ni Mercy Lejarde @Showbiz Talkies | January 17, 2026
Photo: FB KimPau Fanatics
“Akala ko, sasalubungin ko ang bagong taon na walang ngipin,” ito ang nasabi ng aktres na si Kim Chiu nang hindi sinasadyang muntik nang masiko ang mukha niya ng aktor-singer na si Darren Espanto sa It’s Showtime (IS) last Wednesday, January 14, 2026.
Saad ni Darren, “Sorry, sorry, Best!”
Natawa na lang si Kim at masayang ipinagpatuloy ang pagbasa ng opening spiel ng show, kung saan tampok ang umano’y pagpapalit ng branding ng IS ngayong 2026.
Saad ni Kim, “Yes, yes, yes! Tuloy ang saya at ligaya dahil simula pa lang ng taon. Ito na—what if ayusin natin ang branding natin for this year?”
Nagsabay-sabay sa pagsang-ayon ang kanyang mga co-hosts at nag-dialogue ng “Yes, maganda ‘yan.”
Tanong ni Kim, “Kayo ba, ano ba ang branding n’yo?”
Hirit na tanong ni Darren kay Kim, “Branding mo ba ang pinya?”
Tinanong ni Darren si Kim kung pinya ang branding niya dahil kulay-pinya at pormal-pormalan ang dating ng kasuotan niya.
Sagot ni Kim, “Hindi, ang branding ko, a-attend ako ng SONA (State of the Nation Address).”
Saad ni Amy Perez, “Napakaganda naman ni Kim Chiu.”
Napansin ni Kim Chiu na pang-Linggo ng Wika ang tugtog.
Tanong ni Kim, “Bakit naman pang-Linggo ng Wika ‘yung tugtugin natin?”
Sagot ni Darren, “Ah, kasi nga bestie, kagalang-galang.”
Dito na sumingit si Jackie Gonzaga at nag-dialogue ng, “Isa kang lakambini.”
Saad ni Kim, “Oh, thank you.”
Sa mga sandaling iyon ay napahinto si Kim. Nang mapagtantong may ibang kahulugan para sa kanya ang salitang ‘Lakambini’, natatawang sabi ni Kim, “Teka, parang mali ‘yun!”
Dito na humagalpak sa tawa ang mga katabi niyang co-hosts na sina Darren at Amy, habang bakas din sa mukha ni Jackie ang pagkabigla na tipong hindi magawang matawa dahil sa kanyang nasabi.
Well, at least, nagagawa nang tumawa ni Kim Chiu kahit nababanggit ang pangalan ng kapatid niyang si Lakambini.
‘Di ba naman, Jackie Gonzaga?
KAMAKAILAN lang, nagkaroon ng espesyal na guesting ang showbiz power couple na sina Marian Rivera at Dingdong Dantes sa YouTube (YT) channel ng mag-asawang Janno Gibbs at Bing Loyzaga, kung saan ibinahagi nila ang ilang kuwento tungkol sa kanilang pamilya, kabilang na ang kanilang panganay na anak na si Zia.
Kuwento ni Marian, “Nakaka-proud din talaga ‘yung batang ‘yun kasi minsan, s’ya ‘yung magsasabi sa akin na, ‘Mama I want to learn this. I want to do this. I want to try this.’ Kasi ang ganda na ‘di ko, ‘di namin ipinu-push na, ‘Anak, try mo ‘to, ito ang kailangan mong gawin, ito ang dapat.’ Hindi, s’ya mismo, inilalatag n’ya sa amin, lalo na sa akin kasi s’yempre si Dong most of the time, nagtatrabaho talaga s’ya. So ako talaga ang nakatutok sa mga bata. So sabi n’ya sa akin, ‘Mama, gusto ko mag-try mag-horseback, gusto ko nitong swimming, gusto ko nitong ganito.’ Sabi ko, ‘Sige, anak, try natin.’
“So, ilalatag ko kay Dong ang lahat. ‘Oh, Dad, ito ‘yung gusto ng anak mo.’ Pero s’yempre, iko-compromise namin. May sasabihin ang daddy n’ya, tapos sasabihin ko, tapos mag-uusap kami kung ano’ng mga puwede kasi minsan, ang dami n’yang gustong gawin, parang kami na ‘yung nahihirapan na ‘Ano ba talaga ‘yung gusto mo, anak?’”
In fairness, ang gandang bata ni Zia Dantes, nagmana sa mother dearest niyang si Marian Rivera.
MATAPANG na ikinuwento ng baguhang rapper na si Neeyong sa kanyang debut extended play (EP) na Personal Inventory ang pagbangon niya mula sa drug addiction.
“Dumaan ako sa buhay na magulo, buhay na puro bisyo, ‘yung buhay na walang pakialam sa mga tao sa paligid ko. Nu’ng ipinasok ako ng daddy ko sa rehab, du’n ko na-realize ang lahat at nakapag-reflect ako nang maayos para baguhin ko ‘yung sarili ko.
“Habang nandu’n ako, ibinuhos ko ‘yung mga pinagdaanan ko sa mga isinulat kong kanta,” saad ni Neeyong.
Tampok sa Personal Inventory ang limang awitin na Yellow Corner, Programa, Recuperation, 9/21, at Neon na isinulat mismo ni Neeyong at ipinrodyus ni Michael Cursebox sa ilalim ng supervision ng StarPop label head na si Roque ‘Rox’ Santos.
Nagsisilbing key track ang 9/21 na umiikot sa perspektibo ng rapper sa mapait na sitwasyon na hinaharap ng bansa.
‘Yun lang and I thank you.
