Transport sector, kaisa na rin sa paglaban sa katiwalian

ni Leonida Sison @Boses | September 16, 2025

Tuwing may tigil-pasada, ang totoong naiipit ay mga ordinaryong pasahero -- mga estudyanteng kailangang makapasok sa klase, mga manggagawang dapat makarating sa opisina, at iba pang umaasa sa pampublikong transportasyon. 

Ang nationwide transport strike ng Tsuper at Operator Nationwide (PISTON) at Manibela ngayong Setyembre 17 hanggang 19 ay muling magdadala ng matinding hamon sa paggalaw ng publiko, hindi lamang sa Metro Manila kundi sa iba’t ibang bahagi ng bansa. 

Ayon kay Land Transportation Franchising and Regulatory Board (LTFRB) Chair Teofilo Guadiz III, hindi umano ito inaasahan na lubusang makakaapekto sa public mobility. 

Handa naman ang Department of Transportation (DOTr), Metropolitan Manila Development Authority (MMDA), at mga lokal na pamahalaan sa contingency measures, katulad ng libreng sakay gamit ang military trucks, buses, at mga modernized PUVs, gayundin ang pagtatakda ng alternatibong ruta para maibsan ang abala sa mga komyuter. 

Subalit, gaano man karami ang planong alternatibo, malinaw na hindi matutumbasan ng gobyerno ang perhuwisyong idudulot ng tigil-pasada sa mga kababayan. 

Sa kabilang banda, binigyang-diin ng mga transport group na hindi simpleng usapin ng pamasahe o prangkisa ang kanilang ipinaglalaban. Para sa kanila, katarungan para sa lahat na nagiging biktima ng korupsiyon. 

Mariin nilang tinutuligsa ang umano’y katiwalian sa flood control projects, kung saan

ang buwis mula sa diesel na araw-araw nilang binabayaran ay ginagamit lang anila, para sa marangyang pamumuhay ng ilang opisyal at kanilang pamilya. Sa madaling salita, sila ang pumapasan ng bigat habang ang mga nasa itaas ay nagpapakasasa. 

Ang strike ay hindi lang pahayag ng hinaing ng mga tsuper, kundi sumasalamin din ng malawak na pagkadismaya ng taumbayan sa ating sistema. 

Kung ang salitang sakripisyo ay araw-araw na bahagi ng buhay ng jeepney drivers, bakit tila hindi ito natutumbasan ng malasakit mula sa mga dapat nagsisilbi sa bayan? 

Ang tigil-pasada ay hindi simpleng pagtigil ng biyahe ng mga transportasyon. Isa itong paghinto upang magpahinga at manindigan laban sa kawalang katarungan. 

Kung ang kinauukulan ay patuloy na ipagwawalang-bahala ang hinaing ng sektor ng transportasyon, baka dumating ang panahon na hindi lang ang mga ito ang tumigil, kundi ang mismong tiwala ng buong sambayanan. 

Kaya sa ating gobyerno, ‘wag nang magpatumpik-tumpik, tuldukan ang katiwalian sa ating bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Kabi-kabilang rally, gawin nang may kaayusan

ni Leonida Sison @Boses | September 15, 2025

Sa rami ng sunud-sunod na rally sa iba’t ibang lugar sa Kamaynilaan na may layuning labanan ang korupsiyon, nakahanda naman ang kapulisan na gawin ang kanilang trabaho para sa ikabubuti ng lahat.

Sa naging pahayag ni acting Philippine National Police (PNP) Chief PLtGen. Jose Melencio Nartatez Jr., muling ipinaalala nito sa mga organizer ng kilos-protesta na tungkulin nilang kumuha ng permit bago magsagawa ng pagtitipon, alinsunod ito sa ipinatutupad nilang “No Permit, No Rally” policy. 

Ayon sa PNP, hindi ito para hadlangan ang karapatan ng mga mamamayan, kundi upang panatilihin ang kaayusan, seguridad at maiwasan ang kaguluhan. 

Ipinaliwanag rin ni Nartatez na ang EDSA Shrine at EDSA People Power Monument ay hindi freedom park, kaya’t mahigpit na ipinagbabawal na gawing venue ng mga kilos-protesta. 

Gayunman, tiniyak ng kapulisan na mananatili ang implementasyon nila ng maximum tolerance sakaling may mga grupong igigiit ang pagtitipon kahit walang kaukulang dokumento. 

Kasabay ng paalalang ito, nakahanda naman ang kanilang hanay para sa malalaking rally, lalo na sa darating na Setyembre 21 sa Luneta Park, sa Manila at sa iba pang lugar kung saan napakaraming lumalabas upang mahigpit na tutulan ang katiwalian sa ating bansa. 

Ang karapatang magpahayag ay hindi tinatanggal, subalit ito’y may kaakibat na pananagutan. 

Hindi tamang ituring na kaaway ng bayan ang kapulisan, bagkus katuwang natin sila sa pagpapanatili ng kaayusan at kapayapaan. Sila rin ay tumutulong sa pagbalanse sa pagitan ng gobyerno at mamamayan.  

Kung may mga patakaran, ito ay para rin sa kapakanan ng mismong mga raliyista at ng publiko. 

Sa panahon ng masalimuot na pulitika, hindi madali ang trabaho ng mga pulis. Lagi silang nasa gitna ng tensyon, at madalas silang puntirya ng sisi. At kung titingnan, ginagawa lang nila ang tungkulin na iniatang sa kanila ng batas. 

Ang pagsunod sa simpleng panuntunan tulad ng pagkuha ng permit ay hindi dapat ituring na sagabal, kundi proteksyon para sa lahat. Habang ang paninindigan ng PNP ay paalala na ang demokrasya ay kailangan ng disiplina at pagsunod sa batas.

Kung nais nating marinig ang ating tinig, mas magiging makabuluhan ito kung isasagawa nang may paggalang sa batas. 

Alalahanin din sana na ang tunay na pagbabago ay makakamtan kung ang bawat sigaw natin ay may dignidad at sa ilalim ng iisang layunin, ang labanan ang katiwalian.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

DND at AFP, katapatan dapat para sa Konstitusyon at sa bayan

ni Leonida Sison @Boses | September 14, 2025

Sa gitna ng mga panawagan ng publiko laban sa umano’y katiwalian, partikular na sa flood control projects, nananatili naman ang suporta at hindi bibitiw sa gobyerno ang mga sundalo at militar.

Naninindigan ang Department of National Defense (DND) at Armed Forces of the Philippines (AFP) ng kanilang pagiging tapat sa Konstitusyon at sa taumbayan. 

Sa inilabas na pahayag nina Defense Secretary Gilberto Teodoro Jr. at AFP Chief of Staff General Romeo Brawner Jr., mariin nilang tinututulan ang mga tangkang ilihis ang misyon ng militar sa mga usaping pulitikal. Tinawag nila itong “futile and irresponsible”, na para bang sinasabing hindi dapat ginagawang ‘laruan’ ang AFP sa mga agenda ng iilang grupo. Sa halip, binigyang-diin nila ang pagiging propesyonal at non-partisan ng institusyon — isang paninindigan na dapat pahalagahan sa panahon ng kahinaan ng tiwala ng publiko sa pamahalaan. 

Hindi rin nila kinakalimutan ang laban kontra-korupsiyon, na kanilang tinaguriang pambansang krusada. Ang ganitong mensahe ay mahalaga dahil ipinapakita nitong hindi sila basta nagbubulag-bulagan sa mga usaping nagpapahirap sa mamamayan at sa bayan. Pinaninindigan nila na ang tunay na serbisyo ay nakaugat sa integridad at pananagutan, isang pangakong iniaalay nila sa mga bayani at sa susunod na henerasyon ng mga Pinoy. 

Sa kabila ng mga panawagan na magsalita, o pumabor ang militar sa ilang isyu, pinatutunayan ng AFP na ang tanging sinusunod nila ay ang tinatawag na Chain of Command at ang mandato ng batas. Ito ay nagpapakita ng respeto sa demokratikong proseso, taliwas sa mga panawagang magpatupad ng hakbang na wala sa legal na balangkas o labag sa batas. Ang ganitong paninindigan ay hindi lamang pagtalima sa Konstitusyon kundi isang proteksyon laban sa kaguluhan na maaaring idulot ng pamumulitika. 

Ang pahayag ng AFP at DND ay hindi lamang simpleng depensa laban sa tila nagtatangkang guluhin ang ating bansa. Isa itong paalala sa ating lahat na ang tunay na pagbabago ay hindi kailanman makakamit sa marahas o anumang pag-aaklas. Ang kapayapaan at kaunlaran ay makakamtan lamang kung may pagtitiwala sa demokratikong institusyon, paggalang sa mga proseso at pagkakaisa sa ilalim ng batas. 

Tulad nila, at bilang mamamayan, ipanata rin natin na maging tapat sa Konstitusyon, sa kapwa at sa bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com