42M Pinoy rehistrado na sa national ID

ni Lolet Abania | September 8, 2021

Aabot na sa 42 milyong Pilipino ang sinimulan ang proseso ng pagkuha ng kanilang national ID. Ayon sa report ni Socioeconomic Planning Secretary Karl Kendrick Chua kay Pangulong Rodrigo Duterte sa Cabinet briefing na ipinalabas ngayong Miyerkules, nasa 41,970,083 Pilipino na ang nakapag-register para sa Step 1 o ang demographic data collection hanggang Setyembre 3, 2021.

Nasa kabuuang 28,682,680 indibidwal naman ang nakakumpleto na para sa Step 2 registration o ang biometrics capture, habang 1,584,621 Pinoy ang nakatanggap naman ng kanilang PhilID cards.

Target ng pamahalaan na makapagrehistro para sa national ID ng tinatayang 50 hanggang 70 milyong indibidwal bago matapos ang taon.

“We aim to register 50 to 70 million Filipinos with the PhilSys and achieve 100% financial inclusion at the family level by the end of the year. This will help the government efficiently identify beneficiaries for social protection programs and spark the widespread use of electronic payments to accelerate the digital economy,” ani Chua sa isang statement noong nakaraang Hulyo.

Ayon pa kay Chua, hanggang nitong Agosto 22, nasa 5.2 milyong registrants ang nakapag-sign up na para sa kanilang bank accounts.

Edad 15-17 at 65 pataas, puwede nang lumabas para sa National ID

ni Ronalyn Seminiano Reonico | May 7, 2021

Pinayagan na ng Inter-Agency Task Force (IATF) ang mga edad 15 hanggang 17 na lumabas ng bahay upang makapagparehistro para sa national ID system, ayon kay Presidential Spokesperson Harry Roque.

Maaari na ring lumabas ang mga edad 65 pataas para sa registration sa Philippine Identification System, ayon kay Roque.

Ipinagbabawal ng IATF ang paglabas ng mga edad 18 pababa at 65 pataas sa mga lugar na nasa ilalim ng modified enhanced community quarantine (MECQ) katulad ng Metro Manila, Rizal, Bulacan, Cavite at Laguna dahil sa COVID-19 pandemic, maliban na lamang kung para sa mga essential purposes.

Saad pa ni Roque, “Ang mga menor de edad, 15 to 17, kasama na rin po ang mga seniors, ‘yung mga above 65, eh, palalabasin lang po ng kanilang mga tahanan para po magrehistro sa Philippine Identification System at siyempre po, ‘yung dating rule na kapag kinakailangan para kumuha ng mga essentials o kinakailangan para magtrabaho, eh, hindi po iyon apektado.”

Samantala, ayon sa Philippine Statistics Authority, noong Abril ay umabot na umano sa 28 million ang nakapagparehistro para sa Philippine national ID.

Registration ng National ID, 'di kinaya sa dami

ni Mary Gutierrez Almirañez | May 3, 2021

Inaayos na ang website ng Philippine Statistic Authority (PSA) dahil sa nangyaring ‘technical issue’ sa pilot launch ng online registration para sa National ID, ayon sa National Economic Development Authority (NEDA).

Paliwanag pa ni NEDA Socioeconomic Planning Secretary Karl Kendrick Chua, tinatayang 2,000 katao lamang ang nakapagparehistro nu’ng ika-30 ng Abril sapagkat hindi nakayanan ng website na i-handle ang 46,000 na users sa nakalipas na unang isang minuto.

Nilinaw din niyang 16,000 indibidwal lamang ang sinubukan nilang isalang sa pre-registration sa scale na 35,000 per minute na tanging kakayahan ng system.

Aniya, “What we do right now is to review our system so we can increase the load. The problem is really the demand. It’s like you opened a new theme park or restaurant, although you are ready for the peak during holidays or weekends, sometimes on the first day, everyone wants to participate. We thanked them but we are very sorry also for what happened.”

Dagdag pa niya, “We assure you that we are fixing this. We have experts all over the world and we will relaunch it as soon as we can.”

Matatandaang isinagawa ng PSA nu’ng Oktubre ang bahay-bahay na pangongolekta ng impormasyon upang malaman ang demographic profile ng mga mamamayan, kung saan tinatayang 33.3 million ang naging respondent sa Step 1.

Sa ngayon, halos 6.4 million pa lamang nito ang nakauusad sa ikalawang procedure o ang on-site biometrics data collection.

Sa kabila naman ng mga lumalabas na ‘error messages upon registration’ sa website ng PSA ay tiniyak ni Chua na gumagana pa rin ang system, kung saan kailangan lamang ng pasensiya at tiyaga sa paulit-ulit na pag-submit ng data.

Inaasahan ding magkakaroon ng relaunching sa online registration ng National ID kapag naayos na ang website ng PSA sa mga susunod na araw.