LRT, half day lang sa August 20

ni Mai Ancheta @News | August 17, 2023

Suspendido ang kalahating araw na operasyon ng Light Rail Transit-1 sa August 20 upang bigyang-daan ang gagawing upgrade sa signalling system at paglalagay ng bagong software baseline nito.

Ayon kay Light Rail Manila Corporation (LRMC) Chief Operating Officer Rolando Paulino III, magsisimula ang suspensyon sa operasyon ng LRT-1 mula 4:30 ng madaling-araw hanggang 11:59 ng umaga.

Layunin aniya ng upgrading na mapahusay ang kapasidad at serbisyo ng buong linya ng LRT-1 at mapahusay ang koneksiyon sa lahat ng mga train.

Ang upgrading, ayon sa opisyal ay bilang paghahanda na rin para sa Cavite Extension Phase 1.

Humingi agad ng dispensa ang LRMC sa mga pasahero na maaapektuhan ng gagawing upgrading ng LRT-1.

May kapansanan sa paningin, libre sa MRT-3 at LRT-2

ni Mai Ancheta @News | August 3, 2023

Nagbigay ng libreng sakay ang Metro Rail Transit-3 (MRT-3) at Light Rail Transit Line 2 (LRT-2) para sa mga may kapansanan sa paningin simula Agosto 1-6, 2023.

Ayon kay Department of Transportation (DOTr) Assistant Secretary for Railways at MRT-3 Officer-in-Charge Jorjette Aquino, ang hakbang ay bilang pagkilala sa selebrasyon ng White Cane Safety Day.

Sinabi ng opisyal na isinaalang-alang nila ang kapakanan at karapatan ng mga visually impaired na mga pasahero upang masiguro ang komportableng serbisyo sa mga ito.

Kailangan lamang magpakita ng valid PWD ID sa security personnel ng mga istasyon ng MRT-3 at LRT-2 para sa libreng sakay, at libre rin ang isang kasama nito.

Taas-pasahe sa LRT at MRT, ‘di tuloy

ni Mylene Alfonso | April 12, 2023

Ipinagpaliban ni Pangulong Ferdinand Marcos, Jr., ang pagpapatupad sa pagtaas ng pamasahe para sa Light Rail Transit (LRT) lines 1 at 2.

Ito ang inanunsyo ng Department of Transportation (DOTr) makaraang aprubahan ng ahensya ang fare hike sa LRT 1 at 2.

Base aniya sa direktiba ni Pangulong Marcos, pag-aralan muna ang magiging epekto sa mga pasahero bago ipatupad ang taas-pasahe.

“In compliance with the President’s instruction, we will thoroughly study how a fare hike today will impact on passengers of our three rail lines in Metro Manila,” pahayag ni

Bautista sa press briefing sa Malacañang matapos ang isinagawang pulong kasama ang

Pangulo at ibang miyembro ng gabinete.

Sinabi ni Bautista na magtataas sana ng boarding fee ng P2.29 at 21 centavos para sa bawat kilometro ang inaprubahang rate.

Bukod dito, ipinagpaliban din aniya ang petisyon sa pagtaas ng pamasahe para sa MRT-3 dahil hindi umano nakasunod sa mga requirements at procedure.

Idinagdag ni Bautista na gagamitin sana ang malilikom na pondo para sa technical capability, services at facilities ang dalawang linya ng tren.