Dahil sa flood control projects… HERLENE, GUSTO NA LANG MAG-CONTRACTOR KESA MAG-ARTISTA

ni Mercy Lejarde @Showbiz Talkies | Septeber 4, 2025

Photo: Herlene Budol - IG

Nag-viral ang banat ng aktres at beauty queen na si Herlene Budol tungkol sa flood control projects matapos patulan ng isang netizen ang kanyang biro sa Facebook (FB).

Aniya, “Parang gusto ko tuloy maging contractor na lang kesa mag-artista.”

Ibinahagi rin ni Herlene na may nag-private message sa kanya dahil sa kanyang post na magpapalit daw siya ng tatahaking career.

Kuwento pa ni Herlene, “Natawa naman ako may nag-PM sa akin, ‘wag ko daw gawin ang pagiging contractor. Komedyante po ako, kuya, sineryoso mo naman ang caption ko.”

Dagdag na biro pa ni Herlene, “Kung papipiliin ako between artista o contractor, baka ikaw pa piliin ko, kuya. I love you. Hahaha!”

Maraming netizens ang natawa sa post ni Herlene at isa na nga rito ang dati niyang manager na si Wilbert Tolentino.

Basta si yours truly, kung saan ka masaya, Herlene, suportahan taka. 

Char! Patola lang!  

Pak, ganern!

---

BEAUTY and brains — ito lang ang masasabi ni yours truly sa nag-iisang Chief Public Attorney of the Philippines, Atty. Persida V. Rueda-Acosta.

Pinarangalan siya ng Highest Achievement in Public Service Award sa 6th Laguna Excellence Awards na ginanap noong Agosto 24, 2025 sa Grand Ballroom ng Seda Hotel Nuvali.

Atty. Acosta has dedicated her life to ensuring that justice is accessible to every Filipino, especially the marginalized and underprivileged. 

Her unwavering commitment, integrity, and passion for public service truly embody the spirit of leadership and compassion.

Ang pagkilalang ito ay hindi lamang testamento sa kanyang kahanga-hangang karera, kundi inspirasyon din para sa lahat ng Pilipino na maglingkod nang may puso at layunin.

Congratulations Atty. Persida V. Rueda-Acosta, a true icon of justice and public service. 

I salute you!

---

MATIKAS na action star ng showbiz industry at astig na senador ng Pilipinas si Sen. Robin Padilla.

Subalit kapag katabi na niya ang mother dearest na si Lolita Eva Cariño ay lumalabas ang tunay na pagkatao niya.

Napakamapagmahal at mabait na anak si Sen. Robin, ‘di ba naman, Mariel Padilla? 

For sure, “Yes!” ang isasagot ni Mariel. Wanna bet? 

Nagbahagi sa kanyang Facebook (FB) page si Sen. Robin ng video clip na kinakantahan niya si Mommy Eva habang nakaupo ito sa wheelchair.

Aniya, “Sa kanya ko natutunan ang halaga ng disiplina, respeto, at pagmamahal sa kapwa. Ang lahat ng aking ginagawa ay handog ko po sa kanya bilang pasasalamat sa kanyang sakripisyo at walang hanggang gabay.”

Ito ang kantang inawit ni Sen. Robin para sa kanyang mother dearest…“Mama, mama, you know I love you… Mama, Mama, you're the queen of my heart… Your love is like tears from the stars, yes, it is…

“Mama, I just want you to know, lovin’ you is like food to my soul… Yes it is, yes it is…”

Sana all ay may anak na tulad ni Sen. Robin Padilla.

Kahit solo flight, Paulo… KIM, SUPER ENJOY MAMASYAL SA LONDON

ni Mercy Lejarde @Showbiz Talkies | August 31, 2025

Photo: Kim Chiu sa London - IG

Halata sa larawan na super-enjoy si Kim Chiu sa pamamasyal niya sa mga magagandang tanawin sa London, United Kingdom. 

Sey ni Kim, “Living my full tourist life here in London. Of course, I had to tick off the mandatory shots - red telephone booth, the iconic London Eye, and a ride on the Underground. Classic London moments that make the trip extra memorable.”

Sa dami ng pinuntahan ni Kim, sure si yours truly na pagoda (as in tired) na siya, kaya kantahan na lang natin siya ng old song na… “London Bridge is falling down, falling down, falling down.

London Bridge is falling down, my fair lady.”

Pak, ganern!

---

MAKATOTOHANAN ang ibinahagi ng TV host na si Vice Ganda sa kanyang Instagram (IG) Story. Makikita sa video clip na ibinahagi ni Vice ang mga pagkain na iniluto nila sa loob ng kanilang tinutuluyan na Airbnb sa London.

Kasalukuyang nasa London si Vice para sa ASAP in England concert na ginanap sa BP Pulse Arena nitong nakaraang August 30, 2025.

Sey ni Vice sa kanyang IG story, “Super tipid ako dito sa London kasi ang mahal. Kaya namalengke na lang kami nu’ng first day at nagluto dito sa Airbnb.

“Pangatlong araw na naming iniinit ‘tong natirang adobo.”

Mga bagets, siguro naman ay may natutunan kayo sa ibinahagi ni Vice. Ang moral of the story, kahit ano’ng yaman ng tao, dapat marunong magtipid. 

Well, may katwiran ang katwiran. 

Pak na pak ka d’yan, Vice Ganda!

---

MAPAPA-SANA ALL ka na lang talaga kapag nakita mo ang tulad ng comedian-actor na si Ogie Diaz at ang kanyang daughter. 

Nagpahayag ng pagbati si Ogie sa kanyang panganay na anak na si Erin sa pamamagitan ng social media post.

Sey ni Ogie, “Gusto ko lang magpasalamat sa anak ko, dahil hindi n’ya isinuot ‘yung mamahaling damit dito sa mga pics, hindi rin n’ya ginamit ang mamahaling bag at sapatos, dahil mahirap na. Baka ma-lifestyle check s’ya at mapagkamalan s’yang nepo baby.

“Or else, alam na, ‘di na naman mako-control ang flood ng mga bashers. Hahaha!

“Actually, madami pa ‘kong sinasabi, eh. Gusto ko lang namang batiin ang aking panganay na anak ng ‘Happy 24th birthday, Erin!’

“S’ya ang una sa limang batang naging pruweba na kaya ko palang maging isang ama. S’ya rin ang batang ‘pag bina-bash ay unbothered. Nu’ng i-suggest ko na i-block na lang n’ya, ang sabi ba naman sa akin, ‘‘Wag, Daddy. Hayaan mo sila. Engagement din ‘yan. Sayang.’ So minaynd set lang ako ng anak ko. Hahaha!

“Basta mahal ka ng daddy, anak. Always remember na nakasuporta lang ako sa lahat ng mga pangarap mo sa buhay.

“Anyway, bagay sa ‘yo ang black dress sa pictorial mong ito ng Envi Skin Beauty & Wellness. Grabe, buti na lang, nagkasya sa ‘yo ang pinagliitan kong black sexy dress.”

Uwian na, may nanalo na, walang iba kundi ang loving daughter ni Ogie na si Erin sa pagkakaroon ng tatay na tulad niya.

Happy birthday, Erin! You are lucky to have a father like Panyerong Ogie.

‘Yun lang, and I thank you.

Hindi lang mga fans… MGA BFF NA CELEBS, JOINT FORCES PARA IPAGDASAL SI KRIS

ni Mercy Lejarde @Showbiz Talkies | August 25, 2025

Photo: Kris Aquino - IG

Nagpahayag ng pasasalamat ang Queen of All Media na si Kris Aquino sa kanyang official fan page kamakailan.

Saad ni Kris, “I have a new hashtag to remind myself how much I owe all of you who continue praying for me. Thank you for your patience, support and much appreciated LOVE.”

Marami ang nagbigay ng panalangin para sa mother dearest nina Joshua at Bimby. Hindi lang mga tagahanga o followers ni Kris ang nagbigay ng panalangin sa kanya, kundi pati mga kasamahan niya sa showbiz industry tulad nina Angeline Quinto, Angeli Valenciano, Carmina Villarroel, Pokwang, Aga Muhlach, Vina Morales at ang singer icon na si Gary Valenciano.

Sure si yours truly na kahit hindi lahat nababasa ni Kris, ramdam niya ang napakaraming mensahe at panalangin para sa kanyang mabilis na paggaling sa lahat ng kanyang karamdaman.

Sabi pa nga ni Carmina Villarroel, “Laban lang Ninang @krisaquino. We love you, praying for you always.”

Sama-sama tayong manalangin para sa mahal nating kaibigan na si Kris Aquino.

---

KUNTENTO at masaya ang buhay-may-asawa ng magandang aktres na si Nadine Samonte.

Nagpakasal si Nadine kay Richard Chua, nag-iisang anak ng veteran actress na si Isabel Rivas noong October 30, 2013.

Sa 12 taon ng pagsasama nila bilang mag-asawa ay biniyayaan sila ng tatlong anak na sina Heather Sloane, Austin Titus at Harmony Saige.

Sa social media post ni Nadine, nagbahagi siya ng larawan na nagpapakita ng kanyang magandang mukha at katawan na tipong dalaga pa rin.

Saad ni Nadine, “Renewal of Vows first meeting and I’m so excited (in love emoji). Grabe, I can’t hide this feeling (shy emoji). Why How Great Is Our God ang kanta and si Don Moen ang singer sa audio ng post ko?

“Back story, nag-concert s’ya rito sa Philippines. We really wanted to meet him backstage for picture at pagpunta namin backstage ni hubby, hindi lang picture ang nakuha namin. He even told us that he wants to pray for me and my husband. 

“Tinanong n’ya kung ano ang gusto namin na prayer and we told him na gusto namin magkaanak ulit kasi nga with my condition, super-hirap magka-baby. Then he prayed for us. After few months I got pregnant again (laughing with tears emoji). God moves in mysterious ways. With my condition he really gave us hope at biglaan talaga ‘yun (praying emoji). I will never forget that (crying emoji).

“Thank You, Lord for all the blessings and for my family (heart emoji). Can’t wait to share and show you next year (crying emoji).

“Thank you to my husband for being the best (heart emoji). Love you so much @rboy_chua.”

Now I know kung bakit mahal ng aking BFF na si Isabel si Nadine bilang kanyang daughter-in-law. Kasi naman, pareho silang maka-Diyos at super-loving.

Kapag magkasama kami ni Isabel, kahit nasa restaurant pa kami, nagdarasal siya nang alas-tres ng hapon at ala-sais ng gabi. Parehong mabuting tao ang ina at asawa ni Richard. 

God bless you, BFF kong mahal na si Isabel.

---

INILUNSAD na ng BGYO ang bago nitong dance-pop single na Headlines at mapapanood ang unang live performance nito sa Summer Sonic Bangkok 2025 sa Linggo (Agosto 23).

May taglay na Y2K R&B influence ang bagong music offering nina Gelo, Akira, JL, Mikki at Nate na tungkol sa pagmamahal na ibibida at ipagsisigawan.

Produkto ang kanta ng 2nd ABS-CBN Music Camp na ginanap noong nakaraang taon mula sa mga songwriters na sina Lindgren, Melanie Joy Fontana, Marqueze Parker, Courtlin Jabrae Edwards, Nhiko Sabiniano, at BGYO members na sina Mikki at Nate.

Sina Lindgren at Melanie ay kilalang songwriters na nakatrabaho ang BTS at iba pang global artists. Sumulat din sila ng mga kanta para sa pelikulang K-Pop Demon Hunters (KDH). Nakapagsulat na si Courtlin ng awitin para kina Ciara at GloRilla habang si Marqueze ay nakapagsulat naman para kay Ariana Grande.

Nakatakdang ilabas ang Headlines performance video sa BGYO Official YouTube (YT) channel sa Biyernes (August 28) alas-9 ng gabi.

Sinundan ng kanta ang recent hit ng grupo na All These Ladies at self-titled EP nito tampok ang mga kantang Andito Lang, Divine, Trash, atbp.

Pagkatapos ng kanilang sunud-sunod na hits, naghahanda na sila para sa BGYO: The First Solo Concert na gaganapin sa Oktubre 4 (Sabado) sa New Frontier Theater sa Quezon City.

‘Yun lang and I thank you.