Spurs itinabla sa 2-2 ang West finals vs. Thunder

ni Anthony E. Servinio @Sports | May 26, 2026

Photo: Dinedepensahang mabuti ng dalawang katunggaling Oklahoma City Thunder si Victor Wembanyama ng San Antonio Spurs sa NBA semis game na ito. (yahoosports)

Laro ngayong Martes - Rocket

8:00 NY vs. Cleveland

Ibinaon ng San Antonio Spurs ang World Champion Oklahoma City Thunder, 103-82, at itabla ang 2026 NBA Western Conference Finals sa 2-2 kahapon sa Frost Bank Center.  Uuwi na ang OKC para sa kritikal na Game 5 sa Miyerkules.

Dumaan sa limang palitan ng lamang bago biglang bumaha ng 16 sunod-sunod na puntos ang Spurs para maging 23-8.  Hindi na nakabangon ang Thunder mula roon at umabot ng 70-45 ang agwat sa pangatlong quarter.

Unang quarter pa lang ay 11 na si Victor Wembanyama at nagtapos na may 33 puntos.  Sumuporta sina Stephon Castle at Devin Vassell na parehong 13.

Nalimitahan sa 19 lang si MVP Shai Gilgeous-Alexander at hindi na siya ipinasok sa buong huling quarter.  Sumunod si Isaiah Hartenstein na may 12.

Samantala, pinarangalan din ang mga All-NBA kahapon.  Nasa First Team sina SGA, Wemby, Cade Cunningham ng Detroit, Nikola Jokic ng Denver at Luka Doncic ng LA Lakers.

Binubuo ang Second Team nina Jaylen Brown ng Boston, Jalen Brunson ng New York, Kevin Durant ng Houston, Kawhi Leonard ng LA Clippers at Donovan Mitchell ng Cleveland.  Ang lahat ng Third Team - Tyrese Maxey ng Philadelphia, Jamal Murray ng Denver, Jalen Johnson ng Atlanta, Jalen Duren ng Detroit at Chet Holmgren ng OKC - ay nakamit ang parangal sa unang pagkakataon.

Tampok ngayong Martes ang tapatan nina Brunson at Mitchell sa Game 4 ng East Finals.  Maaaring tapusin na ng Knicks ang seryeng best-of-seven sa 4-0 ngunit gagawin ng Cavs ang lahat para manatiling buhay sa sariling tahanan. 

Thunder namumuro na tungo sa finals, SGA bida

ni Anthony E. Servinio @Sports | May 22, 2026

Photo: Hindi napigilan si Shai Gilgeous-Alexander ng Oklahoma City Thunder ni Stephon Castle ng San Antonio Spurs sa laban nilang ito sa West finals.    

Laro ngayong Linggo - Rocket

8 AM NY vs. Cleveland

Lamang na sa serye, 2-1 ang World Champion Oklahoma City Thunder sa bisa ng 123-108 panalo sa San Antonio Spurs sa 2026 NBA Western Conference Finals kahapon sa Frost Bank Center. Humugot muli ng lakas ang OKC kay MVP Shai Gilgeous-Alexander at ilang mga sorpresa.

Ipinasok ng Spurs ang unang 15 puntos at inabot ng 4 na minuto bago nakasagot ang Thunder. Hindi sumuko ang OKC at unti-unting lumapit at gawing mahigpit ang laban pagsapit ng pangalawang quarter.

Walang puntos si SGA sa unang quarter subalit gumana ang kanyang opensa kung kailan kailangan. Nagpasok ng 2 free throw si Alex Caruso para basagin ang huling tabla, 47-45, at itinulak ni SGA ang koponan palayo, 58-51.

Hindi na nakaporma and Spurs at tuluyang lumobo sa 123-105 bago humirit ng tres ang Spurs sa huling 13 segundo. Sa last 2 minutes ay nagpasya ang mga koponan na paupuin na ang mga bituin at maghanda na para sa Game 4 sa Lunes.

Nagtapos si SGA na may 26 at 12 assist. Sumunod na may 24 ang bihirang gamitin Jared McCain, ang nagsabi na mayroon siyang lahing Filipino umano.

Hindi naglaro si Jalen Williams pero umangat sa halip si Jaylin Williams na nag-ambag ng 18 bilang reserba. Napilay ang hita ni Jalen sa kanilang 122-113 panalo sa Game 2.

Nanguna sa Spurs sina Victor Wembanyama na may 26 at Devin Vassell na may 20. Nagpasyang maglaro sina De'Aaron Fox at kabayan Dylan Harper kahit may iniindang pilay at nagsama para sa 21.

Samantala, pinarangalan sina Wemby at Chet Holmgren ng OKC bilang bahagi ng All-Defensive First Team kasama sina Ausar Thompson ng Detroit, Rudy Gobert ng Minnesota at Derrick White ng Boston. Binubuo ang Second Team nina Cason Wallace ng OKC, Scottie Barnes ng Toronto, Bam Adebayo ng Miami, OG Anunoby ng New York at Dyson Daniels ng Atlanta.

Knicks 2-0 na vs. Cavs, Hart nagpaulan ng 3

ni Anthony E. Servinio @Sports | May 23, 2026

Photo: New York Knicks - FB

Laro ngayong Sabado - Frost Bank

8:30 AM OKC vs. SA

Naniguro ang New York Knicks at maagang iniligpit ang bisitang Cleveland Cavaliers, 109-93 sa pagpapatuloy ng 2026 NBA Eastern Conference Finals kahapon sa Madison Square Garden. Lamang na ang Knicks sa seryeng best-of-seven, 2-0.

Kabaligtaran ito ng kanilang 115-104 overtime panalo sa Game One kung saan kinailangan nila humabol sa huling quarter. Nagsimulang bumuhos ng puntos ang NY sa pangalawang quarter upang maagaw ang bentahe at lumamang, 53-49.

Nakatabla ang Cavs sa unang dalawang buslo sa pangatlong quarter, 53-53, pero biglang humirit ng 18 sunod-sunod na puntos ang Knicks sa pangunguna ni Josh Hart, 71-63. Nakalapit ang Cavs sa huling 9 na minuto, 78-85, subalit inihatid ng NY ang knockout para sa pinakamalaking agwat papasok sa huling tatlong minuto, 106-86.

Nagtapos si Hart na may 26 buhat sa limang three-points. Parehong 19 sina Mikal Bridges at bayani ng Game One Jalen Brunson.

Maganda ang simula ng Cleveland nang kunin ang unang quarter, 27-24, sa likod ni Evan Mobley na itinala ang 10 ng kanyang 14. Nanguna si Donovan Mitchell na may 26 habang 18 si James Harden.

Lilipat ang serye sa Rocket Arena para sa dalawang laro sa Linggo at Martes. Sa 473 serye, 35 o 7.4% lang ang nakabangon matapos matalo sa unang dalawa.

Pag-aagawan ngayong Sabado ng World Champion Oklahoma City Thunder at San Antonio Spurs ang liderato sa Western Conference Finals na pantay sa 1-1. Ginulat ng bisitang SA ang OKC, 122-115, pero bumawi agad ang mga kampeon, 122-113.