Estafa sa mga namemeke ng COVID test result, dapat lang!

ni Leonida Bonifacio Sison - @Boses | January 30, 2021

Sa kabila ng mga babala at paalala, patuloy na nakatatanggap ng reklamo ang Philippine National Police (PNP) hinggil sa mga insidente ng pamemeke ng COVID-19 test result.

Ayon sa PNP, nakakukuha umano ng pekeng ng COVID-19 test result ang ilang indibidwal dahil may mga koneksiyon sa ospital, at nadiskubre rin ng Research Institute for Tropical Medicine (RITM) na mismong mga ospital at clinic pa ang nagbibigay ng mga papeles o impormasyon para sa pekeng test result.

Dahil dito, nagbabala ang PNP na puwedeng kasuhan ng estafa ang mga mahuhuling gumagawa nito, lalo na kung may nangyaring bayaran kapalit ng pekeng resulta.

Sa ngayon, naglalaro pa rin umano sa libo ang presyo ng pagpapa-swab test na kinakailangan partikular na sa mga babiyahe sa iba’t ibang bahagi ng bansa.

Samantala, hinimok din ng PNP ang mga kumpanya na maging mabusisi sa isusumiteng RT-PCR test ng kanilang mga empleyado na magbabalik-trabaho.

Ilang beses nang may naiulat na nameke ng COVID-19 test result, at hanggang ngayon, hindi pa rin pala tapos ang isyung ito.

Nakadidismaya dahil para bang wala tayong kadala-dala. Kung ‘yung iba ay no choice dahil requirement sa pagbabalik-trabaho, ‘yung iba ay pasaway lang talaga. ‘Yung tipong kaya nilang gumawa ng ilegal para lang maipilit ang kanilang lakwatsa o kung anu-ano pa. Tsk!

Gayunman, wala rin naman kasing gagamit ng pekeng resulta kung walang namemeke. Kaya dapat ding sisihin dito ang mga gumagawa ng pekeng dokumento.

Dapat lang na makasuhan kayo at managot dahil hindi biro ang ginagawa n’yo. Buhay at kaligtasan ang nakataya rito kaya utang na loob, makonsensiya kayo.

Siyempre, ang taumbayan ay may kailangan ding gawin. Bagama’t mahal talagang magpa-swab test ngayon, kailangan talaga.

Tandaan natin na kaya may ganitong hakbang o requirement ay upang matiyak na hindi kayo nahawa o wala kayong bitbit na virus.

Sa gitna ng pandemya, napakahalagang maging tapat at responsable para sa ikabubuti ng nakararami.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Doble-facemask, dagdag-proteksiyon o panibagong gastos at kalat?!

ni Leonida Bonifacio Sison - @Boses | January 29, 2021

Doble-facemask.

Ito ang pag-aaralan ng Department of Health (DOH) para mas epektibong makaiwas sa COVID-19, lalo na ngayong mayroon nang bagong variant nito sa bansa.

Sa rekomendasyon ng Estados Unidos, pagsusuot ng dobleng facemask ang nakikitang paraan upang magkaroon ng dagdag na takip sa mukha upang hindi makadaan ang ‘respiratory droplets’.

Gayunman, giit ni Health Undersecretary at spokesperson Maria Rosario Vergeire, dobleng proteksiyon na ang ginagawa ng mga Pilipino sa pagsusuot ng facemask at face shield.

Pero kung talagang nararapat ang pagsusuot ng dobleng facemask, kakailanganin ng ahesiya ng sapat na ebidensiya na mas mabisa ito.

Matatandaang sa Amerika, hindi inirerekomenda ang pagsusuot ng faceshield sa kanilang mamamayan at marami pa rin ang tumatangging magsuot ng facemask sa pampublikong lugar.

Kung dagdag-proteksiyon ang pag-uusapan, ayos lang naman magdoble ng ginagamit na facemask, pero ang siste ay dagdag-gastos at kalat na naman.

Kamakailan, naitalang tumaas ng 280 tonelada kada araw ang medical waste sa Metro Manila dahil sa COVID-19 pandemic.

At base sa report ng Asian Development Bank at United Nations, umaabot ng 3.5 kilo ang medical waste ng bawat tao sa isang health care facility dahil sa pandemya.

Gayundin, facemask umano ang madalas nilang nakikita dahil walang malinaw na tapunan ang publiko.

Kaya panawagan natin sa ahensiya, pag-aralang mabuti kung karapat-dapat ipatupad ang hakbang na ito. Baka kasi akala natin, karagdagang proteksiyon ito pero hindi pala.

Isa pa, panibagong gastos ito at tiyak na kawawa na naman ang ordinaryong mamamayan.

Tulad ng paulit-ulit nating pakiusap sa kinauukulan, tiyaking talagang makatutulong kontra COVID-19 ang mga ipatutupad o ginagawa nating hakbang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Kaalaman at impormasyon sa COVID-19 vaccine, ipaalam sa publiko!

ni Leonida Bonifacio Sison - @Boses | January 28, 2021

Habang papalapit ang pagdating ng COVID-19 vaccine sa bansa, marami pa rin tayong kababayan na may agam-agam pagdating sa pagbabakuna.

Siguro, takot ang ilan at ‘yung iba naman, hati pa ang opinyon.

Kaugnay nito, hinikayat ni Department of the Interior and Local Government (DILG) Undersecretary Epimaco Densing ang mga lokal na pamahalaan na bigyan ng sapat na kaalaman ang kanilang constituents hinggil sa bakuna vs. COVID-19.

Paliwanag ng opisyal, kailangang maipaalam at maipaliwanag nang mabuti sa publiko ang impormasyon at kaalaman tungkol sa bakuna.

Gayundin, wala umanong puwang para sa pagkakamali sa vaccination program ng pamamaraan na maaaring isagawa upang maiwasan ang pagkalat ng virus sa bansa.

Sa totoo lang, dapat naman talagang magkaroon ng kaalaman ang taumbayan sa bakuna dahil ngayong talamak “misinformation” hinggil sa COVID-19 vaccine, talagang maraming tao ang nagdadalawang-isip magpabakuna.

Hindi naman nakamamatay ang pagbibigay ng tamang impormasyon dahil ang masama ay ‘yung maniniwala sila sa mga sabi-sabi at ang masaklap, sila pa ang mapapahamak.

Gayunman, habang todo-effort ang mga lokal na pamahalaan na magkaroon ng maayos na vaccination program sa kani-kanilang lungsod, isabay na rin ang malawakang information drive tungkol sa bakuna. Sa ganitong paraan kasi, maiiwasan ang maling paniniwala.

At tayo namang taumbayan, ‘wag tayo bastang magpaniwala sa mga sabi-sabi. Bago maniwala, tiyaking tunay ang impormasyon.

Tandaan, hindi lang basta makapagturok ang ating layunin dahil kailangan din nating matiyak na nauunawaan ng taumbayan na para ito sa kanilang ikabubuti.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com