Mga pulis na sangkot sa droga, sibakin at parusahan

ni Leonida Sison @Boses | December 16, 2025

Palagi na lang nating naririnig na ang batas ay pantay para sa lahat, ngunit sa realidad ng buhay, madalas mahirap lang ang napaparusahan.

Kaya naman mahalagang hakbang ang agarang direktiba ng Philippine National Police laban sa sarili nilang hanay, hakbang na dapat maging simula ng tunay na pananagutan.

Agad na iniutos ni PNP Acting Chief PLtGen. Jose Melencio Nartatez Jr. ang pagsasailalim sa dismissal proceedings ng mga pulis na nagpositibo sa paggamit ng ilegal na droga matapos ang isinagawang targeted intelligence-driven drug test sa Leyte. 

Ang mga sangkot ay pawang may ranggong Police Corporal at mga miyembro ng Palompon Municipal Police Station.

Isinagawa ang targeted drug test matapos makatanggap ng ulat at magsagawa ng serye ng beripikasyon ang Team 8 ng Integrity Monitoring and Enforcement Group–Visayas Field Unit. 

Ayon sa impormasyon, naaktuhan umanong gumagamit ng shabu ang mga pulis noong Setyembre ng kasalukuyang taon. Nang lumabas ang resulta ng drug test at makumpirmang positibo, hindi na nagpatumpik-tumpik ang pamunuan ng PNP.

Kaagad na naglabas si Nartatez ng malinaw at matibay na direktiba na sampahan ng administratibong kaso ang mga sangkot alinsunod sa umiiral na patakaran ng PNP. Inamin ng acting chief ang matinding pagkabahala at hayagang pagkadismaya sa insidente, binigyang-diin na walang puwang sa organisasyon ang mga pulis na sangkot sa ilegal na droga.

Muling iginiit ng PNP na mariin nilang kinokondena ang ganitong gawain at sisiguraduhing mananagot ang sinumang pulis na sumisira sa integridad ng kanilang hanay. Hindi lamang administratibong parusa ang usapin dito, kundi ang kredibilidad ng buong institusyon.

Kapag ang mahihirap ang nagpositibo sa droga, kulong agad. Kaya kung pulis ang sangkot, ‘hindi sapat ang suspensyon o pagtanggal sa puwesto, dapat tanggalan ng lisensya, tuluyang sibakin sa serbisyo, at ikulong kung may ebidensya. Ang uniporme ay hindi dapat maging panangga laban sa hustisya.

Kapag ang batas ay ipinatupad nang walang kinikilingan, saka lamang muling mabubuo ang tiwala ng taumbayan. Ang pulis na gumagamit ng droga ay hindi tagapagtanggol ng batas, kundi banta sa lipunang dapat nitong pinagsisilbihan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mabigat na parusa vs. profiteering sa Noche Buena

ni Leonida Sison @Boses | December 15, 2025

Nakakalungkot isipin na pati sa holiday season ay walang tigil sa taas presyo ang mga bilihin. Lagi na lang sa tuwing papalapit ang Pasko. 

Kaya naman ngayong Noche Buena season, muling nagbabala ang Department of Agriculture (DA) laban sa labis na pagtaas ng presyo ng mga pangunahing sangkap sa handaan, babala na may kasamang mabigat na parusa.

Ayon sa isang pahayag, iginiit ng DA na ang pagtaas ng presyo ng Noche Buena food items nang lampas 10 porsiyento ay maaaring maituring na profiteering. 

Kabilang dito ang mga karaniwang sangkap tulad ng baboy, manok, at gulay, mga pagkaing hindi nawawala sa hapag-kainan ng pamilyang Pinoy tuwing Disyembre 24.

Ang profiteering, ayon sa DA, ay may kaakibat na multa mula ₱5,000 hanggang ₱2 milyon. Hindi dapat gawing pagkakataon ang Pasko para pagkakitaan ang pangangailangan ng masa. Totoong tumataas ang demand tuwing papalapit ang Noche Buena, ngunit hindi ito dapat maging dahilan para abusuhin ang konsyumer.

Sa gitna ng isyung ito, muling nabanggit ang kontrobersyal na pahayag ng Department of Trade and Industry na posible raw ang Noche Buena para sa pamilyang may apat na miyembro sa halagang ₱500, isang pahayag na umani ng batikos mula sa netizens at sektor ng manggagawa. Para sa maraming Pinoy, ito ay tila hiwalay sa realidad ng araw-araw na pamumuhay.

Bilang tugon, sinabi ng isang opisyal ng DA na mas mura ng ₱10 hanggang ₱15 ang presyo ng Noche Buena ingredients sa mga Kadiwa store sa buong bansa. Sa kasalukuyan, may humigit-kumulang 740 Kadiwa outlets na gumagana, karamihan ay pop-up stores, habang mahigit 100 naman ang permanenteng establisimyento. Nanatili rin sa ₱150 kada kilo ang maximum Suggested Retail Price ng sibuyas.

Mahalaga ang mga hakbang na ito, ngunit hindi sapat kung walang mahigpit na pagbabantay at tuluy-tuloy na suplay. Ang Noche Buena ay tradisyon, isang gabi ng sama-samang pagkain matapos ang isang taon ng pagsusumikap.

Ang tunay na diwa ng Pasko ay hindi nasusukat sa dami ng handa, kundi sa pagiging patas at makatao ng sistema. Kung mapoprotektahan ang mamimili at mapipigilan ang kasakiman, mas magiging makahulugan ang selebrasyon para sa bawat pamilyang Pilipino.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Publiko, ‘wag pabiktima sa holiday scams

ni Leonida Sison @Boses | December 14, 2025

Hindi natin maiiwasan na sa bawat nalalapit na espesyal na araw, hindi lang saya at handaan ang dapat bantayan, dahil kasabay nito ang pag-usbong ng mga mapagsamantalang umaasang makalusot habang abala sa paghahanda ang lahat. 

Sa panahon ngayon, ang pinakamapanganib na scam ay hindi na kailangang magpadala ng link. Isang tawag lang, puwede ka nang manawakan.

Habang papalapit ang holiday season, muling nagpaalala ang National Privacy Commission (NPC) sa publiko laban sa ‘vishing’ o ‘voice phishing’, isang uri ng panlilinlang na gumagamit ng tawag sa telepono upang makuha ang sensitibong impormasyon ng biktima. 

Ayon kay NPC Deputy Commissioner Jose Belarmino III, kapansin-pansin ang pagdami ng mga kasong naiuulat sa kanilang tanggapan, lalo na tuwing abala ang mga tao sa paghahanda ng selebrasyon.

Iisa lamang ang estilo ng mga manloloko–madalas ay nagpapanggap silang empleyado ng bangko, opisina, o otoridad, at magbibigay ng kuwentong may halong takot, may naaksidente raw na kapamilya, may na-hack na account, o may problemang kailangang ayusin agad. Sa gitna ng takot, napipilitang maglabas ng impormasyon ang biktima nang hindi na nakakapag-isip.

Dito malinaw ang pagpapaalala ng NPC na huwag magpadala sa emosyon.

Ang unang depensa laban sa vishing ay ang pagiging kalmado at mapanuri. Walang lehitimong institusyon ang hihingi ng one-time password, detalye ng bangko, o personal na impormasyon sa pamamagitan ng tawag. 

Kung may alinlangan, ihinto ang usapan at beripikahin ang sinasabi gamit ang opisyal na linya o tanggapan.

Hindi lang ang publiko ang dapat maghanda para rito. Pinayuhan din ng NPC ang mga personal information controllers, tulad ng mga kumpanya at establisimyento, na maging maingat sa pangongolekta ng personal contact details. Kung hindi kailangan, huwag kunin. Sa panahong laganap ang data breaches at scam, ang sobrang datos ay nagiging panlaban ng mga kriminal.

Ang babalang ito ay mahalaga–lalo na kung may bonus, magpapadala, o transaksyon man ‘yan, mas nagiging target ito ng mga kawatan.

Hindi kahinaan ang magduda, ito ay katalinuhan. Habang pinaghahandaan natin ang nalalapit na kapaskuhan, mas mahalaga ding maging maingat at magkaroon ng kamalayan sa mga taong mapagsamantala.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com