Roosevelt sa LRT-1, FPJ Station na

ni Mylene Alfonso @News | August 20, 2023

Papalitan na ang Roosevelt Station sa Light Rail Transit (LRT) Line 1 at isusunod na sa pangalan ng yumaong si Fernando Poe, Jr. (FPJ).

Pangungunahan ni Senador Grace Poe, anak ng kilalang personalidad, ang renaming rites, kasama sina dating Senate President Vicente "Tito" Sotto III at Sen. Lito Lapid, alas-10 ng umaga.

"I hope people remember FPJ whenever they board this train. Public service has always been in FPJ's heart. Giving commuters a safe and comfortable ride is a way of keeping his legacy alive," wika ni Poe sa isang pahayag.

Kaugnay nito, pasisinayaan din ang bagong marker para sa screen icon, na 84-taong gulang na sana ngayong araw, maging ang pop-up exhibit para kay FPJ sa event.

Ayon kay Poe, dadalo rin sina Transportation Secretary Jaime Bautista at LRT Management Corporation president at CEO Juan Alfonso sa event.

Nabatid na makalipas ang isang taon nang lagdaan ni dating Pangulong Rodrigo Duterte ang batas na nagpapalit ng pangalan ng Roosevelt Avenue sa Quezon City sa ngalan ng pumanaw na Filipino screen icon.

Matatandaang bumida si FPJ sa mahigit 300 pelikula, sa kanyang 46 taon sa entertainment industry. Dahil dito, kinilala siya bilang “King of Philippine Movies".

Matatagpuan ang dating tahanan ng National Artist sa kahabaan ng 2.9-kilometer Roosevelt Avenue, sa pagitan ng EDSA at Quezon Avenue.

LRT-1 at LRT-2, wala pang taas-pasahe — LRTA

ni Lolet Abania | November 10, 2022

Tiniyak ng Light Rail Transit Authority (LRTA) sa mga komyuter na wala pang isasagawang fare adjustments sa mga train lines sa Metro Manila na Light Rail Transit Line 1 (LRT-1) at Light Rail Transit Line 2 (LRT-2).

Sa isang news conference ngayong Huwebes, itinanggi ni LRTA administrator Hernando Cabrera ang lumabas na reports hinggil sa nagbabadyang taas-pasahe nila sa Disyembre.

“Walang pagbabago. Status quo tayo diyan. Hindi tayo mag-i-increase bukas, hindi tayo mag-i-increase next week, hindi tayo mag-i-increase next month,” pahayag ni Cabrera.

“Lahat ito dadaan sa mahabang process at kailangan i-evaluate lahat, lahat ng factors pagdating sa usapin ng fare adjustment,” dagdag ng opisyal.

Ayon kay Cabrera, ang mga panukala tungkol sa dagdag-pasahe ay isa lamang exercise na ginanap sa annual corporate planning ng LRTA kaugnay sa paghahanap ng mga paraan upang madagdagan ang subsidiya ng gobyerno para sa public transport.

Isa sa mga proposal ay ang pagdaragdag ng P5 sa kasalukuyang basic fare ng P11 at P1.50 para sa bawat additional kilometer. Sa ngayon, ang mga pasahero ng LRT ay namamasahe ng P30 sa isang biyahe sa kabuuan ng railway line.

Sinabi ni Cabrera na kung walang government subsidy, nasa P80 hanggang P100 ang idadagdag sa aktuwal na gastos sa pamasahe ng mga komyuter.

Aniya, marami pang mga kadahilanan na kanilang kinokonsidera para sa pagtataas ng rate nito. “Iba-balance natin ang mga bagay -- ‘yung subsidy galing from the government, ‘yung pangangailangan namin ng finances, and the reality na ‘pag taasan mo ‘yan iiwanan ka ng pasahero or they will go to other modes of transport, magiging self-defeating ang activity mo,” paliwanag ni Cabrera.

Ayon sa LRTA, nagbigay na rin ng direktiba si Department of Transportation (DOTr) Secretary Jaime Bautista sa kanila na huwag aprubahan ang anumang fare hikes hangga’t kaya pa ring sagutin ng mga train operators ang operating costs. Huling nagtaas ng pasahe ang LRT-1, LRT-2, at MRT-3 noong 2015.

Operasyon ng LRT-1, suspendido sa Enero 30

ni Lolet Abania | January 27, 2022

Magkakaroon ng suspensyon sa operasyon ng railway system ng Light Rail Transit Line 1 (LRT1) sa Linggo, Enero 30, batay sa anunsiyo ng Light Rail Manila Corp. (LRMC), ang operator ng LRT1 ngayong Huwebes.

Sa isang advisory ng LRMC, nakasaad na ang pansamantalang suspensyon ng operasyon ng LRT1, “to give way to the completion of the upgrade of its signaling system.”

“Normal operations of LRT1 will resume on January 31, 2022, Monday,” sabi pa nito. Matatandaang noong Nobyembre 2021, inanunsiyo ng LRMC ang pag-upgrade ng signaling system ng LRT1 na nakatakdang isagawa ng Nobyembre 28, 2021, Enero 23, 2022, at Enero 30, 2022.

Ayon sa LRMC, katuwang ang kanilang contractor, magsasagawa sila ng mga series ng test runs at trial runs sa LRT1 sa mga naturang petsa upang matiyak na ang bagong signaling system para sa railway system ay handa nang gamitin.

Paliwanag ng kumpanya, “Railway signaling or the traffic light system for railway is a system used to direct railway traffic and keep trains clear of each other at all times, ensuring smooth and safe operations.”

Ani pa ng LRMC, “The upgrade to the new Alstom signaling system is needed to accommodate the commercial use of fourth generation train sets on the existing system, which is targeted to begin in mid-2022”.