Doncic nanaig sa 73 puntos, Maverick tinalo ang Hawks

ni Anthony Servinio @Sports | January 27, 2024

Hindi nagpadaig si Luka Doncic at bumuhos ng 73 puntos upang ipanalo ang Dallas Mavericks laban sa Atlanta Hawks, 148-143, sa NBA kahapon mula sa State Farm Arena. Ang 73 ay naganap ilang araw lang matapos magtala ng 70 si MVP Joel Embiid sa 133-123 panalo sa San Antonio Spurs noong Martes.

Ito rin ang ika-pitong laro na may nagtala ng 73 o higit at apat dito ay kay Wilt Chamberlain na gumawa ng 100, 78 at dalawang beses na 73. Ang iba pa ay ang 81 ni Kobe Bryant noong 2006 at 73 ni David Thompson noong 1978.

Nagtayo ng bagong personal na marka si Doncic at pinakamaraming puntos ng isang Maverick. Nagkataon din na nagawa niya ito kontra sa Hawks, ang koponan na pumili sa kanya noong 2018 subalit agad ipinadala sa Dallas kapalit ang kapwa rookie Trae Young bago magsimula ang torneo.

Sa gitna ng makasaysayang laro ni Doncic, nasapawan ang 62 puntos ni Devin Booker ng Phoenix Suns subalit nanaig sa huli ang Indiana Pacers, 133-131, sa bisa ng buslo ni Obi Toppin na may tatlong segundo sa orasan. Nanguna ang pinakabagong Pacer na si Pascal Siakam na may 31 puntos.

Nagtala rin si NBTC Philippines alumni Jalen Green na 36 puntos at 10 rebound at tinambakan ng kanyang Houston Rockets ang Charlotte Hornets, 138-104. Ang personal na marka ni Green ay 42 laban sa Minnesota Timberwolves na 119-114 noong Enero 23, 2023.

Samantala, ipinakilala na ang mga kapitan at first five para sa 2024 All-Star sa Pebrero 19 sa Indiana. Magsisilbing mga kapitan si Giannis Antetokounmpo ng East at LeBron James ng West na may pinakamaraming online boto buhat sa mga tagahanga (50%), mga mamamahayag (25%) at kapwa manlalaro (25%).

Porzingis ipinanalo ang Celtics vs. Lakers

ni Anthony E. Servinio @Sports | December 27, 2023

Uminit ng todo si Kristaps Porzingis upang maging susi ng 126-115 panalo ng bisitang Boston Celtics sa malupit na karibal Los Angeles Lakers sa taunang NBA Christmas Games kahapon sa Crypto.com Arena. Nag-alay din ng regalong 50 puntos si Luka Doncic at hinila ang Dallas Mavericks kontra sa biglang lumamig na Phoenix Suns, 128-114.

Humataw agad ang Celtics, 12-0, at inabot ng tatlong minuto bago nakapuntos ang Lakers. Nakabawi ng bahagya ang LA sa likod ni Anthony Davis at lumapit sa halftime, 57-58, subalit pinabayaan nila ang Boston na gumawa ng 41 puntos sa third quarter para lumaki ang agwat papasok sa huling quarter, 99-90.

Nagtapos si Porzingis na may 28 puntos at 11 rebound habang 25 si Jayson Tatum.  Nanatiling numero uno ang Celtics sa taas ng liga na may 23-6 panalo-talo at bumaba ang Lakers sa 16-15.

Pumasok sa laro si Doncic na kailangan lang ang 11 puntos upang maging ika-394 na manlalaro na may 10,000 at first quarter pa lang ay bumira siya ng 17. Naabot niya ito sa 358 laro lang.

Umusok para sa 38 si Jalen Brunson at pinutol ng New York Knicks ang pitong sunod na tagumpay ng Milwaukee Bucks, 129-122. Maliban kay Brunson ay nag-ambag sina Julius Randle ng 24, RJ Barrett ng 21 at reserba Immanuel Quickley ng 20.

Naghain ng balanseng atake ang World Champion Denver Nuggets at nilupig ang Golden State Warriors, 120-114. Nagsumite ng double-double sa puntos at rebound sina Nikola Jokic (26, 14), Michael Porter Jr. (19, 10) at Aaron Gordon upang resbakan ang 28 ni Jamal Murray.

Kahit hindi naglaro ang kanilang mga bituin, nagbakbakan ng husto hanggang nanaig ang Miami Heat sa Philadelphia 76ers, 119-113. Nagpasikat si rookie Jaime Jaquez Jr. na may 31 at 10 rebound upang takpan ang pagliban ni Jimmy Butler at naging mas matimbang sa 76ers na wala si MVP Joel Embiid. 

Giannis naglalagablab sa 64 pts, Green suspendido sa pananapak

ni Anthony E. Servinio @Sports | December 14, 2023

Umapoy para sa 64 puntos at 14 rebound si Giannis Antetokoumpo sa 140-126 panalo ng Milwaukee Bucks sa NBA Cup runner-up Indiana Pacers kahapon sa Fiserv Forum. Ang 64 ay bagong personal na marka ng “Greek Freak” na hinigitan ang 55 sa 123-113 panalo kontra Washington Wizards noong Enero 3, 2023.

Itinala ni Giannis ang kanyang ika-56 puntos upang itulak ang Milwaukee sa 127-106 lamang at apat na minuto ang nalalabi. Kahit malaki ang agwat, hindi umupo ang dating MVP at gumawa pa ng walong puntos.

Sumuporta sina Damian Lillard na may 21 at reserba Bobby Portis na may 19. Parehong may tig-22 puntos sina Tyrese Hailburton at Myles Turner ng Indiana.

Umakyat din sa ika-limang may pinakaraming three-points sa kasaysayan ng NBA si Lillard at pumukol ng dalawa para maging 2,451 at lampasan ang 2,450 ni Kyle Korver mula 2003 hanggang 2020. Sunod niyang hahabulin ang 2,560 ng Pacers alamat Reggie Miller mula 1987 hanggang 2005.

Bumawi ang NBA Cup champion Los Angeles Lakers at binitin ang huling hirit ng kulelat San Antonio Spurs, 122-119, sa gitna ng pagliban ni MVP LeBron James. Noong isang araw, yumuko sina LBJ at Lakers sa Dallas Mavericks, 125-127, sa unang laro matapos ang makasaysayang kampeonato.

Samantala, suspendido muli si Draymond Green ng Golden State Warriors at ngayon ay walang katiyakan kung kailan siya makakabalik sa NBA. Malakas na hinampas ni Green si sentro Jusuf Nurkic ng Phoenix Suns sa mukha sa third quarter at agad pinalabas sa laro noong Miyerkules kung saan natalo ang Warriors, 116-119.

Tinimbang ng liga ang nagpatong-patong na parehong kaso ni Green. Nitong Nobyembre lang ay nasuspinde siya ng limang laro matapos sakalin sa leeg gamit ang braso si Rudy Gobert ng Minnesota Timberwolves.