Dae Joo nasilo ang Stage 11, Pinoy Quita Mountain King

ni Elyssa Nichole @Sports | May 11, 2026

Photo: Hawak ni Ronnilan Quita ang Individual Mountain Classification (KOM) (7RP) sa pagtatapos ng Stage 11 MPTC Tour of Luzon 2026 kahapon. (mptcpix)

San Juan, La Union - Kahit tirik na tirik ang araw ay hindi ito naging dahilan para manghina si defending champion Korean rider Dae Yeong Joo kaya naman nasilo nito ang panalo sa Stage 11 kahapon sa MPTC Tour of Luzon 2026 na nagsimula sa Candon City Arena at nagtapos sa San Juan Town Hall dito.

Inirehistro ni 29-year-old Joo, pambato ng Gapyeong Cycling Team ang tiyempong tatlong oras, 19 na minuto at 16 na segundo sa 151.7 km distance race sa event na suportado ng Metro Pacific Tollways Corp., Manny V. Pangilinan Group of Companies at Philippine Sports Commission, (PSC) sa pamumuno ni chairman Patrick "Pato" Gregorio.

Mag-isang tumawid sa finish line si Joo, bumaba ito sa kanyang bisikleta at saka yumuko at hinawi ang kanyang kamay pababa hudyat ng pasasalamat sa mga Filipino fans na nanood ng live.

Muling sumakay sa bisikleta niya at saka nakipag-high five habang dumadaan sa harapan ng mga manonood.

Dumating na segundo si Saniy Syahmi Mohd Safiee ng Malaysian National Team, (3:19,27) habang pangatlong tumawid sa meta si Ovt. Dominic Perez (3:19:28) ng Pangasinan.

Dumating na pang 52nd place si Russian cyclist Nikita Shulchenko ng LCW UAE Cycling Team pero mananatili sa kanya ang pagsuot ng yellow jersey ngayong araw paglarga ng 146.40 kms Stage 12 Agoo - Mangatarem.

Nakalikom si Shulchenko ng 32 oras, 57 minuto at 30 segundo sapat upang upuan ang top spot sa Individual General Classification, pangalawa ang teammate nitong si Syrian rider Ibrahiem Yousef Alrefai, tatlong minuto at 41 segundo ang hinahabol nitong oras.

Naka-puwesto sa tersero si Stage 10 Candon City - Bessang Pass ruler Antoine Huby ng 7Eleven Cliqq Roadbike Philippines, naghahabol ito ng tatlong minuto at 54 segundo.

Huby bumanat sa Stage 10, Cliqq road bike lumakas

ni Elyssa Nichole @Sports | May 10, 2026

Photo: Nauna sa finish line ng Stage 10 si Frenchman Antoine Huby ng 7-Eleven Cliqq Roadbike Team mula sa Bessang Pass sa Cervantes, Ilocos Sur sa  MPTC Tour of Luzon 2026 kahapon na naorasan ng 3:32.01. (mptcpix) 

Cervantes, Ilocos Sur - Nagparamdam ng lakas ang 7Eleven Cliqq Roadbike Philippines nang agawin nila ang overall sa Team General Classification matapos magwagi ni French rider Antoine Huby sa mahirap na Stage 10 ng MPTC Tour of Luzon na nagsimula sa Candon City at nagtapos sa Bessang Pass Natural Monument dito.

Maliban kay Huby, may dalawang riders pa mula sa 7Eleven Cliqq Roadbike Philippines ang dumating sa top ten ito'y sina Ronnilan Quita (3rd) at Jonel Carcueva (6th) kaya naagaw nila ang top spot sa TGC kung saan ay dati itong hawak ng Go For Gold Philippines.

Nakalikom ang 7-Eleven Cliqq Roadbike Philippines ng 111 oras: 37 minuto at 57 segundo sapat para kapitan ang top sa team race, laglag sa pangalawa ang Go for Gold Philippines kung saan ay naghahabol na sila ng 5 minuto at 28 segundo habang nasa pangalawa ang LCW UAE Cycling team.

Inirehistro ni 25-year-old Huby ang tatlong oras, 32 minuto at isang segundo sa 131.20 kms. Candon - Bessang Pass sa karerang suportado ng Metro Pacific Tollways Corp., Manny V. Pangilinan Group of Companies at Philippine Sports Commission, (PSC) sa pamumuno ni chairman Patrick "Pato" Gregorio.

Dumating na segundo si Russian rider Nikita Shulchenko ng LCW UAE Cycling team kaya mananatili sa kanya ang yellow jersey paglarga ng 158.70 kms. Stage 11 Candon City - San Juan La Union ngayong araw.

May kabuuang 29 oras: 34 minuto at 44 segundo si Shulchenko sapat para manatili sa unahan ng Individual General Classification, pangalawa pa rin ang teammate nitong si Syrian cyclist Ibrahiem Yousef Alrefai.

Umakyat sa pangatlo si Huby na tatlong minuto at 56 segundo ang hinahabol kay Shulchenko habang pang-apat si Quita.

TOL: Guld ng CCN team winner, Soriano at Fariñas bumuntot

ni Elyssa Nichole @Sports | May 9, 2026

Photo: Ang Individual Classification Stage 9 Winners na sina 1. #71 GULD, Daniel Ridwan (CCN) (gitna), 2. #84 Pvt. SORIANO, Benidict (PAN) at #86 FARIÑAS, Daniel Jay (PAN) sa 142.89 Kms sa MPTC Tour of Luzon kahapon. (mptcpix)

Candon City, Ilocos Sur - Kumaskas si Danish rider Daniel Guld ng CCN Factory Racing Team sa huling 200 metro paakyat sa finish line upang sikwatin ang panalo sa Stage 9 ng MPTC Tour of Luzon 2026 na nagsimula sa Laoag City, Ilocos Norte at nagtapos sa harapan ng Candon City Arena dito, kahapon.

Naghabol si 25-year-old Guld ng halos 50 metro nang magsimulang umakyat patungong meta, parang posteng nilampasan nito sina Pvt. Benidict Soriano at Daniel Jay Fariñas na parehong Pangasinan Cycling team upang makuha ang pang-apat na Stage winner simula ng magsasali ito sa mga tournaments.

Nakalikom si Guld ng 3 oras, 13 minuto at 2 segundo sa 142.89 Kms, Laoag - Candon City, dumating na pangalawa si Soriano habang tersero si Fariñas.

Inamin ni Guld na kahit sobrang init ay ibinigay niya ang lahat ng lakas sa huling akyatan papunta sa finish line kaya masaya ito na nakuha ang panalo sa Stage 9. “It was really hot, but I like short climbs like this, I gave it a good punch in the end and I dropped the other guys,” ani Guld,  "It’s probably the biggest stage win of my career,”

Marami naman ang nanghihinayang sa pambato ng 7-Eleven Cliqq Roadbike na si Ronnilan Quita, dahil naligaw ito sa huling 1 kilometer ng karera.

Kasama si Quita sa seven-rider breakaway, dinala ang trangko para hawakan ang unahan pero dahil sa pagkaligaw ay tumapos ito ng pang-apat. “Di ko napansin. Pero andun na eh. Masakit, pero okay lang. May iba pa namang stage,” nalulungkot na pahayag ni Quita.