Babaeng nanakit ng traffic enforcer, kinasuhan na

ni Ronalyn Seminiano Reonico | May 27, 2021

Na-"huli-cam" ang pananakit ng isang babae sa traffic enforcer ng Manila Traffic and Parking Bureau (MTPB) at pormal na itong sinampahan ng kasong direct assault at driving without license, ayon sa Manila Public Information Office (MPIO).

Sa inisyal na imbestigasyon ng Manila Police District Special Mayor’s Reaction Team (MPD-SMaRT), sinita ang suspek na kinilalang si Pauline Mae Altamirano dahil sa paglabag nito sa traffic light sa Osmeña Highway, Malate, Manila dahil kahit pula pa umano ang ilaw ay nagpatuloy ito sa pag-andar.

Hinabol ng mga traffic enforcers ang suspek at naabutan siya sa Osmeña Highway, kanto ng Estrada Street at hiningan ng driver’s license, ngunit ang kopya lamang ng official receipt and certificate of registration (OR/CR) ang ibinigay nito.

Sa video na in-upload ng MPIO, makikita na sinisigawan ng suspek ang traffic enforcer habang sinasabi nitong ibalik sa kanya ang OR/CR ng sasakyan.

Nang hindi ibinalik ng traffic enforcer, bumaba ang suspek at doon na nauwi sa pananakit ang pakikipagtalo nito.

Ayon sa MPD-SMaRT, mahaharap si Altamirano sa kasong paglabag sa Section 19 ng Republic Act No. 4136 o ang Land Transportation and Traffic Code for driving without a license, at Articles 148 (direct assault) at 151 (resistance and disobedience to a person in authority) of the Revised Penal Code.

P150-M ilegal na PPEs, face masks at shields, nasabat sa Binondo, Manila

ni Ronalyn Seminiano Reonico | May 9, 2021

Nasabat ng Bureau of Customs (BOC) ang tinatayang aabot sa halagang P150 million unregistered personal protective equipment (PPE) kabilang na ang mga face masks at shields sa isang warehouse sa Binondo, Manila noong May 5.

Sa pakikipagtulungan ng BOC sa Manila International Container Port’s (MICP) Customs Intelligence and Investigation Service (CIIS) at Enforcement and Security Service (ESS), at Philippine Coast Guard (PCG), hindi nakalusot ang mga naturang produkto.

Kaakibat ng Letter of Authority (LOA) na nilagdaan ni BOC Commissioner Rey Leonardo B. Guerrero, nag-inspeksiyon ang awtoridad sa storage facility at natagpuan ang mga hindi rehistradong Aidelai masks at Heng De face shields, cosmetic/beauty products, luxury clothing, mga laruan at cellphone cases.

Saad pa ng BOC, “Further inventory and investigation are underway to ascertain the value and for the possible filing of charges for violation of Section 1400 of RA 10863 also known as the Customs Modernization Act (CMTA).

“The Bureau reiterates the importance of ensuring the authenticity of items especially for items such as face masks and other PPE.”

PLM, balik face-to-face classes na

ni Lolet Abania | May 5, 2021

Ibabalik na ng Pamantasan ng Lungsod ng Maynila (PLM) ang kanilang face-to-face education na limitado lamang para sa Colleges of Medicine, Nursing, at Physical Therapy kasunod ng pag-apruba ng Commission on Higher Education (CHED).

Sa isang statement na inilabas ng pamunuan ng PLM, sa ilalim ng clearance na ibinigay ng CHED, maaari nang ipagpatuloy ng mga estudyante ang kanilang hands-on medical clerkship na isa sa mga requirement para makapagtapos sa College of Medicine.

Pina-finalize naman ng College of Nursing at College of Physical Therapy ang kanilang mga plano kung anong laboratory courses ang isasagawa para sa limitadong face-to-face classes dahil sa mahigit isang taong pagkakaroon ng bansa ng COVID-19 lockdowns.

Matatandaang sinimulan ng PLM noong Pebrero ang kanilang online consultation sa mga estudyante, magulang, guro, faculty at mga practicing doctors na nasa Ospital ng Maynila para talakayin ang mga ideya sa pagpapatuloy ng hands-on learning.

Binisita naman ng mga opisyal ng CHED ang PLM campus noong April upang suriin ang kahandaan ng eskuwelahan, at kung ipinatutupad ang minimum health standards sa mga classrooms.

Hanggang first semester ng academic year 2021-2022 ang ibinigay na awtorisasyon para magsagawa ng limited face-to-face classes ang naturang paaralan.

Samantala, noong Enero, ipinaubaya na ng Inter-Agency Task Force for the Management of Emerging Infectious Diseases (IATF-EID) sa mga lokal na pamahalaan ang awtorisasyon upang mag-apruba sa kahilingan ng muling pagbubukas ng face-to-face classes para sa medicine at health-related courses sa gitna ng COVID-19 pandemic, habang si Manila Mayor Isko Moreno ay una nang pinayagan ang pagpapatuloy ng limited physical classes para sa medical schools ng mga unibersidad at colleges sa nasabing lungsod.