MMDA enforcer nag-counterflow sa EDSA Bus Lane, hulicam

ni Gina Pleñago @News | July 19, 2026

Photo: SS / MMDA

Ipinost mismo ng Metropolitan Manila Development Authority (MMDA) sa kanilang official Facebook page ang viral video na hindi itinatago ang pagkakamali ng isang MMDA traffic enforcer na nag-counterflow sa EDSA bus lane ng Sabado ng madaling-araw.

Ayon kay MMDA Chairman Atty. Don Artes, hindi tino-tolerate ng ahensiya ang mga maling gawain ng sinuman sa tauhan nito. Hindi rin aniya itinatago ang mga maling gawain ng mga kawani ng ahensya para hindi pamarisan.

Aniya, mahaharap sa multang P5,000 dahil sa paggamit sa bus lane at administrative sanction ang enforcer na si alyas Jeffrey.

Sa video makikita ang tila pagpupumilit na maisiksik ng traffic enforcer ang kanyang motorsiklo na nagkataong hindi sila magkasya ng isang sasakyan na nagsasabi pa sa kanya na. 'hindi kasya 'yan... balik ka balik… bumalik ka ru'n, ikot ka ru'n,’ subalit hindi agad sinunod ang payo kundi pilit pa ring iginigilid ang motorsiklo.

Sabi pa ng kasalubong na sasabit ang sasakyan niya kung ipipilit ng traffic enforcer na manatili, at sinabihan siya na mukhang nakainom ng alak.

Nakarating na rin sa Land Transportation Office (LTO) ang ginawang paglabag ng traffic enforcer na inisyuhan na ng show cause order.

'Di lang rider — MMDA.. Vendor, bawal sumilong sa flyover, P1K multa

ni Madel Moratillo @News | August 5, 2023

Bawal ding sumilong sa flyover ang mga vendor kapag umuulan.

Paliwanag ni Metropolitan Manila Development Authority Director for Traffic Enforcement Group Victor Nuñez, bawal naman talagang magtinda ang mga street vendor kung wala silang permit.

Kaya nga aniya hinuhuli ang mga illegal vendor dahil bawal ang illegal vending sa kahit saang pampublikong lugar.

Matatandaang una nang sinabi ni MMDA Chairman Romando Artes na bawal sumilong sa ilalim ng flyover ang mga motorsiklo dahil sa panganib nito hindi lang sa rider kundi maging sa iba pang motorista. Lalo na aniya kapag nag-zero visibility dahil sa lakas ng

ulan.

Pinapayagan lang aniya ang mga ito na tumigil saglit para magsuot ng kapote pero dapat umalis din agad.

Ayon sa MMDA, ang mga lalabag dito ay pagmumultahin ng P1,000.

Abril 6-10, walang coding

ni Gina Pleñago | March 25, 2023

Suspendido mula sa Abril 6 hanggang 10 ang number coding scheme sa National Capital Region, ayon sa Metropolitan Manila Development Authority.

Ang Abril 6 at 7 ay Huwebes at Biyernes Santo, habang ang Abril 10 ay idineklara bilang Araw ng Kagitingan na isang regular holiday.

“Sa pamamagitan ng inter-agency action center, masusubaybayan natin ang real-time updates sa mga terminal ng bus sa Metro Manila para matiyak ang mas ligtas na paglalakbay ng commuting public at maayos na daloy ng trapiko sa ating mga kalsada habang sinusunod natin ang Semana Santa,” ani MMDA acting chairman Atty. Don Artes.

Binubuo ang multi-agency command center (MACC) ng mga kinatawan mula sa MMDA, Department of Transportation, Department of Public Works and Highways, Land Transportation Franchising and Regulatory Board, Inter-Agency Council for Traffic, Land Transportation Office, Philippine National Police, at local government units na magmo-monitor sa aktwal na katayuan ng major transport hubs, partikular na ang mga terminal ng bus sa Metro Manila mula Lunes Santo hanggang Abril 6, Huwebes Santo, kung kailan inaasahan ang pagdagsa ng mga pasaherong bibiyahe sa labas ng Metro Manila.