Papasada para sa libreng sakay... Bayad sa jeepney driver, itinaas sa P3,500/araw

ni Mylene Alfonso @News | April 1, 2026

Photo: Isko Moreno Domagoso / FB

Itinaas na sa P3,500 ni Manila Mayor Isko Moreno, ang jeepney subsidy na ipinagkakaloob sa mga driver sa ilalim ng “Libreng Sakay” program matapos na dagdagan ng P500 dahil sa panibagong P12 kada litrong taas ng langis, kamakalawa.

Ayon kay Moreno, ang subsidiya ay mula sa P661,000 savings sa pondo ng lokal na pamahalaan  ng Maynila.

“Simula sa araw na ito, malugod ko pong ia-announce na ‘yung savings nating P661,000 kahapon ay idadagdag natin ngayong araw na ito,” ayon kay Moreno.

“Mga driver, dadagdagan ko po ng 500 pesos ang bawat araw ninyo upang sa ganoon, ‘yung pagtaas ng presyo ng dose pesos kahapon ng krudo ay ma-offset ngayong araw na ito at sa mga darating pang araw,” dagdag pa ni Moreno.

Ang pagtaas sa subsidiya  ay ibibigay sa nalalabing araw ng programa mula Martes (Marso 31) at sa susunod na Lunes at Miyerkules ng susunod na linggo.

Nabakunahan sa Maynila, higit 1M na

ni Ronalyn Seminiano Reonico | July 19, 2021

Umabot na sa mahigit isang milyon ang naibakuna sa Manila simula nang mag-umpisa ang vaccination program laban sa COVID-19 noong Marso, ayon sa lokal na pamahalaan.

Ayon sa Manila Public Information Office, umabot na sa 1,000,021 ang naiturok na COVID-19 vaccines ngayong Lunes, alas-9:00 nang umaga.

Sa naturang bilang, 657,748 ang para sa first doses habang 342,273 naman ang para sa second doses.

Samantala, patuloy na nananawagan sa publiko si Manila City Mayor Francisco ‘Isko Moreno’ Domagoso na magpabakuna laban sa COVID-19.

Saad ni Mayor Isko, “Sama-sama tayo na makipaglaban at proteksiyunan ang bawat isa sa atin, bawat tao. Hindi lang dahil tayo ay taga-Maynila, kung hindi bawat mamamayan.

"Huwag tayong matatakot. Huwag tayong susuko. Huwag tayong mawawalan ng pag-asa. Mananalo tayo. Siguradong mananalo tayo.

“Magtulung-tulong tayo. Tayo rin ang magkikita sa finals. Isang bangka lang tayo, wala nang iba.”