabag-habag ang sinapit ng isisilang na sanang sanggol na babae matapos lumabas na putol at naiwan ang ulo nito sa loob ng sinapupunan ng kanyang ina nang iniluluwal na sa isang infirmary sa Binalbagan, Negros Occidental.

Batay sa ulat, nasa pitong buwan pa lamang umano na ipinagbubuntis ni Nereza Tarig, 25-anyos, ng Barangay Payao, ang kanyang beybi nang biglang sumakit ang kanyang tiyan. Agad na dinala si Nereza ng mister niyang si John Rommel, 25-anyos, sa isang infirmary upang suriin at tingnan ang kondisyon ng mag-ina.

Nabatid na suhi o baliktad ang posisyon ng sanggol sa sinapupunan ng ina, base sa ginawang pagtatanong ng doktor at staff ng naturang infirmary.

Gayunman, sinabihan umano si Nereza na puwede pa rin daw niyang mailuwal ang kanyang beybi ng normal delivery. Dahil sa patuloy pa rin ang pagsakit ng tiyan ni Nereza, sinabihan umano siya ng doktor ng infirmary na iluwal na niya ang kanyang beybi.

Subalit, ayon kay Nereza, hiniling niyang ilipat o i-refer na lamang umano sila sa ibang ospital. Nang ilalabas na ni Nereza ang kanyang beybi mula sa sinapupunan, nagulat umano siya na katawan na lang ng anak ang nakita habang putol na o wala na itong ulo.

Saka lamang isinugod si Nereza sa district hospital sa Kabankalan City upang kunin ang ulo ng sanggol sa loob ng kanyang sinapupunan. Kahit premature dahil sa pitong buwan lamang ang kanilang beybi, naniniwala ang mag-asawa na may tibok pa rin umano ang puso nito nang iluluwal na ng kanyang ina.

Sa ngayon, nasa bahay at nagpapagaling na umano si Nereza, subalit nais nilang mag-asawa na mabigyang linaw at hustisya ang sinapit ng kanilang beybi.

Ayon sa mag-asawa, posible umanong nagkaroon ng kapabayaan ang naturang infirmary sa nangyari.

Sinubukan namang hingin ang panig at paliwanag ng doktor na nagpaanak kay Nereza ng mga reporters, subalit ayon umano sa isang staff ng infirmary, pinayuhan umano sila ng legal team na huwag magbigay ng anumang komento hinggil sa insidente.

Naka-assign sa Negros Occidental electoral board... Titser, pinagbabaril, utas — PNP

ni Lolet Abania | May 9, 2022

Isang guro sa Negros Occidental na nakatalaga bilang support staff sa isang electoral board ang pinagbabaril at napatay sa Himamaylan City nitong Linggo nang gabi, bago ang araw ng eleksyon, ayon sa Police Regional Office 6 (PRO6) ng Philippine National Police (PNP).

Sinabi ni PRO public information officer chief Police Lieutenant Colonel Arnel Solis, bandang alas-8:30 ng gabi naganap ang shooting incident, kung saan ang biktimang si Mercy Miguel at kanyang asawa ay pauwi na ng kanilang bahay sa Barangay Caradio-an.

“Pinaputukan po ‘yung mag-asawa and itong babae si Ma’am Mercy Miguel, tinamaan po sa tiyan. Sa masamang palad, binawian po siya ng buhay,” saad ni Solis sa isang press conference ngayong Lunes.

Agad namang isinugod ang guro sa Governor Valeriano M. Gatulsao Memorial Hospital subalit idineklarang dead-on-arrival.

Ang asawa naman ni Miguel na si Aldrin ay ligtas na.

Kaugnay nito, inatasan na ni PRO6 director Police Brigadier General Flynn Dongbo ang Negros Occidental Police Provincial Office na magsagawa ng malalimang imbestigasyon hinggil sa naganap na barilan.

“I already gave instruction to the Provincial Director of Negros Occidental Police Provincial Office, Police Colonel Leo B. Pamittan to conduct a thorough investigation on this incident to determine the motive and to identify the suspect/s,” sabi ni Dongbo sa isang statement.

“And once the perpetrators are identified, immediately appropriate charges must be filed against them,” dagdag ni Dongbo.

Nakarekober ang pulisya ng apat na basyo ng 9 mm caliber mula sa lugar na pinangyarihan ng insidente.