Bucks at Warriors, 2-1 na sa Playoffs Semis

ni Anthony E. Servinio - @Sports | May 9, 2022

Kakaibang husay na may halong swerte ang nagbigay sa Milwaukee Bucks ng 103-101 panalo sa bisitang Boston Celtics at lumamang ng 2-1 sa 2022 NBA Playoffs Eastern Conference Semifinals, kahapon sa Fiserv Forum. Walang-awang binugbog ng Golden State Warriors ang bisitang Memphis Grizzlies, 142-112, upang maging 2-1 din ang kanilang serye sa Western Conference.

Sadyang minintis ni Marcus Smart ang pangalawang free throw na may apat na segundo sa orasan at tinapik ni Robert Williams III ang bola bago ipinasok ni Al Horford, subalit hindi binilang ng reperi dahil tumunog na ang huling busina. Ipinasok ni Smart, ang 2022 Defensive Player of the Year, ang unang free throw galing sa foul ni Jrue Holiday para maging dalawa na lang ang pagitan, 101-103.

Sinayang ng Bucks ang kanilang 80-67 lamang sa simula ng 4th quarter at naagaw ng Celtics ang abante matapos ang dalawang free throw ni Jaylen Brown, 100-99, at 1:49 sa orasan. Binalik ng magkasunod na buslo nina Giannis Antetokounmpo at Holiday ang abante, 103-100, bago ang makapigil-hiningang katapusan. Nagtapos si Giannis na may 42 puntos at 12 rebound habang 25 puntos si Holiday.

Ginising ang Golden State ng 10 puntos ni Stephen Curry sa 2nd quarter upang lumamang ng 64-57 sa halftime at hindi na nila binitawan ito. Hindi pa tapos si Curry at dumagdag pa siya ng 10 puntos sa 3rd at kasama ang siyam ni Klay Thompson ay lalong lumayo, 101-80, at umabot pa ito ng 32 puntos sa nalalabing segundo bago ipinasok ng Memphis ang huling 2 puntos.

Bumomba ng 30 puntos si Curry at tinulungan ni Jordan Poole na may 27 puntos. Nagsumite ng 34 puntos si Ja Morant para sa Memphis, subalit hindi na naglaro sa huling 6 na minuto dahil napilay ang tuhod.

Lamang sa puntong iyon ang Golden State, 115-99, at titingnan pa kung makakalaro si Morant sa Game 4 ngayong Martes. Halos kasabay nito ang pagpapalabas sa kakamping si Kyle Anderson na binigyan ng dalawang magkasunod na technical foul.

Embiid, bumida sa 76ers; Mavs, nakabawi vs. Suns

ni Anthony E. Servinio - @Sports | May 8, 2022

Nagbigay ng inspirasyon ang pagbabalik ni Joel Embiid at nagwagi ang kanyang Philadelphia 76ers sa Miami Heat, 99-77, at maiwasan mawalis sa Eastern Conference Semifinals ng NBA Playoffs, kahapon sa Wells Fargo Center. Nakaiwas din sa walis ang Dallas Mavericks at nanalo sa bisitang Phoenix Suns, 103-94, sa kanilang Game 3 sa Western Conference.

Suot ang maskara upang bigyang proteksiyon ang kanyang mata matapos lumiban sa unang dalawang laro ng seryeng best-of-seven, gumawa agad si Embiid ng 7 puntos sa first quarter para sa 21-17 lamang ng 76ers. Minsan lang nakatabla ang Heat sa 3rd quarter, 57-57, at nagising ang Philadelphia sa likod ng 14 puntos ni Tyrese Maxey sa 4th quarter na pumantay sa 14 ng buong koponan ng Miami.

Nagtapos si Maxey na may 21 puntos buhat sa limang 3-points at 21 puntos din si Danny Green, lahat mula sa pitong tres. Double-double si Embiid na 18 puntos at 11 rebound at susubukan na nilang itabla ang serye sa 2-2 sa Game 4 ngayong Lunes.

Mahusay pa rin si Jimmy Butler sa kanyang 33 puntos subalit sabay-sabay inalat ang laro ng mga kakampi. Tanging si Sixth Man of the Year Tyler Herro ang gumana sa 14 puntos.

Humataw ang Suns sa 11-5 na lamang subalit nahanap ni Jalen Brunson ang kanyang shooting at nagbagsak ng 10 puntos upang itulak ang Mavs sa 29-20 lamang sa pagtapos ng first quarter at hindi na binitawan ito. Namuno sa Dallas si Brunson na may 28 puntos habang kinapos ng isang assist si Doncic para sa triple double sa 26 puntos. Sumunod si Bullock na nag-ambag ng 15 puntos.

Nanguna sa Suns si Jae Crowder na may 19 puntos habang 18 puntos si Devin Booker. Nasayang ang selebrasyon ni Chris Paul ng kanyang ika-37 kaarawan at gumawa lang ng 12 puntos at tinapon ang bola nang pitong beses sa gitna ng mahigpit na depensa sa kanya.

Payton, 'tinaga' sa ulo; Brooks, out sa Game 3

ni Anthony E. Servinio - @Sports | May 7, 2022

Galit na galit si Coach Steve Kerr at Golden State Warriors sa ginawang foul ni Dillon Brooks ng Memphis Grizzlies kay Gary Payton II sa Game 2 ng kanilang serye sa Western Conference Semifinals ng 2022 NBA Playoffs. Kahit pinalabas agad sa laro si Brooks, umaksiyon ang liga at suspendido siya para sa Game 3 ngayong Linggo sa Chase Center.

Tatlong minuto pa lang ang lumilipas sa laro ay binigyan ni Brooks ng 'taga sa ulo' ang lumilipad na si Payton kaya bumagsak ito. Matapos mag-shoot ng mga free throw, umupo na si Payton at hindi na bumalik.

Ayon sa pagsusuri, nabali ang kaliwang siko ni Payton at maaaring hindi siya maglaro nang tatlo hanggang limang linggo. Tinatayang makakabalik lang siya kung papasok ang Warriors sa 2022 NBA Finals.

Hindi nakapagtimpi si Coach Kerr sa panayam sa telebisyon sa kalagitnaan ng laro at binansagang marumi ang ginawa ni Brooks. Sa panig ng Grizzlies, ipinagtanggol ni Coach Taylor Jenkins ang kanyang koponan at sinabi na hindi sila marumi maglaro, kailangan lang nila maglaro nang pisikal matapos ang Game 1 kung saan nagwagi ang Warriors, 117-116.

Maliban kay Brooks, hindi nakatakas sa mata ng NBA si Draymond Green ng Warriors at pinatawan ng multang $25,000 (P1.314M) dahil ipinakita niya ang kanyang gitnang daliri sa mga manonood sa FedExForum noong Game 2. Matatandaang pinalabas din si Green noong second quarter ng Game 1 matapos hampasin nang malakas sa mukha si Brandon Clarke, subalit nakaiwas siya sa suspensiyon.

Sa pagpapatuloy ng playoffs ngayong Sabado, sisikapin pareho ng Miami Heat at Phoenix Suns na magtayo ng 3-0 na lamang sa kanilang mga serye kontra Philadelphia 76ers at Dallas Mavericks. Walang koponan sa 75 taon ng NBA ang nakakabalik matapos matalo sa unang tatlong laro sa seryeng best-of-seven.