FEU Tamaraws ni coach Racela, maglalabas ng bagong angas

ni VA - @Sports | September 30, 2022

Sa pagkawala ni RJ Abarrientos na nagdesisyong hindi na tapusin ang kanyang playing years sa Far Eastern University at sa halip ay piniling maglaro sa Korean Basketball League, malaking kuwestiyon ngayon kung sino ang mamumuno sa kampanya ng Tamaraws sa UAAP Season 85.

Pero hindi nababahala dito si coach Olsen Racela na naniniwalang mayroong lilitaw na bagong lider para pamunuan ang Tamaraws.

"Life goes on for us," anang FEU mentor. "This is another opportunity para roon sa mga ibang players to step up and it's their chance to shine."

Nariyan si L-Jay Gonzales na tiyak na magkukumahog na makabawi sa ipinakita nyang mababang performance noong nakaraang season upang mapatunayan na isa siya sa mahuhusay na point guards sa collegiate level.

Hindi rin magpapahuli sina Xyrus Torres, Royce Alforque at Bryan Sajonia na nakahanda ring punuan ang naiwang puwang ni Abarrientos sa kanilang koponan.

Inaasahan namang makakatuwang nila si Patrick Tchuente na syang poposte sa gitna gayundin sina James Tempra at Ximone Sandagon na impresibo sa kanilang pagiging role players para sa Tamaraws sa nakaraang offseason.

Hindi magpapatalo pagdating sa talento ang line-up ng FEU.Pero ang tanong ay kung sino sa kanila ang iigkas kung kinakailangan para mamuno sa Tamaraws.

Samantala, buhat sa pagiging kulelat o cellar dweller ng mahigit tatlong dekada, sasabak sa unang pagkakataon ang University of the Philippines sa UAAP Season 85 men's basketball tournament bilang pangunahing paborito.

Ang nasabing sitwasyon ay sinisikap na makasanayan ng Fighting Maroons para sa gagawin nilang pagsabak sa torneo bilang defending champion at sa misyong ipagtanggol ang kanilang titulo. Sa pangunguna nina Gilas Pilipinas standout Carl Tamayo kasama sina Zavier Lucerio, JD Cagulangan at Malick Diouf, itinalaga ng kanilang mga katunggaling coaches ang Diliman-based squad bilang team to beat.

Mayweather, bumisita uli sa 'Pinas; Surfing sa Siargao, bubuhayin

ni MC - @Sports | September 29 , 2022

Dumating nitong Martes ng gabi sa Pilipinas si retired US boxing champion Floyd Mayweather Jr. isang araw matapos ang matagumpay na exhibition game nito sa Japan.

Ayon sa ulat, inimbitahan si Mayweather ng isang health and beauty products na kanyang iniindorso. Sakay ang undefeated US boxer na si Floyd ng kanyang Gulfstream jet at lumapag ito sa private hangar ng dating Ilocos Sur Gov. Luis “Chavit” Singson.

Base sa itinerary ng boksingero, bibisita rin ito sa ilang private resort sa bansa para sa ibang mga events ng kumpanya. Noong Linggo, pinatumba ni Mayweather si MMA fighter Mikuru Asakura sa Saitama Super Arena sa Japan.

Samantala, inaasahang bubuhay muli sa sigla ng surfing, ekonomiya, turismo at sports scene sa Siargao ang nakatakdang dalawang surfing tournaments.

Gaganapin ang Sol National Surfing Competition at ang International Surfing Cup sa Set. 28 hanggang Oktubre 1 habang ang internasyonal na paligsahan ay gaganapin mula Oktubre 15 hanggang 21.

Huling ginanap ang competitive surfing competitions sa Siargao noong International Surfing Cup ng 2019, ilang buwan bago tumama ang COVID-19 pandemic. Ang Mayor Sol Cup ay magiging feeder sa 2022 World Surfing League international event.

Nakataya ang kabuuang P1.5-M na papremyo sa Sol’s Cup na lalahukan ng may 200 professional surfers mula sa Siargao Island at iba pang bahagi ng bansa. Samantala, 64 na kalalakihan at 40 kababaihang propesyonal na surfers ang nangakong sasali sa internasyonal na torneo sa Oktubre.

Spiker's Turf: Sta. Elena swak sa finals vs. HD

ni MC - @Sports | September 29 , 2022

Kinumpleto ng National University (NU)-Sta. Elena ang pagwalis sa semifinals sa 2022 Spikers' Turf Open Conference nang talunin ang VNS-One Alicia sa four sets, noong Martes sa Paco Arena.

Ginulpi ng Nationals ang Griffins' sa errors para masungkit ang 25-17, 20-25, 25-21, 27-25 victory. Binuo nila ang 3-0 sweep ng semis at pumalaot na sila sa championship series hawak pa ang momentum.

Sinuman ang nagwagi sa pagitan ng Cignal HD at Navy para sa last spot ng finals ang makasasagupa nila.

Binuhat ni Veteran Nico Almendras ang buong team ng NU-Sta. Elena nang umiskor ng 26 puntos sa bisa ng 23 kills. Nag-ambag si Obed Mukaba ng 14 puntos habang si Michaelo Budding ay matamlay pa sa umpisa pero tumapos ng 13 puntos. "Deserving talaga 'yung team na makuha 'yung semifinals na lahat panalo.

Siyempre, credit sa mga player ko na ginawa talaga nila 'yung best nila," tuwang pahayag ni NU-Sta. Elena head coach Dante Alinsunurin.

Matapos na lumamang sa unang 2 sets, pumalaot pa rin sa ikatlong frame ang NU at nakontrol ang laban. Umabot sa set point, 24-20 sa tikas ni Almendras pero nag-service error si Mukaba kaya nabuhayan ang VNS.

Samantala, pinatalsik ng Cignal ang PGJC-Navy sa three sets, 25-22, 25-21, 25-20 para umabanse na rin sa finals.

Si Marck Espejo ang bumida matapos na makabalik mula sa injury ng left Achilles na natamo niya noong Sabado kontra VNS-One Alicia. Sa kanyang pagbabalik, pinangunahan niya ang HD Spikers sa tatlong sunod na pagpasok sa finals.

Ang Game 1 ng finals sa pagitan ng Cignal at NU-Sta. Elena ay ngayong Huwebes ng 5:30 p.m. Makasasagupa naman ng PGJC-Navy ang VNS-One Alicia sa battle-for-bronze ng 2:30 p.m.