Mga bakunang epektib kontra Delta variant

ni Korina Sanchez - @Isyung 'K' | July 27, 2021

Ayon sa pag-aaral na inilathala sa New England Journal of Medicine ay nagpahayag na ang tig-dalawang dose ng bakunang Pfizer at AstraZeneca ay epektibo laban sa Delta variant ng COVID-19, ang variant na sinasabing nagdudulot ng labis na pag-aalala sa buong mundo dahil sa mas nakahahawa ito.

Samantala, ang bakuna ng Moderna ay epektibo rin laban sa Delta variant. Ang tatlong bakunang nabanggit ay sumasailalim ngayon sa mga pagsusuri upang matukoy kung kinakailangan ng pangatlo o booster shot para sa karagdagang proteksiyon. Sa ngayon sinasabi ng gobyerno na hindi pa kailangan.

Ikinalulungkot naman ng mga dalubhasa ang kakulangan ng datos mula sa bakunang Sinovac upang makapaglabas ng tapat na pahayag. Maraming bansa sa ASEAN ang gumagamit ngayon ng tinatawag na “mix and match” ng mga bakuna kung saan magkaibang tatak ang una at pangalawang dose. Para umano mas mapabilis ang pagbigay-proteksiyon. Karamihan sa mga bansa sa ASEAN ay nagpasimula ng pagbabakuna gamit ang Sinovac na ibinigay ng gobyerno ng China.

Ang mga bakuna ng Pfizer at Moderna ay ngayong pa lang dumarating sa bansa sa pamamagitan ng mga donasyon at pagbili ng mga pribadong kompanya. Maaaring sumunod na rin ang gobyerno sa ginagawang “mix and match” ngayong may ibang bakuna na. May mga positibo na para sa Delta variant sa bansa kaya higit na mahalaga ang mabakunahan sa lalong madaling panahon. Ginagawa ng gobyerno ang lahat upang mapigilan ang pagkalat lalo na sa babala ni Pangulong Rodrigo Duterte na maaaring ipatupad ang mahigpit na lockdown kung magsimulang kumalat ang mga kaso. Bumabagsak na nga ang stock market sa babalang ito.

Higit isang buwan na lang at maririnig muli natin ang walang kamatayang awit ni Jose Marie Chan. Magkakaroon ba tayo ng mas masayang Pasko ngayong taon? Hindi pa masabi. Ang Delta variant ay tila balakid sa plano ng lahat. Ang mga bansa na nagpasyang luwagan ang paghihigpit ay nakararanas ng pagtaas ng mga impeksiyon, karamihan sa mga ito ay dahil sa Delta variant at karamihan ay mga hindi bakunado.

Ginagawa ng mga pamahalaan ang lahat para kumbensihin ang mga tao na magpabakuna. Ngunit kahit nagkakaroon ng pagsipa ng bilang ng mga kaso may mga mas naniniwala pa rin sa napakamaling impormasyon na ikinakalat ng mga nagpapahayag ng maling opinyon.

Sana ay hindi nila bayaran ng kanilang buhay ang mga maling paniniwala at dapat panagutan din ang nagkakalat ng maling impormasyon.

Hindi lahat may karapatan o kakayahang humawak ng baril

ni Korina Sanchez - @Isyung 'K' | July 01, 2021

May bagong paliwanag na naman ang Palasyo sa pahayag ni Pangulong Rodrigo Duterte na bigyan ng armas o baril ang mga civilian group sa bansa para matulungan umano ang gobyerno sa pagsugpo sa krimen. Pero hindi pa raw ito opisyal na patakaran ayon kay Roque.

Noong una, sumang-ayon si PNP chief Gen. Guillermo Eleazar pero sinundan agad ito ng paliwanag na hindi sa Philippine National Police (PNP) manggagaling ang mga armas. Puwede raw silang bumili ng kanilang sarili at dumaan sa tamang proseso sa pagbili at pag-aari ng baril.

Siyempre, sumang-ayon si Sen. Ronald “Bato” Dela Rosa, ang PNP na nagpatupad ng madugong kampanya kontra ilegal na droga.

Hindi nakapagtatakang marami ang tumutol sa bagong pahayag ni P-Duterte. Tama si Sen. Panfilo “Ping” Lacson na kung walang tamang pagsasanay at pag-iisip, baka mag-backfire ito o magbigay ng karagdagang sakit ng ulo.

Marami pang mambabatas at grupo ang tumutol at binatikos ang mungkahi ng pangulo. Kung ang mga pulis na may tamang pagsasanay sa paghawak ng baril ay pumapatay o nagpapatayan, nagwawala kapag nakainom o kung ano pang dahilan, paano pa ang ordinaryong sibilyan?

Tama ang sinasabing “disaster waiting to happen” kapag ipinatupad ang kagustuhan ni P-Duterte. Kung sinu-sino na lang ang maglalakad-lakad sa mga lansangan na armado.

Hindi ba’t tutol ang PNP noon na payagan ang mga barangay captain na magdala ng armas matapos ang barilan sa Shaw Blvd.? Dapat maging mas mahigpit pa ang pulis sa pag-aari ng baril — hindi lahat ay may karapatan o kakayahang humawak ng baril.

Maraming insidente kung saan nalasing lang, nakipag-argumento, natalo sa bunong-braso ang mga dahilan kung bakit sila pumatay ng kapwa — may kapwa pulis pa nga. Lahat ‘yan ay hindi imposibleng madagdagan. Malamang ay ipagyabang, ipanakot at gamitin lang sa pansariling interes ang baril.

Pinaka-mabuting gawin ay pag-isipan muna ang panukala, walang may gusto na malagay sa peligro ang buhay ng kahit sino.

Body cams kotra pang-aabuso sa mga operasyon, isulong!

ni Korina Sanchez - @Isyung 'K' | June 21, 2021

Akala natin ay gagamitan na ng body cams ang mga operasyong kontra ilegal na droga, ayon sa utos ni PNP chief Gen. Guillermo Eleazar? Gumamit ba ng mga body cams ang sampung pulis na sangkot sa search warrant kay Antonio Castillo Dalit sa Laguna noong Miyerkules? Kung hindi, ano ang dahilan nito — sira o walang baterya? Hindi ba sila nabigyan?

Ngayon, “nanlaban” na naman ang dahilan kung bakit umano napatay si Dalit at ang 16-anyos na si Johndy Maglinte. Pero ayon sa mga kamag-anak ng mga biktima, una umanong pinatay si Dalit at dahil nasaksihan ni Maglinte ay dinale na rin ito kahit nakaposas at nakadapa sa putik.

Naka-restrictive custody na ang mga sangkot na pulis habang may imbestigasyon nang iniutos si Gen. Eleazar. Hayaan na lang umano munang tumakbo ang imbestigasyon bago husgahan.

Pero hindi maiiwasang ikumpara ito sa kaso ni Kian delos Santos na nagmakaawa sa awtoridad pero pinatay pa rin para lang bumango ang pangalan ng mga pulis sa kampanya ni Pangulong Rodrigo Duterte kontra ilegal na droga, na wala rin namang pagbabago, kaya ba walang body cams ay talagang may papatayin na?

Ito ang unang pagsubok ng Philippine National Police (PNP) sa ilalim ni Gen. Eleaza, baka naman magreretiro na si Gen. Eleazar wala pa rin mangyayari sa kanilang kaso at maghihintay na lang mg PNP chief na malambot ang puso sa kapwa pulis, masama man o mabuti.

Sana nagbigay agad ng pahayag si Gen. Eleazar kung bakit walang body cams. Mukhang hindi pa tanggap ng mga pulis na magsusuot na sila ng camera. Napakalayo sa ibang bansa kung saan hindi puwedeng walang body cams ang pulis dahil gagamitin ang video sa mga kaso. Kaya kahit mga pagkakamali ng pulis ay nakukunan. Maraming video sa YouTube ng mga kuha ng body cams ng pulis sa Amerika kung saan may tamang ginawa, meron ding mali.

Hinihintay pa natin ang unang video mula sa body cams ng PNP. Itong operasyon sa Laguna sana ang naaangkop sa paggamit ng body cams, pero wala. Dapat imbestigahan ang operasyon, pati na rin kung bakit walang ginamit na body cams kahit may utos na si Gen. Eleazar.