Loman, masusukat na ang kaastigan Vs. Bibiano

ni MC - @Sports | November 3, 2022

Nais aniyang malaman ni Team Lakay stalwart Stephen Loman kung hanggang saan ang kanyang kakayahan kontra Brazilian Bibiano Fernandes.

Masasalang sa bantamweight division ang 27-anyos na si Loman sa world’s largest martial arts organization at titiyakin ni “The Sniper” ang pangarap niyang World Title ay magkatotoo sa sandaling makaharap ang Brazilian legend na alam niyang ang laban kay "The Flash" ay pahirapan.

Nagkaroon na ng katuparan ang asam ni Loman na sumalang sa main card ng ONE sa Prime Video 4" Abbasov vs. Lee sa Singapore Indoor Stadium sa Nob. 19.

Mga sakalam na challenge sa kanilang career ang kakaharapin ng Team Lakay fighter at isa itong World title eliminator para sa 145 pound ranks. “In the past, I thought I was going to be matched up with him, but that didn’t happen. So for sure, my excitement for that match is still there. He’s the guy who defeated Kuya Kevin [Belingon], so I want to face him to see where my level is at right now.”

Sa kabilang banda si Fernandes ay naagawan ng golden belt ni John Lineker sa kaagahan ng taon, pero nanatiling ranked #1 sa division. Tantiya ni 4th ranked Loman na magwawagi siya kay Fernandes at isang hakbang na lang ang kailangan niya para sa bakanteng ONE Bantamweight World Title.

Hawak ng Pinoy fighter ang 16-2 professional MMA record at nakasabay sa 10-fight winning streak.

Pakiwari ni Loman sa ONE ay ipapasok siya sa loob ng kulungan ng leon, pero tiwala siya mula nang talunin niya si BJJ black belt Yusup Saadulaev sa kanilang ONE debut noong 2021.

Hawak din ni Loman ang momentum ng dominanteng panalo kontra Shoko Sato sa ONE X noong Marso.

Skateboarder Olympian Didal, naoperahan; 23 Teams sa PNVF

ni VA / MC - @Sports | November 3, 2022

Nagpapagaling na ngayon si Filipino Olympian at skateboarder Margielyn Didal matapos operahan sa paa, ayon sa ulat.

Sumailalim sa operasyon ang Pinay Olympian matapos magkaroon ng fracture sa left ankle. Nakuha umano ni Didal ang injury noong lumahok siya sa Red Bull Skate Level.

Agad namang nagpasalamat si Didal sa mga doktor dahil sa matagumpay na operayson at mga fan na nagpa-abot ng kanilang dasal para sa kanyang agarang paggaling.

Dagdag pa nito na bagamat parte sa paglalaro ang injury, tiniyak niya na mag-iingat na lamang sa mga susunod paglalaro.

Samantala, may 23 koponan, 15 sa kalalakihan at 8 sa kababaihan ang magsasagupa sa ikalawang edisyon ng Philippine National Volleyball Federation (PNVF) Champion's League.

Hinati sa bisa ng draw na pinangunahan ni Don Caringal ng PNVF sa tatlong grupo ang mga koponan sa men's division at dalawa naman sa women's division.

Nagkasama-sama sa Pool A ang PGJC Navy Sea Lions, Basilan-Tennun Spikers, Cignal HD Spikers, VNS-Quezon City Griffins at AIP-University of Baguio-Benguet Province Cardinals.

Natipon sa Pool B ang Aklan Ati-Atihans, Imus City- AJAA Spikers, National University (NU)-Pasay City Bulldogs, One Bulacan Republicans at Pikit-North Cotabato AMC G Spikers.

Nabunot upang Bumuo sa Pool C ang University of the East (UE)-Cherrylume Red Warriors, Baguio City Highlanders, Bacolod City Tarags, Sta. Rosa City Lions at Army-Taguig City Troopers.

Sa women’s division magkakasama sa Pool A ang University of Batangas-Batangas City Lady Brahmans, ICC-Caloocan City Lady Bluehawks, KMS-Quezon City Lady Vikings at Imus City-AJAA Lady Spikers.

Nasa Pool B ng women's ang last year’s first runner-up CPS-Antipolo City, Davao City Lady Agilas, UE Manila-Cherrylume Lady Red Warriors at Tomodachi Bulacan Bulakenyas.

Jake paul, giniba si Silva sa 8th round sa Arizona

ni MC - @Sports | November 1, 2022

Nanatiling walang talo si Jake Paul bilang professional boxer nang muling talunin si mixed martial arts (MMA) legend Anderson Silva sa isang eight-round bout noong Linggo, oras sa Pilipinas.

Nagwagi si Paul, isang social media personality sa bisa ng unanimous decision kung saan nagbigay ang judges ng mga iskor na 77-74, 78-73, 78-73. Umibayo siya sa 6-0 sa kanyang professional boxing career.

Nakuha ni Paul ang panalo nang pabagsakin si Silva sa eighth round ng kanilang cruiserweight bout.

Tinawag niya ang panalo na "surreal moment," dahil tinalo niya ang fighter na matagal na niyang iniidolo. "First and foremost, I wanna say thank you to Anderson. He was my idol growing up, he inspired me to be great. Without him we wouldn’t have had a fight this year.

He’s a tough mo-fo, like for real, legend. I have nothing but respect for him," ayon sa 25-anyos na si Paul.

Umakyat si Silva sa laban hawak ang 3-1 record bilang boxer sa tuktok ng kanyang matingkad ng MMA career. Kahit na 47 anyos na, nasubukan pa rin ng Brazilian icon si Paul pero hindi na rin humirit ng rematch matapos ang laban. "Jake is better than me today," ani Silva. "I don’t have nothing to say bad about my opponent. I think everybody needs to respect this kid because he’s doing the best job."