U.S., palaging nanghihimasok sa Presidential Election sa ‘Pinas

ni Ka Ambo - @Bistado | February 24, 2022

PINASOK na ng Russia ang Ukraine.

Matagal nang napasok ‘yan!

◘◘◘

MAY dalawang malaking rehiyon sa loob ng Ukraine ay nagdeklara ng awtonomiya na matagal nang sinusuportahan ng Russia.

Tulad ng Crimea na dating bahagi ng Ukraine, isasapormal lang ng Russia ang pagkontrol sa dalawang rehiyon.

‘Yun lang ang totoong isyu riyan!

◘◘◘

KAPAG tinangka ng Ukraine government na bombahin ang dalawang rehiyong ito, riyan na papasok ang ground Russian Troops na siyang hinihintay ng US at Europe.

Ibig sabihin, ang panghihimasok ng US at European Union ang magpapalala ng sitwasyon!

◘◘◘

HALOS kalahati ng populasyon ng Ukraine ay maka-Russia at kalahati ay maka-US-Europe.

Ang “divided citizens” dito — ay siyang ginagamit ng US at Europe para makapanghimasok!

◘◘◘

ANG nangyayari sa Ukraine ay puwede ring maranasan ng Pilipinas.

‘Yan ay kapag nahati ang populasyon ng Pilipinas — kalahati ay maka-US-EU at kalahati ay maka-China.

Walang maka-Pilipinas!

◘◘◘

MAHALAGA ang foreign policy o plataporma pang-dayuhan sa nagaganap na presidential election.

Ang media sa Pilipinas na siyang nagsasagawa ng “mga panayam” ay may mahihinang kukote.

Hindi pinagtutuunan ng mga “moderator” ang maselang foreign policy ng mga kandidato!

◘◘◘

DAPAT linawin sa panayam kung ano ang foreign policy ng presidentiable.

Halimbawa, sino sa mga kandidato ay may malinaw na pagkiling, paghapay at kaalyado ng US?

Maselan ‘yan?

◘◘◘

BATAY sa kasaysayan, palaging nanghihimasok ang US sa presidential election sa Pilipinas.

Sa aktwal, palaging may “manok” ang US sa presidential election!

◘◘◘

MAHIHINA ang kukote ng mga moderator sapagkat wala sa mga ito — ay nakapokus upang matukoy kung sino ang kaalyado ng US.

Mahalaga ang “American factor” sa presidential election.

Ito ay maaaring makatulong sa “kapayapaan”, pero maaari ring magbunsod ng kaguluhan, tulad sa Ukraine!

◘◘◘

SOBRANG taas ng presyo ng petrolyo.

Isang dahilan dito ay ang giyera ng Russia at Ukraine!

◘◘◘

KAHIT naglaho na ang COVID-19, maaaring mas grabe ang maging krisis dahil sa digmaan.

Pero, walang presidentiable na tumatalakay sa maselang isyung ito.

Engot naman ang media sa pagbungal ng isyung ito, kung saan nakataya ang hinaharap ng ating bansa!

Parusa talaga ang taas-presyo ng petrolyo

ni Ka Ambo - @Bistado | February 23, 2022

BUMABA nang todo ang bilang ng nagkaka-COVID-19

Mainam naman!

◘◘◘

NILALANGAW ang massive vaccination.

As expected!

◘◘◘

MAE-EXPIRE lang ang mga COVID-19 vaccine this year.

Pustahan tayo!

◘◘◘

MASYADONG mabagal ang imbestigasyon sa mga nawawalang sabungero.

Alam n'yo na this?

◘◘◘

MARAMING parak ang adik sa online sabong.

Waley aksiyon ang PNP.

Bakit?

◘◘◘

BAKIT hindi pa naghahanda sa 100 percent face-to-face classes?

Mabagal talaga ang mga kolokoy!

◘◘◘

NAIINIP na ang mga tatay at nanay na nagtuturo sa mga anak.

Pagod na sila sa kakokopya sa module ng kapitbahay!

◘◘◘

WALA bang additional incentives ang mga titser na ipinagagamit ang pasilidad ng sariling bahay bilang klasrum?

Unfair sa mga titser na walang ayuda ang iskul!

◘◘◘

MATUMAL pa rin ang public transport dahil sa work-from-home.

Parusa rin ang sobrang taas ng presyo ng petrolyo!

◘◘◘

BUMALIK ang matinding trapik.

Pero, bakit wala pa ring kita ang mga tsuper?

◘◘◘

MAHINA rin ang delihensiya ng mga mangongotong.

Krisis din ang mga korap sa kalye!

Dapat paghandaan ng lahat ang ‘worst scenario’ ng pandemic

ni Ka Ambo - @Bistado | February 22, 2022

NAALALA ko noong nasa elementarya pa ako bandang 1964-65 kung paano nangangampanya ang mga tao.

Nagtatrabaho ang aking ama na si Kapitan Sucing sa Manlo, Inc. (Manuel Lopa, in-laws ng Pamilya Aquino).

◘◘◘

MEKANIKO ng printing machine ang aking ama sa Manlo — isang pabrika na gumagawa ng “tansan”at nag-i-imprenta ng tin sheet o maninipis na lata.

Opo, lata — hindi plastic o tarpaulin ang gamit noong sa kampanya.

Nag-uuwi ang aking ama ng lata na may sukat na 2 inches by three inches na may nakaimprentang mukha nina Ferdinand Marcos at Fernando Lopez.

◘◘◘

Si Lopez ay may hawak na uhay ng mga malagong palay na hitik sa butil sa printed tin sheet kasama si Marcos.

Nagwagi ang Marcos-Lopez tandem noong 1965 — at ito ay simula ng napakahaba at nakapakontrobersiyal na kasaysayan ng Pilipinas.

◘◘◘

NABUHAY ang “kampanyang Marcos-Lopez” noong Linggo sa Maynila matapos ang mahabang motorcade dahil ang kandidato ng UniTeamsa pagka-alkalde sa Maynila ay si Atty. Alex Lopez.

May tarpaulin na may malalaking letrang: Marcos-Lopez kaya’t naalala ko ang tandem na ito.

Tulad ni Marcos saradong Nacionalista Party (NP) ang mga Lopez na pinaigting ng panunungkulan ng yumaong si Mayor Mel Lopez sa Maynila.

◘◘◘

UMANGAT na sa senatorial survey si ex-PNP Chief Guillermo Eleazar.

Tanging si Eleazar ang kandidatong senador na nagmula sa Calabarzon dahil siya ay tubong Tagkawayan, Quezon at nagging RD ng rehiyon.

Dinumog ang motorcade ni Eleazar sa Calabarzon kung saan personal niyang kinausap ang mga LGU executives.

◘◘◘

MASASABI nating pinakamalakas na pambato ng Partido Reporma bilang senador si Eleazar dahil sa kanyang performance at popularidad.

Ginawaran si Eleazar bilang outstanding alumnus sa katatapos na PMA Homecoming sa Baguio City na magpapaangat sa kanyang tsansa.

◘◘◘

NAKABABAHALA ang magkakasalungat na pagtaya sa lagay ng ekonomiya.

Mahirap matantiya ang mararanasan krisis kasi’y tila ngayon lang naranasan ng daigdig ang ganitong klase ng “delubyo” — higit dalawang taong pandemic.

Hindi nakatitiyak ang mga eksperto na tama ang kanilang pagtingin o analysis.

Dapat maghanda tayo sa “worst scenario”.

◘◘◘

ANG positive scenario ay puwedeng hindi paghandaan, pero ang grabeng sitwasyon kapag hindi pinaghandaan ay magiging delubyo ang epekto.

Bigo ang gobyerno na maglatag ng konkretong contingency.

Pero, hindi dapat asahan o sumandal ang mga tao sa satsat at kuwento ng mga nasa pamahalaan.

Kumbaga, kani-kanya tayong solusyon sa personal nating problema, wala nang iba pa.