Matapos ang school shooting... Pa-isyu ng bagong gun permits sa Thailand, sinuspinde

ni Justine Berganio @Overseas News | August 14, 2026

Photo: Reuters

Ipinatigil muna ng pamahalaan ng Thailand ang pag-iisyu ng bagong gun permits kasunod ng pamamaril sa isang paaralan noong nakaraang linggo na ikinasawi ng walong katao at ng 14-anyos na suspek.

Inatasan ni Prime Minister Anutin Charnvirakul ang pagpapatupad ng mas mahigpit na gun control habang inihahanda ang mga bagong batas na magpapataw ng mas mabibigat na parusa sa mga lalabag.

Sa ilalim ng bagong hakbang, hindi muna tatanggapin ang mga bagong aplikasyon para sa pagbili o pagmamay-ari ng baril. Hindi rin ire-renew ang mga dating purchase permit, bagama’t hindi pa malinaw kung paano maaapektuhan ang kasalukuyang gun ownership permits.

Matagal nang ipinagbabawal sa Thailand ang pagdadala ng baril sa publiko. Simula 2023, kailangang manatili sa bahay o shooting range ang mga baril ng mga lisensiyadong may-ari.

May tinatayang 10.3 milyong baril na pagmamay-ari ng mga sibilyan sa bansa, dahilan upang kabilang ang Thailand sa mga bansang may pinakamataas na civilian gun ownership sa Southeast Asia.

Kaugnay ng insidente sa Debsirin Nonthaburi School sa labas ng Bangkok, sinabi ng pulisya na ginamit ng 14-anyos ang baril ng kanyang lolo bago naganap ang pamamaril sa paaralan. Nasawi ang kanyang dalawang lolo’t lola, limang school staff at isang 12-anyos na estudyante.

Sinisiyasat din ng mga awtoridad kung may naging epekto sa suspek ang marahas na content na napanood niya online at ang umano’y interes niya sa paggamit ng baril. Tinitingnan din ang stress sa pag-aaral at mga problema sa pamilya bilang posibleng salik sa insidente.

Isinusulong din ng gobyerno ang mga hakbang para mahikayat ang mga may-ari ng tinatayang apat na milyong unlicensed firearms na isuko ang kanilang mga armas.

Bukod dito, pinag-aaralan ang mas mahigpit na pagkontrol sa bala, habang iminungkahi naman ng education minister ang screening sa mga pasukan ng paaralan upang mapigilan ang pagdadala ng armas ng mga estudyante.

Nanawagan ang gun control advocates na isama sa proseso ng pagkuha ng permit ang mental health assessment at regular na pagsusuri sa mga lisensya ng gun owners.

22 patay sa mass shooting

ni Angela Fernando - Trainee @News | October 26, 2023

Takbuhan at sigawan ang bumungad sa Lewiston, Maine matapos mamaril ng isang lalaki na kumitil sa buhay ng hindi bababa sa 22 katao nu'ng Miyerkules, Oktubre 25.

Nagsimula ang pamamaril alas-6:56 ng gabi, kung saan nakita ng mga saksi na tumatakbo palayo ang mga tao mula sa bowling alley.

Inilabas ng pulisya ng Lewiston ang kanilang 'person of interest' at kinilalang si Robert Card, 40-anyos.

Umabot naman sa 50 hanggang 60 ang nasugatan sa pamamaril at kasalukuyang tinutugis ang suspek.

19 bata at 2 titser, patay sa mass shooting sa eskuwelahan sa Amerika

ni Lolet Abania | May 25, 2022

Labing-siyam na bata at dalawang guro ang nasawi sa naganap na mass shooting sa isang elementary school sa Texas, USA nitong Martes.

Sa report ng Reuters, kinilala ng mga awtoridad ang suspek na si Salvador Ramos, 18-anyos, na una nang pinagbabaril ang kanyang lola na himalang nabuhay.

Mabilis na tumakas ang suspek sakay sa kanyang kotse, kung saan bumangga naman ito malapit sa Robb Elementary School sa Uvalde, Texas. Dito ay walang habas na pinagbabaril ng suspek ang mga batang estudyante at guro na ikinasawi ng mga biktima, habang napatay din si Ramos ng mga rumespondeng pulis.

Batay sa pulisya, hindi pa malinaw ang motibo ng suspek sa ginawang krimen. Sinabi ni Texas Department of Public Safety (DPS) Sergeant Erick Estrada sa CNN, nakita nila ang suspek na nakasuot ng body armor nang lumabas mula sa nabangga niyang sasakyan.

May bitbit itong baril na nagawang makapasok sa gusali, saka pinaputukan ang eskuwelahan na nagresulta ng pagkamatay ng mga biktima.

Natigil lamang ang pamamaril ng suspek nang tamaan ito ng pulis na kanya ring ikinamatay. Kaugnay nito, nanawagan na si US President Joe Biden sa kanyang mga kababayan na manindigan at labanan ang tinatawag na “politically powerful” US gun lobby.

Aniya, ito ang dahilan kung kaya hindi maipasa ang mas mahigpit na batas sa pagmamay-ari ng armas. Iniutos din ni Biden na ilagay sa half-staff araw-araw ang bandila ng Amerika hanggang sa Sabado bilang pagluluksa sa nangyaring trahedya.

“As a nation, we have to ask, ‘When in God’s name are we going to stand up to the gun lobby?’” pahayag ni Biden sa telebisyon, kasabay ng kanyang pagnanais na pag-reinstate ng US ban kaugnay sa assault-style weapons at iba pang “common sense gun laws.”