MRT-3 train, binaboy, mga empleyado damay

ni Lolet Abania | May 13, 2021

Pinaghahanap na ngayon ng pamunuan ng Metro Rail Transit Line 3 (MRT-3) ang suspek sa bandalismo sa isa sa kanilang mga tren nitong Miyerkules.

“Nakakagalit kasi pare-pareho tayong stakeholders dito. Ang ginamit na pera dito sa pag-aayos ng MRT ay pera ng bayan. Nakakapanlumo kasi... pagod ang ibinuhos dito ng ating mga kasamahan, ‘yung mga naglilinis ng tren, security,” ani Eymard Eje, officer-in-charge at general manager ng MRT-3.

Batay sa inisyal na imbestigasyon, ang hindi nakilalang suspek ay walang takot na umakyat sa fence ng MRT track sa pagitan ng Magallanes at Taft Avenue stations nu'ng Miyerkules nang gabi.

Nakahinto pa ang tren nang sandaling iyon habang naghihintay na umandar ang nasa unahan nitong tren.

Hindi napansin ng train operator at marshals na mayroon na palang nag-spray ng pintura sa nasabing tren, kaya dinala ito sa MRT-3 depot matapos na isang concerned citizen ang nagpabatid sa security guard hinggil sa ginawang bandalismo.

Ayon kay Eje, napilitan naman ang mga MRT-3 personnel na manatili sa kanilang trabaho kahit na lagpas na sila sa oras upang maimbestigahan ang insidente.

“Nakakapagod talaga kasi extra-trabaho sa tauhan natin,” ani Eje.

Ito na ang ikalawang insidenteng nangyari sa train line ng MRT sa loob ng isang linggo. Noong Lunes, dalawang pasahero ang bumaba sa train track mula sa platform sa Quezon Avenue station upang makapag-selfie ang mga ito.

MRT-3, palpak ang disinfection, mga empleyado, kakastiguhin

ni Mary Gutierrez Almirañez | March 14, 2021

Isinailalim sa ‘disciplinary actions’ ang ilang empleyado ng Metro Rail Transit Line 3 (MRT-3) matapos lumabas sa internet ang video kung saan makikitang minamadali at hindi inaayos ng mga ito ang pagdi-disinfect ng tren, ayon sa pahayag ng Department of Transportation (DOTr) ngayong araw, Marso 14.

Anila, "We are assuring the riding public that matters have been taken to prevent a repeat of that unfortunate incident and that the personnel involved are now facing disciplinary action."

Nauna nang iniulat na nagpositibo sa UK variant ng COVID-19 ang ina ng isang empleyado sa MRT-3 na nagdulot ng pagkabahala sa mga biyahero at buong administrasyon ng MRT-3.

Sa ngayon ay sinisigurado ng Department of Transportation ang malinis at maayos na pagdi-disinfect sa lahat ng tren at iba pang pasilidad sa bawat istasyon upang maiwasan ang pagkalat ng virus.

Libreng sakay sa MRT-3 at LRT-2 bukas

ni Lolet Abania | March 7, 2021

May libreng sakay para sa mga kababaihan bukas, Lunes.

Naglabas ng anunsiyo ang Department of Transportation (DOTr) na ang Metro Rail Transit-3 (MRT-3) at ang Light Rail Transit-2 (LRT-2) ay magbibigay ng libreng sakay para sa mga kababaihan bilang selebrasyon ng International Women’s Day.

Nagtakda ng libreng sakay para sa mga kababaihan bukas sa dalawang time slots, alas-7:00 ng umaga hanggang alas-9:00 ng umaga at mula alas-5:00 ng hapon hanggang alas-7:00 ng gabi.

Ito ang paraan ng DOTr para magbigay-pugay sa mga kababaihan at bilang selebrasyon ng National Women’s Month sa bansa.