Ang lakas daw siguro ng manager… SUZIE, AMINADONG SUMAMA ANG LOOB NANG PALITAN NI IYA SA SHOW

ni Mercy Lejarde @Talkies | May 26, 2026

Photo: IG _mars_suzi

Inamin ng TV host na si Suzie Entrata-Abrera na nalungkot siya noong pinalitan siya ni Iya Villania sa programang Mars noon.

Kamakailan lang ay nag-guest siya sa Fast Talk with Boy Abunda (FTWBA) kasama ang kanyang mga “Mars” na sina Camille Prats at Iya Villania.

Diretsahang tanong ng King of Talk na si Boy Abunda, “Suzie, nu’ng pinalitan ka nu’ng pumasok si Iya — remember after 7 years from GTV to GMA-7, and then Iya had to come in to do the show with Camille Prats — sumama ba ang loob mo?”

Pabirong sagot ni Suzie na nagdulot ng tawanan ng mga nasa studio, “Yeah. Actually, matagal ko nang itinatago ‘to.”

Dagdag na seryosong sagot ni Suzie, “Actually, s’yempre, I was sad na ‘di ako kasama na lumipat ‘yung Mars. And I would’ve wanted to join the two of them. Or actually, kasi kami naman talaga ni Camille ‘yung original ‘Mars’, eh. Kasi it would have been so awesome kung naging kaming tatlo.

“But unfortunately, si Iya nu’ng lumipat sa GMA-7, s’ya ang nakuha. Ang lakas siguro ng manager nito.”

Hirit na tanong ni Boy, “But why couldn’t you do it? Because you were also with Unang Hirit, ‘di ba?”

Saad ni Suzie, “Of course, I felt bad about it because everybody moved to GMA, except for me, to the main channel. But I made sure to message Iya, to let her know that, although it wasn’t for me to say na ‘It’s okay with me, ha?’ kasi ‘di naman ako ‘yung nagdesisyon na ‘to ‘yung gagawin natin, ha? But I just wanted her to feel comfortable.

“That if it were anybody, I mean, I wanted, it would be so wonderful that it was her.”

Well, kahit sino naman ang nasa kalagayan ni Suzie Entrata-Abrera, masasaktan kapag biglang pinalitan sa show na minahal niya. Tao lang siyang may puso at damdamin.

Pak, ganern!

---

“My birthday became extra special because of all of you,” ang pahayag ng aktres at lider ng Sexbomb Girls na si Rochelle Pangilinan para sa kanyang ika-44 na kaarawan noong Mayo 23, 2026.

Ibinahagi ni Rochelle ang kanyang taos-pusong pasasalamat sa kanyang Sexbomb family, pamilya, mga producer, at sa kanyang loyal fans.

Sey ni Rochelle, “Another year older, wiser... at mas lalong grateful.

“Sa aking Sexbomb family, maraming salamat sa pagmamahal, tawanan, kulitan at pagiging tahanan ko sa loob ng maraming taon. ‘Di man tayo perfect, pero ang samahan natin ay totoong-totoo at habang-buhay kong iingatan.

“Sa aking pamilya, thank you for always being my strength, my comfort and my safe place. Kayo ang dahilan kung bakit patuloy akong lumalaban at nangangarap.

“Sa aming producers at mga taong walang sawang sumusuporta sa amin behind the scenes, thank you for believing in us and for making beautiful things happen.

“‘Di magiging posible ang lahat kung wala kayo.

“At s’yempre… sa aming mga loyal fans na lumaki kasama ang SexBomb, maraming-maraming salamat. 

“Hanggang ngayon, dama ko pa rin ang pagmamahal ninyo. Salamat sa bawat sigaw, suporta, memories at walang sawang pag-stay.

“My birthday became extra special because of all of you. Love na love ko kayo.”

Happy birthday to the Queen Bomb, Rochelle Pangilinan! Get, get, awww!

---

INILUNSAD na ng ABS-CBN Music ang CAT Records, ang record label na magbibigay ng bagong buhay sa mayamang catalog ng Original Pilipino Music (OPM).

Pangungunahan ng music publishing group ng ABS-CBN ang label na magsisilbing platform para sa bagong bersiyon ng mga natatanging komposisyon ng Filipino composers na bahagi ng malawak na catalog ng ABS-CBN Music.

Misyon nito na panatilihin ang mga kuwento at himig ng mga awiting tumatak sa kulturang Pinoy at magbigay ng pagkakataon para sa mga artists, producers, at musicians ngayon na bigyan ang mga ito ng sariling interpretasyon para sa bagong henerasyon.

Kabilang sa mga singers na magiging bahagi ng CAT Records sina CIFRA, Gab Tagadtad, Gino Nazal, Jeri Violago, JM Yosures, at SAGA.

May bagong rendition si CIFRA sa OPM classic na Ipagpatawad Mo mula kina Tito Sotto, Vic Sotto, at Joey de Leon o kilala bilang TVJ. May modern take naman ang singer-songwriter at producer na si Gab Tagadtad sa Panaginip Lang. Isa rin siya sa mga producers na makakasama sa CAT Records.

May instrumental project na ilalabas ang kilalang gitarista na si Gino Nazal. Si Jeri Violago ang unang singer-songwriter ng label. 

Bibigyang-buhay naman ni JM Yosures ang kantang Ang Hirap Maging Mahirap, habang pangmalakasang interpretasyon naman ang handog ni SAGA sa awiting Diamante. 

Makakasama rin sa CAT Records family sina BRYN, Sarvi, at YellowPad.

Samantala, kasama rin sa mga unang proyekto ng CAT Records ang isang koleksiyon ng jazz instrumental versions ng classic songs ng ‘70s icon na VST & Co.. Ipo-produce ang koleksiyon ng music arranger na si Sunny Ilacad at ipe-perform ng saxophonist na si Jun Figueroa na magtatampok sa Awitin Mo, Isasayaw Ko at iba pang classics, na napapakinggan na simula nu’ng Mayo 22, 2026.

Kabilang din sa mga producers at composers na bubuo sa tunog ng CAT Records sina Christian Martinez, Kiko Salazar, Raizo Chabeldin, at Sunny Ilacad.

‘Yun lang, and I thank you.

Isinama sa serye dahil Muslim… SEN. ROBIN, TODO-PASALAMAT SA ABS-CBN

ni Mercy Lejarde @Talkies | May 25, 2026

Photo: FB Robin Padilla

Todo-pasalamat ang aktor-pulitiko na si Sen. Robin Padilla sa pamunuan ng ABS-CBN at sa buong produksiyon ng seryeng Blood vs. Duty (BVD).

Saad ni Sen. Robin, “Allah hu akbar! (Ang Allah ay pinakadakila).

“Bilang tagapangulo ng komite ng Senado sa usapin ng Muslim affairs at mass media, ako’y nagpupugay. Pagpalain nawa ng Allah ang mga bumubuo sa likod ng Blood vs. Duty.

“Unang-una ay ang creative team at ang ABS-CBN. Ang tunay na mga katangian ng pananampalataya ng mga Muslim, gayundin ang kultura at tradisyon ng Bangsamoro ay inyong pinagyayaman sa kaalaman ng mga Pilipino. Maraming-maraming salamat po.”

Samantala, isinusulong din ni Sen. Robin ang Senate Bill No. 1958 na naglalayong gawing libre at bigyan ng lifetime validity ang PWD (Person with Disability) ID upang maalis ang gastos, abala, at pabalik-balik na pagre-renew. 

Sa kasalukuyang sistema, kinakailangang i-renew ang ID kada limang taon.

Saad ni Sen. Robin sa kanyang post, “Ano nga ba ang saysay ng paulit-ulit na renewal ng PWD ID para sa mga may permanenteng kapansanan?

“Ito ang gustong baguhin ng Senate Bill No. 1958 na isinusulong ni Sen. Robin Padilla. Layunin nitong maibsan ang hirap ng ating mga kababayan mula sa dagdag-gastos, abala at pagod sa renewal.”

In fairness naman kay Sen. Robin Padilla, kahit abala siya sa kanyang serye ay priority pa rin niya ang trabaho sa Senado.

---

NAGING matagumpay ang pagdiriwang ng unang Nora Aunor Day noong May 21, 2026 sa Iriga City.

Ito ang bayang sinilangan ng yumaong Superstar Nora Aunor. Pinangunahan ng kanyang anak na si Ian De Leon ang nasabing okasyon katuwang ang lokal na pamahalaan.

Ayon sa kaibigan at tagahanga ni Guy na si Jen Donna Pergis Morera, naging masaya ang lahat ng mga Noranians na dumalo sa Iriga.

Sey niya, “Napakasaya at nakita po namin ang buong Iriga.

“Maraming Noranians ang pumunta noong unang gabi ng May 20. At sa Nora Aunor Day noong May 21 ay mas marami ang nakisali sa motorcade.

“Ang grupo po namin ay nag-extend ng isang araw para makapunta kami sa bahay at riles ng tren kung saan nagtinda ng tubig si Guy.

“Lahat ng grupo ng Noranians ay nagsidalo sa parada — ang NFF GANAP, Federation, Kabataan for Ate Guy, Solid, Noranian Visayas, Noranian Iriga, Solid Nora Tirso Forever, Alay kay Guy at ang Global Guy Cocoy Lovers and Friends.”

Sa panayam ay tinanong ni yours truly si Jen kung kumusta ang naging pagtrato ni Ian sa mga Noranians na pumunta sa Iriga.

Saad niya, “Mainit po ang pagtanggap n’ya sa lahat at ‘di rin kami pinabayaan.”

Samantala, ayon naman kay Marie Cusi, isang kaibigan at naging huling manager ni Guy, masaya rin ang mga Noranians na nag-alay ng dasal at bulaklak sa puntod ni Guy sa Libingan ng mga Bayani (LNMB).

Sure si yours truly na masaya rin si Bok (Nora Aunor) sa heaven dahil masaya ang kanyang mga minamahal na Noranians.

---

TODO-TANONG ang aktor na si Nikko Natividad kung ano ang sikreto ng mga travel vlogger sa pagtitipid abroad, lalo’t mas mahal pa raw ang local travel.

Sey ni Nikko sa kanyang post, “Paano nagagawa ng mga travel vlogger na pumunta sa ibang bansa nang limang araw tapos ang total expenses nila ay P25K, P30K o P50K?

“Kasi kami, magpunta lang ng Baguio, nakaka-P50K na. Partida, three days and two nights lang ‘yun.”

Sa comment section ng post ni Nikko ay maraming netizens ang naka-relate.

Komento ng isa, “Mas mura naman talaga mag-travel sa ibang bansa lalo na kung Asia. Dito kasi, bawat galaw ay may bayad. Pati CR, parking at picture, may bayad. Tapos may mga entrance fee pa. Sa ibang bansa, kasama na ang tour, accommodation, breakfast at pati airfare.”

Well, basta sa bawat travel, enjoy-enjoy lang! Walang katumbas na halaga ang magandang experience. 

Pak, ganern!

‘Yun lang, and I thank you.

Bago man lang daw siya maging lola… NERI, TODO-PAKIUSAP NA MAKAPAGPA-SELFIE KAY SARA

ni Mercy Lejarde @Talkies | May 24, 2026

Photo: IG _mrsnerimiranda & _justsarahgph

Nagpahayag ng nakakakilig at taos-pusong bukas na liham ang misis ng Parokya ni Edgar frontman na si Chito Miranda na si Neri Naig para sa singer-actress na si Sarah Geronimo, kung saan inamin niyang matagal na niyang pangarap na makapagpa-picture kasama ang Popstar Royalty.

Saad ni Neri, “Dear Sarah G. Kailan kaya ako makakapagpa-picture sa ‘yo? Sana, bago ako maging lola, may picture naman tayo together... please.

“Ang tagal-tagal ko nang inaasam-asam na makapagpa-picture sa ‘yo, pramis!

“Nagmamahal, Neri.”

Well, sure si yours truly na kapag nabasa ni Sarah Geronimo ang mensahe ni Neri Naig ay pagbibigyan siya nito sa simpleng hiling niya.

---

EMOSYONAL na mensahe ang ibinahagi ng mga kapwa-artista at kaibigan sa industriya matapos ianunsiyo ng aktres na si Alex Gonzaga ang kanyang pagbubuntis kasama ang asawang si Mikee Morada noong Mayo 21, 2026.

Ang content creator na si Bea Borres ay nagpahayag ng pagbati para sa mag-asawa.

Sey ni Bea sa post niya, “Congrats, Ate Catherine! (Alex) You won’t message me anymore if alam na ni ganito, ganyan, ‘cause you finally announced it na!

“I’m so happy for you and Kuya Mikee, ily (I love you). Alam n’yo na why wala s’ya sa binyag.

“Even kay Blythe (Andrea Brillantes) na I tell all my secrets to, I didn’t say talaga.”

Samantala, ang vlogger na si Toni Fowler ay nagbahagi ng video clip kung saan makikita si Alex na masayang ipinapakita ang lumalaki niyang tiyan.

Sey ni Toni Fowler, “Bukod sa scandal (sex) ko, eto ‘yung nasa hidden ko, eh.

“Nu’ng panahon na ‘to, dinalaw ko s’ya at maliit-liit pa ‘yung tiyan n’ya.

“Grabe iyak ko kasi nabigla talaga ako, akala mo ako ‘yung ama.

“At masasabi kong worth it ‘yung pagsisinungaling ko sa maraming tao na tanong nang tanong kung buntis ba s’ya.

“Sobrang saya ko para sa ‘yo, Alex! Alam mo ‘yan! Hot mommy ka na! I love you so much!

“Simula ngayon, may bayad na ang pa-picture sa akin. Parang OB-GYN (Obstetrician-Gynecologist) lang, maaayos ko PCOS (Polycystic Ovary Syndrome) mo at mabubuntis ka.”

Well, in fairness sa mga friendships ni Alex Gonzaga ay talagang masaya at love na love siya.

Congratulations again, Alex & Mikee Morada!

---

PATULOY na gumagawa ng marka sa music scene si Maki matapos umani ng 1 billion all-time streams sa Spotify bago ang Kolorcoaster Southeast Asian tour at paglabas ng bagong single na Habangbuhay Pansamantala.

Nasungkit ni Maki ang bagong milestone matapos ang tagumpay ng kanyang debut album na Kolorcoaster na nagtatampok ng hits tulad ng Dilaw, Namumula at Kahel na Langit. 

Ipapakilala rin niya ang makulay na mundo ng album sa international audiences sa Kolorcoaster Southeast Asian tour na gaganapin sa The Theatre at Mediacorp sa Hunyo 13 at sa Bengkel Space sa Hunyo 14. 

Nakatakda rin niyang bisitahin ang North America, Australia, at New Zealand. 

Bago simulan ang concert tour, ilulunsad ni Maki ang bagong single na Habangbuhay Pansamantala na mapapakinggan na ngayong Mayo 24. Inilarawan ng Kapamilya singer-songwriter ang awitin bilang ‘pink song’ na magsisilbing anthem para sa mga taong itinuturing na backburner sa isang relasyon.

Isinulat mismo ni Maki ang awitin habang ipinrodyus naman ito ng vocalist ng Nameless Kids na si Nhiko Sabiniano. 

Bago ang official release, inilabas ang preview ng kanta na umani na nang milyun-milyong views sa social media dahil sa mapanakit at relatable nitong mensahe.

Ipagdiriwang ni Maki ang bagong single sa dalawang fan events na Pink Fest na gaganapin sa TriNoma sa Mayo 29 at Pink Room sa Solaire Resort North. 

‘Yun lang, and I thank you.