Lakers, nag-kampeon sa NBA In-Season 1st Edition

ni Anthony E. Servinio @Sports | December 10, 2023

Lumikha ng kasaysayan ang Los Angeles Lakers at iniuwi ang pinakaunang edisyon ng NBA In-Season Tournament laban sa Indiana Pacers, 123-109 sa T-Mobile Arena ng Las Vegas. Lalong dumami rin ang karangalan ng 38-anyos na si LeBron James at napiling MVP ng torneo, hindi masama para sa pinakamatandang manlalaro ng liga.

Sa unang minuto lang nakasabay ang Pacers at kontrolado ng Lakers ang laro hanggang lumamang ng 11 bago matapos ang third quarter, 90-79. Ilang beses lumapit sa tatlo na lang ang Indiana at ang huli ay 99-102 papasok sa huling anim na minuto.

Mula roon ay bumanat nang 13 sunod na puntos ang Lakers na sinimulan ng three-points ni Cam Reddish at sinundan ng 10 ni Anthony Davis para sa kanilang pinakamalaking bentahe, 115-99, at tatlong minuto ang nalalabi.

Halimaw si Davis na nagsumite ng kabuuang 41 puntos at 20 rebound. Sumunod si Austin Reaves na may 28 at LBJ na may 24 at walang talo ang Lakers sa lahat ng pitong laro.

Bago ang laro, umaapoy ang shooting ng Pacers at gumagawa sila ng 132.7 puntos bawat laro sa torneo. Sinubukang lagyan ng posas si Tyrese Haliburton subalit nagtala pa rin siya ng 20 puntos at 11 assist.

Ayon kay Reaves na isa sa pinakasikat na manlalaro ng Team USA noong 2023 FIBA World Cup, ang nasa isip niya ay maglaro lang ng tama at manatiling agresibo. Basta kasama niya sa sahig ang mga tulad nina LBJ, Davis at D’Angelo Russell ay nagiging madali ang Basketball.

Para kay champion coach Darvin Ham na isang dating PBA import ng TNT noong kanyang kabataan, nagustuhan niya ang epekto ng torneo sa manlalaro. Kahit nasa unang mga buwan ng liga ay parang naglalaro na sa playoffs at nadagdagan ng saysay ang mga laro.

Bucks at Lakers, swak sa semis ng NBA in-season tour

ni Anthony E. Servinio @Sports | December 6, 2023

Kinumpleto ng Milwaukee Bucks at Los Angeles Lakers ang mga maglalaro sa semifinals ng pinakaunang NBA In-Season Tournament matapos pauwiin ang kanilang mga bisita kahapon. Tinambakan ng Bucks ang New York Knicks, 146-122, at sinundan ng 106-103 panalo ng Lakers sa Phoenix Suns.

Pumukol ng pandiin na tres si Austin Reaves upang lumayo ang Lakers, 105-102, at 15 segundong nalalabi pero sinagot ito ng buslo ni Kevin Durant upang magbanta ang Suns, 104-105. Binigyan ng foul si Anthony Davis at isang free throw lang ang kanyang naipasok at napunta ang bola kay Durant subalit nagmintis ang kanyang tira mula 30 talampakan sabay tunog ng huling busina.

Namuno si LeBron James na may 15 ng kanyang 31 puntos sa 4th quarter at 11 assist. Tumulong si Davis na may 27 at 15 rebound habang 20 si Reaves bilang reserba.

Nasayang ang 31 ni Durant. Perpekto pa rin ang Lakers kontra sa Suns sa kanilang tatlong laro ngayong taon at tumalon sa taas ng Pacific Division na may 13-9 panalo-talo.

Bumira ng three-points si Damian Lillard upang ibigay sa Bucks ang 75-72 lamang pagsapit ng halftime. Mula roon ay dinala ng Milwaukee ang positibong enerhiya at tuluyang lumayo hanggang umabot sa 146-119 ang agwat bago ang huling minuto.

Nagtapos si Giannis Antetokounmpo na may 35 puntos sa 34 minuto na may kasamang 10 assist. Sumunod si Lillard na may 28 galing sa limang tres.

Naghihintay sa Milwaukee sa semis ang Indiana Pacers ngayong Biyernes sa T-Mobile Arena ng Las Vegas simula 6:00 ng umaga, oras sa Pilipinas. Haharapin ng Los Angeles ang New Orleans Pelicans sa parehong palaruan sa 10:00.

Ang dalawang magwawagi ay paglalabanan ang kampeonato sa Linggo sa T-Mobile muli. Igagawad sa kampeon ang NBA Cup, ang bagong tropeong gawa sa ginto at pilak na may taas na 23 pulgada bilang tanda ng unang taon ng torneo.

8 team sa NBA In-Season Tournament, kumpleto na

ni Anthony Servinio @Sports | November 29, 2023

Kumpleto na ang walong koponan na paglalabanan ang pinakaunang NBA In-Season Tournament matapos ang huling araw ng group stage. Nakuha ng Milwaukee Bucks, Boston Celtics, New York Knicks at Sacramento Kings ang tiket sa bisa ng mga hiwalay na tagumpay.

Naka-shoot si Malik Monk na may pitong segundong nalalabi upang itulak ang Kings sa 124-123 panalo sa Golden State Warriors at walisin ang apat na laro sa West Grupo C. Nanguna si De’Aaron Fox na may 29 habang 21 puntos si Monk.

Tinulungan ng Celtics ang sarili at tinambakan ang Chicago Bulls, 124-97, sa likod ng 30 ni Jaylen Brown. Nagtabla ang Boston, Orlando Magic at Brooklyn Nets sa taas ng East Grupo C sa 3-1 subalit nangibabaw ang Celtics dahil mas malaki ang kanilang kabuuang nilamang sa apat na laro.

Perpekto din ang Bucks sa East Grupo B at dinurog ang Miami Heat, 131-124. Malupit muli si Giannis Antetokounmpo sa kanyang 33 puntos at 10 rebound.

Nahabol ng Knicks ang Wild Card ng East bilang may pinakamataas na kartada sa tatlong pumangalawa sa mga grupo. Iniwan ng New York ang Charlotte Hornets, 115-91, sa halimaw na 25 puntos at 20 rebound ni Julius Randle.

Ang mga magtatapat sa knockout quarterfinals sa East ay ang Milwaukee laban New York at Indiana Pacers kontra Boston. Sa West, magkikita ang Los Angeles Lakers at Phoenix Suns kasabay ng Sacramento at New Orleans Pelicans.

Ang mga magwawagi ay tutuloy sa semifinals na gaganapin sa Las Vegas sa Disyembre 8. Sa parehong lugar din ang laban para sa korona at $500,000 sa Disyembre 10.

Lahat ng laro ng torneo maliban sa finals ay bibilangin sa kinagawiang 82 laro ng bawat koponan. Magkakaroon din na hiwalay na MVP at iba pang mga karangalan.