76ers humilera na sa East semis, Knicks nakaabang

ni Anthony E. Servinio @Sports | May 4, 2026

Photo: Philadelphia 76ers / FB

Kinumpleto ng bisitang Philadelphia 76ers ang milagro sa 109-100 panalo sa paboritong Boston Celtics sa 2026 NBA Playoffs kahapon sa TD Garden. Nanaig ang 76ers sa seryeng best-of-seven, 4-3, at tumuloy sa Eastern Conference Semifinals.

Pumasok ang Celtics na wala sa Jayson Tatum na napilitang lumiban dahil masakit ang tuhod. Agad na kinuha ng Philly ang pagkakataon at unti-unting lumayo hanggang umabot ng 84-66 bago magwakas ang pangatlong quarter.

Ayaw mapahiya sa sariling tahanan, humabol ang Celtics at ang huling banta nila ay 98-99 at 3:49 sa orasan. Nakahinga ng maluwag ang 76ers sa walong sunod-sunod na puntos ni Tyrese Maxey, 107-99, at tiyakin ang resulta na may 15 segundo pa.

Nagtapos si Maxey na may 30 at 11 rebound. Sariwa pa ang operasyon para tanggalin ang appendix, bumanat ng 34 at 12 rebounds si Joel Embiid.

Haharapin na ng Philadelphia ang New York Knicks simula Martes sa Madison Square Garden. Hindi biro ang ginawa ng 76ers na kunin ang huling tatlong laro.

Ito ang ika-14 na pagkakataon na may umahon galing 1-3 mula 1968. Bago niyan ay dumaan muna sila sa Play-In at tinalo ang Orlando Magic, 109-97, para itakda ang serye kontra Celtics.

Sa gitna ng nawalang 23.3 puntos ni Tatum ay sinikap buhayin ang Celtics nina Jaylen Brown na may 33. Tumulong si Derrick White na may 26.

Malalaman ang huling dalawang mapapabilang sa East Semis sa kambal na Game Seven ngayong Lunes. Bibisita ang Orlando sa Detroit Pistons habang dadalaw ang Toronto Raptors sa Cleveland Cavaliers.

Rockets pinalagan ang Lakers, 'di rin sumuko ang Pistons

ni Anthony E. Servinio @Sports | May 1, 2026

Photo: Hawak maige ni Houston Rockets forward Tari Eason (17) ang bola laban kay Los Angeles guard Marcus Smart (36) sa laban nilang ito sa NBA playoffs kahapon. (Gary A. Vasquez Images/Reuters)

Hindi pa handang sumuko ang bisitang Houston Rockets at wagi sila ng ikalawang sunod sa Los Angeles Lakers, 99-93 sa 2026 NBA Playoffs kahapon sa Crypto.com Arena. Napigil din ng Detroit Pistons ang pag-angat ng Orlando Magic, 116-109.

Naubusan agad ng enerhiya ang Lakers at kontrolado ng Rockets ang laban mula sa pangalawang quarter. Naghatid ng maagang knockout sa three-points ni Jabari Smith Jr., 82-69, at 10 minuto ang nalalabi.

Nagtapos si Smith na may 22 habang 18 si Tari Eason sa gitna ng patuloy na pagliban ni Kevin Durant. Gumawa ng 25 si LeBron James at 22 para sa nagbabalik na si Austin Reaves subalit isa na lang ang bentahe ng Lakers sa seryeng best-of-seven, 3-2.

Matindi ang naging palitan ng puntos nina Cade Cunningham ng Pistons at Paolo Banchero ng Magic na parehong bumuhos ng 45. Naging mas matimbang ang ginawa ni Cunningham at naiwasan ng numero unong Pistons na magwakas ang serye.

Sa isa pang laro, bumanat ng husto si Dennis Schroder sa huling quarter para itulak ang Cleveland Cavaliers kontra Toronto Raptors, 125-120. Ipinasok ni Schroder ang 11 ng kanyang 19 sa huling quarter na tinuldukan ng malapitang buslo para maging 124-113 at 3:43 sa orasan.

Spurs at Celtics, 3-1 na isa na lang sa playoffs

ni Anthony E. Servinio @Sports | April 28, 2026

Photo: Nabigo sa tangkang pag-swak ng bola si Alperen Sengun (28) ng Houston Rockets habang nakadepensa si Los Angeles Lakers center/forward Jaxson Hayes (11) at forward LeBron James (23) sa 2nd quarter game ng NBA playoffs kahapon sa Toyota Center. (Troy Taormina-Images/Reuters)

Binitin ng Houston Rockets ang martsa ng bisitang Los Angeles Lakers, 115-96 sa 2026 NBA Playoffs kahapon sa Toyota Center. Isang panalo na lang ang kailangan ng San Antonio Spurs at Boston Celtics matapos ang mga impresibong tagumpay.

Unang quarter lang nakasabay ang Lakers at mula roon ay tuloy-tuloy ang arangkada ng Rockets hanggang maging 97-69 maaga sa huling quarter. Ito ang unang panalo ng Houston sa seryeng best-of-seven subalit matapos mahulog sa unang tatlong laro.

Bumanat ng 23 si Amen Thompson habang 20 si Tari Eason. Hindi pa rin naglaro si Kevin Durant dahil masakit ang bukong-bukong.

Umahon ang Spurs mula sa 39-58 butas bago magwakas ang pangalawang quarter at ibinaon ang Portland Trail Blazers 114-93, at itayo ang 3-1 bentahe. Balik-aksyon si Victor Wembanyama at agad uminit para sa 18 ng kanyang 27 sa huling dalawang quarter na may kasamang 12 rebounds at 7 supalpal.

Rumatrat ng 24 3-points ang Celtics para tambakan ang Philadelphia 76ers, 128-96, at lumamang ng 3-1. Anim na tres si reserba Payton Pritchard para pamunuan ang Boston sa kanyang 32 habang nagpatak ng 30 si Jayson Tatum at 20 kay Jaylen Brown.

Sa isa pang serye, panalo ang Toronto Raptors sa bisitang Cleveland Cavaliers, 93-89, para pumantay sa 2-2. Sumandal ang Raptors sa mga paniguradong free throw ni Scottie Barnes sa huling minuto upang magtala ng 23 at tinumbasan ni Brandon Ingram na 23 din.

Samantala kahit lamang ng 3-1 ang Minnesota Timberwolves sa Denver Nuggets, kailangang maghanda silang tapusin ang serye na wala sina Donte DiVincenzo at Anthony Edwards. Napilay ang sakong ni DiVincenzo sa Game 4 at ooperahan na sabay nasaktan ang tuhod ni Edwards at walang linaw kung kailan babalik.