Todo ang taas-presyo sa petrolyo, wala nang makakaawat, nakupo!

ni Ka Ambo - @Bistado | March 17, 2022

MAY kapansin-pansin na nagaganap sa nagdaang ilang araw.

Magkakasunod na nakatanggap si VP Leni ng endorsements.

◘◘◘

SORPRESANG inendorso ng apat na gobernador si VP Leni.

Kabilang dito sina Ben Evardone ng Eastern Samar; Edwin Ongchuan ng Northern Samar; Eugenio 'Bong' Lacson ng Negros Occidental; at Daniel Fernando ng Bulacan.

◘◘◘

NAUNA rito, inendorso rin si VP Leni ni dating Cagayan Gov. Alvaro Antonio.

Sinasabing inendorso rin siya ng 80 young politicians mula sa 31 probinsiya kasama ang Ilocos Sur, Cagayan, Isabela, Batangas, Leyte, at Pampanga.

◘◘◘

MAY nalalabi pang higit 50 araw bago ang Mayo 9.

Kumbaga, sa basketbol, bilog ang bola.

Kahit sa e-sabong, hindi lahat ng llamado ay nagwawagi sa ibabaw ng gradas.

◘◘◘

MAY nagdeklara ng Revolutionary Government sa EDSA Monument.

Hindi po totoo na samahan ito ng mga “magbabalot”.

Ayon kay presidential spokesman Martin Andanar, naghahayag lamang ng emosyon at opinyon ang mga nandun na kasama ang ilang dating heneral.

◘◘◘

MATAPOS ang COVID, may ilang grupo na nais matulad ang Pilipinas sa Ukraine.

Mas gusto nilang magkaroon ng civil war, kaysa kapayapaan.

◘◘◘

TODO-TODO na ang presyo ng petrolyo.

Wala nang makaaawat dito.

◘◘◘

NAGWAGI sa unang amateur bout ang anak ni Sen. Manny Pacquiao na si Jimuel.

Idinaos ang laban sa America.

Hindi po kandidato si Jimuel.

◘◘◘

HINDI nag-i-improve ang iskor ni Sen. Ping Lacson sa serye ng mga nagdaang survey.

Hindi pa rin siya aatras.

◘◘◘

NGAYON lang ginaganahan mangampanya si Pacquiao sa mga lalawigan.

Marami kasi ang nakikinig at nanonood.

◘◘◘

WALA pa ring linaw kung kailan matatapos ang giyera ng Ukraine at Russia.

Iyan ay isang palaisipang mahirap sagutin.

◘◘◘

SA ngayon, walang masama na paghandaan ang isang lagim.

Hindi tayo makakaasa sa pamahalaan dahil batbat 'yan ng katiwalian.

May subsidy sa petrolyo, sana sa tubig at kuryente meron din

ni Ka Ambo - @Bistado | March 15, 2022

Dagdag-parusa ang ulat na pagtaas ng taripa ng Philippine Ports Authority (PPA).

Hampas ito sa langaw, latay sa kalabaw.

Isa itong anti-poor.

◘◘◘

BINATIKOS ito mismo ni Dean Dela Paz, professor ng Business, Finance at Mathematics, hindi napapanahon ang pagtaas ng taripa dahil sa oil crisis.

Tinawag namang “economic sabotage” ng Philippine Chamber of Commerce and Industry (PCCI) ang naturang hakbang.

◘◘◘

KAHIT ang NEDA ay naghain ng resolusyon laban sa pagtaas ng taripa dahil magbubunga ito lalo ng pagtaas ng presyo ng mga bilihin.

Tanong ng mga taga-arrastre: “Ang gobyerno ba ay tumutulong sa mahihirap o siya mismong nagpapahirap?’

◘◘◘

SABI ng isang bisor sa NEDA na tumangging magpabanggit ng pangalan, “Bumabaho ang imahe ng opisina namin at ng gobyerno dahil sa mga aksyon ng PPA… manhid sa mamamayan.”

Pero ikinatwiran ni PPA chief Atty. Jay Santiago, “Noong 2013 pa nang huling nag-adjust ng tariff rates ang PPA.”

◘◘◘

Sinopla ito ni Dela Paz sa kanyang analysis: “Paper napkin math on the foregoing reveals (that)… CPI (Consumer Price Index) could not have been the impetus given the lowest reported increase was 240%."

◘◘◘

Ang CPI ay talaan ng mga piling produkto at ng kanilang presyo sa merkado na ginagamit ng gobyerno at mga negosyo bilang pamantayan ng pagbaba o pagtaas ng mga bilihin.

Sana’y pigilin ni Digong ang PPA sa kabulastugang ito.

◘◘◘

WALANG masulingan ang ordinaryong tao.

Hindi kakasya ang suweldo sa mataas na presyo at mataas na singil sa utilities.

◘◘◘

KUNG may subsidy sa petrolyo, hindi ba puwedeng mayroon din subsidy sa konsumo ng elektrisidad at tubig?

Hindi rin ba puwedeng magbaba ng tuition ang mga private schools?

◘◘◘

WALANG kongkretong programa ang gobyerno para saklolohan ang mga nagdarahop.

Dapat ay magkaroon ng feeding center sa lahat ng mga nagugutom.

◘◘◘

NAUUNAWAAN na ngayon ng ilang kritiko ang posisyon ni Vladimir Putin.

Walang sundalong Ruso sa labas ng Russia pero ang US troops nakapasok sa iba’t ibang bansa.

Aling bansa ang mananakop — Russia o US?

◘◘◘

MAY krisis sa loob ng Russia.

Pero mayroon ding krisis sa buong daigdig.

Presidentiable na aatras, abangan!

ni Ka Ambo - @Bistado | March 10, 2022

DAPAT ay ibawal ang motorcade.

Kapos ng suplay eh.

◘◘◘

HINDI na COVID ang kuwentuhan ngayon.

Giyera naman.

◘◘◘

MAS grabe ang negatibong epekto ng digmaan kaysa sa pandemic.

Virus ay hindi nakikita ng mata ng tao pero ang tao mismo ang sanhi ng giyera.

◘◘◘

BEHAVIOR ng virus ang sinusuri noon sa pandemic.

Behavior lang ni Putin ang sinusuri ngayon.

◘◘◘

INUTIL ang WHO na mapigil ang COVID.

Inutil din ang UN para pigilin ang digmaan.

◘◘◘

NABIBISTO ang kahinaan ng US.

Masusukat naman ang tikas ng Russia.

◘◘◘

KALIWA’T kanan pa rin ang bentahan ng illegal drugs.

Inaantay ng mga adik ang pamamaalam ni P-Digong.

◘◘◘

WALANG kongkretong plano ang mga presidentiables kontra-droga.

Bakit kaya?

◘◘◘

KAHIT ang isyu sa e-sabong ay iniiwasan.

Hulaan n’yo, bakit din?

◘◘◘

WALA ring specific programs ang mga kandidato para sa economic recovery.

Nambobola lang ang mga ‘yan.

◘◘◘

SINO daw ang dark horse sa mga presidentiables?

Siya ‘yung umaasa sa wala.

◘◘◘

AYON kay Maritess, may presidentiable na aatras bago mag-Mayo.

Kung sino ang pumiyok, siya na mismo ‘yun.

◘◘◘

HINDI mapigil ang pagsasara ng ilang negosyo.

Imbes na guminhawa, gumagrabe pa ang buhay sa buong mundo.