Huwag magpabulag sa salapi ngayong halalan

ni Fr. Robert Reyes - @Kapaayapaan / Patakbo-takbo | March 12, 2022

Premium gas: P67/liter; unleaded: P66/liter; diesel: P62/liter. Abangan ang pagtaas pa ng presyo ng gasolina’t krudo sa susunod na linggo.

Maghanda na po tayo sa pagtaas ng presyo ng petrolyo sa P100 kada litro.

Ano ang tugon ng pamahalaan? Fuel subsidy. Eh, paano na ang mga maliit at kulang ang suweldo o ang walang trabaho? Napakarami na ng mga ganitong mga kababayan natin noon pang nagsimula ang pandemya, Marso 2020. Hirap at baon na baon na sa utang ang marami sa nagdaang dalawang taon ng kahirapan at kawalan.

Kasabay pa ng krisis sa Ukraine ay ang nalalapit na halalan sa Mayo 2022. Tumitindi na ang kampanya ng mga kandidato at ng kani-kanilang mga partido. Ganundin ang mga partylist.

Ngunit sa isang banda, lalabas ang pera ng mga kandidato at partido para tustusan ang malawakang pambansang kampanya.

Sige lang, ikalat ang salapi para sa mga nagugutom at nangangailangan. Sana lang ay hindi tuluyang lumabo ang paningin at pananaw ng marami para piliin pa rin sa hulihan ang tama, malinis, mabuti at mahusay na mga kandidato na mag-aahon sa atin hindi lang sa kahirapan kundi mula sa putikan ng katiwalian at imoralidad.

Ngunit mapanganib ang paggamit ng salapi. Ito ang naging kalakaran ng mga nagdaang administrasyon.

Ang napakadali at walang kumplikasyong instrumento ng pagkontrol at pananamantala ay ang salapi. Nakita natin kung paano unti-unting pinatahimik ng salapi ang Simbahan noong panahon ni Pangulong Gloria Macapagal-Arroyo. Kung paanong naging madaling humingi at umasa sa pera ng ilang mga namumuno sa Simbahan. Nakalulungkot kung paano hindi ligtas ang mga taong-Simbahan sa salot na korupsiyon.

Kailangang magpakatatag upang hindi mahulog sa tukso ng salapi na sa tingin natin ay ang pangunahing tukso ng marumi at tiwaling pulitika sa ating bansa.

Pagdating sa mga kandidato, napakadaling makuha ang suporta ng mga naghihirap at nangangailangan ng pera. Mula itaas hanggang baba, mula sa pinaka-espirituwal hanggang sa pinaka-materyal at mala-salaping pagkatao, ganu'n na lang makaakit at makapagpahina ng loob at makapagpalabo ng pananaw ang salapi.

Ito marahil ang malalim na hamon ng pagtaas ng presyo ng lahat at ng pagkawala ng salapi at paghihirap ng marami.

Panahon nang maglakad, magtipid, magtanim, magpalitang-ani (barter), matulog nang maaga, magbawas ng konsumo ng anuman mula pagkain hanggang kuryente at gasolina. Panahon nang bumalik sa payak na pamumuhay.

Malaki ang magagawa ng pagpapasimple ng buhay. Lalaya tayo sa mga hindi nakakatulong na luho at gawaing nagpapahina ng isip, diwa, kaluluwa at katawan.

Sa araw-araw, sikaping bawasan ang gastos sa pamamagitan ng pagbabawas ng anumang konsumo. Tingnan natin ang ilang bagay na maaari nating bawasan:

Una, ang pag-uubos ng oras at lakas sa social media (Facebook, TikTok, YouTube atbp).

Pangalawa, ang pag-ubos ng pera sa walang saysay na gala at pasyal.

Pangatlo, ang pagsasayang ng pera sa sitsirya at softdrinks.

Pang-apat, ang pag-iwas sa paglulustay ng pera sa lahat ng bisyo (sigarilyo, alak at sugal).

At kung merong binabawasan na hindi nakakatulong at nakapagpapahina ng pananaw, pag-iisip at pagtuklas sa tama at totoo, meron namang maaaring dagdagan at palakasin, tulad ng:

Paglalakad, pagbibisikleta at pag-eehersisyo.

Pag-aaral at pagbabasa ng tama, totoo at mapanuring artikulo sa pahayagan at matinong social media.

Panonood ng debate para makilala at makilatis ang bawat kandidato.

Pagtulong na ikampanya ang matitino, malilinis at kuwalipikadong mga kandidato.

Pagsali sa iba’t ibang “Circles of Discernment” na inoorganisa ng Simbahan para tulungan ang mga botante na pumili nang maayos.

Paggamit ng social media para magpalaganap ng mga totoo at makatutulong na impormasyon para sa mabubuting kandidato at makatutulong ding impormasyon para makilala ang tunay na kulay at pagkatao ng mga hindi mabuting kandidato.

Pagsapi sa mga inoorganisang mga sektor na sumusuporta sa mabuting kandidato. At ipagpatuloy ang nabuong organisasyon para suportahan ang nilalayon ng kilusang binuo para sa kapakanan ng lahat.

Ito marahil ang hamon ng pahirap na buhay dahil sa pagtaas ng lahat ng bilihin.

Sa paghirap ng buhay dahil sa mataas na bilihin, kailangang maging simple at higit na lumaya ang buhay para sa higit na makabuluhan at malayang halalan.

Paulit-ulit na paglimot o panlilinlang

ni Fr. Robert Reyes - @Kapaayapaan / Patakbo-takbo | October 09, 2021

“Palagi kayong manalangin, at magpasalamat sa Diyos sa lahat ng pagkakataon; sapagkat ito ang kalooban ng Diyos para sa inyo sa inyong pakikipag-isa kay HesuKristo.”

Ito ang pakiusap ni Pablo sa mamayan ng Tesalonica (1Tesalonica 15:16-18). Ito rin ang turo ni Hesus sa Ebanghelyo ni San Lucas (Lucas 11:5-13) noong Huwebes, “Sinabi pa rin niya sa kanila, ‘Ipalagay nating isang hatinggabi, isa sa inyo’y nagpunta sa isa ninyong kaibigan at nakiusap,’ ‘Kaibigan, bigyan mo muna ako ng tatlong tinapay. Dumating kasi ang isa kong kaibigang naglalakbay at wala akong maihain sa kanya!’ At ganito ang sagot ng kaibigan mong nasa loob ng bahay, ‘Huwag mo na akong gambalain! Nakatrangka na ang pinto at nakahiga na kami ng aking mga anak. Hindi na ako makababangon para bigyan ka ng iyong kailangan.’ Sinasabi ko sa inyo, hindi man siya bumangon dahil sa kanilang pagiging magkaibigan, babangon siya upang ibigay ang hinihingi ng kaibigan dahil sa pagpupumilit nito. Kaya’t sinasabi ko sa inyo, humingi kayo at kayo’y bibigyan; humanap kayo at kayo’y makakatagpo; kumatok kayo at kayo’y pagbubuksan. Sapagkat ang bawat humihingi ay tatanggap; ang bawat humahanap ay makakatagpo at ang bawat kumakatok ay pagbubuksan. Kayong ama, bibigyan ba ninyo ng ahas ang inyong anak kung ito’y humihingi ng isda? Bibigyan ba ninyo siya ng alakdan kung siya’y humihingi ng itlog? Kung kayong masasama ay marunong magbigay ng mabubuting bagay sa inyong mga anak, gaano pa kaya ang inyong Ama na nasa langit! Ibibigay niya ang Espiritu Santo sa mga humihingi sa kanya!” (MBB05: Magandang Balita Biblia 2005)

Ang walang sawang paghingi, pakiusap sa Diyos na tulungan tayo sa lahat ng panahon sa anumang ginagawa natin upang palaging maayon ito sa Kanyang banal na kalooban. Ito ang tunay na diwa ng panalangin, ang walang sawang, walang tigil, walang katapusang pag-asa, pagtatanong, paghingi ng tulong, pagsangguni, pakikipag-ugnay sa Diyos. Sinikap nating gawin ito sa nakaraang 51 taon ng aking buhay mula 1970 hanggang 2021, mula ng panahon ng Martial Law ni dating Pangulong Ferdinand Marcos hanggang sa lahat ng mga dating sumunod na Pangulo na sina Cory, Fidel Ramos, Erap, Gloria Macapagal Arroyo, PNoy hanggang P-Digong.

Isinagawa natin ang walang sawa, walang tigil na pagsusuri at pagtutuligsa ng anumang mali o pang-aabuso na kinasangkutan ng nagdaang pitong administrasyon.

Hindi madali ito at hindi rin ligtas, dahil anumang ating matuklasan sa pag-aaral at pagsusuri ng mga nagdaang administrasyon, hindi maaaring manahimik at walang gawin. Palagi tayong namamahayag at kumikilos laban sa anumang abuso o katiwalian ng nagdaang administrasyon.

Nakalulungkot kapag nakakausap natin ang nagsasabing, “Ang galing-galing ng mga Marcos dahil itinuro ng kanilang ama ang “disiplina” sa mamamayan. Ang disiplina ang mahusay na paraan upang umunlad ang lahat sampu ng buong bansa. Sa ganitong pananalita, parang hindi nangyari ang Martial Law, at walang nawala, natortyur at napatay noong panahon ng Martial Law. Nakalulungkot ding marinig na okay si Lacson dahil hindi ito gumamit ng pork barrel, tila nakalimutan o hindi narinig o napag-aralan ang kaso ng pagkamatay nina Corbito at Dacer noong panahon ni Erap at ng pagpatay sa mga miyembro ng Kuratong Baleleng.

Nakalulungkot din na marinig na mabait at may magandang kalooban si Pacquiao, pagkatapos nitong paulit-ulit ipagtanggol ang parusan bitay sa dahilang “binitay si HesuKristo sa krus.” Nakalulungkot ding marinig na okay si Isko pagkatapos nitong sabihing, “Hayaan ang due process ng mga korte na umiral sa kaso ni Sen. Leila de Lima, samantalang, hindi sinunod ng pamahalaan ang due process sa pagkulong at paglilitis ng Senadora.

Nakalulungkot ding marinig na kailangang iboto si Sara para merong “continuity” ang kabutihang sinimulan ng ama nito, samantalang ay hindi nakikita ang continuity din sa panggigipit sa anumang oposisyon, sa maraming namatay sa tokhang, sa patuloy na paghahandog ng palaki nang palaking bahagi ng ating bansa sa mananakop na China, atbp.

Nakalimot kaya tayo o sadyang pinalalabo ang katotohanan upang ang kabaliktaran nito ang umiral sa mga isipan, puso at kaluluwa ng mga tao. Sa totoo lang, hindi pagkalimot o pagiging makalilimutin ng taumbayan ang problema kundi ang sinasadyang pagpapalaganap ng mga kasinungalingan o kabaliktaran ng tunay na nangyari para magmukhang mabuti ang masasama at magmukhang masasama ang mabubuti.

Nagdeklara na sa wakas noong Huwebes si VP Leni Robredo. Nakatutuwang marinig, “Iboboto ko si Leni dahil sa malinis na hangarin nito at dahil sa wagas at walang sawang paglilingkod nito sa lahat, lalo na sa mahihirap. Pag-aralan, suriin, kilatisin, pag-usapan ang buhay ni VP Leni at walang makikitang malaki at nakababahalang depekto, kahinaan o kasiraan.

Gayunman, simulan na natin ang matiyagang panalangin at sabayan ito ng malalim na pag-aaral, pagsusuri, pagtatakayan ng buhay, pagkatao at mga nagawa ng iba’t ibang kandidato. Ito ang buhay na madasalin, ang buhay na palaging kaugnay ang Diyos at ang mundong kinikilusan Niya at ng Kanyang kaaway.

May kabuluhan ba ang pangalan ng mga bagyo?

ni Fr. Robert Reyes - @Kapaayapaan / Patakbo-takbo | September 11, 2021

Nagising na ako nang alas-3: 00 ng umaga noong Miyerkules, ika-8 ng Setyembre. Malakas ang buhos ng ulan na tila tumpok ng bato na bumabagsak sa mga yero, imposible na tayong makatulog nang mahimbing. Ganu’n kalakas ang bagsak ng tubig mula sa Bagyong Jolina.

Bakit kaya Jolina? Marahil, wala nang maisip na pangalan ang PAGASA kaya’t lumitaw na lang ang pangalang ito. Nauna sa Bagyong Jolina si “Isang” at natural lang na kasunod ng “I” ay “J” kaya’t okay na rin ang Jolina.

At dahil ang kasunod ng “J” ay “K”, biglang sumulpot ang pangalan ng kasunod na Bagyong Kiko. Meron kayang mahalaga o malalim na dahilan ang pagpili ng PAGASA sa Kiko? Malamang wala.

Kung walang malalim na dahilan sa pagpili ng Bagyong Kiko, malaya naman tayong magbigay ng pansariling kahulugan at kahalagahan para sa pangalang “Kiko”, ng kasunod na bagyo. Kasisimula lang ng mahigit isang buwang pagdiriwang na tinawag ni Papa Francisco ng “Season of Creation” na nagsimula ng ika-1 ng Setyembre hanggang ika-4 ng Oktubre, ang Pista ni San Francisco ng Assisi.

Napakahalagang tutukan ang kalikasan sa buong buwan ng Setyembre hanggang sa Pista ni San Francisco. Napakahalaga ng kalikasan sa kasalukuyang panahon. Kung ipinagdarasal natin araw-araw ang Oratio Imperata, kailangang hanapan natin ng panahon ang sumusunod na dasal ng panahon ng paglikha. Basahin natin ang ilang bahagi ng panalanging ito: Maylikha ng lahat, nagpapasalamat kami na mula sa pagkakaisa ng Inyong pag-ibig ay nilikha N’yo ang aming planeta upang maging tahanan ng tanan.

Sa pamamagitan ng Inyong banal na karunungan, Inyong nilika ang daigdig upang magpasibol ng samu’t saring buhay sa sangkalupaan, sangkatubigan at sangkalawakan. Pinupuri Ka ng bawat bahagi ng sangnilikha at kanilang kinakalinga ang isa’t isa ayon sa kani-kanilang kinatatayuan sa hibla ng buhay. Kaisa ng Salmista, umaawit kami sa Iyo ng papuri na sa Iyong bahay “maging ang maya ay nakasusumpong ng tahanan at ang langay-langayan ng pugad para sa kanya na mapaglalapagan niya ng kanyang inakay.”

Batid namin na tinawag Mo ang sangkatauhan na pangalagaan ang Iyong halamanan nang may paggalang sa dangal ng bawat nilalang at pinananatiling ganap ang buhay sa daigdig para sa tanan. Subalit, batid din naming ang paghahangad ng kapangyarihan ay nagdadala sa aming planetang tahanan sa sukdulang kasiraan.

Ang aming pagkokonsumo ay hindi na ayon sa kakayahan ng daigdig na hilumin ang kanyang sarili. Natitigang at nawawala na ang mga tirahan ng samu’t saring buhay. Marami na ring samu’t saring buhay ang naglaho, gayundin ay ang mga nasirang sistemang ekolohikal. Ang mga bahura ng korales, mga lungga ng mga hayop, kabundukan at karagatan na dating puspos ng buhay at ugnayan, ngayon ay tuyot at tiwang-wang.

Marami ring pamilya ang nawalan ng tirahan duloy ng kawalan ng seguridad at alitan, nagsisilikas sa paghahangad na masumpungan ang kapayapaan. Ang mga hayop ay nagsisipanakbuhan papalayo sa kanilang likas na tirahan sanhi ng mga nagliliyab na apoy, pagkakalbo ng mga gubat at taggutom, at gumagala sa paghahanap ng bagong tahanan para sa kanilang supling at para mabuhay.

Ngayong panahon ng paglikha, idinadalangin naming nawa’y ang hininga ng lyong malikhaing salita ay dumaloy sa aming mga puso tulad ng tubig sa aming pagsilang at binyag. Pagkalooban Mo kami ng pananampalataya upang masundan ang halimbawa ni HesuKristo sa makatarungang pakikipag-ugnayan sa komunidad ng buhay.”

Magtatapos ang Panahon ng Paglikaha sa Pista ni San Francisco ng Assisi. “Kiko” ang palayaw ng Santo — “Papa Kiko” ang tinawag ng mga Pinoy sa kanya. Isinulat ni “Papa Kiko” ang Laudato Si kung saan tinawag niya ang mundo na tahanan ng lahat. Mababasa ito sa panalangin. At mababasa rin ang dahilan ng pagkasira ng mundo mula sa paghina at pagkawala ng pangalan sa dangal ng tao at kalikasan hanggang sa walang habas na pagkonsumo. Kung kailangan nating baguhin ang pagtingin sa kalusugan ng katawan dahil sa pandemya, kailangan din nating baguhin ang pagtingin sa kalusugan ng daigdig.