Remolino at Alcoseba sakalam sa NAGT 2025

ni Reymundo Nillama @Sports News | Jan. 29, 2025

Photo: Determinasyon at lakas ang puhunan para maunang tumawid sa finish line sina Kim Remolino kasunod si Matthew Hermosa para sa men's elite sa ginanap na 2025 National Age Group Triathlon (NAGT) sa Boardwalk ng Subic, Olongapo City, Zambales kahapon. (Reymundo Nillama)

Nanatili kina Andrew Kim Remolino at Raven Faith Alcoseba ang mga titulo sa kalalakihan at kababaihan nang magwagi kahapon sa unang leg ng 2025 National Age Group Triathlon (NAGT) sa Boardwalk ng Subic, Zambales.

Mabilis na nakapagtala ang 23-anyos na 2nd year Marketing Management sa San Jose Recoletos sa Cebu ng personal na oras na (56:46m) para sa ikalawang sunod na men's elite title habang nanatili kay Alcoseba ang ikaapat sa hawak nitong tatlong sunod na korona sa oras na 1:09.55.

Nagtala si Remolino ng oras na 56 minuto at 56 segundo at iwan ang kapwa Cebuano na si Matthew Justine Hermosa, na may personal best na 56:57 oras. Tumersera ang mula Baguio City na si Dayshaun Ramos (57:16) bagaman kabilang ito sa Junior Elite men bago dumating si Jose Ramos para makamit ang 3rd place sa Elite Men sa oras na 57:22 minuto.

Muling pumangalawa kay Alcoseba si Erika Nicole Burgos ng Tanauan, Batangas sa oras nito na (1:06:33). “Super tough po ang competition laluna galing sa training camp ang lahat ng mga kasali.

Lima kami magkakasabay at nag-catch up lang po ako bike and then sa run,” sabi ng mula Talisay City, Cebu at aquathlon silver medalist sa 2023 Cambodia SEA Games na si Remolino.

“I always briefly bothered by both my knees but I tried my best. I also follow my plans especially sa bike kasi doon ako madalas mag-stock,” sabi ng 22-anyos na 4th year na Civil Engineering student na si Alcoseba.

Tinahak ng mga kalahok sa Triathlon Philippines na suportado ng Philippine Sports Commission ang 750m swim, 20km bike at 5km run para sa sprint elite, junior elite, para, at age group; at 1.5km swim, 40km bike at 10km run para sa standard age group at team relay.

Fabrito at Isibido kampeon sa 21km Tagaytay Uphill Challenge

ni MC @Sports News | Jan. 29, 2025

Photo: Fabrito at Isibido.. Easy lang ang 21km na rutang matatarik at palusong kina Jose R. Fabrito, Jr. at Jennelyn Isibido sa Tagaytay Uphill Challenge na nagsimula at nagtapos sa People's Park, Tagaytay City, Cavite noong Enero 19. (fbpix)

Matatarik ang daan, malamig ang panahon at nababalot pa ng makakapal na hamog ang mga rutang dinaraanan ng mga mananakbong lumahok sa 2nd Tagaytay Uphill Challenge na nagsimula at nagtapos sa People's Park, Tagaytay City.

Nagkampeon sa 21k male category si Jose R. Fabrito, Jr. 2nd si Prince Karl Christian Piano habang champ din sa kababaihan si Jennelyn Isibido, 2nd si Ana Marie Ayam at 3rd si Limbaco, Angeline na madaliang nakipagbakbakan sa halos patagilid na daan pababa at paakyat ng finish line.

Champ sa 10km run si Jeffrey Sario, 2nd si Angelio Diana habang 3rd si Dexter Espanol. Sa kababaihan ay nagreyna si Melissa Noriega, 2nd Jona Espineli at 3rd si Jizya Asanjil na halos pinatag lang ang rutang akyatan.

Bumanat ng kampeonato sa 5k sa male category si Erick Catipay, 2nd George Roqueno at Lee Andrew Consignado. Hindi nagpahuli sa kampeonato si Rina Gevero, 2nd Marjorie Diangkinay at Nitz Tumaliuan. Bukod sa mga podiumers ng run challenge ay nagwagi sa 60-yrs old and above male category sina Ariel Maginoo, Jose Eusebio at Joselito Paguing.

Bida sa kababaihang kategorya si Marlene Gomez Doneza na pawang batak ang mga katawan sa matatarik na takbuhan. Kumarera sa unahan ng 50-59 yrs old female sina Angeline Limbaco at Maria Bulanhagui habang sa male sina Bienvenido Dalawis, Gilbert Moldez at Elmer Barquia na pare-parehong bihasa na rin sa mga running event sa mga rutang bundok na akyatan.

Itinanghal na oldest runner sa 21k category si Orlando Payumo, 78-years old ng Calamba City na isa ring siklista na pinatibay na ng pagiging beteranong mananakbo sa mahabang panahon habang youngest runner sa 5k si Princess Loriene Torcuator, 7-anyos ng Palo-Alta, Calamba City.

Super Tri-Kids Dimayuga at Tan kampeon sa NAGT U15

ni R. Nillama @Sports News | Jan. 25, 2025

Solid na tinawid mag-isa ni Diego Jose Dimayuga ng PH developmental pool ang finish line upang tanghaling kampeon para sa NAGT U15 Super Tri-kids na ginanap sa Boardwalk ng Subic Bay Freeport sa Olongapo City. May kabuuan na oras na tinapos si Dimayuga para sa Swim, Bike at Run na 30:55 minuto. (Reymundo Nillama)

Pinangunahan nina Diego Jose Dimayuga ng PH developmental pool ang boys division habang nakuha ni Lauren Lee Tan ng Ormoc ang kampeonato sa Under 15 Youth sa unang leg ng National Age Group Triathlon (NAGT) Series na ginanap sa Boardwalk ng Subic Bay Freeport sa Olongapo City.

Unang umahon si Dimayuga sa 500 meter swim bago nanguna sa 1km bike at 750m run upang solong tawirin ang finish line sa 30:55 minuto at patatagin ang tsansa na makasama sa Asian Youth Games (AYG).

“I think I really did a good job in the run. I really pushed myself in the swim. I know my competitors are good in the bike that is why I did a breakaway in the swim. It was not really about the gold because what I really wanted to get is my Personal Best,” sabi ng 13-anyos at Grade 7 sa Singapore Manila Green Campus na si Dimayuga.

Kinailangan naman ng mahiyain na si Tan ng Ormoc Aquatic Edge na bumalikwas sa pagkakaiwan sa swim bago inagaw ang unahan sa bike saka tuluyang tinapos sa takbuhan ang pag-angkin sa gintong medalya na pinakauna nito sa pagsali sa national triathlon event.

“This is my first gold,” sabi ng 12-anyos at graduating student sa St. Paul’s School sa Ormoc City. “This is my second time to compete in NAGT and first one is a silver medal. I am so happy to win this tough competition,’ sabi ni Tan.

Pumangalawa naman kay Dimayuga si Pio Mishael Latonio ng Get Coach’D Academy (31:34m) habang pumangalawa kay Tan na may 34:07 minutong oras si Christy Ann Perez ng TLTG GFG PH (34:27m).