P500 multa sa rider na sisilong sa overpass — MMDA

ni Mai Ancheta @News | July 14, 2023

Ipagbabawal na ng Metropolitan Manila Development Authority (MMDA) ang pagsilong ng mga motorcycle rider at mga motorista sa ilalim ng overpass kapag malakas ang ulan.

Ayon kay MMDA acting Chairman Romando Artes, mapanganib ang pagtigil sa ilalim ng overpass lalo na sa highway dahil maaaring madisgrasya o masagasaan kapag hindi napansin ng ibang mga sasakyan.

“Unang-una, delikado para sa kanila. Imagine mo, nasa highway ka, titigil ka doon, puwede kang masagasaan o mabangga ‘pag hindi ka napansin ng ibang nagmamaneho,” ani Artes.

Bukod sa mapanganib, sinabi ng opisyal na nagiging dahilan din ng trapik ang pagparada para sumilong dahil sasakupin nila ang isang lane ng kalsada.

“Nagko-cause po siya ng traffic dahil, imagine mo, kung 30 minutes to an hour ang ulan, hindi sila umaalis hangga’t hindi tumitila. Minsan, isang lane na lang ang nadadaanan na nagko-cause po ng sobrang traffic,” dagdag ni Artes.

Dahil dito, sinabi ng MMDA chairman na magpapataw na sila ng multa para sa mga lalabag nito bilang obstruction na may multang P500.

Iaayos aniya nila ang sistema para sa pag-iisyu ng ticket bago simulan ang pagpapataw ng multa sa mga mahuhuling rider.

“Obstruction ang una na penalty, P500. Soon, kapag naisaayos natin ang ating sistema, particularly ‘yung mga sa gasoline stations, we will strictly enforce na po ang pag-i-issue ng tickets sa magba-violate,” wika ni Artes.

Plano ng MMDA na kausapin ang mga gasoline station sa kahabaan ng EDSA na makipag-partner sa kanila sa pamamagitan ng pagtatayo ng tents para masilungan ng riders at isang paraan na rin para masiguro ang kaligtasan ng mga ito kapag malakas ang ulan.

Single ticketing, start na — MMDA

ni Mylene Alfonso | May 2, 2023

Simula na ngayong araw ang pilot testing ng single ticketing system para sa mga motorista na lalabag sa batas trapiko sa National Capital Region (NCR).

Sinabi ni Metropolitan Manila Development Authority (MMDA) spokesperson Melissa Carunungan na susubukan muna nila ang nasabing sistema sa mga piling lugar upang matukoy ang anumang lapses o adjustments bago ilunsad sa buong rehiyon o sa buong bansa.

Ipatutupad ang dry run sa mga piling local government units kabilang ang mga lungsod Manila, Quezon, Parañaque, Muntinlupa, Caloocan, Valenzuela at San Juan.

"Ito ay magiging malaking ginhawa para sa mga motorista dahil sa loob ng single ticketing system, ang top 20 most common traffic violations ay may pare-parehong multa, contesting procedures, at digital payment platforms kagaya ng GCash, Maya, at Landbank,” ani Carunungan sa Public Briefing kung saan may tracking department ang bawat LGU.

Nauna rito, nagkaroon ng briefing para sa mga traffic enforcers at sinanay sila sa Metro Manila Traffic Code of 2023 kung saan nakalagay ang uniformed fines at penalties ng mga LGUs at MMDA at pinalawig din aniya ang contesting procedure mula pitong araw ay naging sampung araw na.

Kasama sa Metro Manila Traffic Code of 2023, na magsisilbing guideline para sa nabanggit na sistema, ang mga parusa para sa mga sumusunod na paglabag sa traffic violations: Disregarding traffic signs, Illegal parking (attended and unattended, Number coding UVVRP, Truck ban, Light truck ban, Reckless driving, Unregistered motor vehicle,

Driving without license, Tricycle ban, Obstruction, Dress code for motorcycle, Overloading, Defective motorcycle accessories, Unauthorized modification, Arrogance/discourteous conduct (driver), Loading and unloading in prohibited zones, Illegal counterflow at Overspeeding.

Sa ngayon, wala pang ipatutupad na demerit points dahil undergoing approval pa ito ng Department of Transportation.

Nabatid na magde-deploy ang MMDA ng 900 enforcer kada shift sa mga pangunahing lansangan para sa pagpapatupad ng single ticketing system.

Ayon pa sa MMDA, ang multa para sa mga paglabag ay mula P500 hanggang P5,000.

Nilinaw din ni Carunungan na hindi nagbabago ang number coding scheme na mula alas-7 ng umaga hanggang alas-10 ng umaga at alas-5:00 ng hapon hanggang alas-8 ng gabi mula Lunes hanggang Biyernes maliban tuwing holidays.

Kumakalat na bagong number coding scheme, fake news — MMDA

ni Gina Pleñago | April 28, 2023

Pinag-iingat ng Metropolitan Manila Development Authority (MMDA) ang mga motorista sa kumakalat na pekeng number coding scheme.

Naglabas ng abiso ang MMDA para sa mga motorista kaugnay sa kumakalat na maling impormasyon sa social media na may bagong number coding scheme na paiiralin ang ahensya.

Wala umano itong katotohanan, ayon sa naturang ahensya.

Batay sa ahensya, nananatili ang pagpapatupad ng expanded number coding scheme mula alas-7 ng umaga hanggang alas-10 ng umaga at alas-5 ng hapon hanggang alas-8 ng gabi mula Lunes hanggang Biyernes, maliban tuwing holidays.

Nanawagan ang MMDA, na pigilan ang pagkalat ng mga ganitong mensahe na dulot ay panic at kalituhan.

Sakaling may natatanggap na mensahe o post sa social media ukol sa number coding at nais itong iberipika, maaaring tumawag sa MMDA Hotline 136 o magpadala ng mensahe sa MMDA official page sa Facebook, Twitter, at Instagram.