Libreng sakay sa LRT-2 sa Labor Day

ni Gina Pleñago @News | April 28, 2026

Photo: LIght Rail Transit - LRT 2 / File

May libreng sakay ang Light Rail Transit Line 2 (LRT-2) para sa lahat ng manggagawa sa pagdiriwang ng Labor Day sa Biyernes, Mayo 1.

Ayon sa Light Rail Transit Authority (LRTA), maaaring makasakay nang libre mula alas-7 hanggang alas-9 ng umaga at alas-5 ng hapon hanggang alas-7 ng gabi.

“Ang libreng sakay na ito ay munting pagkilala sa walang sawang pagsusumikap at sakripisiyo ng mga manggagawang Pilipino. Sa pamamagitan nito, hangad naming maipadama ang aming taos-pusong pasasalamat at mataas na pagpapahalaga sa kanilang dedikasyon,” ani LRTA Administrator Hernando Cabrera. 

Simula sa Marso 23... 50% discount sa MRT, LRT

by Mai Ancheta @News | March 20, 2026

Photo: File / DOTr-MRT

Inanunsyo ng Department of Transportation (DOTr) na magkakaroon ng 50% discount sa pamasahe sa mga tren ng Metro Rail Transit Line 3 (MRT-3) at Light Rail Transit Line 2 (LRT-2), simula sa Marso 23, 2026.

Alinsunod umano ito sa direktiba ni Pangulong Ferdinand Marcos, Jr. na pagaangin ang pasanin ng mga pasahero sa gitna ng taas-presyo ng langis dulot ng gulo sa Middle East.

Ang 50% discount sa MRT-3 at LRT-2 ay maaaring awtomatikong makuha ng mga may hawak ng asul na Beep card.

Para naman sa mga sasakay gamit ang single journey tickets, ang pamasahe ay awtomatikong mababawasan ng 50% sa bayad.

Bukod dito, mananatili pa rin ang 50% diskwento na tinatamasa ng mga may hawak ng puting Beep card—kabilang ang mga senior citizen, persons with disabilities (PWD), at mga estudyante.

Sinabi ng DOTr na mananatili ang diskwento sa pamasahe sa MRT-3 at LRT-2 hanggang sa susunod na ilalabas na abiso. 

May kapansanan sa paningin, libre sa MRT-3 at LRT-2

ni Mai Ancheta @News | August 3, 2023

Nagbigay ng libreng sakay ang Metro Rail Transit-3 (MRT-3) at Light Rail Transit Line 2 (LRT-2) para sa mga may kapansanan sa paningin simula Agosto 1-6, 2023.

Ayon kay Department of Transportation (DOTr) Assistant Secretary for Railways at MRT-3 Officer-in-Charge Jorjette Aquino, ang hakbang ay bilang pagkilala sa selebrasyon ng White Cane Safety Day.

Sinabi ng opisyal na isinaalang-alang nila ang kapakanan at karapatan ng mga visually impaired na mga pasahero upang masiguro ang komportableng serbisyo sa mga ito.

Kailangan lamang magpakita ng valid PWD ID sa security personnel ng mga istasyon ng MRT-3 at LRT-2 para sa libreng sakay, at libre rin ang isang kasama nito.